Qaar ka mid ah
Xildhibaanada Baarlamaanka oo ku hanjabay in ay ..
Iyadoo maalintii shalay
ahayd Xildhibaanada Baarlamaanka la siiyay fasax todobaad ah ayaa wararka ka
imaanaya Magaalada Baydhabo waxay sheegayaan in qaar ka mid ah Xildhibaanada
Baarlamaanka ay si aad ah uga caroodeen fasaxa mar kale la siiyo
xildhibaanada, waxayna sheegeen in arrintaani ay ahay mid la doonayo in lagu
wiiqo habsami u socodka kulanka Baarlamaanka.
“Waxaa la doonayaa in la
fuliyo dano gaar ahaaneed si looga careysiiyo Xildhibaanada oo ay isaga
tagaan kulamada Baarlamaanka” ayay yiraahdeen qaar ka mid ah Xildhibaanada
Baarlamaanka oo sheegay inay isaga tagi doonaan kulamada Baarlamaanka haddii
aan wax laga bedelin arrimaha noocaan oo kale ah.
Caasha Axmed Cabdala oo
iyadu horey uga dhiidhisay fasixii hore ayaa midkaan waxa ay sheegtay in uu
yahay mid la doonayo in laga careysiiyo Xildhibaanada si ay uga huleelaan
Magaalada Baydhabo oo inta yarta ah ee soo harta laga fushado wixii la
doono, balse waxay sheegtay in taasi ay tahay mid aan suuragal ahayn. “waa
wax layaab leh in Guddoomiyaha Baarlamaanka uu yiraahdo waxaa idin siiyay
fasax, iyadoo la og yahay in Baarlamaanka hor yaalaan ajandayaal’ ayay tiri
Caasha Axmed Cabdala oo sheegtay in Guddoomiyaha Baaarlamaanka uu joojiyo
waxyaabaha dhegta loogu soo sheegayo, waan mid uusan ku shaqeyn karin Golaha
Baarlamaanka”, Sidoo kale Xildhibaano ka mid ah Baarlamaanka ayaa iyagu si
dabacsaan ah ku soo dhaweeyay fasaxaas iyagoo sheegay in mudo shan maalmood
ah aysan waxba ka dhimi karin kulamada Baarlamaanka, balse waxay codsadeen
in aan dib dambe loogu celin fasax noocaan oo kale ah oo ay sheegeen in uu
yahay mid kala dhantaalaya Kulamada Baarlamaanka.
Shiikh caan ah oo lagu
dilay Magaalada Garoowe ee maamul Goleedka Puntland ..
Wararka naga soo gaaraya Magaalada
Garoowe ee Gobalka Nuugaal waxay sheegayaan in shalay subax Magaaladaasi
lagu dilay shiikh caan ka ahaa Magaaladaasi ama deegaanada Puntland lagu
magacaabi jiray Shiikh Max’ed C/raxmaan Ilaaq oo ka mid ahaa Culuma’udiinka
sida weyn looga yaqaanay deeganadaasi.
Dilka Shiikha waxaa gaystay nin adeer u
ahaa oo lagu magacaabo Ciise Ilaaq, ilaa iyo hadda lama oga sababaha loo
dilay shiikhaasi balse warar ayaa waxay sheegayaan in dilka Shiikha la
xiriirinayo muran dhuleed oo dhinaca dhaxaltooyada ah.
Gacan ku dhiiglihii dilay Shiikha oo ay
gacanta ku soo dhigeen Ciidanka Booliiska ee Maamul Gobaleedka Puntland ayaa
haatan ku xiran xabsiga Magaalada Garoowe waxaana la filayaa in si dhaqsi
leh loo soo taago Maxkamad.
Xildhibaanada
Baarlamaanka oo mar kale galaya fasax ilaa mudo tobaad ah..
Maalintii shalay ahayd ayaa
kulan waxaa isugu yimid Golaha Baarlamaanka, waxaana shir gudoominayay
Guddoomi-aha Baarlamaanka Shariif Xasan Shiikh Aadan, waxaana la filayay in
shalay looga doodo arrimo la xiriira dhameystirka Guddiyadii Baarlamaanka,
iyadoo intii aan la gelin dooda ajandayaasha uu Guddoomiyaha Baarlamaanka ku
dhawaaqay in xubnaha Baarlamaanka ay fasaxan yihiin mudo todobaad ah laga
bilaabo maanta ilaa iyo maalinta Sabtida ah ee soo socota, waxaana la
sheegay in arrimaha loo fasaxay ay tahay iyadoo weli hoolka shirarka ee
Baarlamaanka ay dayactir ku socota, sidoo kale waxaa xubnaha Baarlamaanka
loo sheegay in ay ka soo baaraan-degaan ajandayaasah hor yaal Baarlamaanka.
Qaar ka mid ah Xildhibaanada
Baarlamaanka ayaa waxaa la sheegay in ay si aad ah uga caroodeen in
Guddoomiyaha Baarlamaanka mar kale uu kala diro Xildhibaanada iyadoo ay hor
yaalaan howlo culus oo u aadan xaaladda dalka uu marayo haatan.
Ururka Garyaqaanada
Somaaliyeed oo walaac ka muujiyay xaalufinta lagu hayo dhirta Soomaaliyeed.
Ururka Khareenada
Soomaaliyeed ayaa walaac ka muujiyay Xaalufka naxariista darada ah ee ka
socda Wadanka, taasoo ay sheegeen in ay keeneyso dhibaato weyn oo si xun u
taabaneysa shacbiga Soomaaliyeed guud haan, gaar ahaanna Nimcooleyda iyo
xoolaha duur joogta ah haddii aan laga hortagin.
“Dhirta oo la baabi’iyo
waxay keeneysaa Dhibaato aan la qaadi karin, sida roobka oo yaraada, dhulka
oo noqda mid lama dagaan ah, nolosha dadka iyo duunyada oo culeys soo
wajaho” ayuu yiri Prof. Maxamuud Cali Daahir (Guure) oo ah Guddoomiyaha
Garyaqaanada Soomaaliyeed (SLS) wuxuuna intaa ku daray “maadaama aysan jirin
dowlad shaqeysa, waxaa waajib ka saaran yahay joojinta Xaalufkaa lagula
kacayo dhirta wadanka shacbiga Soomaaliyeed oo ay wax ka qabtaan kuwa ku
dhaqaaqaya falkaa naxariista darada ah ee aan damiir iyo wadanimo lahayn”,
waxa kalloo uu sheegay in Dowladaha dhiirigelinaya Xaalufka lagu hayo
wadanka in ay maxkamad la tiigsan doonaan, wuxuuna ugu baaqay Dowladahaasi
in si deg deg ah u joojiyaan Dhuxusha sida sharci darada ah looga keenayo
dhulka Soomaaliyeed.
Ugu dambeyntii wuxuu uga
digay kuwa guraya iyo kuwa fududeenayaba in ay gacanta kula jiraan fal
dambiyeed oo ku xusan sharciga Soomaaliyeed.
Maleeshiyo daacad u ah Yuusuf Daba-Geed
oo weerar ku qabsaday Degmada Buula Barde ee Gobalka Hiiraan...
Maleeshiyo daacad u ah Guddoomiyaha
Gobalka Hiiraan Yuusuf Axmed Hagar (Yuusuf Daba-Geed) ayaa waxay weerar ku
qaadeen oo ay qabsadeen Magaalada Buula Barde ee Gobalka Hiiraan.
Maleeshiyadaas ayaa la sheegay in ay
halkaasi ka saareen kuwii horey u joogay oo caacadda u ahaa Guddoomiyaha
degmada Buula Barde Cabdi Iidow Sabriye, waxaana la sheegay in Cabdi Iidow
uu ku sugan yahay Magaalada Buula Barde oo uusan ka bixin gurigiisii.
Qaar ka mid ah Xildhibaanada
ee ka soo jeeda Gobalka Hiiraan ayaa cambaareeyay falkaasi, waxayna sheegeen
in uu ka dambeeyay Guddoomiyaha Gobalka Sh/dhexe Max’ed Cumar Xabeeb (Max’ed
Dheere) kaddib markii uu gacan siiyay maleeshiyada Daba-Geed, sidoo kale
waxay ku eedeeyeen arrintaani Ra’isul Wasaaraha Dowladda Federaalka Cali
Max’ed Geedi.
“Haddii aan deg deg looga
saarin Ciidamada halkaasi, waxay keeni doontaa cawaaqib xumo” ayay
yiraahdeen Xildhibaanada oo sheegay in aysanba aqoonsaneyn Guddoomiyanimada
Yuusuf Daba-Geed oo ay sheegeen in uu yahay Guddoomiye aan la isku
raacsaneyn oo aan ku imaanin rabitaanka shacabka Gobalka Hiiraan.
Sidii loo magacaabay Yuusuf
Daba-Geed waxaa ka jiray gobalka Hiiraan qalalaase dhinaca siyaasadda ah,
waxaana gobalka ka dhacay dhowr jeer iska hor imaadyo u dhexeeyay
Maleeshiyooyin kala taageersan qabablayaasha halkaasi ku sugan
Hay’adda FATXA oo
Barnaamij wacyigelin ah ka sameysay Xaafadaha iyo Dugsiyada Gobalka
Banaadir...
Hay’adda FATXA (Women Relief
Development Organization) ayaa barnaamij wacyigelin ah ka fuleysay xaafadaha
iyo Dugsiyada Gobalka Banaadir kaasoo la xiriira Cudurka Aids-ka kaddib
markii Hay’addu sheegtay in uu si weyn ugu soo kordhaayo dalka.
Guddoomiyaha Hay’adda
Faadumo Xasan Diirshe ayaa waxay sheegtay in barnaamijkaasi uu socday mudo
todobaad ah, ayna dadka ku baraarujinayeen sidii looga hortagi lahaa
cudurkaas maadaama ay Soomaaliya deris la tahay wadamo uu aafeeyay
cudurkaasi.
“Dadkii aan la kulanay waxay
noo sheegeen in cudurkaani uu yahay mid jira oo u baahan in si wadajir ah
looga hortago” ayay tiri Faadumo Xasan Diirshe oo intaa raacisay, ‘waxaan
wacyigelin xitaa aan ka sameenay goobaha ay dadku isugu tagaan sida
Suuqyada, Shineemooyinka iyo Goobo kale” .
Faadumo waxay sheegtay in
intii ay marayeen xaafadaha Gobalka Banaadir ay dadka si aad ah u soo
dhaweenayeen in la taageero barnaamijka Wacyigelinta si looga hortago
Qatarta cudurkaas.
Mar aan wax ka weydiinay
xadiga qiyaasta cudurka Aids-ka ee dalka, waxay tiri Faadumo “sanadkii hore
waxa uu ahaa 1% haatan waxa uu marayaa 2%, waana qiyaas marka la fiiriyo aad
u badan.
Ugu dambeyntii waxa ay
sheegtay Faadumo Xasan Diirshe in Barnaamijka wacyigelinta ah ee ay wado
Hay’addeedu ay ku balaarin doonto guud ahaan dalka si looga hortago qatarta
cudurkaasi oo ah mid si weyn Aadduunka haatan ula dagaalamyo.
Midowga
Jabhadda xoreynta Soomaali Galbeed oo uga mahadceliyay dadaalka ay wadaan
Odoyaasha..
Ururka Midowga Jabhadda
xoreynta Soomaali Galbeed (UWSLF) isagoo ka ambaqaadaya ujeedooyinkii ku
saleysnaa himilooyinka Shacabka Soomaali Galbeed, ayaa waxa uu caddeeyay in
uu soo dhaweenayo dadaalka ay wadaan Odoyaasha Dhaqanka, Salaadiinta
Soomaali Galbeed ee ku aadan xal u helidda dhibaatada daba dheeraatay ee
wadanka Soomaali Galbeed.
Ururku wuxuu u
mahadcelinayaa Odoyaasha sida xil kasnimada leh uga danqaday dhibaatada
dadkooda uguna dhabar adeegeen dadaalkaas ay ummadda soo wadeen, wuxuuna
ururku ugu baaqayaa inay sii wadaan dadaalkaas kana fiijignaadaan
dhibaatooyinka Caddow iyo wax kasta oo sumcaddooda hoos u dhigaya
dhuminayana Dalka, Diinta iyo Dadka Soomaali Galbeed.
Ururku waxa u sheegay in
shacabka Soomaali Galbeedy maanka ku hayaan Gumeysiga Itoobiya in uu yahay
sababta ugu weyn ee keentay dibin daabyada soo daashatay iyo saxariirta soo
jireenka ah, isla markaana ay adag tahay in Itoobiya ay daacad ka noqoto
dadaal kasta oo loo galo xal u helidda qadiyadda Soomaali Galbeed.
Ugu dambeyntii Ururku waxa
uu Alle uga baryayaa in shacabka Soomaali Gelbeed ka dul qaado gumeysiga
facood ka reebay iyo Abaaraha
W/.D: Amiin Yuusuf
Khasaaro
E-Mail: amiinkhasaaro@hotmail.com