-
Halka uu degan yahay
Baydhabo Guddoomiyaha Baarlamaanka oo shalay ka dhacday shaqaaqo...
-
Guddigii ku howlanaa dhex
dhexaadinta kooxihii ku dagaalamay Muqdisho oo soo jeediyay shacabka
Soomaaliyeed..
-
Xildhibaan Xuseen Max’uud “waxaa
inoo yaala qodob xasaasi ah oo dhowraa ..
-
Mudane Jangeli “waxaan sharciyo u
sameyn doonnaa Shirkadaha isgaarsiinta…
-
Maleeshiyooyin kala taageersan Indha-Cadde iyo
Cumar Finish oo isku dhacay...
-
Maalinta berri ah oo uu furmayo kulankii
Baarlamaanka..
-
Guddiga Jamaacadda Badweynta Hindiya oo soo
jeediyay in la magacaabo..
-
Dugsiga Indhoolayaasha Al-Nuur oo bilaabay
waxbarashada INdhoolayaasha dadka waaweyn..
Halka uu degan yahay
Baydhabo Guddoomiyaha Baarlamaanka oo shalay ka dhacday shaqaaqo...
Wararka naga soo gaaraya Magaalada
Baydhabo ayaa waxay sheegayaan in maalintii shalay ahayd ay shaqaaqo ka
dhacday halka uu degan yahay Guddoomiyaha Baarlamaanka kaddib markii ay
kooxo maleeshiyo ah ay halkaasi ka qaateen hub yaalay, isla markaana waxay
isbaaro dhigteen halka laga soo galo guriga Guddoomiyaha. Maleeshiyadan
falkaa ku kacday oo ah Maleeshiyo taageersan Xildhibaan Max’ed Ibraahim
Xaabsade ayaa waxaa la sheegay in Kooxdii maleeshiayda ahayd ay la tageen
hubkii hase yeeshee waxaa ku baxay Odoyaal iyo Waxgarad oo ku guuleystay in
ay dib u soo celiyaan hubkii shaqaaqadan ayaa waxaa la sheegay in ay sabab u
ahayd kaddib markii mid ka mid ah Maleeshiyada ilaalisa Guddoomiyaha
Baarlamaanka shaqadii laga eryay kaddib markii uu ku kacay falal aan loo
baahneyn. Mar dambe ayaa waxaa goobtii yimid Xildhibaan Max’ed Ibraahim
Xaabsade oo Guddoomiyaha ka raali-geliyay wixii lakula kacay isagoo sheegay
in dib dambe aysan u dhici doonin fal noocaan oo kale ah. Guddoomiyaha
Baarlamaanka ayaa markii dambe howshisii sii watay, isagoo qaabilayay
Xildhibaanada Baarlamaanka oo uu kala hadlayay kulanka Baarlamaanka oo berri
la filayo in mar kale uu ka dhaco Magaalada Baydhabo. Waa markii ugu
horeysay tan iyo markii ay Dowladda gaartay Magaalada Baydhabo uu dhaco fal
noocaan oo kale ah, waxaana si weyn arrintaan uga xumaaday dadweynaha ku
nool Magaalada Baydhabo. Madaxweynaha iyo Ra’isul Wasaaraha ayaa iyaga
xarumahooda waxaa ku sugan ciidamo ay ka keensadeen deegaanadii ay ka
yimaadeen kuwaas oo si weyn u suga ammaanka, iyadoo marka aad dooneysid in
aad gasho guriga Madaxweynaha ama Ra’isul Wasaaraha aad mareysid dhowr
Koontarool oo si weyn laguugu baarayo.
Guddigii ku howlanaa dhex dhexaadinta
kooxihii ku dagaalamay Muqdisho oo soo jeediyay shacabka Soomaaliyeed..
Guddigii dhex dhexaadinta ka dhex waday
Maxkamadaha Islaamiga ah iyo kooxihii dhawaan isku magacaabay isbahaysiga la
dagaalanka argagixisada, dhawaanna dagaal qaraar uu ku dhex maray agagaarka
Kulliyaddi Ciidamada Jaale Siyaad ayaa waxay sheegeen in aysan jirin saan
saan colaadeed oo ka jirta goobihii horey loogu dagaalamay.
“Maalin walba kormeer ayaan ku sameynaa
ciidamadana uma muuqdaan kuwo dagaal” ayuu yiri Suldaan Cali Suldaan Axmed
Nuur oo sheegay in shacabka looga baahan yahay in ay is dejiyaan
guryahoodana ay ku nagaadaan, wuxuu kalloo u soo jeediyay dadkii ka qaxay
deeganadii ay dagaaladu ka dheceen in ay dib ugu soo laabtaan guryahoodii.
“iska ilaaliya kuwa war xumo tashiilka ah
oo doonaya in ay iska horkeenaan bulshada” ayuu yiri Suldaanka oo sheegay in
howlihii nabadeynta ay haatan marayaan meel wanaagsan maalmaha soo socdana
la kala qaadi doono ciidamada si rasmi ah.
Xildhibaan Xuseen Max’uud “waxaa inoo
yaala qodob xasaasi ah oo dhowraa ..
Xuseen Maxamuud Shiikh Xuseen oo ah
Wasiirka Tacliinta Sare ee Dowladda Federaalka oo shalay u waramayay
weriyaasheena ku sugan Magaalada Baydhabo Ayaa waxa uu sheegay in golaha
Baarla maanka ay hor yaalaan qodobo aad xasaasi u ah oo loo baahan yahay in
Xildhibaanada Baarlamaanka ay si saraaxad leh uga doodaan.
Wuxuu sheegay in guusha ugu wey ee ay
gaartay Dowladda Federaalka ay tahay markii kulankii ugu horeeyay ee
Baarlamaanka isugu yimaadeen Dalka gudihiisa isagoo sheegay in Xildhibaanada
Baarlamaanka ay u soo dhaarteen sidii ay u badbaadin lahaayeen dalka iyo
dadka, isagoo sheegay in sida ugu dhaqsiyaha badan loo dhisi doono
guddiyadii Baarlamaanka oo ah midka ugu muhiimsan ee uu Baarlamaanku ku
shaqeyn karo.
Wasiirka Tacliinta waxa uu sheegay in
Dowladda Federaalka ay si dhaqsi leh wax uga qaban doonto abaaraha ka jira
dalka, isagoo sheegay in dhawaan la magacaabi doono guddi heer qaran ah oo
soo eega xaaladda Abaareed ee dalka ka jirta.
Mudane Jangeli “waxaan sharciyo u
sameyn doonnaa Shirkadaha isgaarsiinta…
Wasiirka Boostada iyo Isgaarsiinta Cali
Axmed Jaamac (Jangeli) haatanna ku sugan Magaalada Baydhabo ayaa waxa uu
sheegay in kulanka ugu horeeya ee Baarlamaanka looga hadli doono arrimo fara
badan oo la xiriira waxyaabihii u qabsoomay dowladda mudadii halka iyo sano
iyo barka ahayd iyo heshiiyadii ay la gashay shirkadihii iyo Dowladihii
shisheeye.
Wasiirka oo weriyasheena ugu waramayay
xarunta shirkadda isgaarsiinta Hormuud mar uu booqanayay halkaasi ayaa waxa
uu sheegay in Wasaaraddiisa ay dhawaan sharciyo u sameyn doonto shirkadaha
isgaarsiinta ee ka jira dalka, isagoo sheegay in lagu bilaabi doono
shirkadaha Isgaarsiinta ee ka howlgala Magalada Baydhabo.
“Sharci u sameyn Shirkadaha Isgaarsiinta
waa mid caalami ah ee ma ahan mid aanu iska sameysaneyno” ayuu yiri Jangeli
Maleeshiyooyin kala taageersan Indha-Cadde iyo Cumar
Finish oo isku dhacay...
Maalintii shalay aheyd ayaa
maleeshiyooyin kala taageersan wasiirka awqaafta iyo arrimaha diinta Cumar
Max’ed Maxud {Finish} iyo guddoomiyaha gobolka Sh/hoose Yuusuf Max’ed Siyaas
{Indha-cadde}, iska hor imaadku dhex maray halka lagu magacaabo Dhanaane ee
Lambar Lixdan, dagaalkaas oo la isku adeegsaday hubka culus iyo midka fudud
ayaa waxaa la xaqiijiyey iney ku dhinteen afar maleeshiyo oo labada dhinac
ah, waxaana ku dhaawacmay shan kale.
Maleeshiyada wasiirka Awqaafta iyo
Arrimaha Diinta Cumar Finish ayaa markii hore ka baxay deegaabka Madiino
iyadoo aan la garaneyn sababihii ay halkaasi u tageen, waxaana la sheegay in
markii dambe dib loogu soo celiyey halkii ay ka duuleen.
Dagalkaan ayaa wuxuu ku soo beegmay xilli
laba todobaad ka hor magaalada Muqdisho uu dagaal ku dhex maray maxkamadaha
Islaamiga ah iyo kuwa isku magacaabay isbaheysiga la dagaalanka argagixisada,
iyadoo uu Cumar Finish uu xubin ka yahay isbaheysigaasi.
Warar ayaa waxey sheegayaan in
maleeshiyoo-yinkaasi ay halkaasi u tageen sidii ay u carqaladeyn lahaayeen
wadada isku xirta Muqdisho iyo goboka Sh/hoose, warar kale ayaa waxey
sheegayaan iney doonayeen iney carqaladeeyaan garoonka diyaaradaha ee N0.50,
iyadoo dagaalkii shalay uu keenay in dad fara badan ay ka qaxaan goobihii
lagu dagaalamay.
Maalinta berri ah oo uu furmayo kulankii
Baarlamaanka..
Iyadoo muddo todobaad ah ay fasax ku
maqnaayeen xildhibaanada baarlamaanka ayaa la filayaa in maalinta berri ah
ay mar kale kulan ku yeeshaan magaaladaasi, waxaana golaha baarlamaanka hor
yaalla qodobo muhiim ah oo la xiriira waxa u qabsoomay muddadii sannadka
aheyd ee uu baarlamaanku ku kala maqnaa khilaafka, sidoo kale waxaa hor
yaalla sidii loo ansixin lahaa heshiisyadii ay gashay xukuumadda uu madaxda
u yahay Ra’isul wasaare Geeddi.
Ajandaha ugu xasaasisan ayaa lagu
tilmaamay inuu yahay qodobkii uu dhawaan soo hor dhigay madaxweynaha oo ahaa
in Soomaaliya laga qaado cunaqabateynta hubka, waxaana qodobkaasi si weyn
isugu khilaafsan xubnaha baarlamaanka, waxaa kaloo horyaalla golaha
baarlamaanka sidii dalka ay u imaan lahaayeen ciidamo shisheeye oo hub ka
dhigis ku sameeya kooxaha hubeysan.
Muddadii todobaadka aheyd ee golaha la
fasaxay ayaa waxaa si weyn uga xumaaday qaar ka mid ah xildhibaanada oo ku
tilmaamay mid waqti lumis ah.
Guddiga Jamaacadda Badweynta Hindiya oo soo jeediyay
in la magacaabo..
Shir ay isugu yimaadeen Guddiga
Jaamacadda Badweynta Hindiya ayaa waxey uga hadleen xaaladda guud ee dalka
iyo dagaalada sokeeye, gaar ahaan kii u dambeeyey ee dhawaan ka dhacay
magaalada Muqdisho, dood dheer iyo falanqeyn kaddib, ayaa waxaa ay talo ku
soo jeediyeen in la dhiso guddi heer Qaran ah oo ka hor taga musiibooyinka
shirkaasi oo uu shir guddoominayey guddoomiyaha Jaamacadda Prof: Max’ed Cali
Daahir, ayaa waxey u soo jeediyeen indheer garadka in la abuuro guddigaasi
laguna daro aqoonyahanada, siyaasiyiinta, dhalinyaradam iyo haweenka
kuwaasoo xilkoodu noqonayo sidii looga gaashaaman lahaa musiibooyinka ka
dhasha dagaalada.
Guddiga Jaamacadda Badweynta Hindiya
waxey soo dhaweeyeen nabadeynta iyo dib u heshiisiinta ka socota gobolada
dhexe ee dalka Soomaaliya, waxeyna u soo jeediyeen walaalihii colaaddu dhex
martay iney ka dhabeeyaan heshiiskaasi.
Dugsiga Indhoolayaasha Al-Nuur oo bilaabay
waxbarashada INdhoolayaasha dadka waaweyn..
Dugsiga Indhoolayaasha Al-Nuur ee
Magaalada Muqdisho ayaa shalay waxaa ka bilowday waxbarasho la siinayo dadka
Indhoolaayasha ah ee waaweyn, maadaama uu dugsigu horey waxbarasho u siiyay
carruurta indhoolayaasha ah.
Ilaa iyo taban qof oo
indhoolayaal ah ayaa lagu bilaabay dugsigaasi waxaana la barayaa farta ay
leeyihiin Indhoolayaasha ee lagu magacaabo Braill-ka oo ah far si habeysan
wax loogu fahamsiiyo dadka indhaha aan lahayn.
C/raxmaan Max’ed Faarax
(Luunge) oo ah maamulaha dugsigaasi ka mid ahaa dadkii aasaasay dugisgaasi
ayaa waxa uu sheegay in waxbarashada indhoolayaasha dadka waaweyn ay tahay
mid uu dugsigu ku doonayo in uu kor u qaado niyadda Indhoolayaasha waaweyn
waxa uuna u mahadceliyay intii gacanta ka gaystay in dugsigaasi uu hirgalo.
Sanadkii horaantiisii ayay
ahayd markii Magaalada Muqdisho laga furay dugsi ay leeyihiin
indhoolayaasha, waxaana lagu bilaabay 20-carruur ah oo isugu jira gabdho iyo
wiilal, waxayna haatan mareysaa waxbarashadooda meel aad u sareysa, iyadoo
carruurtaasi marka ay dhameeyaan waxbarashadaasi ay wax la qaybsan doonaan
carruurta facoood ah ee iyana dhigta dugsiyada caadiga ah.
Waalidiinta carruurtooda
gaysatay dugsigaasi ayaa u mahadceliyay maamulka Dugsiga iyo intii furtay
dugsigaasi
W/D Amiin Yuusuf Khasaaro
E-Mail
amiinkhasaaro@hotmail.com
Faafin: SomaliTalk.com | March
5, 2006
Xubnihii
ku dhawaaqay "isbahaysiga Argaggaxisada" oo ku sii Jeeda Addis-Ababa
»Xamar: Banaanbax looga
soo horjeedo "kooxda Isbahaysiga"
»Geedi iyo Shariif oo
yeeshay kulan albaabada u xeran yihiin
»C/llaahi Yuusuf oo
caafimaad ahaan ugu socda Ingiriiska..
»Xildhibaan Diirshe oo
ka hadlay nabadgelyo xumida Xamar
»Dowladda Talyaaniga oo
deeq soo gaarsiisey DFKMG..
»Geedi oo ka hadlay
xayiraad ka qaadista hubka Somaliya...
iyo Warar
GooGoos ah ka akhri halkan... Guji... Mar 4