Max’ed Dheere “C/llaahi Yuusuf hubkii laga keenay Yemen wuxuu siiyay beeshiisa .

Max’ed Cumar Xabeeb (Max’ed Dheere) oo ah Guddoomiyaha gobalka Sh/dhexe oo shalay shir jaraa’id ku qabtay Magaalada Jowhar ayaa waxa uu si weyn uga soo horjeestay hadalkii dhawaan ka soo yeeray Madaxweyne C/llaahi Yuusuf ee ahaa in Soomaaliya laga qaado cunaqabateynta hubka laga qaado, waxa uuna sheegay in Soomaaliya aysan waqtigaan u baahneyn in cunaqabateynta laga qaado waayo hubkii hore ayaa si weyn u buuxa wadanka. “C/llaahi Yuusuf Dowladda Yemen ayuu hub ka soo qaaday hubkiina waxa uu gacanta u geliyay Beeshiisa” ayuu si kulul u yiri Max’ed Dheere oo sheegay inay soo dhaweenayan cid kasta oo gacan ka geysaneysa in hubka laga qaado shacabka. Mar waxa laga weydiiyay kulan ay dhawaan ku yeesheen Isbahaysiga looga dhawaaqay Magaalada Muqdisho waxa uu yir Max’ed Dheere “wax kulan kama dhicin Magaalada Jowhar ee labo jeer ayaan ku kullannay Deegaanka Deyniile, waxaana ka hadalnay sidii looga hortagi lahaa kooxaha argagixisada. Ugu dambeyntii waxa uu ugu baaqay Qaramada Midoobey in aysan marnaba ogolaan in Soomaaliya laga qaado cunaqabateynta hubka, waxaana aragtida uu qabo Max’ed Dheere ee Cunaqabateynta hubka la qaban in tabadan Xildhibaanada Baarlamaanka oo iyagu sheegay in waqtigaan aan loo baahneyn in Soomaaliya laga qaado cunaqabateynta hubka ee lagu soo rogay sanadkii 1992-dii.

Taliye ku xigeenkii Wasiirka hub ka dhigista iyo xaaskiisii oo lagu dilay Muqdisho ..

Habeen hore ayaa kooxo dabley ah oo aan la garaneyn waxay u dhaceen guriga Taliye ku xigeenkii Wasiirka dhaqan celinta Maleeshiyooyinka Bootaan Ciise Caalin kaaso ku yaalay agagaarka Isbitaalka Carafaat.

Kooxda dabelyda ahayd markii ay u dhaceen guriga ayaa waxay halkaasi ku dileen taliyahaasi oo lagu magacaabi jiray Siciid Axmed San Gaab (Booleeye) iyo xaaskiisii oo iyana lagu magacaabo Saynab Cubeyd Faraj. Taliyaha iyo xaaskiisa waxaa shalay lagu aasay qabuuraha Barkaat, iyadoo nin u hadlay qoyska uu ka dhashay taliya uu sheegay in aysan garayneyn ciddii ka dambeysay falkaasi balse ay baaritaan ku sameenayaan.

Dilka loo gaystay taliyahaan waxaa si weyn uga xumaaday beesha uu ka dhashay ninkaasi, waxaan cambaareeyay Hay’adaha xaquuqda aadanaha kuna tilmaamay mid ka baxsan Bini-aadannimada.

C/llaahi Yuusuf oo kulamo gooni gooni ah kula leh Magaalada Baydhabo xubnaha labada Gole ..

Iyadoo maalinta Isniinta ah la isugu ballansan yahay in ay kulan isugu yimaadaan Xildhibaanada Baarlamaanka ayaa haddana Madaxweyne C/llaahi Yuusuf waxa uu maalmahan wadaa kulamo gooni gooni ah oo uu la leeyaay qaar ka mid ah Xildhibanaada Baarlamaanka.

Madaxweynaha iyo xubnihii uu la kulmay ayay waxay isla soo qaadeen sidii loo ansixi lahaa qodobadii dhawaan uu u soo jeediyay oo ay ugu horeeyaan sidii Soomaaliya looga qaadi lahaa cunaqabateynta hubka iyo in Xildhibaanada ay ansixiyaan in xilalka Dowlada ay noqdaan kuwo laga qaybgeliyo dhamaan Shacabka Soomaaliyeed.

Madaxweynaha, waxa uu kulamo la yeeshay Wasiiro ka tirsan Dowaldda Federaalka oo ay isla soo qaaden sidii wada shaqeyn u dhex mari lahayd Xukumadda iyo Baarlamaanka.

Hadalkii Dhawaan ka soo yeeray C/llaahi Yuusuf ee ahaa in Soomaaliya laga qaado cunaqabateynta hubka waxaa si weyn uga soo horjeestay qaar ka mid ah Xildhibaanada Baarla-maanka oo sheegay in Soomaaliya aysan habooneyn in laga qaado canaqabateynta xiligaan, iyagoo u soo jeediyay Madaxweynaha in arrintaasi ka harto, hase yeeshee waxay sheegeen in Soomaaliya la keeno ciidamo nabad ilaalin ah oo Dowladda Federaalka kala qayb-qaata sharciga iyo kala dambeynta.

Ra’isul Wasaare Geeddi oo wada qorshe uu ku doonayo in Magaalada Jowhar ay..

Ra’isul Wasaare Cali Max’ed Geeddi ayaa shalay waxa uu kulamo gooni gooni ah la qaatay qaar ka mid ah Wasiirada ee ku sugan Magaalada Baydhabo, waxaana kulankaas la iskula soo qaaday sidii si wadajir ah ugu shaqeyn lahaayeen Golaha Xukumadda, waxaana ka mid ahaa wasiirada uu la kulmao qaar ay si aad ah isaga soo horjeedeen oo fadhigoodu ahaa Magaalada Muqdihso.

Ra’isul Wasaaraha ayaa wada qorshe ah in kulana Xukumada uu ka dhaco Magaalada Jowhar marka uu dhamaado kulanka Baarlamaanka oo aan la ogeyn waqtiga uu qaadan doono, hase yeeshee Ra’isul Wasaaraha waxaa ku dhegan xubno fara badan oo ka tirsan Baarlamaanka oo iyagu sheegay in Ra’isul Wasaaraha uu keligii heshiisyo la galay Dowlado iyo shirkado ka tirsan beesha caalamka.

Xero ay deganayeen dad soo barakacay oo mar labaad uu dab qabsaday...

Iyadoo weli ay socoto dib u dejintii dadkii soo barakacay oo ay waxyeeladu ka soo gaartay dabkii ka kacay xerada Qaxootiga ee Warshadda Birta dibna loo furay dugsiyadii iyo Malcamadihii Qur’aanka ayaa dadweynihii ku jiray xeradaasi waxay shalay subax ku soo baraarugeen dab qabsaday xeradaasi, waxayna dhamaantood hal haleel uga baxeen xeradaasi, waxaana halkaasi ku basbeelay wixii yaraa ee dhawaan loo uruuriyay.

Nin qariyay magaciisa kana mid ahaa dadkii deganaa xeradaasi ayaa waxa uu sheegay in maalintii doraad ahayd u yimaadeen kooxo kuna soo wargeliyeen xeradaasi, hase yeeshee arrintaasi wax dheg jalaq u siiyay ma jiri, isagoo sheegay in saakay ay ku soo tooseen dabkaan.

Qoysaskii ku noolaa xeradaasi ayaa shalay waxay hoganayeen qoraxda iyagoo aan haysan wax hoy ah iyo wax ay afka geliyaan, waxayna shacabka Soomaaliyeed ka codsadaan in ay la soo gaaraan gargaar deg deg ah.

Ciidamadii ku xareysnaa deegaanka Kongo oo ku sii jeeda Waajid...

Wararka naga soo gaaraya Magaalada Jowhar waxay sheegayaan in ciidamadii ku xareysnaa xerada Kongo oo u badnaa kuwo laga keenay deegaanka Puntland ayaa saraakiishooda waxay codsadeen in deg deg loogu ambabixyo Magaalada Waajid.

Codsigaan waxa uu ka ymid Madaxweyne C/llaahi Yuusuf Axmed, iyadoo sarkaashina ciidamada hogaamineysa ay xeegan haatan ay geliyeen ciidamadaasi.

Maalintii shalay ahayd ayaa Max’ed Cumar Xabeeb (Max’ed Dheere) waxa uu ciidamadaasi ku tilmaamay kuwo beeleed oo haysta hubkii uu lahaa qaranka Soomaaliyeed ee laga keenay dalka Yemen.

Khudbad uu Max’ed Dheere ka jeeday markii Ciidamada halkaa la dejinaya ayaa waxa uu ciidamadaas ku tilmaamay in ay yihiin kuwo qaran, lama ganarayo in haatan uu ku tilmaamo kuwo Beeleed, waxaana halkaas kaaga muuqda in uu khilaaf u dhexeeyo Madaxweynaha iyo Max’ed Dheere, mana ahan markii ugu horeysay oo uu Max’ed eedeeyo C/llaahi Yuusuf Axmed.

Warku waxa uu intaa ku darayaa in Max’ed Dheere uu la kulmay saraakiisha kongo uuna u sheegay in ay si nabadgelyo leh ku bixi doonaan, waxaana la sheegay in Ciidankaasi ay wataan dhowr gaari oo Tikniko ah iyo rasaas, dhawaan ayay ahayd markii Ciidamada Max’ed Dheere iyo kuwa Puntland uu dagaal ku dhex maray meel u dhow Garoonka Jowhar waxaana dagaalkaasi ku dhintay mid ka mid ah ciidamada laga keenay Puntland.

W/D Amiin Yuusuf Khasaaro
E-Mail amiinkhasaaro@hotmail.com

W/D Amiin Yuusuf Khasaaro
E-Mail amiinkhasaaro@hotmail.com

Wararka naga soo gaaraya Gobalka J/hoose gaar ahaan degmada Af-Madoow waxay sheegayaan in maalintii shalay ahayd halkaas lagu afduubtay Nin Mareykan ah oo u shaqeynayay Hay’adda UNICEF ee Qaramaada Midoobey u qaabilsan dhinaca Carruurta.

Ninkaan ayaa markii la afduubayay waxa uu ku jiray howl uu ku kormeerayay Baaxadda abaarta ka jirta deegaankaasi, waxaana ninkaa Mareykanka ah lafduubay nin magaciisa lagu sheegay Xuseen Abnaa Culoow.

Ninka wax afduubtay ayaa la sheegay in uu yahay nin ganacsato ah, mar la wareystayna waxa uu sheegay in sababaha uu afduubtay ninkaasi ay tahay, isagoo sheegay in Qaramada Midoobey uu ku leeyahay lacag uu horey ugu shaqeeyay, gaar ahaan sanadihii 96 iyo 97-dii.

Ninkaan waxa uu sheegay in ninka Mareykanka ah uu ku hayo gurigiisa oo ku yaala duleedka Degmada Af-Madoow isagoo sheegay in ninkaas uu sii deyn doono marka uu helo lacagta uu ku lahaa Qaramada Midoobey inkastoo uusan cara- baabin tirade lacagta, waxaana haatan socda dadaal lagu doonayo in lagu sii daayo ninkaasi oo ay wadaan Odoyaasha deegaanka.

Istudiyaha Horn Afrik ay dhawaan ka furatay Baydhabo albaabada loo laabay ...

Sida ay noogu soo waramayaan weriyaasheena ku sugan Magaalada Baydhabo waxay xaqiijiyeen in Istuudiyihii Idaacadda Horn Afrik uga furnaa Magaalada Baydhabo gebi ahaanba la joojiyay kaddib markii uu khilaaf soo kala dhex galay iyaga iyo Idaacad kale oo haalkaasi ka furan oo lagu magacaabo DMC.

Maalmihii hore Idaacadda Horn Afrik IStuudiyaha ay ku lahayd Magaalada Baydhabo si wanaagsan ayaa looga dhegeysanayay Baydhabo, hase yeeshee waxaa la waayay labadii habeen ee ugu dambeysay iyadoo la damcay dhowr jeer in arrintaasi la xaliyo balse lagu guuldareystay khilaafka ugu xoogan waxa uu ka yimid markii la isku qabsaday khandaraaska Idaacadda British Broadcasting Corporation-da gaar ahaan dhinaca FM-ka kaddib markii mas’uuliyiinta Idaacadda DMC ay soo jeediyeen in ay qadaraaskaasi xaq u leeyihiin in ay iyaga sii daayaan, Horn Afrikna ay sii deysato barnaamujyadeeda kale.

Mas’uuliyiin ka tirsan Idaacadda British Broadcasting Corporation-da oo damcay in arrintaasi ay dhex galaan ayaa iyagana ku soo hungoobay, waxaase haatan socda waan waan ay wadaan maamulka ka taliya Magaalada Baydhabo.

Mas’uul u hadlay Idaacadda DMC ayaa waxa uu sheegay in aan waxba lagala socodsiin sii deynta barnaamijyada British Broadcasting Corporation-da ee Magaalada Baydhabo, isagoo u soo gudbiyay maamulka British Broadcasting Corporation-da in ay si toos ah iyaga ugala xaajoodaan si loo sii daayo barnaamijyada British Broadcasting Corporation-da, isagoo sheegay in ay haystaan qalab ka tayo wanaagsan Idaacadda Horn Afrik.

W/D Amiin Yuusuf Khasaaro
E-Mail amiinkhasaaro@hotmail.com