Wararkii June 25, 2006

• Midowga Maxaakiimta Islaamiga ah oo magacabay Golaha Maxaakiimta Islaamiga...

• C/llaahi Yuusuf oo maanta warbixin siinaya...

• Deegaanka Tooratoorow oo ka cabanaya. hayadaha samafalka iyo maamulka Gobolka .

• Midowga Maxaakiimta Islaamiga ah oo sheegay ku rad joogan kuwii ka dambeeyey.

• Hay’adda City Group oo sheegtay in Hay’adda.Saacid ay isku koobtey..

• ---

Midowga Maxaakiimta Islaamiga ah oo magacabay Golaha Maxaakiimta Islaamiga...

Kulan aad u balaaran oo ay ka qaybgaleen waxgarad, Culuma’u-diin, Odoyaal iyo dad magac ku leh dalka ayaa maalintii shalay ka dhacay Magaalada Muqdisho gaar ahaan Hotel Ramadaan, waxaana kulankaasi looga hadlayay is bedelka ku soo krodhay Magaalada Muqdisho, kaddib markii laga adkaaday qabqablayaasha dagaalka, sidoo kale kulankaasi waxaa looga hadlay sidii dardar loo gelin lahaa howlaha Midowga Maxaakiimta Islaamiga ah, waxaana aaqiritaankii halkaasi laga sameeyay Gole la magacbaxay Golaha Maxaakiimta Islaamiga ah ee Soomaaliyeed, kaasoo bedeli doona Midowga Maxaakiimta Islaamiga ah, sidoo kale waxaa halkaasi lagu magacaabay Gole la magacbaxay Golaha Shuurada Soomaaliyeed. Sababaha golahaan loo magacaabay ayaa lagu sheegay sidii howlaha Maxaakiimta loo gaarsiin lahaa dhamaan dalka oo dhan, maadaama shacabka Soomaaliyeed ay u baahan yihiin is bedelka noocaan oo kale ah.

Sheekh Shariif Sheekh Axmed ayaa isaga loo magacabay Guddoomiyaha Golaha Maxaakiimta Islaamiga ah ee Soomaaliyeed, waxaana Guddoomiye ku xigeenka koowaad loo magacaabay Sheekh Yuusuf Indha-Cadde, Guddoomiye ku xigeenka labaadna waxaa loo magacaabay Sheekh C/qaadir Cali Cumar, Guddoomiyaha Golaha Shuurada ayaa isna waxaa loo magacaabay Sheekh Xasan Daahir Aweys, xoghayaha Shuurada waxaa loo magacaabay Sheekh Maxamuud Ibraahim Suulay. Golaha Shuurada ayaa la sheegay in ay ka kooban yihiin ilaa 88-xubnood kuwaasoo ka kala socda qaybaha kala duwa ee bulshada.

Dhinaca kale Guddoomiyaha Midowga Maxaakiimta Islaamiga ah ayaa si aad ah ua xumaaday dilkii loo gaystay Weriye ku dhashay Wadanka Sweden oo doraad lagu dilay fagaaraha Tarabuunka mar uu halkaasi ka socday Banaanbax aad u balaaran oo looga soo horjeeday in dalka la keeno ciidamo shisheeye, isla marakaan waxaa lagu taageerayay heshiiskii ka dhacay Magaalada Khartuum ee dalka ee dhex maray Midowga Maxaakiimta Islaamigaa iyo Dowladda Federaalka.

C/llaahi Yuusuf oo maanta warbixin siinaya...

Madaxweyne C/llaahi Yuusuf Axmed ayaa si dhaqsi leh uga soo laabtay Magaalada Baydhabo kaddib markii uu ka qaybgalay kulankii lagu heshiisiinayay Midowga Maxaakii-mta Islaamiga ah iyo Dowladda Federaalka ee ka dhacay dalka Suudaan.

Madaxweynaha oo si weyn u soo dhaweeyay heshiiski ka dhacay Magaalada Khartuuma ayaa maanta la filayaa in uu xubnaha labada gole warbixin ka siiyo heshiiskaasi iyo sidii loo ambaqaadi lahaa taabagelintiisa.

C/llaahi Yuusuf mar uu warbixin siiyay warbaahinta waxa uu sheegay in Dowladda Federaalka ay ka go’an tahay in ay si dhab ah u fuliso heshiiskaasi oo uu sheegay in uu yahay mid horudhac ah, iyadoo bisha July-na heshiis kale oo ka dhici doona Khatuum lagu dhameystiri doono heshiiska labada dhinac.

Deegaanka Tooratoorow oo ka cabanaya. hayadaha samafalka iyo maamulka Gobolka .

Guddoomiyaha Degmada Tooratoorow Xaaji Cadde Xaaji Xasan ayaa na soo gaarsiiyay Warqad qoraal ah oo uu kaga cabanayo Hay’adaha samafalka iyo gobalka Sh/hoose, guddiga gurmadka abaaraha ee fadhigiisu yahay Magaalada Muqdisho iyo maamulka ka arrimiya gobalka Sh/hoose, kuwaas oo ku tuntay dhamaan xaquuqdii ay ku lahaayeen, maadaama deegaankaasi ay ka jirto abaaro, biyo la’aan, cuduro iyo cunto la’aan.

Duqa Magaalada isagoo arrintaasi ka hadlayana waxa uu yiri “Degmada Tooratoorow waxa ay ku taalaa baadiya fog, waana suuqa ugu weyn ee Xoolaha iyo Masagada, ee gobalka, waxaana xoolahaasi iyo Masagadaasi loo dhoofiyaa maamul gobaleedyada Putnland, Soomaaliland iyo dalalka Carabta. Hadaba Degmada oo lahayd hal Ceel ayaa matoorkii ka jaban yahay mudo ku dhow dhowr sano, iyadoo deegaan-kaasi ka jirto abaaro saameeyay dadkii iyo duunyadii, waxaana is weydiin mudan degmadaasi oo ka tirsan Degmooyinka ugu baaxadda weyn gobalka Sh/hoose miyeysan xaq u lahayn kaalmo” waxa uu intaasi sii raaciyay “Maamulka Gobalka Sh/hoose muxuu indhihiisa uga laabtay oo ugu soo rogay cunaqabateyn dhinaca samafalka ah, miyeysan degmadeenu mudnaan ku lahayn gobalka Sh/hoose”.

Ugu dambeyntii Guddoomiaha Waxa uu sheegay in Degmada Tooratoorow ay Muqdisho u jirto 90Km, ilaa iyo haddana Guddiga gurmadda Abaaraha waxay soo gaarsiiyeen ma jiraan, isagoo sheegay in gobalo ka fog fog ay guddigaasi ka wadaan gargaar Bini’aadannimo, waxa uuna u soo jeediyay Hay’adaha samafalka in ay gacan la soo gaaraaan Dadkaas.

Midowga Maxaakiimta Islaamiga ah oo sheegay ku rad joogan kuwii ka dambeeyey.

Midowga Maxaakiimta Islaamiga ah ayaa waxa ay sheegeen in ay ku raad joogaan isla markaana ay baaritaan ku hayaan ciddii ka dambeysay dilkii Weriye Martin oo doraad lagu dilay banaanbax ka dhacayay fagaaraha Tarabuunka ee looga soo horjeeday ciidamo shisheeye, isla markaana lagu taageerayay Midowga Maxaakiimta Islaamiga ah.

Mas’uuliyiin ka tirsan Midowga Maxaakiimta ayaa sheegay inay hayaan raad raad muujinaya cid ka dambeysay falkaasi dilka ah, dhawaana gacanta lagu soo dhigi doono, dhinaca kale waxaa maalintii shalay ahayd ayaa maydkii Weriyihii lagu dilay magaalada Muqdisho loo duuliyay Magaalada Nayroobi, iyadoo Sheekh Shariif uu sheegay in arrintaasi ay aad uga naxeen in isla markaana ay u saareen guddi ka kooban todobo xubnood oo baaritaan rasmi ah ku sameeya dilka Weriyahaasi.

Hay’adda City Group oo sheegtay in Hay’adda.Saacid ay isku koobtey..

Qoraal uu na soo gaarsiiyay Guddoomiyaha Hay’adda City Group Daahir Macallin Xaashi ayaa waxa uu sheegay in ururkoodu mudo aad u fog si mutadawacnimo ah uga shaqeynayay Magaalada Muqdisho gaar ahaan dhinaca nadaafadda.

Waxa uu sheegay Guddoomiyuhu in Hay’adda SAACID ay ku xadgudubtay howlihii ururkaasi, kadib markii ay la wareegtay barnaamijyadii dhinaca nadaafadda ee gobalka Banaadir, waxa uuna sheegay Guddoomiyuhu in arrintaasi ay gacan ku siiyeen mas’uuliyiin ka tirsan Maamulka Gobalka Banaadir.

“Hay’adda SAACID waxay isku koobtay dhamaan howlihii nadaafadda ee gobalka Banaadir mana ahan mid noo cuntameysa” ayuu yiri Daahir oo sheegay in maamulka Gobalka Banaadir looga baahnaa in uu tixgelin gaar ah siiyo dadkii sida mutadawacnimada ah ee aan hagarta lahayn uga shaqeynayay nadaafadda iyo bilicda magaalada Muqdisho.

Xabiibo Yuusuf “Hay’adda Saacid waxay la waregtey Howlaheenii..”

Xabiibo Yuusuf Camalow oo ah Xoghayaha guud ee Ururka Haweenka nabadda iyo Taabagelinta nadaafadda ee Gobalka Banaadir ayaa mar ay nagu soo booqatay xafiiska, waxa ay sheegtay tan iyo markii ururkooda la aasaasay ay howlo nadaafadeed oo baaxad weyn ka fuliyeen Gobalka Banaadir, gaar ahaan xiligii ay jirtay Dowladdii Carta. “Mashruuc dhinaca nadaafadda ah oo aan u gudbinay duqii hore ee Magaalada Xuseen Cali Axmed si uu arrintaasi ugala hadlo Haya’adda UNDP ayaa waxaa dhacday in markii uu mashruucaasi soo dhamaaday uu Duqa Magaalada ku wareejiyay Hay’adda SAACID” ayay tiri Xabiibo Yuusuf oo intaa raacisay “Duqa Magaalada waxa uu inoo sheegay in mashruucaan uu yahay mid tijaabo ah, balse ay heli doonaan mashaariic kale oo dhinaca nadaafadda ah, sidaa ayaana ku qanacnay, maadaama waxa loo shaqeynayo ay tahay Ummadda Soomaaliyeed”

Xoghayaha waxay kaloo sheegtay in ay mar kale Barnaamij nadaafadeed ay u gudbiyeen xiligaasi Duqa Magaalada, waxayna sheegtay in mashruucii haatan uu soo baxay, iyadoo sheeegtay in mashruu-caasi maalgelintiisa ay leeyihiin Hay’adaha UNDP iyo ILO, balse waxay sheegtay in meeshii ay ka filayeen in mashruucaasi lagu wareejiyo ayaa mar kale lagu wareejiyay Hay’adda SAACID oo ay sheegtay in barnaamijyada noocaan oo kale ah aysan ku shaqo lahayn, balse ay shaqadeedu tahay dhaqancelinta Maleeshiyaadka.

Ugu dambeyntii Xabiibo Yuusuf Camalow waxa ay sheegtay in wixii dhibaato ah ee arrintaasi ka yimaada ay mas’uuliyeeda qaadi doonaan ciddii walba oo ku kacda falal noocaas o kale ah.

W/D Amiin Yuusuf Khasaaro

E-Mail amiinkhasaaro@hotmail.com

Faafin: SomaliTalk.com | June25, 2006

»Jens Assur: "Soomaaliya waxey kamid tahay meelaha lugu ugaarsado warfidiyeenada"

Wareegtooyin iyo Bayaano laga soo saaray Xiritaanka Baarlamanka Puntland
»Wareegto: Xafiiska Gudoonka Golaha Wakiiladda DGPL.
»Bayaan ka soo Baxay Shacabka Puntland.....
»Xisbiga Ramaas oo Bayaan kasoo saaray Xiritaankii..
»Wareegto: Xafiiska Kusimaha Madaxweynaha Puntland..
Wararka oo dhan ka akhri halkan.... Guji...

»»Governor-ka iyo labada Mayor ee Minneapolis & St. Paul oo si rasmi ah u aqoonsaday Usbuuca Soomaalida June 26-July 2

Heshiis Khartuum ku Dhexmaray Midowga Maxaakiimta Islaamiga iyo DFKMG
Qodobada ay wada saxiixdeen waxaa ka mid ah in maxkamad la soo taago qabqalayaashii dagaalka, iyo in labada dhinac uu midba kan kale... Guji...

Waraysiyo Ku Saabsan Guddoomiyihii Baarlamaanka DGPL oo Xilkii Laqa Qaaday....
iyo Puntland oo ka laabatay Qodob ka mid ah Heshiiskii ay la galeen shirkadda "Range Resources..."... Guji.... Jun 21

VOA: Safiirkii USA u Fadhiyi jirey Itoobiya oo Ka Hadlay Xaalada Cusub ee Soomaaliya & Ciidama Itoobiya
Ka Dhegeyso VOA:: Halkan ama Halkan

•  Taariikh Kooban Soomaaliya: 1960 - 2006