Heshiis Khartuum ku Dhexmaray Maxaakiimta Islaamiga iyo DFKMG

Kulan Khamiis June 22, 2006 magaalada Khartuum ee dalka Suudaan ku dhex maray Maxaakiimta Islaamiga iyo Dowladda FKMG ayaa waxaa lagu kala saxiixaxday heshiis dhex maray labada dhinac, heshiiskaas oo labada dhinac uu midba kan kale aqoon saday.

Labada dhinac qodoba ay ku heshiiyeen waxaa ka mid ah:

• In labada dhinac ay joojiyaan hujuumka ay isku wadaan ee xagga militari iyo xagga saxaafadda
• Labada dhinac uu midba midka kale aqoonsado
• in furo maxkamad la soo taagayo dembiilayaashii dagaalka (War Crime Trial)
• Dhawridda Midnimada Soomaaliya, iyo dhawrida wadajirka Dhulka Soomaaliya
• In dadka Soomaaliyeed lagu caawiyo dib u dhiska hay'adihii qaranka, dib u dejin iyo horumarin

Midig: M. Cali Ibrahim iyo C/lahi SH. Ismaciil | Sawirka: SUNA SUDAN

Heshiiskaas dhinaca DFKMG waxaa u saxiixay wasiirka Arrimaha Dibada ee DFKMG, Cabdullaahi Sheikh Ismaaciil, dhanka midowga Maxaakiimtana waxaa u saxiixay Dr. Maxamed Cali Ibraahim.

Waxa ay labada dhinac isku raaceen in ay mar kale isugu yimaadaan magaalada Khartuum July 15, 2006 si ay u sii wadaan wada hadalkooda.

Kulankan lagu wada hadalsiinayo labada dhinac waxaa soo agaasimey dalka Suudaan, waxaana guddoominayey ururka Jaamacadda Carabta.

Goobtii saxiixu ka dhacay waxaa goob joog ka ahaa madaxweynaah DFKMG iyo madaxda carbeed.

Sawiradii hay'adaha wararka AP iyo AFP ay ka qaadeen goobtii saxiixa xabbad joojintu ka dhacday ka daawo hoos:

M. Cali Ibrahim & C/Lahi Sh. Ismaaciil

Camar Musa, Wasiirka A/dibada sudan, & M. Cali Ibrahim

C/lahi Yusuf, Xasan Albashir, & Camar Musa

C/lahi Sh. Ismaaciil & M. Cali Ibraahim

C/lahi Yusuf

Waftiga Maxaakiimta Islaamiga

ISHA: SUDAN SUNA |Tarjumadii SomaliTalk.com | June 22, 2006
Sawirada: Yahoo News, AP, AFP

Wararkii kale ee maanta hoos ka akhri

WARARKII JUNE 22, 2006

• Ammaanka Jidka Isku Xirta Xamar iyo Gobolada Dhexe oo aad u wanaagsanaadey...

• Maxaa ka soo bixi doona kulanka ay ku yeelanayaan Suudaan Maxaakiimta iyo Dowladda Federaalka ..

• Sheekh Shariif oo sheegay in ay cagta marin doonaan kooxaha ku soo gambanaya..

• Naadiga Qurba jooga Soomaaliyeedoo warbixin ka soo saaray xaaladda qaxootiga Soomaaliyeed ..

• C/llaahi Yuusuf, Shariifka iyo Geeddi oo la kulmay xubno ka tirsan Dowladda Mareykanka..

• Golaha Guurtida Hawiye oo warsaxaafadeed ka soo saaray is bedelka ka cusub ee ka dhacay magaalada Muqdisho..

• Gole la magacbaxay Golaha Siyaasiyiinta Dhallinyarada oo looga dhawaaqay Muqdisho..

• ---

Ammaanka Jidka Isku Xirta Xamar iyo Gobolada Dhexe oo aad u wanaagsanaadey...

Wararka ka imanaya Gobolada Dhexe ee Soomaaliya ayaa tibaaxay in jidka isku xira Muqdisho ilaa gobolada dhexe uu ammaankiisu aad u wanaagsanaadey intii ay aaggaas qabsadeen Maxkamadaha Islaamiga. Waxaa wararku sheegeen in aad looga raystay qabqablayashii dagaalka ee dhigan jirey Isbaarooyinka ay dadka ku baadi jireen, kuna cunaqabatayn jireen shacabka Soomaaliyeed.

Maxaa ka soo bixi kara kulanka ay ku yeelanayaan Suudaan Maxaakiimta iyo Dowladda Federaalka ..

Waxaa magaalada Khatruum ee dalka Suudan ku sii qulqulaya wufuud ka kala socota Midowga Maxaakiimta Islaamiga ah iyo Dowaldda Federaalka, waxaana la doonayaa in laysa soo hor fariisiyo labada dhinac, waxaa ka soo shaqeeyay kulankaani Jaamacadda Carabta oo ay hormuud u tahay Dowadda Suudaan. Dowlada Federaalka waxaa la filayaa in kulankaasi ay uga qaybgalaan Madaxweyne C/llaahi Yuusuf iyo Ra’isul Geeddi iyo Guddoomiyaha Baarlamaanka Shariif Sheekh Aadan, halka Maxaakiimta uga qaybgalayaan toban xubnood oo ka tirsan Midowga Maxaakiimta oo isugu jira aqoonyahano, waxgarad iyo Dhallinyaro waxaana horkacaya Dr. Max’ed Cali Ibraahim, waxaana ka mid ah Cumar Aadan Qaadi, Sheekh Xuseen Max’ed, Axmed Ma’xed Cabdule (Axmed Qare) iyo xubno kale, haddaba su’aasha is weydiinta mudani waxay tahay kulankaasi maka soo bixi doonaan natiijo wax ku ool ah, hase yeeshee dadka qaarkii ayaa waxay qabaan in natiijo sidaa ah aysan ka soo bixi karin, iyagoo u aaneynaya Dowladda Federaalka oo dooneysa in ay ciidamo shisheeye keento dalka, iyadoo Dowladdu diidan in ay dib ugu soo laabato Magaalada Muqdisho oo haatan aad u xasiloon, iyadoo dowladu ka soo horjeedo in dalka lagu dhaqo Shareecadda Islaamka, inkastoo u Dastuurku qorayo in wax kasta ay saldhig u yihiin shareecada Islaamka. Midowga Maxaakiimta Islaamiga ah ayaa waxay qabaan in Dowladda Federaalka ay ku xisaabtanto is bedelka ka dhacay magaalada Muqdisho si ay saldhig ugu noqdaan dib heshiisiin rasmi ah oo dhex marta Midowga Maxaakiimta iyo Dowlada Federaalka.

Akhri qormadii Culamada ee 2004

Sheekh Shariif oo sheegay in ay cagta marin doonaan kooxaha ku soo gambanaya..

Guddoomiyaha Midowga Maxaakiimta islaamiga ah oo shalay shir jaraa’id ku qabtay Magalada Muqdisho ayaa ka hadlay Maxkamadaha Islaamiga ah ee maalin walba laga furayo Magaalad Muqdisho iyo hareeraheeda, kuwaas oo aan hoos imaanin Midowga maxaakiimta Islaamiga ah, waxa uuna Sheekh Shariif sheegay in Bulshada Soomaaliyeed ay si weyn u garaneyso Maxkama-daha ka tirsan Midowga Maxaakiimta Islaamiga ah.

“Kuwa aysan la warqabin Midowga Maxaakiimta Islaamiga ah waxaan u aragnaa kuwo fowdo ah oo u shaqeynaya haraadigii Isbahaysigii, kuwaasna cagta ayaanu marineynaa” ayuu yiri Sheekh Shariif.

Naadiga Qurba jooga Soomaaliyeedoo warbixin ka soo saaray xaaladda qaxootiga Soomaaliyeed ..

20-kii Bishan ayaa caalamka laga xusay maalinta Qaxootiga adduunka, hadaba naadiga Qurba joogta Soomaali-yeed ayaa soo saaray warbixin ku aadan xaaladda Qurba jooga Soomaaliyeed lixdii bilood ee ugu dambeysay ee sanadkaan.

Waxa uu sheegay Naadigu in ay dhaceen 37-dhacdo oo ka kala dhacay 16-dal, waxayna saameeyeen 6613, waxaana dhintay 326 qof, waxaa la xiray 1111 qof, waxaa badbaaday 5176 qof.

Naadigu waxa uu u mahadceliyay wadamada Uganda South Africa iyo Kenya oo iyagu qaxootiga qaarkood siiyay sharciyo ay ku joogaan wadankooda.

Mar uu ka hadlayay naadigu qaxootiga ku sugan dalka gudihiisa waxa uu qaxootigu sheegay in ay jiraan dad ka soo qaxay dalka Tanzania gaar ahaan Jasiiradda Zanzibar oo tiradoodu gaareyso 70-qof, sidoo kale waxaa jira dad qaxooti ah oo ka haray dagaalkii 77 ee dhex maray Soomaaliya iyo Itoobiya oo u badan Oromo oo ku kala firirisan dalka gudihiisa, sidoo kale naadigu waxa uu sheegay in ay jiraan dad ku barakacay dalka gudihiisa oo tiradoodu gaareyso 350,000 ilaa iyo 400,000, kuwaas oo uu naadigu sheegay in ay dhibaato ku hayso dalka gudihiisa u baahan yihiin gargaar , waxaana warsaxaafeedkaani ku saxiixnaa Guddoomiyaha Naadiga (SODIF) ADV C/raxmaan Xuseen (Abu-Xamsa)

C/llaahi Yuusuf, Shariifka iyo Geeddi oo la kulmay xubno ka tirsan Dowladda Mareykanka..

Madaxweyne C/llaahi Yuusuf Axmed oo booqasho hal maalin ah ku tagay wadanka Itoobiya, halkaas oo uu kula soo kulmay Ra’isul Wasaaraha dalka Itoobiya ayaa maalintii shalay ahayd soo gaaray dalka Kenya.

Madaxweyne C/llaahi Yuusuf oo wuxuu markiiba kulan la yeeshay Ra’isul Wasaare Cali Max’ed Geeddi oo ay isla soo qaadeen sida ugu haboon ee wada hadal loola furi karo Midowga Maxaakiimta Islaamiga ah, Waxaana mar dambe ku soo biiray wada hadalkooda Guddoomiyaha Golaha Baarlamaanka Shariif Sheekh Aadan.

Saddexdaan mas’uul ayaa shalay kulan albabaadu u xirnaayeen waxay la yeesheen kaaliya Xoghayaha arrimaha dibadda ee Afrika ee Dowaldda mareykanka, waxaana kulankaasi oo mudo saacado ah socday la iskula soo qaaday arrimo xasaasi ah oo la xiriira xaaladda cusub ee haatan ka taagan dalka, iyadoo C/llaahi Yuusuf uu horey u sheegay in Midowga Maxaakiimtu ay taageero ka heleen ururo Mintid ah oo ka jira caalamka, isagoo sheegay inay qatar ku yihiin nabadgelyada wadamada Geeska Afrika.

Warku waxa uu intaas ku darayaa in markii uu dhamaaday kulankaasi saddex mas’uul ay u dhaqaaqeen wadanka Suudaan halkaas oo ay kula kulmi doonaan Midowga Maxaakiimta.

Golaha Guurtida Hawiye oo warsaxaafadeed ka soo saaray is bedelka ka cusub ee ka dhacay magaalada Muqdisho..

War-Saxaafadeed ka soo baxay golaha guurtida Hawiye ayaa lagu sheegay in ay aad u soo dhaweynayaan isla markaana ay tixgelinayaan horumarkii ay Maxaakiimta Islaamiga ah ka sameeyeen Magaalada Muqdisho iyo daafaheeda, hase yeeshee ay si aad ah uga xun yihiin codeyntii Baarlamaanka ee ahaa in ciidamo shisheeye oo ay ku jiraan kuwa safka hore la keeno dalka.

Lix qodob oo uu warsaxaafadeedkaasni ka koobnaa ayaa lagu kala sheegay

1. in Golaha guurtida Hawiye ay si aad ah uga soo horjeedaan ciidamo shisheeye oo dalka la keeno taasoo ay ku tilmaameen in dhib kale ay dalka ka abuureyso

2. In goluhu uu aaminsan yahay in ciidamo shisheeye aysan xal ka keeni karin Soomaaliya, laakiin ay dhibaato abuurayaan.

3. in Goluhu uu ka codsanayo Madaxeyne C/llaahi Yuusuf in uu tixgeliyo xaaladaha jira isla markaana uusan horseedin dhiig kale oo daata.

4. Goluhu waxa uu ku dhiiragelinayaan in aysan ku dhiiran ciidamo ay u soo diraan dalka Soomaaliya kuwaas oo ay ku jiraan wadamada safka hore, taasina ay abuuri karto dagaal hor alaah.

5. Goluhu waxa uu ku booriniayaa Maxaakiimta islaamiga ah iyo Dowladda Federaalka in ay si dhaqsi ah wada hadal iyo wada shaqeyn u bilaabaan, si xal loo helo.

6. ugu dambeyntii goluhu waxa uu ka codsanayaa beesha caalamka in ay caawiyaan dadka Soomaali-yeed laga qayb-qaato xalinta dhibaatooyinkooda, waxaana war-saxaafadeedkaasi ku saxiixnaa afhayeenka golaha Guurtida Hawiye C/llaahi Cabdule Weheliye.

Gole la magacbaxay Golaha Siyaasiyiinta Dhallinyarada oo looga dhawaaqay Muqdisho..

Gole la magacbaxay Golaha Siyaasiyiinta Dhallinyarada Soomaaliyeed ayaa maalintii shalay ahayd looga dhawaaqay magaalada Muqdisho.

Golahan oo uu guddoomiye ka yahay Xasan Maxamuud Xaaji (Xasan Geela), furitaankiisii kaddib ayaa waxaa laga soo saaray dhowr qodobo oo kala ah, waxaana soo dhaweyneynaa is bedelka ka dhacay magaalada Muqdisho, waxaana taageersan yahay Maxkamaddaha Islaamiga ah iyo howlaha ka wadaan dalka, waxaana u soo jeedineynaa Maxaakiimta in ay ku fara adeegaan guusha ay gaareen, waxaana u soo jeedineynaa Dowladda Federaalka iyo Midowga Maxaakiimta in ay wada hadal shuruud la’aan ah galaan, ugu dambeyntii waxay soo dhaweeyeen wada hadalka ka furmaya dalka Suudan oo maanta lagu wado in uu furmo.

W/D Amiin Yuusuf Khasaaro

E-Mail amiinkhasaaro@hotmail.com

Faafin: SomaliTalk.com | June 22, 2006

VOA: Safiirkii USA u Fadhiyi jirey Itoobiya oo Ka Hadlay Xaalada Cusub ee Soomaaliya & Ciidama Itoobiya
Ka Dhegeyso VOA:: Halkan ama Halkan

Degmada Cadaado oo soo dhaweyn ugu jirta Maxaakiimta Islaamiga..
»C/llaahi Yuusuf iyo Max’ed Dheere oo Khadka Taleefanka..
»Midowga Maxaakiimta oo sheegay in aysan aqoosan doonin
»Tikniko uu leeyahay Cabdi Nuure oo gaaray Guri-Ceel...
»Dowladda Ku meel gaarka ah oo wada hadal kula jirta..
»C/llaahi Yuusuf iyo Geeddi oo si kala gooni gooni ugu..
Wararka oo dhan ka akhri halkan... Guji... June 21

Warbixin: Xildhibaankii Sweden kaga Fakaday Waftigii Gudoomiyaha Baarlamaanka DGPL
iyo 7 Xubnood oo soo hor dhigay Baarlamanka in xilka laga Xayuubiyo Guddoomiyaha Baarlamanaka PL Guji.... Jun 20

Xafladii Nugaal University ee Minnesota U.S.A
Xaflad aad loo soo agaasimey ayaa lagu qabtey badhtamaha magaalada Minneapolis, Minnesota... Guji....

•  Taariikh Kooban Soomaaliya: 1960 - 2006