WARARKII JUNE 21, 2006

• Degmada Cadaado oo soo dhaweyn ugu jirta howlgalka Maxaakiimta Islaamiga..

• C/llaahi Yuusuf iyo Max’ed Dheere oo Khadka Taleefanka ku wada xiiray..

• Midowga Maxaakiimta oo sheegay in aysan aqoosan doonin...

• Tikniko uu leeyahay Cabdi Nuure Siyaad oo gaaray Guri-Ceel...

• Dowladda Ku meel gaarka ah oo wada hadal kula jirta Maleeshiyo ka soo gadooday...

• C/llaahi Yuusuf iyo Geeddi oo si kala gooni gooni ugu kala ambabaxay..

  ---

Degmada Cadaado oo soo dhaweyn ugu jirta howlgalka Maxaakiimta Islaamiga..

Wararka naga soo gaaray Magaalada Cadaado ee Gobalka Galguduud waxay sheegayaan in degmadaasi dadweynaha ku nool ay si weyn u hadal hayaan is bedelada ka soo cusboonaaday magaalada Muqdisho kadib markii guulo gaareen Maxaakiimta Islaamiga ah. Ciidamadii ku sugnaa Degmada Cadaado ayaa la sheegay in ay ku kala qaybsameen is bedelka ka dhacay Magaalada Muqdisho ee Midowga Maxaakiimta Islaamiga ah, waxaana lagu waramay in 100-Maleeshiyo ah oo wadata todobo gawaari Tikniko ah ay shalay u dhaqaaqeen dhinaca Degmada Godinlabe, waxaana la sheegay in sababaha ay halkaasi u tageen sidii ay u soo dhaweyn lahaayeen Midowga Maxaakiimta Islaamiga ah maadaama ay soo gaareen gobalka Hiiraan. Odoyaasha deegaanka Cadaado ayaa waxay sheegeen in ay si aad ah u soo dhaweynayaan Midowga Maxaakiimta Islaamiga ah, waxayna ka cosadeen Sheekh Shariif in howlgaladooda soo gaarsiiyaan Degmada Cadaado.

C/llaahi Yuusuf iyo Max’ed Dheere oo Khadka Taleefanka ku wada xiiray..

Madaxweyne C/llaahi Yuusuf Axmed oo shalay gaaray magaalada Adis-Ababa ee dalka Itoobiya ayaa waxaa la sheegay in markiiba uu la soo xiriiray guddoomiyihii hore ee Gobalka Sh/dhexe Max’ed Cumar Xabeeb (Max’ed Dheere) oo hada la sheegay in uu ku sugan yahay dalka Itoobiya. Inkastoo aan la faahfaahin wixii ay ka wada hadleen Max’ed Dheere iyo C/llaahi Yuusuf ayaa haddana warar aan u helnay waxay sheegayaan in ay ka wada hadleen is bedeladii ugu dambeeyay ee ka dhacay Magaalada Muqdisho iyo Jowhar, kadib markii ay si buuxda gacanta ugu dhigeen Midowga Maxaakiimta Islaamiga ah, isla markaana ay ka adkaadeen isbahaysigii la oran jiray la dagaalanka argagixisada, kuna fashilmay dagaaladii ka dhacay Magaalada Muqdisho iyo nawaaxigeeda. Max’ed Dheere oo gacan saar la leh Dowladda Itoobiya, ayaa waxaa la sheegay in uu aad u soo dhaweeyay go’aankii Baarlamaanka ee ahaa in dalka la keeno ciidamo ka socda wadamada safka hore, hase yeeshee wareysiyo uu horey u bixiyay Max’ed Dheere waxa uu si aad ah uga soo horjeeday in dalka la keeno ciidamo shisheeye, isagoo soo jeediyay in dib loo uruuriyo ciidamada xoogga dalka Soomaaliyeed, isla markaana tababar la siiyo kooxaha maleeshiyooyinka. Isku soo dhawaanshaha C/llaahi Yuusuf iyo Max’ed Dheere ayaa u muuqata sidii ay isugu baheysan lahaayeen maadaama Max’ed Dheere laga qabsaday xaruntiisii Gobalka Sh/dhexe. Warar kale ayaa waxay sheegayaan in hogaamiyayaashii doraad ka dhoofay magaalada Ceel-Buur ay gaareen Dalka Itoobiya, waxaana la sheegay in ay doonayaan sidii ay door uga yeelan lahaayeen arrimaha siyaasadda ee dalka Somaaliya. Maadaama looga xoog roonaaday dagaalkii Muqdisho.

Midowga Maxaakiimta oo sheegay in aysan aqoosan doonin...

Guddoomiye ku xigeenka Midowga Maxaakiimta Islaamiga ah Sheekh C/qaadir Cali Cumar ayaa waxa uu sheegay in Midowga Maxaakiimta Islaamiga ah ay sii adkeyn doonaa ammaanka iyo nabadgelyada magaalada Muqdisho iyo deegaanada kale ee ku xeeran.

Guddoomiye ku xigeenka ayaa mar wax laga weydiiyay sida ay u arkaan Maxkamadda ka furamaya gobalka Banaadir iyo deegaanada kale ee ku xeeran ayaa waxa uu yiri “Maxkamad aan ka tirsaneyn Midowga Maxaakiimta Islaamiga ah ma aqoosan doono”, waxa uuna sheegay in furitaanka Maxaakiimtu ay u baahan yihiin shuruudo, isla marakaan waa in ay noqdaan kuwo ay ka war qabaan Midowga Maxaakiimta Islaamiga ah.

Maxkamado fara badan oo aan ka tirsaneyn Midowga Maxaakiimta Islaamiga ah ka dhisan Magaalada Muqdisho, waxaana ka mid ah Xararyaale, Wardhiiglay iyo kuwo kale, iyadoo sidoo kale Degmada Karaan lagaga dhawaaqay Maxkamad Islaami ah.

Akhri qormadii Culamada ee 2004

Tikniko uu leeyahay Cabdi Nuure Siyaad oo gaaray Guri-Ceel...

Wararka naga soo gaaraya Degmada Guri-Ceel ee Gobalka Galguduud ayaa waxay sheegayaan in Tikniko uu leeyahay Cabdi Nuure Siyaad oo xubin ka ah isbahaysigii burburay ee la dagaalanka Argagixisada ay shalay gaareen Degmada Guri-Ceel.

Tiknikadaasi ayaa Cabdi Waal waxa uu ku wareejiyay beeshiisa, waxaana la sheegay in imaanshaha tiknikadaasi ee Degmada Guri-Ceel ay walaac gelisay dadweynaha degmada, maadaama Midowga Maxaakiimta ay soo gaareen deegaano ka tirsan Gobalka Hiiraan.

Odoyaasha uu ka soo jeedo Cabdi Nuure Siyaad ayaa waxay wadaan dadaal ay doonayaan in tiknikadaasi ay ka qayb-qaadato ammaanka degmada Guri-Ceel, iyadoo degmadaasi uu weli ku sugan yahay Sheekh Xasan Daahir Aweys oo xubin ka ah guddiga Shuurada ee Maxkamadda Islaamiga ah ee Ifka Xalan.

Dowladda Ku meel gaarka ah oo wada hadal kula jirta Maleeshiyo ka soo gadooday...

Waxaa degmada Buur-Hakaba ee Gobala Baay ku sugan Maleeshiyo iyo Tikniko ka soo gadooday magaalada Baydhabo, kadib markii ay halkaasi uga soo carareen Maleeshiyooyin taageeraC/Laahi Yuusuf oo iyagu gacanta ku dhigay goobihii ay horey u joogeen maleeshiyooyinkaasi, waxaa socda wada hadal iyo is afgarad.

Dowladda Federaalka ayaa waxaa la sheegay in beri ah u soo direyso ergo si ay ula xaajoodaan Maleeshiyoo-yinkaasi dibna loogu celiy xerooyinkii ay ku sugnaayeen waxaana haatan socda wada hadal lagu dhameynayo arrintasi, hase yeeshee Max’ed Ibraahim Bilaal oo ka mid ah siyaasiyiinta Beelaha Digil iyo Mirifle ayaa waxa u sheegay in ciidamadaasi aysan dib ugu laaban doonin Magaalada baydhabo, wuxuuna sheegay in ay dib ugu laaban karaan oo keliya iyadoo magaalada ay ka baxan dhamaan maleeshiyada ka soo jeeda Puntlanad.

C/llaahi Yuusuf iyo Geeddi oo si kala gooni gooni ugu kala ambabaxay..

Maalintii shalay ahayd ayaa waxaa garoonka Diyaaradaha ee Magaalada Baydhabo ka ambabaxay Madaxweynaha Dowladda Federaalka C/llaahi Yuusuf Axmed iyo Ra’isul Wasaare Cali Max’ed, subixii hore waxaa baxay Madaxweyne C/laahi Yuusuf Axmed oo isagu u kicitimay dalka Itoobiya, waxaana la filayaa in magaalada Adis-Ababa uu kulan kula yeesho Ra’isul Wasaaraha dalka Itoobiya Milless Sanawi oo ay isla soo qaadi doonaan sidii ciidamada Itoobiya ay qayb uga noqon lahaayeen ciidamada nabad ilaalinta ah ee loo dirayo, iyadoo haatan la og yahay in ciidamo ka tirsan Dalka Itoobiya ay ka gudbeen xuduudka Soomaaliya iyo Itoobiya.

Ra’isul Wasaaraha oo isna shalay galabnimadii baxay ayaa waxaa uu gaaray wadanka Kenya, waxaana la filayaa in uu kaga sii gudbo wadanka Suudaan oo uu kaga qaybgalayo shir ay isugu imaanayaan madaxda wadamada Afrika.

Dalka Suudaan ayaa horey waxa uu sheegay in Soomaaliya uu u soo u dirayo ciidamo nabad ilaalin ah oo ka qayb-qaata amnigii iyo kala dambeyntii.

DHegeyso VOA::: oo ka warbixinaya Soomaaliya:: June 20, 2006
 

W/D Amiin Yuusuf Khasaaro

E-Mail amiinkhasaaro@hotmail.com

Faafin: SomaliTalk.com | June 21, 2006

Midowga Maxaakiimta Islaamiga ah oo aad uga xumaadey hadalkii Geedi..
. Nairobi oo laga Canbaareeyeyey Go'aankii Baarlamanka
. Xildhibaanadii ku sugnaa Magaalada Baydhabo oo..
. Dowladaha Mareykanka iyo Yemen oo ka wada hadley..
. Maxkamadda Islaamiga ah ee Ifka xalan oo xukun ...
. Hay'adda COGWO oo wacyigelin dhinaca nabadda ah u..
. Somali Badan oo lagu xirxiray Garissa iyo Wajeer...
. Wasiirka Xanada Xoolaha Dawlada oo sheegay in...
. Dagaal Gunagado ka dhacay oo gumaysiga lagu jabiyay.
. Dhalinyaro ka tagay magaalooyinka oo ciidammada...
Wararka oo dhan ka akhri halkan... Guji... Jun 20

Xafladii Nugaal University ee Minnesota U.S.A
Xaflad aad loo soo agaasimey ayaa lagu qabtey badhtamaha magaalada Minneapolis, Minnesota... Guji....

•  Taariikh Kooban Soomaaliya: 1960 - 2006