Wafdi ka socda Dowladda Mareykanka oo ku soo jeeda Muqdisho...

Warar aanu helnay ayaa waxay sheegayaan in wafdi ka socda Dowladda Mareykanka ay maalmaha soo socda soo gaari doona Magaalad Muqdisho si ay wada hadal ula yeeshaan Midowga Maxaakiimta islaamiga ah oo iyagu doonaya in ay taageero ka helaan beesha Caalamka oo uu ugu horeeyo Mareykanka.

Wafdigaan oo heer Diblamaasiyadeed ah ayaa la sheegay inay imaanshahooda ogolaadeen Midowga Maxaakiimta Islaamiga ah.

Sheekh Shariif Sheekh Axmed ayaa horey u sheegay in ay diyaar u yihiin in ay wada shaqeyn dhex marto iyag iyo Mareykanka,. hase yeeshee Sheekh Shariif waxa uu u soo jeediyay inay u hogaansanto rabitaanka Shacabka Soomaaliyeed oo iyagu kacdoon ku riday hogaamiyaasha kooxaha oo mudo lix iyo taban sano ah xoog ku haystay shacabka gobalka Banaadir.

Dhanaca kalana Dowladda Yemen ayaa wada sidii ay u dhex dhexaadin lahayd Dowladda Federaalka iyo Midowga Maxaakiimta Islaamiga, waxaana la sheegay in labada dhinac ay si weyn u aqbaleen.

Maxkamad Islaami ah oo laga furay Magaalada Mahadaay…

Wararka naga soo gaaraya Magaalada Mahadaay oo ka tirsan gobalka Sh/dhexe, waxay sheegayaan in maalintii shalay ahayd magaaladaasi looga dhawaaqay Maxkamad Islaami ah oo ka mid noqoneysa Midowga Maxaakiimta Islaamiga ah oo iyagu maalin maalinta ka dambeysa ay awoodoodu sii kordheyso, waxaana ka qaybgalay mas’uuliyiin ka tirsan Midowtga Maxaakiimta Islaamiga ah. Maanta ayaa la filayaa in banaanbax lagu t aageerayoi Magaalada Mahadaay uu ka dhacao Magaaladaasi, sidoo kale Maxkamad Islaami ah ayaa looga dhawaaqay Degmada Yaqshiid oo ka tirsan Gobalka Banaadir.

C/llaahi Yuusuf “Haddii ay Maxaakiimtu ay Aqoonsadaan waan la kulmayna...”

C/llaahi Yuusuf oo ah Madaxweynaha Dowladda Federaalka oo dib ugu soo laabtay Magaalada Baydhyabo ayaa si weyn u soo dhaweeyay go’aankii Baarlamaanka ee ahaa in dalka la keeno ciidamo shisheeye isagoo sheegay in go’aankaasi uu ahaa mid mar horey la sugayay.

Mar wax laga weydiiyay is bedelka ka dhacay Magaalada Muqdisho ayuu C/llaahi Yuusuf ku jawaabay “Horey ayaan u soo jeediyay in Maxaakiimtu ku ekaadaan Muqdisho aysan u gudbin gobalada kale, waxaana haatan kula talinayaa in ay ka baxaan gobalada ay joogaan”, waxa uu intaasi sii raaciyay “waxaan u arkaa in ay yihiin Qatar, balse waa in ay ka haraan awooda qoriga oo ay wax walba ku xaliyaan wada hadal iyo is afgarad”.

“Marka ay aqoosadaan Dowladda Federaalka ayaan wada hadal la galeynaa balse inta uu qalbigoodu ku jiro is balaarin iyo siyaasad ku dhisan gursi wax wada hadal ah la gali meyno” ayuu yiri C/llaahi Yuusuf oo sheegay in uu qoraal ka helay Madaxweynaha wadanka Yemen, waxa uuna C/llaahi Yuusuf sheegay in uu Madaxweynaha Yemen ka codsaday in ay wada hadal u furaan iyaga iyo Midowga Maxaakiimta, waxaa kaloo uu sheegay C/llaahi Yuusuf in Madaxweynaha Yemen uu u sheegay in haddii ay Dowladda Aqoosadaan Midowga Maxaakiimtu ay wada hadal diyaar ula yihiin.

Hubkii Muuse Suudi oo wali uu ka taagan yahay Muran Xoogan...

Warar ayaa waxay sheegayaan in Muuse Suudi Yalaxow iyo Bashiir Raage ay ka ambabaxeen Magaalada Muqdisho ayna ku baxeen Dooni soo gaartay Xeebta Mariino maalintii doraad ahayd.

Ilaa iyo hadda lama oga halka ay ku kicitimeen labadaasi xubnood oo ahaa rag ugu cad caddaa Isbahaysigii burburay ee la dagaalanka Argagixisada kaddib markii ay ka adkaadeen Midowga Maxaakiimta Islaamiga ah. Warar ayaa waxay sheegayaan in Muuse Suudi uu dhaqaaqay dhinaca Cadale iyo Warshiid, warar kale ayaa waxay leeyihiin waxaa laga yaabaa in doontii siday ay gaartay Markab uu Mareykanku leeyahay oo taagan xeebta.

Muuse Suudi waxa uu ka tagay hub aad u fara badan oo isugu jira Qoryaha Lidka Diyaaradaha, madaafiicda Goobta, Gawaarida Gaashaa-man iyo Qoryaha darandooriga u dhaca, waxaana la sheegay in Maleeshiyadii haystay hubkaasi ay maalintii shalay ahayd isku qabsadeen hubkaasi, hase yeeshee Muuse ayaa hubkaasi waxa uu uga tagay taliye ku xigeenkiisii Cali Dalable.

Odoyaasha uu ka soo jeedo Muuse Suudi ayaa iyagu waxay dadaal ugu jireen sidii hubkaasi uu u noqon lahaa hub ay leedahay Beesha, si loogu sameeyo Maxkamad Islaami ah.

Odoyaasha iyo Kooxaha Maleeshiyooyinka ayaa haatan waxaa u dhexeeya muran aad u xoogan, hase yeeshee qaar ka mid ah Odoyaasha ayaa waxaa la sheegay in ay u yeereen Maxaakiimta Islaamiga ah si ay goob joog uga noqdaan wareejinta hubkaasi si hubku u noqdo mid loogu shaqeeyo Maxkamadda Islaamiga ah ee la filayo in looga dhawaaqo Waqooyiga Muqdisho.