Sheekh Qaasim “Haddii ay
yihiin ciidamo Qaran maxay u laayeen dadkii u soo Gurmadey..”
Sheekh
Qaasim Ibraahim Nuur oo ka mid ah Siyaasiinta Beesha Geeladle oo shir jaraa’id
ku qabtay hoolka shirarka Baarlamaanka FKMG ee Magaalada Baydhabo ayaa shirkiisa
jaraa’id ku sheegay sababaha keeney dilka Ugaas Samoow Cabdi garuun, isagoo
arimahaasi ka hadlaya ayaa wuxuu qaybaha saxaafada gudaha iyo dibada u qaybiyey
qoraal ka kooban labo bog. Sheekh Qaasim oo ah ehelada ugaaska ayaa wuxuu
sheegay in dagaalka markiisa hore ay sabab u ahayd in ciidamo ka tirsan ilaalada
Madaxweynaha oo ka yimid Saldhiga Manaas ay soo Afduubteen 4 nin oo maleeshiyo
ah oo joogay bar isbaaro oo ka baxsan Magaalada Baydhabo una jirta qiyaas 3km
kuwaasoo ka tirsanaa Beesha Ugaaska, hase ahaatee markii ay maqleen
maleeshiyooyinka Beesha ayaa waxay weerar ku qaadeen Xarunta Madaxweyne
Col/C/llaahi Yuusuf iyadoo markaasi dhalinyaradaasi lagu haystay meel u dhow
Madaxtooyada DFKMG.
Ugaas Seemoow cabdi Garuun oo
arinta ka warhelay ayaa si degdeg ah ugu gurmaday si uu u joojiyo dagaalkaasi,
isagoo arintii maleeshiyooyinka ku dhexjira xalintooda ayaa lagaga soo furay
dhinaca ilaalada Madaxtooyada Xabado, waxaana halkaasi ka dhacay dagaal xoog leh
oo socday mudo saacad ku dhow, markii uu dagaalka joogsaday daqiiqado kadib
Ugaaska oo ay la socdaan laba xubnood iyagoo markaasi ku sugnaa agagaarka
Isbitaalka Magaalada Baydhabo ayaa la toogtay maalinimadii Jimcaha 9/6/006
isagoo gacanta ku haadinaya maro cad, waxaana toogtay ilaalada Madaxtooyada,
sedaxdoodii waxaa ka badbaaday hal ruux, kaasoo sheegay in Ugaaska uu u dhintay
dhiigbax, kadib markii ay diideen maleeshiyooyinkii toogtay Ugaaska in la
qaado, dadkii u soo gurmaday oo ka mid ahaa Xildhibaan Maxamed Xuseen Afaraale
ayaa goobtii ku dhaawacmay iyo lix ruux kale, waxaana isweydiin mudan haday
Ciidamo Qaran yihiin Maxay dadka u soo gurmaday Ugaaska ay u laayeen ayaa
qoraalkiisa ku xusnaa Sheekh Qaasim Ibraahim Nuur. wuxuu intaa ku daray in Dilka
ugaaska loo saaray Baaris Gudi heer qaran ah oo uu Gudoomiye u yahay Raysul
Wasaare ku xigeenka dowlada ahna Wasiirka Maaliyada Saalim Caliyoow Ibrow.
C/llaahi Yuusuf iyo Geeddi
maxay ka dooneen wadanka Kenya…?
Madaxweyne C/llaahi Yuusuf iyo
Ra’isul Wasaare Geeddi ayaa shalay si gooni gooni ah ugu ambabaxay magaalada
Nayroobi ee dalka Kenya, Ra’isul Wasaaraha ayaa waxaa la sheegay in uu ka
qaybgalayo shir ay isugu imaan doonaan madaxda wadamada IGAD oo looga
arrinsanayo arrimaha Soomaaliya, halka Madaxweynaha uu isna Magaalada Nayroobi
kulamo kula yeelan doono wadamada Deeqda Bixiya oo iyagu horey u sheegay in ay
gargaar balaaran siin doonaan Dowladda Federaalka. Warar ayaa waxay sheegayaan
in Madaxweynuhu uu Nayroobi kula kulmo madax ka socda wadamada Uganda iyo Suudan
oo iyagu ballanqaaday in ay Soomaaliya u soo diri doonaan ciidamo nabad ilaalin
ah. Waxa magaalada Nayroobi sina gaaray Madaxweynaha dalka isku magacaabay
Somaliland Daahir Riyaale Kaahin, iyagoo warar qaar ay sheegayaan in Daahir
Riyaale uu halkaasi u tagay sidii uu maamulkiisu qayb uga noqon lahaa lacago
deeq ah oo la siinayo Soomaaliya.
Dowladda Itoobiya oo ka codsatay IGAD
in ay qayb ka noqdaan Ciidamda…
Warar aanu helnay ayaa waxay
sheegayaan in Dowladda Itoobiya ay warqad qoraal ah u dirtay dhamaan wadamada ku
bahoobay IGAD, waxayna warqaddaasi ku saabsaneyd sidii Ciidamada Itoobiya ay
qayb uga noqon lahaayeen ciidamada nabad ilaalinta ee loo soo dirayo Soomaaliya.
Wadamada IGAD ayaa qorsheeyay in
ay Soomaaliya u soo diraan ilaa iyo 7-Kun oo Askari oo min labo kun ay ka
imaanayaan wadamada Suudaan iyo Uganda oo iyagu horey u ballanqaaday
ciidamadaasi, wararku waxa uu intaasi ku darayaa in wadamada IGAD laga yaabo in
ay ogolaadaan in ciidamada Itoobiya ay galaan gudaha wadanka Soomaaliya, waxay
su’aale ka taagan tahay sidii shacabka Soomaaliyee loo ogoleysiin doono in
Ciidamo Itoobiyaan ah ay ka qayb-qaataan nabad ilaalinta iyo hub ka dhigista
Soomaaliya.
Doodii ku saabsaneyd keenista
Ciidamo oo maaanta mar kale la isgu iimaanayo..
Maalintii shalay ahayd ayaa
golaha Baarlamaanka waxa uu fadhi ka yeeshay ajande ay Xukumadda Cali Max’ed
Geeddi u soo gudbisay Golaha Baarlamaanka kaasoo ahaa in dalka la keeno ciidamo
shisheeye.
Dooda oo uu shir guddoominayay
Shariif Sheekh Aadan ayaa xubnihii halkaasi ka hadlay waxay sheegeen in
waqtigaan loo baahneyn in soomaaliya la keeno ciidamo shisheeye iyagoo tu’aalse
u soo qaaday ciidankii nabad ilaalin ee la keenay sanadihii sagaashameeyadii oo
uu howlgalkooda noqday mid fashilmay, waxayna sheegeen in howlgalkaasi ay ku
baxday lacag gaareysa Labo Bilyan oo Doolar.
Qaar ka mid ah Xildhibaanada
Baarlamaanka ayaa iyana waxay soo jeediyeen in waqtigaan loo baahan yahay in
dalka la keeno ciidamo shisheeye waxayna iyana sabab uga dhigeen maadaama
Ummadda Soomaaliyeed aysan waqtigaan is aaminsaneyn loo baahan yahay koox
saddexaad oo hubka loo dhiibo, halka kuwo kale ay sheegeen in ciddii go’aamisa
in dalka la keeno ciidamo shisheeye mar un lala xisaabtami doono wixii dhibaato
ah ee ka yimaadana iyagu dusha u ridan doonaan.
Shalay oo la filayay in cod loo
qaado keenista ciidamo shisheeye ayaa dib loo dhigay, waxaana la filayaa in
maanta cod loo qaado, iyadoo ay ka maqan yihiin Madaxweyne C/llaahi Yuusuf Axmed
iyo Ra’isul Wasaare Cali Max’ed Geeddi.
Xarunta Ismaaciil Jimcaale oo
Siminaar u soo gabagabeysey ..
Maalintii shalay ahayd ayaa
Hotel Ambassador ee magaalada Muqdisho waxaa lagu soo gebagabeeyay siminaar
socday mudo saddex maalmood ah oo ay soo qaban-qaabisay xarunta Ismaaciil
JImcaale oo inta badan ka hadashada ama uruurisa tacadiyada ka dhaca wadanka.
Simaarkaan oo ay ka qaybgaleen
qaybaha kala duwan ee Bulshada ayaa waxay ku baranayeen sidii bulshada
Soomaaliyeed u dhowri lahaayeen Xaquuqda Aadanaha, sidoo kale waxay ku
baranayeen arrimo la xiriira dhinaca nabadda iyo dib u heshiisiinta.
Ugaas Bashiir oo ka mid ahaa ka
qaybgalayaashii Siminaarkaasi ayaa u mahadceliyay Xarunta Ismaaciil Jimcaale,
isagoo sheegay in wixii halkaan ku barteen ay u gudbin doonaan bulshada
Soomaaliyeed ee aan fursadda u helin, waxaa kaloo halkaasi ka hadlay Maryan
Xuseen Owreeye oo ah gudoonka xarunta, waxayna sheegtay in haddii la dhowro
Xaquuqda Aadanaha ay wax walba hagaagi karaan, hana noqoto dhinaca nabadda iyo
dib u heshiisiinta, waxay kaloo sheegtay in sababaha loo qabtay Siminaarkaani uu
yahay sidii bulshada loogu wacyigelin lahaa Xaquuqda Aadanaha.
W/D Amiin
Yuusuf Khasaaro
E-Mail
amiinkhasaaro@hotmail.com
Barnaamijkii Radio Xoriyo
13 Jun 2006
Gumaysiga Itoobiya oo
jawaasiis badan qortay.
Jaaliyadda Ogadenya ee
Koonfur Afrika oo shir isugu timid.
Jabhadda EPPF oo
ciidammo Itoobiyaan ah caydhis ku galisya Suudaan.
Maraykanka oo qabanaya
shir caalami ah oo Soomaaliya ku saabsan.
======================
Ciidammada
gumaysatada Itoobiya ayaa la sheegayaa inay qorteen boqollaal qof oo
jaajuusnimo ugu shaqeeya, kuwaasoo la doonayo inay la shaqeeyaan qaybaha
sirdoonka ee ciidammada gumaysiga, isla markaana ay u soo sheegaan dadka
taageera ama ka tirsan Jabhadda Waddaniga Xoreynta Ogaadeenya.
Jaajuusiintan
cusub ee la qoray, waxay sidoo kale la shaqaynayaan ragga gumaysiga u adeega
ee ka tirsan maamulka Kilil ku-sheegga Soomaalida. Jaajuusiintan ayaa la
sheegayaa in laga soo xulay qaybaha kala duwan ee bulshada oo dhan, sida
dadka ku shaqeeya meheradaha ay ka midka yihiin baalashka, biya-dhaaminta,
wadayaasha tagaasida iyo xoogsatada caadiga ah, waxaana la sheegayaa in
jaajuusiintan cusub ee la qoray ay tiradoodu gaadhsyo 600 oo qof.
Xukuumadda
gumaysatada Itoobiya ayaa si wayn u kordhisay argagixinta dadwaynaha. Waxaa
dadwaynaha loo xidhxidhaa si xad ka bax iyadoon loo sheegin denbiyada loo
haysto, waxaana qorshaha ugu jirta inay layso dad badan oo bulshada
dhexdeeda magac ku leh, si ay dadwyanaha baqdin ugu riddo. Arrintan ayay
xukuumadda Itoobiya billowday, ka dib markii ku guul darraysatay dagaalka ay
kula jirto ciidammada xoreynta Ogaadeenya.
Jaaliyadda
Ogadenya ee Koonfur Afrika oo shir isugu timid.
Markii ay taariikhdu ahayd
11.06.6006 waxaa gobalka Eastern Cape ee dalka Koonfur Afrika ka dhacay shir
ballaadhan oo ay isugu timid Jaaliyadda Ogaadeeniya ee dalka Koonfur Afrika.
Shirkan oo ay ka soo qayb galeen dadweyne aad u farabadan waxaa warbixin
dheer oo meelo badan taabanhaysa ka jeediyay Mudane Cali Axmed Xuseen oo ah
xubin ka tirsan Golaha Dhexe ee JWXO.
Mudane Cali dheere ayaa si
waafi ah uga warbixiyay ololaha millatari ee ciidammada gumaysigu ka wadaan
dalka Ogaadeenya, wuxuuna sheegay in ololahan millatari ay xukuumadda
Itoobiya seddex arrimood uga jeeday. Inay ugu googol-xaadho sharikadaha
shidaalka ee ay heshiiska kula gashay inay Ogaadeenya ka soo saaraan shidaal
iyo gaas dabiici ah, iyo inay caalamka tusto inay wali leedahay awood
millatari oo ay ku muquunin karto ciddii ka hortimaado, iyo ugu denbayntii
inay kordhiso cadaadiska iyo cabidhinta ay ku hayso dadwaynaha soomaalida
Ogaadeenya, si ay u qab-jabiso, isla markaana ugu qasabto inay dhimaan
taageerada ay u hayaan halganka hubaysan ee ay hormuudka ka tahay JWXO.
Mudane Cali dheere wuxuu
sidoo kale ka xogwarramay Isbahaysiga Xorriyada iyo Dimuqraadiyada ee JWXO
xubinka ka tahay ee dhawaan lagu asaasay dalka Holland. Wuxuuna caddeeyay in
ku biirista Isbahaysigani ayna ka dhignayn in JWXO ka tanaasushay
mabaadii’deedii ahayd halganka xornimo doonka, balse uu Isbahaysigu yahay oo
kaliya aalad loo adeegsanayo fududaynta ridista maamulka Wayaanaha ee dalka
Haysta, isla markaana ay mabaadii’da asaasiga ah ee Isbahaysiga ku jirto
inaan uruna lagu faragalinin xeerarkiisa iyo barnaamijyadiisa siyaasadeed
iyo waliba qaabka uu u fulinayo barnaamijyadiisa.
Ugu danbayntii wuxuu xubnaha
Jaaliyadda Koonfur Afrika ku guubaabiyay inay sii xoojiyaan taagerada ay u
fidiyaan ciidammada xaq u dirirka ah ee JWXO ee dagaalka xornimo raadinta ah
kula jira ciidammada gumaysiga Itoobiya.
Jabhadda EPPF oo ciidammo
Itoobiyaan ah caydhis ku galisya Suudaan.
Jabhadda la dagaallanta
maamulka Wayaanaha ee Addis Ababa ak taliya ayaa sheegtay inay jab wayn u
gaysatay ciidammada Wayaanaha ka dib markii ay weerar ku qaaday fadhiyo ay
ku leeyihiin woqooyiga galbeed ee dalka Itoobiya, sidaas waxay Jabhaddu ku
sheegtay bayaan ay toddobaadkii hore soo saartay.
Jabhadda EPPF waxay
bayaankan ku sheegtay inay weerar ku qaaday xero ay ciidammada Wayaanuhu ku
lahaayeen meesha lagu magacaabo Owara oo ku taalla woqooyiga galbeed ee
Itoobiya. Bayaanku wuxuu kaloo intaas ku daray in ciidammadii xeradaas ku
sugnaa ay kala firxadeen, isla markaana uu firxadkoodii galay xadka Suudaan.
Jabhadda EPPF waxay
bayaankan ku sheegtay in ciidammadii Wayaanaha ee xeradaas fadhiyay ay
cagohooda miciinsadeen, isla markaana orod ku galeen xadka Suudaan.
Jabhadda EPPF ayaa baryahan
denbe xoojisay hawlagallada ka waddo nawaaxiga Gonder iyo Gojam, waxayna
waddaa olole ay dadka meelahaas deggan ku wacyi galinayso, isla markaana ku
abaabulayso, si ay gacan ugu siiyaan dagaalka hubaysan ee ay kula jirto
maamulka Wayaanaha.
Maraykanka oo qabanaya
shir caalami ah oo Soomaaliya ku saabsan.
Dawlada Maraykanka ayaa
qabanqaabinaysa shir caalami ah oo lagaga hadlayo arrimaha Soomaaliya,
kaasoo ay ka soo qayb galayaan wadammo kala duwan iyo ururro caalami ah,
sidaas waxaa isniintii shaaca ka qaaday afhayeenka wasaarada arrimaha dibada
ee Maraykanka.
Shirkan ayaa la qaban doonaa
maalinta khamiista ah ee bisha Juun 15-ka tahay, waxaana lagu qaban doonaa
magaalada New York, wuxuuna afhayeenka wasaarada arrimaha dibada ee
Maraykanku sheegay in dawlada Maraykanku ay wali ka shaqaynayso liiska
dalalkii sida rasmiga ah shirkan uga qayb gali lahaa iyo kuwa
goobjoogayaasha ka noqonaya.
Shirkan waxaa guddoomin
doontaa kaaliyaha xoghayaha arrimaha dibada ee Maraykanka u qaabilsan
arrimaha Afrika Jandayi Frazer. Wadammada uu Maraykanku ilaa iyo hadda uu
xaqiijiyay inay shirkan ka soo qayb galayaan waxaa ka mid ah Britain,
Talyaaniga, Swedan, Norway iyo Tanzania. Waxaa sidoo kale shirka ka qayb
gali doonta Qaramada Midoobey.
Maraykanku wuxuu sheegay
inuu wali ka baaraan-degayo in shirkan ay ka soo qayb galaan wadammada
Eritereya iyo Itoobiya iyo in kale.
13
Jun 2006.
Axmed Gaal-Eri
Info@radioxoriyo.com
raadioxoriyo@yahoo.com
Radio Xoriyo waxaad ka dhegaysan kartaa Mawjadda 25 MB ee dhererkeedu yahay
11865 KHZ,iyo internetka Radioxoriyo.com,Ogaden.com Maalmaha Talaadada iyo
Jimcaha 7: 30PM waqtiga Afrikada Bar
Faafin: SomaliTalk.com | Jun 13, 2006
Sheekh Shariif
“Wada hadal la Galimeyno Dowladda inta ay daba joogto.....”
»Caasho Axmed “C/llaahi
Yuusuf waxa uu wadaa wixii...
»C/llaahi "Daacad"
muxuu ka yiri is bedelka cusub ee ku soo..
»Maleeshiyada Muuse
Suudi oo ka baxay Isbitaalka Keysanay
»Shirkada IBM oo
maalgashi ku sameyneysa dalka India...
Wararka oo dhan
ka akhri halkan.... Guji... Jun 12
Sheekh Shariif "Lagama
Fursanayo Dagaal Haddii aysan....."
»Ururka Midowga
Afrika oo soo dhaweeyay Isbedelka ka dhacay..
»C/llaahi Yuusuf
“Beelaha Digil iyo Mirifle.u soo jeediyey in ay .”
»Hay’ado
cambaareeyay dilkii loo gaystay Malaq Seemow..
»Ma dhabaa in MSN
Messenger-ka uu lacag noqon doono.?
Wararka oo dhan
ka akhri halkan.... Guji... Jun 11
Warbixin ku
saabsan dagaalkii ka dhacay Baydhabo..
»Indha-Cadde
“kooxihii laga adkaaday waxay doonayaan in..
»Saraakiil Mareykan
ah oo ku soo jeeda Magaalada Baydhabo
»Dowladda Itoobiya
oo si taxadar leh uga hadashey is....
»Beesha Gaal Jecel
oo shaley Furatey Maxkamad Islaami ah
Wararka oo dhan
ka akhri halkan... Guji.. Jun 10
»Isbeddelka
aasaasiga ah ee ka dhacay Muqdisho| Abokor
»Talo-siin
Maxkamadaha iyo Maanso. | Caliqeyr
»Maxaa sababay
isbadka Muqdisho? Sidee buu ku waari karaa? | Caafi
»Ba' Dagaal
Oogaha, Barkhada Wadaadada iyo Baraaraha Shacabka
»Muqdisho:
shalay, maanta iyo barri (Q. 1aad/2aad) | Axmad
»Horumarka
Maxkamadaha Mogadishu: Guul mise Khatar? | Faysal
»Taladaan la
Ruugin, Waa Lagu Rafaadaa | C/xakiim
»WARQAD
FURAN OO KU SOCOTA MIDOWGA MAXAAKIINTA | Cumar
»Talo Wax-ku-ool ah
oo ku socota Maxkamadaha Islaamka | Yusuf
»Aynu wada dhawrno....
| Jaamac
»MUQDISHO
WAA LOO YAABAA | C/laahi
Daabaco
Boggan | Print