Daabaco Boggan | Print

WARARKII JUNE 8, 2006

• Ibraahim Nuur Xabeeb “haddii aysan Dowladdu qaadan ku Dhaqanka Shareecadda..”
• Kulan ka soo horjeeda kulankii Mowlaca Sheekh Shariif oo ka dhacay..
• Mareykanka oo mar kale doonaya in uu soo noleeyo xiriirkii..
• Banaanbaxyo iska soo horjeeda oo shalay ka dhacay Muqdisho...
• Macallin Xaashi “markii Max’ed Qanyare nagu soo soo duulayey xaguu jirey Mudulood..”
• Kulan ay isugu timid Beesha Sacad o looga hadlay Isbedelka...
• Wasiirudowlaha Arrimaha Dibada Sweden, Annika Söder: "Ayaan darro weeyaan in markale dagaalo ka dhacaan Soomaliya"
• Dagaallo cadowga lagu naafeeyay.

  ---

Ibraahim Nuur Xabeeb “haddii aysan Dowladdu qaadan ku Dhaqanka Shareecadda..”

Wasiiru-Dowlaha Dibu dhiska iyo Dibudejinta DFKMG ee Soomaaliya Ibraahim Nuur Xabeeb ayaa ka hadlay isbedelada ka soo cusboonaaday Magaalada Muqdisho fikirka uu ka qabo ,kacdoonka ay sameeyeen Shacabka Muqdisho iyo waxa la gudboon Dowlada FKMG ee Soomaaliya. Wasiiru Dowlaha isagoo arimahaasi ka hadlaya waxaa uu yiri “Waxaan aaminsanahay in dalka Soomaaliya lagu Xukumo Shareecada Islaamka, sida ku qoran j Axdi Qarameedka oo sheegaya in wax kasta oo Shareecada Islaamka ka hor imaanaya ay yihiin waxba kama jiraan” isagoo hadalkiisa sii wata ayaa intaa ku daray “Kacdoonka ay sameeyeen qaybaha kala duwan ee Bulshada ku dhaqan Magaalada Muqdisho, waa inay ka faa’iidaystaan waayo aragnimadii 16-ka Sano ee la soo dhaafay ee ku dhisnayd Xukun jaceylka, Qabqab dhaafay iyo Qabiil aan guulna lagu gaarin, Cid kasta fikirka ay qabto waxaa haboon inay ku kabto Dowlada Dhexe ee Soomaaliya”. wuxuu keloo sheegay Wasiiru-Dowluhu “waxa la gudboon Dowlada Dhexe inay siiso Ahmiyada koowaad iyo Rabitaanka Shacabka Soomaaliyeed ee kuwajahan in dalka lagu Xukumo Shareecada Islaamka”.

Mar uu ka hadlaayey Wasiiru-Dowluhu haddii Dowladu ay ku shaqayn weydo rabitaanka Shacabka ayaa wuxuu yiri “Hadii Dowladu ay ku shaqeyn weydo rabitaanka shacabka wixii uga yimaada shacabka iyadaa miraheeda guran doonto”. Shacabka Soomaaliyeed guud ahaantiisa gaar ahaan Reer Muqdisho waxaan ugu Hambalyeeynayaa guusha ay gaareen iyaga iyo Maxkamadaha Islaamiga ah, waxaana u soo jeedinayaa inay ka digtoonaadaan wax kasta oo gudahooda khilaaf ka dhex abuuri kara, una diyaar garoobaan sidii wada xaajood ay ula geli lahaayeen Xukuumada si Qarankii Soomaaliyeed loo badbaadiyo ayuu hadalkiisa ku soo koobay Wasiiru dowlaha Dibudhiska iyo Dibudejinta DFKMG Ibraahim Xabeeb Nuur.

Kulan ka soo horjeeda kulankii Mowlaca Sheekh Shariif oo ka dhacay..

Waxaa maalintii shalay ahayd Hotel Ramadaan kulan ku yeeshay Waxgarad, Odoyaal iyo Siyaasiyiin ka tirsan Beesha Mudullood, waxaana kulankaasi looga hadlay go’aanadii ka soo baxay kulankii ka dhacay Mowlaca Sheekh Shariif Sheekh Muxiyadiin, waxaana xubnihii ka qaybgalay kulankaasi ay sheegeen in go’aanadii ka soo baxay Mowlaca Sheekh Shariif ay ahaayeen kuwo aan loogu daneyn Beesha Mudullood.

Xubnihii ka hadlay waxaa ugu cadcadaa Xuseen Xaaji Bood oo sheegay in Is bedelka ka dhacay Magaalada Muqdisho loo baahan yahay in ay beesha Mudullood la saan-qaado si loo gaaro nabad buuxda, waxaa kaloo ka hadlay Sheekh Muuday Gacal oo sheegay in uu aad uga xun yahay in Mowlaca Sheekh Shariif Sheekh Muxiydiin uu noqdo mid mar kale lagu burburiyo ku dhaqanka shareecadda Islaamka, waxaa kalloo ka hadlay Guddoomiyaha Gobalka Banaadir Maxamuud Xasan Cali Cadde Gaabow oo sheegay in Beesah Mudullood aysan noqon beel is hortaagta rabitaanka shacabka.

Mareykanka oo mar kale doonaya in uu soo noleeyo xiriirkii..

Warar aanu helnay ayaa waxay sheegayaan in Dowladda Mareykanka ay dooneyso in ay boorka ka jafto xiriirka u dhexeeya Dowladda Federaalka iyo Iyada, kaddib markii xiriirkaani uu xumaaday Markii ay dowladda Mareykanku ay taageero xoog leh siisay hogaamiye kooxeedyadii dagaalka ka waday magaalada Muqdisho.

Waxaa soo gaaraya Dowladda Federaalka Fariimo u badan taageero, waxaa la sheegay in Ujeedada ka dambeysa xiriirka cusu ay tahay kaddib markii uu Mareykanku ku fashilmay dagaalkii ka dhacay Magaalada Muqdisho, haatanna uu doonayo in arrinta u weeciyo dhinaca dowladad.

Siyaasi diiday in magaciisa la sheego kuna sugan magaalada Baydhabo ayaa waxa uu sheegay in Mareykanku uu mar kale doonayo in uu iska horkeeno Midowga Maxaakiimta Islaamiga iyo Dowladda federaalka, isagoo ku beer-laxowsanaya in uu ka qaadayo cunaqabateynta hubka si ay dowladdu u hesho hub fara badan ugana hor tagto Midowga Maxaakiimta.


Banaanbaxyo iska soo horjeeda oo shalay ka dhacay Muqdisho...

Banaanbaxyo iska soo horjeeda oo lagu kala taageerayay go’aankii ka soo baxay Mowlaca Sheekh Shariif Sheekh Muxiyadiin iyo Midowga Maxaakiimta Islaamiga ah ayaa waxay ka kala dhaceen garoonka Banaadir iyo Isgoyska Fagax.

Haddii aan ku horeyno kii ka dhacay Garoonka Banaadir, waxaa isugu soo baxaay dadweyne aad u fara badan, waxaana ka soo qaybgalay xubno ay ka mid ahaayeen Muuse Suudi iyo Bashiir Raage, waxayna dadkii ka qaybgalay banaanbaxaasi ay sheegeen in Midnimada Mudullood ay tahay muqadas loona baahan yahay in laga hortago cid kasta oo dooneysa in ay carqaladeyso.

Muuse Suudi oo banaanbaxaasi ka hadlay ayaa waxa uu sheegay in ay dib u soo laabato wadajirkii Beesha Mudullood, waxayna Bulshada ugu baaqay in ay soo dhaweeyaan go’aankii ka soo baxay Mowlaca Sheekh Shariif.

Banaanbax iyana lagu taageerayay Midowga Maxaakiimta Islaamiga ah loogana soo horjeeday go’aankii ka soo baxay Mowlaca Sheekh Shariif ayaa waxa uu ka dhacay Isgoyska Fagax, waxayna dadku ku dhawaaqayeen ereyo ay ka mid ahaayeen “ma fileyn in Mowlaca Sheekh Shariif Sheekh Muxiydiin uu noqdo mid lagu burburiyo Diinta Islaamiga”, waxaana halkaasi hadalo ka jeediyay Guddoomi-yihii hore ee Maxaakiimta Islaamigaa Sheekh Cali Dheere oo yiri “kuwii burburiyay Maxkamadihii Islaamiga ahaa ee Waqooyiga Muqdisho kuna kaadiyay Shareecadda Islaamka, ayaa maanta waxay doonayaan in ay mar kale burburiyaan ku dhaqanka Shareecadda Islaamka iyo Rabitaanka shacabka”.

Sheekh Cali Dheere waxa uu u soo jeediyay Beesha Mudullood in ay ka digtoonaadaan kuwa aan dooneyn noloshooda iyo rabitaankooda.

Macallin Xaashi “markii Max’ed Qanyare nagu soo soo duulayey xaguu jirey Mudulood..”

Macallin Xaashi oo ka mid ah Mas’uuliyiinta Degmada Balcad ayaa jawaab kulul ka bixiyay go’aanadii ka soo baxay Mowlaca Sheekh Shariif Sheekh Muxiyadiin, waxa uuna yiri “aad baan uga xunnahay in la hor istaago ku dhaqanka Shareecadda Islaamka”, mar uu ka hadlayay ka qaybgalkii furitaankii Maxkamad Islaami ah ee Yuusuf Indha-Cadde waxa uu yiri “Yuusuf Indha-Cadde waa nin walaalkayaga ah oo Muslim ah cid ka xigta Degmada Balcadna ma jirto, Mudullood intii uu jiray markii Max’ed Qanyare igu soo duulay oo baabi’inayay dadka reer Balcad”, waxa uu intaa sii raaciyay “Mudullood aniga ayaa wixii maanta ka dambeeya wax layga weydiinayaa”.

Macallin Xaashi waxa uu sheegay inuu aad uga xun yahay in Mowlaca Sheekh Shariif Sheekh Kuxiydiin uu noqdo meel laysaga hor keeno Beesha Mudullood, waxa uuna u soo jeediyay Beesha MUdullood in ay ka digtoonadaan waxyaabaha ay wataan raggii mudada 15-ka ahayd hor joogay ee maanta doonaya in ay qabiil ku beerlaxowsadaan.

Kulan ay isugu timid Beesha Sacad o looga hadlay Isbedelka...

Maalintii shalay ahayd ayaa xaruntii hore ee Jaamacadda Ummadda waxaa kulan isugu yimid waxgarad, Odoyaal ka iyo Siyaasiyiin ka tirsan Beesha Sacad, waxaana kulankaasi looga arrinsanayay is bedelka ku yimid Magaalada Muqdiso, kaddib markii Maxaakiimtu la wareegeen gacan ku haynta magaalada Inteeda badan, ayaa waxa ay Xubnihii ka qaybgalay is tusiyeen in Beesha Sacad ay ka qaybqaadato sidii Nabad loogu soo dabaali lahaa Magaalada Muqdisho.

Waxaa halkaasi laga caddeeyay in Maleeshiyadii iyo Tiknikadii taalay wadada isku xirta Muqdisho iyo Afgooye lagu soo xareeyo gudaha Magaalada Muqdisho, waxaana la sheegay in shacabka Soomaaliyeed ay u faran tahay wadadaasi, waxaa kaloo lagu go’aansaday in Beeshu ay is difaacdo haddii lagu soo xadgudbo deegaanada ay degan tahay.

W/D: Amiin Yuusuf Khasaaro
E-Mail: amiinkhasaaro@hotmail.com

Annika Söder: "Ayaan darro weeyaan in markale dagaalo ka dhacaan Soomaliya"

Wasiirudowlaha Arrimaha Dibada Sweden Annika Söder oo shir labo cisho qaatay kala qeybgashay siyaasiin iyo aqoonayahno Soomaali ah ayaa ka hadashay arrimaha Soomaaliya, gaar ahaan dagaalada kasoo cusboonaday magaalada caasimada ah ee Muqdisho.

Shirkan ay wasiiradu ka qeybashay ayaa waxa uu ahaa kalfadhigii koowaad ee urrurka SSUP (Somali Social Unity Party) oo ah urrur siyaasadeed oo sanadii 2004-ta laga dhisay magaalada Katrinaholm ee wadankan Sweden.

Annika oo maalintii ugu horeysay shirkaasi ka hadashay ayaa waxey ka faalootay dowrka ay dowlada Sweden ku yeelatay nabadeyntii shirkii lugu soo dhisay dowlada KMG, waxaana inkastoo ay rajo xummo kamuujisay horusocodkii dowladaasi laga sugayey hadana hoosta ka xariiqday in dowladeeda ay had iyo goor diyaar la tahay taageerada dowladkasta oo Soomaaliya ka dhalata, kalana shaqeyn doonto arrimaha daruuriga ah.

Iyadoo weli ka hadlaysa arrimahaasi ayey tiri "waxaa ayaan darro ah Soomaaliya oo qeyb libaax ka qaaday xornimada qaarada Afrika ay maanta adduunka magacyo badan looga yeerro," taasina waxey iyadoo amaan u soo jeedineysa urrurka SSUP ku sheegtay inuu yahay urrur laftiisa dowr ka qaadan karra nabadeynta Soomaaliya ka codsatay ineysan ka seexan wacyigelinta bulshada, gaar ahaan qurbo joogta Soomaalida oo qudheeda wax ka badali kara marxalada adag ee maanta jirta.

Inkastoo khudbaddii ay halkaasi ka jeedisay haweeneydani aheyd mid aad u dheer, hadana mar ay suuragal ii noqotay inaan la yeesho wareysi gaaban ayey iigu sheegtay waxyaabihii ay ka wadahadleen iyada iyo wasiirka qorsheynta qaranka oo labo cisho booqasho ku joogay Sweden aheyd sidii dowlada KMG ah goobjoog uga noqon laheyd shirwenaha caalamiga ah ee ay soo qaban qaabiyeen Qaramada Midoobey, Midowga Yurub, Bankiga Adduunka oo loogaga arinsanayo arrimaha Soomaaliya kaasoo qabsoomi doona dhamaadka sanadkan aynu ku jirno martigelinteedana ay leedahay dowlada Sweden.

"Xaqiiqdii rajadii aan ka qabnay in dowladii aan maal badan gelinay ay taabasho gasho hadana hoos ayey u dhacday hankii aan qabnay, marba hadey dagaaalo kasoo cusboonaadeen magaalada caasimada ah waxaa noo muuqata in dowladu tahay midaan laheyn awood badan oo wax ka badali karta daruufaha maanta jira, saas oo ay tahayna waan taageereyna inta weli dowladu ka shaqeyneyso dib u soo celintii nabada" ayey tiri iyadoo ka jawaabeysay su'aal aan weydiiyey oo aheyd waa sidee aragtidiina aad ka qabtaan dowlada KMG ah.
Dhinaca kale mar aan weydiyey kaalmada ay Soomaaliya siiyaan iney ku kooban tahay dhaqaale iyo in kale iyadoo la ogsoon yahay iney jiraan taakuleyn kale oo lacagta ka muhiimsan loona baahan yahay in la siiyo "Waa runtaa Ikraam, dhaqaalaha ayaa ah mida marwalba mudnaanta leh si ay u socodsiiso howlaha muhiimka ah, hadana waxaan ku dadaaleynaa sidaan dhinacyada caafimaadka, waxbarashada aan uga kaalmeyn laheyn, sidoo kale waxaan tababaro aan siinaynaa qaar ka tirsan xildhibaanada baarlamkan si laftooda ay qeyb uga noqdaan horusocdka nabad ka islaaxda Soomaaliya."

Sidoo kale waxaan weydiiyey sida ay u cadaadinayaan dagaal oogeyaalka wasiirada laga dhigay ee dagaalka kula jiray maxkamada islaamiga ah maadama laftooda ay dowlada ku jireen lagana filaayey iney ka shaqeeyaan nabada.

" Waa ayaan darro in dagaalo kasoo cusboonaadan Soomaaliya gaar ahaan magaalada Muqdisho, hadana waxaa muhiim ah in lugu cadaadiyo sidey nabada uga shaqeyn lahaayeen beesha caalamkana uma dulqaadanayaan waxa ay wadaan hogaamiyeyaalkaasi aan weli fahmin mas'uuliyada saaran" ayey tiri Annika Söder oo ah wasiiru dowladaha arrimaha dibada Sweden oo runtii rajo xummo ka muujisay isbadalada kasoo cusboonaday dalka.

FG: Wareysigan waxaan qaaday kahor in aan wasiirada hubeysan loogaga adkaan dagaalkii ay kula jireen Maxkamadaha.

Waxaa diyaarisay; Ikraam Cali-kaar
ikraam@journalis.com

Munaasabada maalinta Deegaanka aduunka iyo sida looga xusey meelo katirsan somalia- 5ta Jun

Ururka ASAL (Action in semi-Arid lands) oo ka hawlgala gobolada Puntland ayaa munaasabada maalinta deegaanka aduunka u diyaariyey deegaano ka mid ah gobolada Bari iyo karkaar barnaamij isugu jira wacyi gelin iyo guddoonsiin dhir gaareysa 330 geed.

Barnaamijkii Radio Xoriyo
06 Jun 2006

Dagaallo cadowga lagu naafeeyay.

Dhibaatooyinka dadwyanaha loo gaystay.

Baaq uu xasuuqa Ogaadeenya ka soo saaray Golaha Dhalinyarada Ogaadeenya.

Barnaamijkii Aragtida Halgamaaga(Jabkii Mulageta yaa ka naxay).Maqal

======================

Wariyaha RX uga soo warrama dalka Ogaadeenya ayaa noo soo sheegay dagaallo dhawr oo jab wayn loogu gaystay ciidammada gumaysatada Itoobiya. Dagaalladaasi waxay u dheceen sidatan;

10/05/06 dagaal mir ah oo lagu qaaday ciidammada cadowga ee fadhiya magaalada Gunagado waxaa loogu gaystay khasaare ba’an oon faahfaahintiisa la haynin.

16/05/06 dagaal mir ah oo lagu qaaday ciidammadaee fadhiya tuulada Qorile, oo degmada Dannood ka tirsan, waxaa lagaga dilay 3 askari, 2 kalana waa lagaga dhaawacay.

20/05/06 waxaa dagaal mir ah lagu qaaday ciidammadacadowga ee fadhiya magaalada Gunagado, waxaanana loo gaystay khasaare ba’an.

22/05/06 waxaa magaalada Gunagado ka soo baxay ciidammo cadowga ka mid ah, ka dib markii laba weerar oo is-xiga xeradooda lagu qaaday. Ciidammadaas oo bixintaankooda laga warhayay ayaa loo galay meesha lagu magacaabo Gol-danbas, waxaana halkaas lagaga dilay inta la ogyahay 1 askari, mid kalana waa lagaga dhaawacay.

25/05/06 dagaal ka dhacay Jugle, oo Qabridaharre ka tirsan, waxaa cadowga lagaga dilay 20 askari, 30 kalana waa lagaga dhaawacay.

30/05/06 Sagalo, oo u dhaw Kabti-naag, waxaa ciidammada cadowga lagaga dilay 2 askari, 30 kalana waa lagaga dhaawacay.

22/05/06 ciidammada cadowga ee fadhigoodu yahay magaalada Fiiq waxaa ka goostay 18 askari oo u dhashay qowmiyada Oromada.

Dhibaatooyinka dadwyanaha loo gaystay.

Baka:

Magaalada Baka, oo gobolka Jarar ka tirsan, waxay ciidammada gumaysatada Itoobiya dadwaynaha ugu gaysteen dhibaatooyin aad u fara badan. Waxay jidhdil ba’an ku sameeyeen dadwayne rayad ah oon waxba galabsanin.
Waxay sidoo kale hanti kala duwan ka dhaceen dadwayne ku nool magaalada Baka iyo nawaaxigeeda, waxaana ka mid ah dadka dhacaas loo gaystay een magacyadooda helnay;
1- Aamina C/llaahi ooy ciidammada gumaysatadu ka dhaceen 2000 oo Bir.
2- Mawliid C/sammad oo isagana laga dhacay 2500 oo Bir
3- Dahabo Nuur oo laga dhacay 4000 oo Bir
4- Sawdo Faarax oo iyadana laga dhacay 1100 oo Bir
5- Khaliif Takhal waxaa isagana laga dhacay 1700 oo Bir
6- Nimco Cabdi Shiil ayaa iyadana laga dhacay 200 oo Bir
7- Baahila Cali Kaahin waxaa iyadana laga dhacay 300 oo Bir
8- Ardo Muxumed oo laga dhacay 250 Bir
9- Aamina Cumar Cali oo laga dhacay 500 oo Bir
10- C/nuur Faarax oo laga dhacay 270 Bir iyo
11- Caasha Faarax oo iyadanba laga dhacay 500 oo Bir.

Waxaa kaloo jira dad badan oo ay jidhdil ba’an ku sameeyeen, ka dibna ay ka tageen iyagoo dhaawacyo badani ku yaallaan.

Goosalaley:

Goosalaley, oo Dhagaxbuur ka tirsan, waxay ciidammada cadowgu ku xidhxidheen dad rayad. Waxaana ka mid ah dadka ay magacyadoodu na soo gaadheen;

1- Bashiirow Faarax
2- Maxamuud Faarax

Gob-ceebeed:

Tuulada Gob-ceebeed, oo Dhagaxbuur ka tirsan, waxaa dhawaan laga soo qaqabtay 20 qof oo lagu soo xidhay magaalada Dhagaxbuur. Dadkan waxaa loo qaqabtay kornayl ay ciidammada xoreynta Ogaadeenya dhawaan ku dileen deegaankaas, waxaana lagu xukumay inay bixiyaan magtii kornaylkaas. Dadkaas waxaa ka mid ah;

1- Cabdi Axmed Dhamac
2- Maxamed Muxumed C/llaahi
3- Mahdi Muxumed Xaashi
4- Nimco Mahdi Muxumed
5- Sahro Muxumed Nuur

Dhabar-sarmaan:

Dhabar-sarmaan, oo degmada Fiiq ka tirsan, waxay ciidammada cadowgu jidhdil ba’an ugu gaysteen 5 qof oo rayad ah. Dadkan waxay gaadhsiiyeen dhaawacyo halis ah, waxayna uga tageen sidi mayd ahaan.

Ceel-karri:

Ceel-karri waxay ciidammada cadowgu jidhdil ba’an ugu gaysteen 2 qof oo rayad ah.


Abaaqorrow:

Abaaqorrow waxay ciidammada cadowgu ku xidhxidheen 27 qof oo rayad ah, waxayna dadkaas u gaysteen jidhdil ba’an.

Laas-dhankayrre:

Laas-dhankayrre waxay ciidammada cadowgu ku xidhxidheen 13 qof oo rayad ah. Dadkan waxaa loo xidhxidhay dagaallo dhexmaray ciidammada xoreynta Ogaadeenya iyo kuwa cadowga oo deegaankaas ka dhacay markii taariikhdu ahayd 26/05/06.

Iimey-galbeed:

Inta u dhaxaysa Iimey-galbeed iyo Cadaado, oo Godey ka tirsan, waxaa laga soo qaqabtay 127 qof oo rayad ah, kuwaasoo lagu xidhxidhay magaalada Iimey-galbeed.

Yucub:

Ciidammada gumaystada Itoobiya ayaa dhwaan wiil yar oo siddeed jir ah ku faraxumeeyay baadiyaha magaalada Yucub, kaasoo ay ciidammada maxaysatada ah ee Itoobiya falkan waxshinimada ah u gaysteen isagoo Adhi la jooga. Xaaladda caafimaad ee wiilkan ayaa la sheegay inay aad u liidato. Wuxuu kaloo warku intaas ku darayaa in Adhigii uu wiilka yari la joogay qaar badan oo ka mid ah ay ciidammada gumaysigu qasheen.

Jeerinka (Fiiq):

Wararka ka imanaya tuulada Jeerinka, oo ka tirsana degmada Fiiq, ayaa sheegaya in ciidammada gumaysatada Itoobiya ay tuuladaas ku dileen afar qof oo rayad ah. Afartan qof ee rayadka ah ee la dilay waxay kala yihiin seddex nin iyo haweenay waayeel ah, waxaana la dilay 03 Juun 2006. Dadkan ayaa loo dilay inay taageeraan Jabhadda Waddaniga Xoreynta Ogaadeenya.

Jigjiga:

Ciidammada gumaysatada Itoobiya ayaa sidoo kale labo wiil oo dhalinayaro ah ku dilay magaalada Jigjiga markii ay bisha May 29-ka ahayd 2006. Labadan wiil ayaa la sheegayaa in laga qaqabtay magaalada dhexdeeda, ka dibna la geeyay xerada millatariga ee Garab-Case, halkaasoo jidhdil xun loogu gaystay, ka dibna rasaas lagu dhuftay.

Baaq uu xasuuqa Ogaadeenya ka soo saaray Golaha Dhalinyarada Ogaadeenya.

Golaha Dhalinyarada Ogaadeenay ayaa baaq ka soo saaray xasuuqa ba’an ee ciidammada Itoobiya ka wadaan dalka Ogaadeenya. Golaha Dhalinyarada Ogaadeenya ayaa baaqiisan ku sheegay in xukuumadda Itoobiya ay dalka Ogaadeenya ka billowday olole qallafsanoo ay dadwaynaha ku xasuuqayso, ka dib markii ay ku guuldarraysatay dagaalladii ay kula jirtay ciidammada Xoreynta Ogaadeenya.

Golaha Dhalinyarada Ogaadeenya wuxuu beesha caalamka ugu baaqay inay si degdeg ah tallaabo uga qaadaan xasuuqa bani’aadamnimada ka baxsan ee xukuumadda Itoobiya ka wado dalka Ogaadeenya.

Wuxuu sidoo kale dadwyanaha Soomaalida Ogaadeenya ee geesiyiinta ah ugu baaqay inay hal meel uga soo wadajeestaan falalka bahalnimada ah ee taliska Addis Ababa kula dhaqamayo dadwaynaha nugulka ah, isla markaana ay iska kaashadaan sidii ay naftooda iyo maalkoodaba uga difaacan lahaayeen ciidammada maxaysatada ah ee al soo dhoobay dalka Ogaadeenya.


06 Jun 2006.
C/nuur Sh. Maxamed

Info@radioxoriyo.com
raadioxoriyo@yahoo.com

Radio Xoriyo waxaad ka dhegaysan kartaa Mawjadda 25 MB ee dhererkeedu yahay 11865 KHZ,iyo internetka Radioxoriyo.com,Ogaden.com Maalmaha Talaadada iyo Jimcaha 7: 30PM waqtiga Afrikada Bari

Faafin: SomaliTalk.com | June 7, 2006

Midowga Maxaakiimta Islaamiga oo ka digay in diyaarado ka soo degaan garoonka Jowhar
»Qaxootiga Soomaaliyeed iyo Nabaad guurka Dhirta Kenya..
»Muslim Aid iyo Wejigii Labaad ee Abaaraha K/Soomaaliya..
»Ra’isul Wasaare Geeddi oo 50-xubnood oo ah Mudulood ku.
»Maleeshiyadii iyo hubkii Cabdi Qaybdiid oo soo galey...
»Dowladda Kenya oo dalkeeda u diiday ineey soo galaan..
»Wada hadaladii u dhexeeyay Muuse Suudi iyo Odayaasha
»Wabarka Beesha Cayr oo u soo jeediyay Maxaakiimta..
Wararka oo dhan ka akhri halkan... Guji.... 6/6/06

Maxkamadaha Islaamiga: Fari kama Qodna Faanoole..

C/risaaq Xaaji Xuseen Is kama hadlin!!