::: SomaliTalk.com :::

Maanta ayaa la filayaa in golaha Baarlamaanku ay isugu yimaadaan kulan looga hadlayo ama looga doodayo sidii xilka looga qaadi lahaa Xubnaha Wasiirada ee iyagu dagaalka ka wada magaalada Muqdisho, waxaana maanta la filayaa in golaha Baarlamaanku uu soo gaaro Ra’isul Wasaare Cali Max’ed Geeddi oo isaga laga sugayay in uu go’aan ka qaato raggaasi, maadaama labo jeer ay diideen in ay soo gaaraan magaalada Baydhabo si ay uga qayb-qaataan kulamada Baarlamaanka iyo kulamada Wasiirada. Dhamaan xubnaha Baarlamaanka waxay taageersan yihiin in xilka laga qaado wasiirada hubeysan ee ku sugan Magaalada Muqdisho, maadaama ay ka qayb-qaateen dagaalada lagu xasuuqayo bulshada ku nool Muqdisho. Xildhibaan Sakariye Xaaji Max’uud ayaa waxa uu sheegayin Dowladda Federaalka ay si weyn uga gaabisay in ay gacan ka gaysato daminta colaadaha ka jira magaalada Muqdisho, waxa uuna si gaara farta ugu fiiqay in ay wax ka qabanweyday wasiirada hubeysan ee iyagu dagaalada ka wada Magalada Muqdisho. Ra’isul Waaare Cali Max’ed Geeddi waxa uu haystaa fursad uu xilka kaga qaadi karo raggaasi, maadaama qoraalo uu saaray ay ka dhega fureysteen. Amarka Ra’isul Wasaaraha waxaa si dhaba ugu hogaansamay Wasiirka Dib u dhiska iyo dib u dejinta Barre hiiraale oo isagu Baydhabo soo gaaray dhowr maalmood ka hor, sidoo kale waxaa magaalada Baydhabo soo gaaray dhowr wasiir oo iyana ka tirsanaa Dowladda Federaalka.

Isbahaysiga la dagaalanka Argagixisada oo gooyay mid ka mida Buundooyinkii..

Warar aanu ka helnay degmada Balcad oo ka tirsan gobalka Sh/dhexe ayaa waxay sheegayaan in maalintii shalay ahayd la gooyay mid ka mida Buundoonyinkii ku yaalay degmada Balcad gaar ahaan buundaddii Keliga Gololeey oo ku aadan dhinaca Degmada Afgooye, iyadoo Buundadaas si fudud looga soo gali karo dhinaca Degmada Jowhar, ilaa iyo hadda lama garanayo sababaha loo jaray Buundadasi, balse warar ayaa waxay sheegayaan in Buundadaa jarideeda ay ka dambeeyeen Isbahaysiga la dagaalanka Argagixisada.

Warar kale ayaa waxay sheegayaan in sababaha loo jaray buundadaasi ay tahay iyadoo Tikniko iyo maleeshiyooyin ay si toos ah uga gudbin karaan buundadaasi, iyagoo maraya duleedka Degmada Balcad kadibna si toos ah u tagaya Degmada Jowhar.

Jarida Buundadaan ayaa waxay sababtay in Gawaaridii Caanaha siday ee imaan jiray maaalada Muqdisho ay yaraadeen, iyadoo dadweynaha Degmada Balcad ay si aada uga xumaadeen, iyadoo Buundadaasi ay ahayd mid muhiimad gaara ugu fadhiday dadweynah ku nool degmada Balcad, dhinaca kale waxaa shalay subaxnimadii dagaal ka dhacay meel ku dhow degmada Balcad waxa uuna u dhexeeyay Isbahaysiga la dagalanka iyo maleeshiyo uu watay guddoomiyaha siyaasadda Xamar iyo Xamar-Daye Macallin Xaashi Faarax, waxaana dagaalkaasi ku dhintay 11 qof oo todobo ka mida ay ahaayeen kuwa Macallini Xaashi iyadoo uu Isbahaysigu uu halkaasi kula wareegay labo gaari oo Tikniko ah oo uu lahaa Macallin Xaashi

Max’ed Cumar Xabeeb Max’ed Dheere oo ah Guddoomiyaha Siyaasadda gobalka Sh/dhexe oo baryahan uu culey ka haystay dagaalo u dhexeeya Isbahaysigiisa iyo Midowga Maxaakiimta Islaamiga ah ayaa waxaa la sheegay in uu u dhaqaaqay dhinaca Dalka Itoobiya.

Waxay wararku sheegeen in Diyaarad ay leedahay Dowladda Itoobiya aya ka qaaday Magaalada Jowhar, ilaa iyo haddana lama garanayo sababaha uu Max’ed Dheere u aaday dalka Itoobiya, balse warar ayaa waxay sheegayaan in uu Itoobiya u tagay sidii uu uga heli lahaa taageero dhinaca hubka iyo saanadda.

Warar kale ayaa waxay sheegayaan in Max’ed Dheere uusan ogeysiin Xubnha ay ku wada jiraan Isbahaysiga la dagaalanka Argagixisada, iyadoo Xubnihii isbahaysiga qaarkood ay ku kala go’doonsan yihiin qaybo ka mida magaalada Muqdisho, waxayna ka cabsanayaan in ay weeraro uga yimaadaan

Banaanbax looga soo horjeedo Mareykanka oo shalay ka dhacay magaalada Muqdisho..

Waxaa maalintii shalay ahady Fagaaraha Tarabuunka ee magaalada Muqdisho ka dhacay banaanbax aad u balaarnaa oo mudooyinkaan aan ka dhicin magaalada Muqdisho, waxaana isugu soo baxay dadweyne aad u fara badan, waxa uun banaanbaxaani ku saleystaan taageerida ku dhaqanka shareecadda Islaamka, sida ay uga soo horjeedaan faragelinta uu Mareykanku u hayo arrimaha gudaha ah ee Soomaaliya.

Banaanbaxaasi ayaa waxaa ka hadlay Guddoomiyaha Midowga Maxaakiimta Islaamiga ah, oo sheegay in ay guulo ka soo hooyeen dagaalkii ay kula jireen waxa uu ugu yeeray Isbahaysiga Shaydaanka, “Haddii shacabkii Soomaaliyeed ay fahmeeyeen caddowgooda iyo nasteexooda” ayuu yiri Sheekh Shariif Sheekh Axmed.

Waxaa kalloo halkaasi ka hadlay culuma’udiin ay ka mid ahaayeen Sheekh Nuur Baaruud, Sheekh Maxamuud Ibraahim Suuleey iyo Abwaan Abshir Bacadle, waxayna dhamaantood sheegeen in la gaaray waqtigii ay shacabka soomaaliyeed ka bixi lahaayeen dhibaatada.

Xildhibaan C/dheeg “Xad gudubyadii ay geysteen Ciidamada Yeman iyo Hay’ada UNCHR, waa mid lagula xisaabtami doono”

Xildhibaan C/kariim Naasir Siciid {Cabdi Dheeg} ayaan wax ka weydiiney Safarka Gudoomiyaha Baarlamaanka Shariif Xasan Sh, Aadan uu ku tagey Maamul Goboleedka Puntland,Kan Madaxweyne Col,C/llaahi Yuusuf, Raiisul Wasaare Geedi iyo , Dagaalada ka socda Magaalada Muqdisho, waxa uu ku soo kordhin karo xal u helida Siyaasada Murugsan ee Soomaaliya maadaama uu isagu ahaa xildhibaankii ugu dambeeyey ee lagu dhaariyey Baydhabo, isla markaana ka soo jeeda Beesha Shanaad ee Carab Soomaali iyo waxa iska bedelay eedayn uu hada ka hor u soo jeediyey dowlada Yeman.

Xidhibaanka isagoo arimahaasi ka hadlaya waxaa uu yiri ”Safarka Gudoomiyaha Baarlamaanka Shariif Xasan Sh, Aadan uu ku tagay Maamul Goboleedka Puntland wuxuu ahaa Dibu-heshiisiinta Dowlada Dhexe iyo Maamul Goboleedka Puntland, taasina waa uu ku guulaystay Safarka Madaxweynaha wuxuu ahaa safar deg deg ah oo heer Madaxweyne uu kaga qaybgalayo shir ka dhacaya dalka Liibiya ayna isugu imaanayaan wadamada saxaraha ka hooseeya, waxaana u sii gogol xaarayey Wafdi uu hogaaminayo Raiisul Wasaare ku xigeenka ahna Wasiirka Iskaashiga Gobolka Ismaaciil Hure Buubaa, hadalkiisa sii wata ayaa intaa ku daray Xildhibaanku safarka Raiisul Wasaaruhuna wuxuu ahaa mid Caafimaad,

Mar uu ka hadlaayey Xildhibaanku Dagaalada ka socda Magaalada Muqdisho iyo in wax diiwaan gelin ay ku sameeyeen dadkii ku dhintay ama ku dhaawacmay iyo Hantida ku Burburtay ayaa wuxuu ku sheegay “In diinteenu aysan ogolayn in lagu dhex dagaalamo Haweenka, Caruurta iyo dadka Waayeelka ah ee jilicsan, Caqliga Bani’aadamkuna magalayo arinkaas, waxaana soo jeedinayaa Qolada Dowlada ku jirta ee samaystay Xizbiyada inay joojiyaan dagaalka, halka kooxaha Culumaa’udiinka uu iyaguna uu u soo jeediyey in ay qaataan waanada iyo maslaxada” “Dowladu waa ay jirtaa laakiin awood buuxda malaha,sidaas darteed wax walba waqtigeeda ayaa laga hadlayaa, laakiin cafin malaha iyo sii daysmo”.

Sidoo kale Mar uu ka hadlaayey Xildhibaanku waxa uu ku soo kordhin karo siyaasada murugsan ee Soomaaliya ayaa wuxuu yiri”Marka hore waxaan ku faraxsanahay inaan ku biiro Baarlamaanka Soomaaliya, isla markaana aan ku jiro gudiga Haweenka, Caruurta iyo Xuquuqul insaanka, ahayna xoghayaha guud ee gudigaas ayaa waxaan ku dadaali doonaa sidii laysugu soo jiidi lahaa Dowlada iyo Xildhibaanada hawsha ay wadaan intii karaan kayga ah, intii aan xubinta noqdayna shaqooyin badan oo uu Baarlamaanku qabtay ayaan goob joog ka ahaa”.

Ugu dambeyn eedayntii dowlada Yeman waxaa uu ka yiri “DFKMG horey waxay u kala joogtay Magaalada Jowhar iyo Muqdisho, hadaadan is yeelyeelaynina waad ogtahay, waxa laysku hayeyna waxay ahaayeen Siyaasad , wax cadna way ahayd waxaana jiray dad la gubay,la garaacay iyo la xirayba, Xad gudubyadii ay geysteen ciidamada Yeman iyo Hay’ada UNCHR, ilaa iyo hadana loogama haraayo ilaa meel ay saarto, wixii wanaag ay qabatayna faa’iidadeeda waanu sheegaynaa”ayuu hadalkiisa ku soo gunaanaday Xildhibaan Cabdi dheeg.

Xudunta Xidhiidhka Caalamiga ah Warsaxaafadeed ku saabsan Alliance for Freedom and Democracy

Waxaa 22/05/06 lagaga dhawaaqay wadanka Holand Isbahaysi loogu magacdaray Alliance for Freedom and Democracy. Jabhadahan iyo Xisbiyadan ayaa ku midoobay, kuna heshiiyey in la ilaaliyo midnimada Itoobiya, xukunkana lawadaago, wadajira loobadalo xukunka TPLF/EPRDF (Wayaanaha) ee talada haysta hada. Isbahaysigan oo ay ku midoobeen Jabhado gobanimodoon ahaa iyo Xisbiyada ka jira Adis Ababa oo doorashadii oogu dambaysay ka qeybgalay ayaa ka kooban ururadan:

Inta badan xisbiyada iyo jabhadaha ka jira Itoobiya gaar ahaan CUDP iyo EPPF oo ka soo jeeda qoomiyada Axmaarada ayaan aqoonsanayn inay Soomaalida Ogaadeenya aayaheeda ka tashato iyo inay noqoto Qowmiyad Itoobiyaan ah oo la xuquuq ah qoomiyadaha kale ee Itoobiya. waxaa kalooyna aqoonsanayn xisbiyada Axmaaradu inay Qoomiyadii rabtaa aayaheeda ka tashato, waxayna aaminsan yihiin inay Iyagu (Axmaaradu) yihiin qoomiyada Itoobiya samaysatay, iskuna haynkarta ee xukumikarta, Qoomiyadaha kalana ay yihiin dadyow raaciyad u ah Iyaga oo aan Xoriyad iyo Xukunka Itoobiya midnaba Gayin.

Sida runtii ah Inaan Itoobiyaan noqono oo qofka Itoobiyaanka ahi aqbalo inaan muwaadin la siman nahay ayaa waxaa ka dhibyar inaan ka xorowno Itoobiya oo aynu ka Go’ono. sababtoo ah waxay dhamaan qoomiyadaha Itoobiya iska raacsan tihiin inay Soomaalida Ogaadeenya tahay Cadogooda koobaad xoogna ay ku haystaan.taasina ma aha mid Isbahaysi aan galo ama isbadal xukun (dowladeed) ay wax ka badali karto, ee waa aaminsanaan ku salaysan taariikh jirta iyo waxa inoo dhaxeeya Inaga iyo Xabashida (Abasiiniyaanka).

Hadaba waxaan ilaa 1898 ku soo jiray halgan hubaysan oo aan ku raadinayno xoriyada Soomaaliweyn iyo mida Soomaalida Ogaadeenya, ilaa wakhtigaasna waxay xukuumadihii kala duduwanaa ee Gumaysiga Itoobiya inoogu yaboohayeen inaan qaadano ismaamul hoosaad oo aan ka tanaasulo Xoriyaddoonimada, taasoo aan diidanayn. Halgankan iyo Raadinta Xoriyadaas oo ay kumanyaal wiil ku naf waayeen, kumanyaal kalana ku agoontoobeen, kumanyaal marwo ku Asay qaadeen oo ay ku ninwaayeen, Malaayiina oogu qaxeen caro shisheeye oo ayna wadankoodii hooyo dib oogu laabanin Halganka dartii, Xoriyadii Raadinteeda intaas iyo in ka badan loo soo mutay inaan kaga tanaasulo maanta Isbahaysi afka Baarkiisa ah oo Axmaaro maamulka itoobiya loogu barbaarinayo, waa mid aan suuragal ahayn oo aan la aqbali karaynin marnaba.

Markuu Garabka Badbaadinta JWXO shirar kala duwan ka yeeshay Faaiidada iyo Khasaaraha oogu jira Soomaalida Ogaadeenya ka midnoqoshada Isbahaysiga Alliance for Freedom and Democracy, Isla markaana aan dib oogu noqonay Xeerkii Jabhada, wuxuu heshiiska lagu aas-aasay Isbahaysiga cusub ka hor imanayaa, si cadna u burinayaa Qodobka 39aad ee Xeerka Jabhadda, kaa soo ay ku cadahay in shirweynaha Jabhada oo kaliya uu awood u leeyahay ama ka go’aan gaadhi karo qodobada 1;2;3;4;5;6;7;8 ee xeerka Jabhada, kuwaasoo aas-aas iyo laf-dhabarta u ah Halganka Shacabka Soomaalida Ogaadeenya ay ku hiigsanayaan inay kaga hoosbaxaan Gumaysiga Itoobiya.

Hadaba Iyadoo laga tixraacayo qodobada 1 ilaa 8 ee xeerka jabhada iyo Go'aankii 1994 ee Kalfadhigii sadexaad ee Baarlamaanka Soomaalida Ogaadeenya ay ku gudoonsadeen magaalada Jig-Jiga in Afti-Aayo katalineed laga qaado Shacabka Soomaalida Ogaadeenya ayaa waxaa cad inuu Isbahaysigani dhabarjab iyo marin habaabinba uu ku yahay Halganka aynu oogu jiro Gobanimadeena.waxaanuna oogu baaqaynaa Shacabka Soomaalida Ogaadeenya inay ka feejignaadaan Dabinka ay u qoolayaan kuwa dibin-daabyeynaya Halganka ee Khaainul Wadhaniinta ah iyo kuwa ku dulhaya Gumaysiga Abasiiniya iyo kuwa raba inay sii gumaystaan intaba.

Oogu dambayntii Garabka Badbaadinta Jabhada Wadaniga Xoraynta Ogaadeenya wuxuu la socodsiinaynaa, Isbahaysiga Alliance for Freedom and Democracy, Shacabka Soomaalida Ogaadeenya iyo Bulshoweynta Caalamkuba gaar ahaan USA, EU iyo African union inuusan khusaynin Isbahaysigaasi Garabka Badbaadinta JWXO iyo Shacabka Soomaalida Ogaadeenya ee Gobanimodoonka ah. islamarkaana aanaan Aqoonsanaynin heshiiskasta oo ay gaadheen ururada ku midoobay Holand hadayna ku cadayn inay Soomaalida Ogaadeenya tahay qoowmiyad Itoobiya gumaysato oo xaq u leh inay aayaheeda ka tashato.

Jabhada wadaniga Xoraynta Ogaadeenya Garabka Badbaadinta ( JWXO-GB)
Xudunta Xidhiidhka Caalamiga ah.
Warsaxaafadeed
29 may 2006
Email:BadbaadintaJWXO@yahoo.ca
Booqo: www.ogadensun.com

Barnaamijkii Radio Xoriyo

Gumaysiga iyo taageerayaashiisa oo kordhiyay cadaadiska dadwaynaha.

Jigjiga: Shir ay jannaraalo Itaabiyaan ahi u qabteen maamulka iyo Shaqaalaha Kililka.

Washington: Kulan lagu soo bandhigayay isbahaysiga AFD oo JWXO ka qayb gashay.

Ogaadeenya: Dagaallo cadowga lagu naafeeyay.

Ururka saxaafadda adduunka oo Itoobiya canbaareeyay.

Waraysi Dhinacyo badan taabaya(Gudomiyaha JWXO Adm.Max,ed Cumar Cisman).

======================

Tan iyo intii ay xukuumadda gumaysatada Itoobiya hawlgalka millatari ka billowday dalka Ogaadeenya waxaa si wayn u kordhay cadaadiskii uu ku hayay dadwaynaha rayadka ah, waxaana muddo kooban gudeheed lagu laayay dad fara badan meelo kala badan oo Ogaadeenya ka mid ah. Waxay sidoo kale ciidammada gumaysatadu dadwyanaha u gaystaan dhibaatooyinka ay ka midka yihiin kufsi, jidhdil, caga-juglayn iyo hantida oo ay ka boobaan.

Wararka naga soo gaadhaya magaalada Awaare ayaa sheegaya in labadii todobaad ee u denbeeyay dadwaynaha magaalada deggan lagu hayay hanjabaad iyo caga-juglayn aad u daran, iyadoo lagu eedaynayay inay taageeraan JWXO.

Xadgudubyadan dadwaynaha loo gaysanayo iyo caga-juglaynta lagu hayo ee magaalada Awaare waxaa ka qayb qaadanaya ninka lagu magacaabo Cabdi Ismaaciil (Cabdi Gannaf) oo ka tirsan maamul ku sheegga Kililka, kaasoo dadwyanaha magaalada ugu hanjabay inuu isagu farta ku fiiqi doono cidda taageerta JWXO haddii ayna iyagu isa sheegin. Ninkan ayaa dadwaynaha ugu hanjabay in ciqaab adag la marin doono qofka lagu ogaado inuu JWXO taageero.

Dadwaynaha ayaa hanjabaaddaas aad uga gilgishay, isla markaana ka xumaaday sida bani’aadamnimada ka baxsan ee loogu hanjabayo iyagoon waxba bi’inin. Arrintaas ayaa keentay in dadwayne badani ay magaalada ka qaxaan dhawrkii maalmood ee u denbeeyay, iyagoo bar-tilmaameedkoodu yahay meel kastoo ay ku badbaadi karaan.

Wararka ka imanaya magaalada Dhagaxbuur ayaa iyaguna sheegaya in cabsi middaas la mid ah ay dadwaynaha hayso, isla markaana laga walwalsan yahay tallaabooyinka bahalnimada ah ee ciidammada gumaystada Itoobiya kula kacayaan dadwaynaha rayadka ah.

Waxaa wali jeelka magaalada Dhagaxbuur ku xidhxidhan odayaal 18 ah oo dhawaan laga soo qaqabtay tuulada lagu magacaabo Gob-caayeed, waxaana la soo qaqabtay odayaashaas, ka dib markii dagaal deegaankooda ka dhacay lagu jabiyay ciidammada gumaysiga.

Jigjiga: Shir ay jannaraalo Itaabiyaan ahi u qabteen maamulka iyo Shaqaalaha Kililka.

Badhtamihii toddobaadkan waxaa magaalada Jigjiga shir degdeg ah ku qabtay jannaraalo ka tirsan ciidammada gumaystada Itoobiya, kuwaasoo shiriyay madaxda iyo shaqaalaha maamul ku-sheegga Kililka.

C/llaahi Lugbuur, oo shirka furay, ayaa sheegay in horumarka deegaanka soomaalida ay JWXO hortaagan tahay, sidaas darteed loo baahan yahay in deegaanka laga tirtiro, wuxuuna markuu intaas yidhi hadalka ku wareejiyay Jannaraal Haile Salasse iyo Jannaraal Mulugetu, oo u dhashay qowmiyada Tigreega, isla markaana hooggaaminaya hawlgallada millatari ee lagu xasuuqayo dadwaynaha Soomaalida Ogaadeenya ee hadda dalka ka socda.

Jannaraal Haile Salasse ayaa si wayn ugu hanjabay dadkii shirkaas la keenay, wuxuuna ku nuuxnuuxsaday sida ay dawladu uga warhayso in cidda taageerta JWXO ay tahay intan horfadhida iyo guud ahaanba Kililka. Wuxuuna si gaar ah u carrab-baabay xafiisyada caafimaadka, la dagaallanka AIDS-ka iyo maaliyada, oo uu sheegay inay si toos dawooyin iyo maaliyadaba ugu qoondeeyaan JWXO iyagoo isticmaalaya caddaymo been-abuur ah.

Jannaraal Mulugetu oon isagu hadalka ku dheeraanin, wuxuu shirkaas ka yidhi hadal kooban oo macnihiisu ahaa “ama nala jir ama naga jir”.

Washington: Kulan lagu soo bandhigayay isbahaysiga AFD oo JWXO ka qayb gashay.

Maalintii axadda ahayd ayaa magaalada Washington ee dalka Maraykanka lagu qabtay shir si wayn looga soo qayb galay, kaasoo lagu soo bandhigay isbahaysiga cusub ee lagu magacaabo “Isbahaysiga Xorriyada iyo Dimuqraadiyada”, oo dhawaan ay dalka Holland ku asaaseen ururro ka soo horjeeda xukuumadda Itoobiya oo JWXO ka mid tahay.

Shirkan Washington ka dhacay waxaa ka soo qayb galay madax sarsare oo ka socda ururrada JWXO, OLF, EPPF iyo CUDP, waxayna dadwaynihii iyo warfidiyeennadii halkaas isugu yimid u sharaxeen ujeeddada loo asaasay isbahaysigan, qaabkuu u shaqayn doono iyo rajada laga sugayo.

Wakiilkii JWXO matalayay oo hadal dheer halkaas ka jeediyay ayaa sheegay in ujeeddada isbahaysigan loo asaasay ay tahay mid loogu danaynayo qowmiyadaha ay ururrada isbahaysigu matalaan, si looga hoos bixiyo xukuumadda macangaga ah ee kaligii taliye Meles Zenawi oon iyadu haba yaraatee ayna jirin wax ay xeerinayso oon ka ahayn inay xukunka sii haysato.

Wakiilka JWXO wuxuu sidoo kale ka qayb galayaasha shirka uga warramay xaaladda Ogaadeenya hadda ka jirta iyo weerarrada millatari ee xukuumadda Itoobiya ku hayso, isagoo faahfaahiyay in magaalooyinka Ogaadeenya oo dhan ay hadda go’doon ku jiraan, ka dib markii ay ciidammada Itoobiya mamnuuceen in wax gaadiid ahi galaan ama ka baxaan.

Isbahaysiga Xorriyada iyo Dimuqraadiyada waxaa daba-yaaqadii bishii May lagu asaasay dalka Holland, waxaana ku bahoobay lix urur oo ka soo horjeeda xukuumadda Itoobiya, oo kala ah JWXO, OLF, SLF, CUDP, EPPF iyo UEDF.

Mabaadii’da ugu muhiimsan ee saldhigga u ah asaaska isbahaysigan waxaa ka mid ah inaan ururna lagu faragalinin mabaadii’diidsa iyo barnaamijkiisa siyaasadeed iyo qaabka uu u fulinayo, arrintaasoo ahayd shuruudihii ay JWXO isbahaysiga kaga qayb gashay. Sidaas darteed ka qayb galka ay JWXO isbahaysigan ka qayb gashay kama leexin doono hadafkeedii asaasiga ahaa ee ahaa in loo halgamo sidii aaya-ka-tashi buuxa loo gaadhsiin lahaa dadwyanaha Soomaalida Ogaadeenya.

Ogaadeenya: Dagaallo cadowga lagu naafeeyay.

Wariyaha RX uga soo warrama xarunta dhexe ee Jabhadda Waddaniga Xoreynta Ogaadeenya ayaa noo soo sheegay dagaallo badan oo dhexmaray ciidammada xoreynta Ogaadeenya iyo kuwa gumasatada Itoobiya oo waxyeellooyin ba’an loogu gaystay ciidammada caga-jiidka ah ee Itoobiya. Dagaalladaasi waxay u dhaceen sidatan;

05/05/06 dagaal mir ah oo lagu qaaday ciidammada cadowga ee fadhigoodu yahay tuulada Qorile, oo ka tirsan degmada Dannood, waxaa lagaga dilay 12 askari, 8 kalana waa lagaga dhaawacay.

10/05/06 dagaal mir ah oo lagu qaaday ciidammada gumaysiga ee fadhiya magaalada Awaare waxaa lagaga dilay 4 askari inta la ogyahay, 3 kalana waa lagaga dhaawacay.

16/05/06 dagaal ka dhacay balliga Daratoole, oo gobolka Doollo ka tirsan, waxaa cadowga lagaga dilay 12 askari, 7 kalana waa lagaga dhaawacay. Waxaa halkaas sidoo kale lagu gubay baabuur ay saarnaayeen ciidammo gurmad ah, waxaana halkaas ku bas-beelay baabuurkaas iyo wixii saarnaa oo dhan.

18/05/06 dagaal ka dhacay Dawacaley, oo Qabridaharre ka tirsan, waxaa ciidamada cadowga lagaga dilay 4 askari, 4 kalana waa lagaga dhaawacay.

20/05/06 Dharkaynley, oo u dhaxaysa Dhagaxbuur iyo Dhagaxmadow, dagaal ka dhacay waxaa ciidammada cadowga lagaga dilay 10 askari, 13 kalana waa lagaga dhaawacay.

21/05/06 dagaal ka dhacay Dhuurre, oo ka tirsan degmada Qabridaharre, waxaa ciidammada maxaysatada ah ee Itoobiya lagaga dilay 5 askari, 6 kalana waa lagaga dhaawacay.

25/05/06 dagaal ka dhacay Barraajisaale waxaa ciidammada cadowga lagaga dilay 8 askari, 11 kalana waa lagaga dhaawacay.

22/05/06 dagaal mir ah oo lagu qaaday ciidammada gumaysiga ee fadhigoodu yahay magaalada Nusdariiqa waxaa cadowga loogu gaystay khasaare ba’an oon faahfaahintiisa la haynin.

26/05/06 dagaal ka dhacay Karin-barkhadle, oo u dhexeeya Sagag iyo Dhagaxmadow, waxaa ciidammada cadowga lagaga dilay 6 askari, 5 kalana waa lagaga dhaawacay.

Ururka saxaafadda adduunka oo Itoobiya canbaareeyay.

Ururka Suxufiyiinta aan soohdinta lahayn, oo ah urur caalami ah oo u daneeya xorriyada saxaafadda, ayaa xukuumadda Itoobiya si wayn ugu canbaareeyay xayiraadda ay ku soo rogtay bogagga internetka ee mucaaradka ka soo horjeeda, oo dhawrkii toddobaad ee u denbeeyay ay xukuumaddu xayiraad ku soo rogtay, sidaas darteed aan laga gali Karin Itoobiya gudeheeda.

Ururku wuxuu wasiirka warfaafinta iyo dhaqanka ee xukuumadda kaligii taliye Meles Zenawi ka codsaday inuu sharraxaad ka bixiyo sababta aan Itoobiya looga gali Karin bogagga internetka ee lagu soo qoro waxyaabaha xukuumadda lagu dhalliilayo, oo tan iyo 17-kii May ayna suuragal ahayn in la akhristo ama la booqdaba.

Ururkan ayaa warqad uu wasiirka u qoray wuxuu ku yidhi; Waxaan rabnaa inaan ogaano in xukuumadda dalkaagu ay xayirtay bogagga internetka ee mucaaradka ku ah siyaasada xukuumadda. Wuxuu kaloo ururku warqaddiisa ku sheegay in xukuumadda xil ka saran yahay in qof kasta oo dadwaynaha ka mid ah fursad loo siiyo inuu ra'yigiisa sheego oon la cabudhinin.

Dhinaca kale, goobaha Internet-ka ee Magaalada Jigjiga ayaa waxay sirdoonka Itoobiya geeyeen dad ka shaqeeya oo eegaya meelaha ama shabakada ay dadku galayaan. Waxaana na soo gaadhaya in shalay xabsiga loo taxaabey laba wiil oo dhalinyaro ah oo lagu qabtey iyaga oo akhrisanaya Shabakada Radio Xoriyo, http://www.radioxoriyo.com

Shabaka Ogaden Online iyo kuwo kale oo badan ayey dawladda Itoobiya hore dadka uga mamuucdey in la galo ama la akhristo.

Hadaba shabakada maamulka Shabakada Online ayaa wuxuu ogeysiinayaa akhristayaasha, in ay si deg-deg ula soo xiriiraan Maamulka shabakada oo u fududeyn doona, qabaka ay u geli karaan shakada….la soo xiriir: ciwaanada kala ah: Securiy@ogaden.com ama Wemaster@ogaden.com

General Mulugeta iyo General Haile oo maanta shiriyey Odey dhaqameedyada Magaalada Jigjiga.

Wararka naga soo gaadhaya Magaalada Jigjiga ayaa sheegaya in labada General ee Tigreaga ee lagu kala Magacaabo General Mulugeta iyo General Haile ay weli wadaan hanjabadii ay shirarka ugu qabanayeen qaybaha bulshada ee Magaalada Jigjiga.

Warku wuxuu intaas ku darayaa in ay maanta shir u qabteen Odey dhaqameedyada Magalaada Jigjiga, halka ay shalay kala kulmeen ganacsatada Magaalada Jigjiga. Sido kale waxay beri la kulmi doonaan Xafiisyada Maamul ku sheega, sida xafiiska Garsoorka iyo Xeer ilaalinta.

Kulamadan oo socdey intii mudo ah ayey labada General ee ka socda Gumeysiga Itoobiya dadka shacabka ah ugu hanjabayaan, iyaga oo ku eedeynaya in ay dadku yhiin ama taageersanyihiin ururka ONLF.

C/nuur Sh. Maxamed

Info@radioxoriyo.com
raadioxoriyo@yahoo.com

Radio Xoriyo waxaad ka dhegaysan kartaa Mawjadda 25 MB ee dhererkeedu yahay 11865 KHZ,iyo internetka Radioxoriyo.com,Ogaden.com Maalmaha Talaadada iyo Jimcaha 7: 30PM waqtiga Afrikada Bari

Faafin: SomaliTalk.com | June 3, 2006

Ogeysiis ku jeeda Soomaalida Minnesota (Midtown Exchange/ Global Market)

Soomaalida Minnesota waxaa la ogeysiinayaa in agagaarka Masaajidka cusub ee la gaday ee Abubakar al sidiiq agtiisa laga dhisay guryo la kireysto weliba dadka dan yarta ah qayb loogu talo galay. Gurigaas oo aad u weyn waxaa uu ku yaalaa 2929 Chicago Ave South Minneapolis Gurigan waxaa uu ku yaalaa meel u dhaxayso labo masaajid kuwaas oo kala ah Masji Abubakar iyo Masjid al Iimaan. Waxaa kale oo aan ka dheerayn masaajidyada Umatu Muxammad, Al-towxiid, iyo masjid Cumar iyo labada suuq ee aadka u waaweyn ee Soomaaliyeed Karmal Mall iyo Mallka 24ka.

Gurigan dib u habaynta lagu sameeyay waxaa la yiraahdaa Midtown Exchange Apartment. Ka dib markii la arkay horumarka iyo soo noolaynta ay immigrants ku sameeyeen Lake Street muhaajiriintaas oo u badan Latino iyo Somali ayaa ganacsato kaashanaysa shirkadda weyn ee Allina iyo madaxda magaalda Minneapolis iyo Congressmenka Minnesota oo ay ka mid yihiin Senator Coleman, Senator Dayton, Congressman Sabo waxaa suurtogal noqotay in Midtown Echange dib loo dhiso weliba Global Market uu noqon doona suuq caalami ah marka la furo.

Global Market waxaa talada lagu dhisay wax ka lahaa nin Soomaaliyeed oo la yiraahdo Hussein Samatar oo ah madaxa hayada African Development Center. Degaankan waa mid afka Soomaaliga lagu qoray meelkasta maalinta furitaanka Amiin Caamir ayaa ku soo bandhigi doonaa farshaxan Soomaaliyeed. Waxaa kale oo ka soo qaybgeli doona madaxda gobolka iyo dadweyne badan.

Xafladda furitaanka

Midtown Exchange & Global Market.

June 3, 2006 saacada markay tahay 10:00 subaxnimo ilaa 4:00 galabnimo

Kala xiriir Guryaha Midtown Echange 612-823-1104

Global Market business African Development Center 612-333-4772

Waxaa soo tebiyey: Maxamuud Wardheere
mnwardere@yahoo.com