Waxaa weli maalintii sadexaad ku jira Saldhiga Magaalada Bosaaso Guddoomiyaha Bulshada Rayidka Ururka INXA Xafiiska Gobolada Puntland Cabdi Faarax, kadib markii uu isku dayey si nabad ah inuu ku dhigo banaanbax lagu muujinayo sida bulshada uga xuntahay Dagaalada Macnodarada ah ee Muqdisho ugu dhimanayaan Shacabka Soomaaliyeed.
Cabdi Faarax wuxuu galay xaalad adag oo lugaha ayaa six un looga xiray silsilad adag oo labada dhinac qufulo uga dhegan yihiin, isagoo sheegay in horay lugta bidix uu naafo uga ahaa taasina ay dhilisay in neerfaha lugta ay shaqeynkari waayeen iminka.
Arrintan ayaa ah mid ka baxsan xaquuqda adaanaha in lagu xiro silsilad nin naafo ka ah lugaha oo weliba u ololeeya arrimaha bulshada.
Dastuurka Puntland ayaa dhigaya in qofkasta oo Reer Puntland ah uu xor u yahay inuu fikirkiisa cabirikaro siduu doon ha ku cabiree, dibadbax, qoraal, sawir, Suugaan iyo wixii la mid ah.
Ma ahan markii ugu horaysay ee maamulka Puntland dhibaato u gaystaan bulshada rayidka ah horay ayey waxay xabsiga u taxaabeen madaxda ururka Ramaas oo si xor ah u muujinayey aragtidooda siyaasadeed. Wuxuu kaloo xabsiga marar badan u taxaabay maamulka Puntland Kooxo Weriyayaal ah oo si madaxbanaan shaqadooda u gudanayey.
Waxaa intaas oo dhan ka daran weeraro dad ku dhinteen oo marar badan maamulka askar ka amar qaadata ku qaaday duulaan dad rayid ah oo aan wax ba galabsan.
C. G. N. Bosaso Puntland.
June 1, 2006
Midowga Maxaakiimta Islaamiga
ah oo dagaal kula wareegay Suuqa Xoolaha
iyadoo ay maalmahan
magaalada Muqdisho ay ka jireen dagaalo u dhaxeeya Midowga Maxkamadaha iyo
Isbaheysiga la dagaalanka argagixisada, ayaa subaxnimadii Arbacada ciidamada
Midowga Maxaakiimta Islaamiga ah ay weerar ku qaadeen Suuqa Xoolaha oo fariisin
u ahaa kooxo maleeshiyo ah oo daacad u ahaa, Bootaan Ciise Caalim wasiirka
dhaqan celinta maleeshiyooyinka xubinna ka ah Isbaheysiga la dagaalanka
argagixisada.
Dagaalkaas oo
socday muddo kooban ayaa midowga maxaakiimta waxey ku guuleysteen iney cagta
mariyaan kooxihii maleeshiyooyinka ahaa ee ku sugnaa Suuqa Xoolaha kuwaasoo la
sheegay iney markii horeba ay dhibaato ku hayeen bulshada halkaasi ku dhaqan iyo
isku socodka gaadiidka ee gobolada Soomaaliya.
Midowga Maxaakiimta
Islaamiga ah waxey dagaalkaasi kula wareegeen gawaari tikniko ah iyo hub iyadoo
ciidamadii Maxaakiimta Islaamiga ah ay u dhawaaqeen dhinaca deegaanka Darmooleey,
halkaasoo fariisin u ah maleeshiyooyin daacad u ah wasiirka Ganacsiga Muuse
Suudi Yalaxow, xubinna ka ah Isbaheyga la dagaalanka argagixisada.
Todobaad gudihii
ayey Midowga Maxaakiimta Islaamiga ah laba jeer guulo ka gaareen dagalada u
dhaxeeya iyaga iyo Isbaheysiga la dagaalanka argagixisada, todobaadkii hore
ayeyna aheyd markii ciidamada Midowga maxkamadaha ay dagaal culus la galeen
ciidamada Isbaheysiga kaasoo ka dhacay deegaanka Km4, kaddibna ay halkaasi kula
wareegeen gacan ku hayntii Isgoyska Km4, guushii labaadna waa tan maanta ay kula
wareegeen Suuqa Xoolaha.
Sheekh Shariif Sh.
Axmed oo ah guddoomiyaha Midowga Maxaakiimta oo wax laga weydiyey dagaalkii
saakay ay kula wareegeen Suuqa Xoolaha, ayaa wuxuu sheegay in dagaalkaasi uu ku
bilowday iyadoo midowga Maxaakiimta laga dilay laba qofood.
Madaxweyne C/llaahi Yuusuf oo
Mareykanka ka dhaadhiciyay..
Wararka naga soo
gaaraya Magaalada Nayroobi waxay sheegayaan in Madaxweyne C/llaahi Yuusuf oo
Magaalada Nayroobi dhawaan kula kulmay diblamaasiyiin ka socday Dowladda
Mareykanka, waxyana isla soo qaadeen dagaalada ka socda Muqdisho ee u dhexeeya
Midowga Maxaakiimta Islaamiga ah iyo Isbahaysiga isku magacaabay la dagaalanka
Argagixisada. Madaxweynaha ayaa Diblamaasiyiintaasi waxa uu u sheegayin Dowladda
Mareykanka ay ku xadgudubtay qarannimadii Soomaaliya, maadaama ay si gaara u
taageertay xubno ka tirsan Dowladda, isagoo sheegay in arrintaani ay tahay mid
ka hor imaaneysa Qawaaniinta caalamiga ah.
Madaxweyne
C/llaahi Yuusuf waxa uu sheegay in dagaalka ka socda Muqdisho ay mas’uuliyeeda
leedahay Dowladda Mareykanka looga baahan yahay in ay raaligelin ka bixiso.
Diblamaasiyiintii ka hadashay kulankaasi ayaa waxay meesha ka saareen in
Dowladda Mareykanka ay taageero lacageed siisay Qabqablayaasha dagaalka ee ku
sugan Magaalada Muqdisho, waxay kaloo sheegeen in Dowladda Mareykanka ay
taageersan tahay Dowladda Federaalka wixii tasiilaad ah oo ay u baahan tahayna
ay siin doonaan, hase yeeshee Saraakiil ka tirsan USA ayaa waxay qireen in
Dowladda Mareykanka ay qarash siisay Hogaamiye kooxeedyada ku sugan Magaalada
Muqdisho.
Max’ed Dheere oo ay la socdaan dhowr Tikniko ah oo soo
gaaray..
Iyadoo maalintii shalay
Midowga Maxaakiimta Islaamiga ah ay la wareegeen gacan ku haynta deegaano ka
tirsan Suuq Xoolaha oo fariisimo u ahaa Maleeshiyo taageersan Isbahaysiga la
magacbaxay la dagaalanka Argagixisada kuwasoo firxad-koodii la geeyay Degmada
Balcad ayaa warar ayaanu helnay waxay sheegayaan in ciidamo iyo Tikniko uu wato
Guddoomiyaha Gobalka Sh/dhexe ay u soo dhaqaaqeen dhinaca Maagaalada Balcad,
waxaana la sheegay in ka cabsanayaan in deegaanka Balcad ay ku soo siqaan
Midowga Maxaakiimta Islaamiga ah.
Ciidamada Midowga Maxaakiimta
Islaamiga ah ayaa muhiim u tahay qabshada deegaanka Suuqa Xoolaha waayo
Maleeshiyada halkaasi ku sugneyd, waayo waxay Maleeshida Maxaakiimta ka hor
taagnaayeen in ay gudbaan dhinaca deegaanka Balcad ama Dayniile.
Colaado baryahan ka jiray Gobalka Hiiraan …
Waxaa maalmihii la soo dhaafay
gobalka Hiiraan ka jiray colaado u dhexeeyay beelo halkaasi wada dega, waxaana
coladahaasi ku dhintay dad aad u fara badan, waxaana ku dhaawacmay tiro intaa ka
badan.
Deegaanka Jawiil ayaa dhowr
jeer waxaa ku soo laab-laabtay colaado u dhexeeyay beelaha Ujeejeen iyo Xawaadle,
waxaana aaqiritaan-kii laga gaaray heshiis, sidoo kale deegaanka Maaxaas ayaa
iyana waxaa ka taagnaa colaado u dhexeeyay Beelaha Murusade iyo Xawaadle,
waxaase Coladahaasi markii dambe xakameeyay Odoyaasha iyo waxgaradka labada
dhinac.
Dagaal insa aad u qaraar ayaa
waxa uu ka dhacay degmada Jalalaqsi, waxa uuna u dhexeeyay Beelaha Xawaadle iyo
Baadi-Cadde waxaana isna ku dhintay dad aad u fara badan, waxaase markii dambe
soo kala dhex galay dagaalkasi Odoyaal iyo Waxgarad ka tirsan labada beelood.
Dalladda Culumada Soomaaliyeed oo u soo
jeediyay in ay ka digtoonadaan..
Dalladda Culumada
Soomaaliyeed oo shalay shir jaraa’id ku qabtay xaruntooda ay ku leeyihiin
Magalada Muqdisho ayaa waxa ay ka hadleen dagaalada ka socda Magaalada Muqdisho
ee u dhexeeyay Midowga Maxaakiimta Islaamiga ah iyo Isbahaysiga la dagaalanka
Argagixisada, Dalladdu waxay sheegtay in dagaaladu ay yihiin kuwo u dhexeeya
Islaamka iyo kuwo u adeegaya Gaalada.
“Haddii aan nahay
Dalladda Culumada Soomaali-yeed waxaan u soo jeedineynaa Ummadda Soomaaliyeed in
ay taageeraan Midowga Maxaakiimta Islaamiga ah oo iyagu gacan ka gaystay
nabadgelyada magaalada Muqdisho” ayuu yiri Sheekh Nuur Baaruud oo ah guddoomiye
ku xigeenka Dalladdaasi, waxa uuna intaasi sii raaciyay “marka hore waxaana
nalagala dagaalamay nolosha, maanta waxaa la doonayaa in nalagala dagaalamo
Diinta”.
Sheekh Baaruud
waxa uu u soo jeediyay shacabka Soomaaliyeed in ay difaacdaan Diintooda oo ah
mid ay ku gaari doonaan liibaan Adduun iyo mid Aakhiro, waxaa kalloo u soo
jeediyay in ay ka feejignaadaan kuwa dibindaabyada la raba Diinta Islaamka.
Daabaco
Boggan | Print