Wararkii July 5, 2006

• Ugaas Max’ed Wali “Barre Hiiraale wuxuu wadaa Barnaamij Daaroodiisam ah oo loo soo dhiibay..”

• Ciidamadii Itoobiya ee soo galay Buulo-Xaawo oo qaarkood..

• C/llaahi Yuusuf Axmed oo shalay dib ugu soo laabtey Magaalada..

• Dowladda Itoobiya oo wada Qorsha ah in ay heshiisiiso Kooxohii.

• Kulan dhex maray Max’ed Jaamac Furux iyo. Gudoomiyaha maxkamada.

• Xafladii loogu dabaal dagayey Xoriyaddii Ummada Soomaaliyeed ee 46aad oo ka dhacday Minnesota...

• Dagaallo ciidammada Itoobiya lagu jabiyay.

  ---

Kismaayo: Xafladda Xiritaanka Xilli Jaamacadeedka....

 Munaasabad balaaran oo ay ka soo qeyb galeen dad weyne aad u fara badan oo lagu soo gaba gabaynayay xili jaamacadeedka kismaayo university ayaa shalay galinkii danbe ka dhacday hotel tawakal ee magaalada kismaayo.

Munaasabadaan oo ay ka soo qeyb galeen masuuliyiin fara badan oo ka kala socda maamulka degmada kan dooxada jubba iyo waliba kan jaamacada kismaayo ayaa waxaa ay ahayd mid lagu loogu soo gaba gabeynayay xilli dugsiyeedka ardeyda jaamacada xiligan ayagoo haatan ardeydu ay fasax galayaan.

Intii ay munaasabadaas socotay ayaa waxaa halkaas khudbado kala duwan ka soo jeediayay masuuliyintii halkaas isugu timid oo uu ugu horeeyay madaxda jaamacada kismaayo ayagoo dhamanaba carabka ku adkeeyay muhiimada ay leedahay waxbarashada islamrkaana ka war bixiyay waxyaabaha ay kala kulmeen furitaanka jaamacada kismayo, haddana ay ardeyda jaamacada oo ah kuwo aanan horey u helin jaamacad ku taala degaankooda ay hadda heleen. Prof. Cabdi Raxmaan sahal oo ah gudoomiye ku xigeenka jaamacada ayaa waxaa uu aad ugu dheeraaday micnaha loo aas aasay jaamacada kismaayo iyo sida ay oga faaiideysteen bulshada ku dhaqan gobolka oo uu sheegay in ay baahi weyn u qabeen helitaanka jaamacadka hirgasha gobolka.

Sidoo kale waxaa halkaas khudbado ka soo jeediyay qaar ka mid ah ardeyda xiligaan loo xirayo jaamacada ayagoo sheegay in ay aad ugu faraxsanyahiin aqoonta ay ka heleen jaamacada waxaana ay aad ugu mahad celiyeen macalimiinta waqtigooda ay u hureen in ay u faaiideeyaan.

cabdi khadar Nuur  | SomaliTalk Kismaayo | cabdiqadar84@hotmail.com

Ugaas Max’ed Wali “Barre Hiiraale wuxuu wadaa Barnaamij Daaroodiisam ah oo loo soo dhiibay..”

Ugaas Max’ed Wali Ugaas Axmed Nuur oo ah Ugaaska Beesha Sade ahna Afhayeenka Beelaha Daarood ayaa mar uu xalay na soo xiriiray waxa uu ka hadlay arrimo maalmahan u dhexeeyay Barre Hiiraale iyo rag kale, waxa uun yiri isagoo arrimahaasi ka hadlaya. “Soomaalidu waxba kalama qarsan karaan, marka laga reebo waxa jeebkooda ku jira, waxaan og nahay in Barre Hiiraale uu waday Barnaamuj Daaroodiisim ah oo la doonayo in lagu abuuro magac qabiil si loogu adeegsado arimo fool xun”. Ugaasku waxa uu intaasi raaciyay “Waxaan ayaandaro ah in Barre Hiiraale meel todoban sano laga soo gudbay uu maanta dib ugu laabto”.

Ugaas Max’ed Wali waxaa kaloo uu yiri “Walaalkey Barrow waan kuu nasteyxay-nayaa, waa in aad faraha kala baxdaa arrimaha laguu soo dhiibay oo aysan faa’idada ugu jirin Diinta iyo Dalkaba, xaaladda Maanta taagan waa inaad ka faa’iideysataa, haddii aad rabtid Liibaan Adduun iyo mid Aakhiro”.

Ugaas Max’ed Wali ugu dambeyntii waxa uu yiri Xikmad Soomaaliyeed ayaa oroneysa “Nin rag ah abaal waa gudaa, Doqonina waa garataa, haddii wax kugu dambeeyaan Barrow wixii abaal kuu guday”.

Ciidamadii Itoobiya ee soo galay Buulo-Xaawo oo qaarkood..

Wararka naga soo gaaraya Magaalada Buula Xaawo ee Gobalka Gedo waxay sheegayaan in ciidamadii Itoobiyaanka ahaa ee labadii maalmood halkaasi ku sugnaa ay maalintii shalay ahayd isaga dhaqaaqeen.

Lama garanayo sababa-ha ay ciidamada itoobiya uga baxeen halkaasi hase yeeshee warar ayaa waxay sheegayaan in qaar ka mid ah ciidamadaasi ay soo aadeen magaalada Baydhabo.

Wararka kale ayaa waxay sheegayaan in Ciidamada Itoobiya sababaha ay halkaasi uga baxeen ay tahay iyadoo uu cadaadi uga yimid dadweynaha Deegaanka oo u sheegay in aysan ogolaaneyn in ciidamo Itoobiyaan ah ay ku sugnaadaan deegaankooda.

Dowladda Itoobiya wali waxay beenineysaa in ciidamo Itoobiyaan ah ay soo galeen guda dalka Soomaaliya, Dhinaca kale warar ayaa waxay sheegayaan in ciidamo Itoobiyaan ah ay soo galeen mar kale deegaanka Jawiil oo ka tirsan Gobalka Hiiraan.

C/llaahi Yuusuf Axmed oo shalay dib ugu soo laabtey Magaalada..

Madaxweyne C/llaahi Yuusuf Axmed oo ka qaybgalay shirkii Wadamada Afrika ee lagu soo gebagabeeyay wadanka Gaambiya ayaa maalintii shalay ahayd dib ugu soo laabtay Magaalada Baydhabo, waxaana, ku soo dhaweeyay mas’uuliyiin ka tirsan Dowladda Federaalka.

Madaxweyne C/llaahi Yuusuf Axmed ayaa la filayaa in uu maanta warbixin siiyo Xubnaha labada Gole oo uu ku faahfaahinayo waxyaabihii ugu soo qabsoomay shirkii Gaambiya.

Madaxweyne C/llaahi Yuusuf ayaa waxa uu madaxdii shirkaasi ka qayb-gashay hor dhigay in Soomaaliya loo soo diro ciidamo nabad ilaalin ah, arrintaasi si weyn uga guuxeen madaxdii halkaasi fadhiday, waxayna ogolaadeen in soomaaliya ay u dir doonaan ciidamo nabad ilaalin ah oo Dowladda Federaalka kala qayb-qaata dhinaca amniga iyo waliba hub ka dhigista kooxa Maleeshiyooyinka.

Dowladda Itoobiya oo wada Qorsha ah in ay heshiisiiso Kooxohii.

Warar hoose oo aanu helnay ayaa waxay sheegayaan in Dowlada Itoobiya ay wado qorshe ah in ay heshiisiiso Xubnihii Isbahaysiga la dagaalanka Argagixisada ee looga adkaaday dagaalkii Muqdisho.

Heshiiskaan oo ay wadaan saraakiil sarsare oo ka tirsan Dowladda Itoobiya ayaa Dowladda Itoobiya waxay dooneysaa in xubnahaasi dib loogu celiyo jagooyinkoodii, kadib markii Ra’isul Wasaare Geeddi uu ka qaaday xilkii. Warar ayaa waxay sheegayaan in Max’ed Dheere oo ay la socdaan Saraakiil Itoobiyaan ah ay soo gaareen Magaalada Baydhabo, isla markaana uu kulan la yeeshay mas’uuliyiin ka tirsan Dowladda oo uu ku jiray Ra’isul Wasaare Cali Max’ed Geeddi.

Dowladda Itoobiya ayaa iyagu si aad ah uga soo horjeeda guusha ay Midowga Maxaakiimtu ka gaareen qabqablayaasha dagaalka oo mudo 15 sano ah dhibaato ku hayay shacabka Soomaaliyeed.

Waxaa lagu waramay in Ciidamo Itoobiyaan ah lagu arkay xarunta uu degan yahay Madaxweyne C/llaahi Yuusuf Axmed, ciidamadaas oo la sheegay in halkaasi loo keenay in ay sugaan ammaanka Madaxweyne C/llaahi Yuusuf, waxayna ka kooban yihiin ilaa iyo 300 oo askari.

Kulan dhex maray Max’ed Jaamac Furux iyo. Gudoomiyaha maxkamada.

Kulan ayaa waxaa wada yeeshay wasiir ku xigeenka Badda iyo Dekedaha Max’ed Jaamac Furux , Guddoomiyaha Maxkamadda Islaamiga ah C/qaadir Cali Cumar, Suldaanka Beesha Reer Xaaji Suleymaan Suldaan Cali Axmed Nuur Guuleed, kulankaan waxaa kaloo ka qaybgalay xubnaha ka socday Jaaliyadda Beesha ee Yurub, Ameerika iyo Kanada, waxaana looga hadlay sidii ay beeshu u yeelan lahayd midnimo guud.

Xubnahaasi waxay si weyn u soo dhaweeyeen Guusha Midowga Maxaakiimta Islaamiga ah ka gaareen Xaaladdii Cakirneyd ee Soomaaliya.

Guddoomiyaha Maxka-madda Sheekh C/qaadir ayaa waxa uu soo jeediyay in loo baahan yahay in la mideeyo Aqoonyahanada, Waxgaradka, Siyaasiyiinta iyo Culuma’udiinka beesha si ay ula jaan qaadaan is bedelka cusub ee ka dhacay dalka.

Bashiir Salaad Dhool Yare oo ku hadlayay magaca Jaaliyadda ee Dibadaha ayaa waxa uu soo jeediyay in loo baahan yahay in la sameeyo barnaamij qaabeysan oo lagula socdo xaaladda Beesha iyo deegaanada ay degan tahay, waxaana qoraalkaan na soo gaarsiiyay Mahad Daahir Muuse, wuxuuna kulankaasi ku dhamaaday Jawi is af garasho .

W/D Amiin Yuusuf Khasaaro
E-Mail amiinkhasaaro@hotmail.com