Barnaamijkii Radio Xoriyo
24 February 2006
Qaramada
Midoobey oo ku baaqay in Geeska Afrika loo soo gurmado.
Guddoomiyaha
CUD oo indha la'aan ka badbaaday.
Baydhabo oo
kulanka Baarlamaanka isu diyaarinaysa.
======================
Qaramada
Midoobey oo ku baaqday in Geeska Afrika loo soo gurmado.
Qaramada
Midoobey ayaa dunida inteeda kale ugu baaqday inay sida ugu dhakhsaha
badan uga soo jawaabto baaqii ku saabsanaa in gurmad degdeg ah lala soo
gaadho malaayiinta qof ee Geeska Afrika ku tabaalaysan
Bayaan ka soo
baxay hay'ad Qaramada Midoobey hoos timaada oo lagu magacaabo "Xaqa ay
dadyowgu u leeyihiin inay cunto helaan" ayaa lagu sheegay in bulshada
caalamka waajib ka saran yahay inay tallaabo degdeg ah ka qaado wax ka-qabashada
dhibaatada cunto la'aaneed ee ku timaad mid ka mid ah dalalka xubnaha ka
ah Qaramada Midoobey.
Bayaankan waxay
Qaramada Midoobey ku sheegtay in 11 milyan oo qof oo ku kala dhaqan
dalalka Jabuuti, Soomaaliya, Itoobiya, Kenya iyo Tanzania ay hayso
dhibaato ba'an oo ka dhalatay abaarta gobolkaas ka jirta.
Macaluusha
ba'an ee ka jirta gobolka Bariga Afrika waxay si gaar ah u sii
taabanaysaa qiyaastii 1,2 milyan oo ah carruur ay da'doodu shan sano ka
hoosayso, kuwaasoo sida la ogyahay aad ugu jilicsan nafaqo darrada iyo
cudurrada cunto xumada ka dhasha.
Qaramada
Midoobey waxay sidoo kale ugu baaqday dalalka ay macluushu hayso inay
hay'adaha Qaramada Midoobey ka kaashadaan sidii wax looga qaban lahaa
dhibaatada macaluusha ku soo noqnoqonaysa gobolka.
Dhinaca kale
Jabhadda Waddaniga Xoreynta Ogaadeenya ayaa dalalka beesha caalamka iyo
ururrada gargaarka ugu baaqday inay gargaar degdeg ah la soo gaadhaan
malaayiinka qof ee ku tabaalaysan gobollada kala duwan ee Ogaadeenya, ka
dib markii ay ku habsadeen abaaro ka dhashay xilli roobeedkii oo la
waayay.
Jabhadda
Waddaniga Xoreynta Ogaadeenya waxay sidoo kale beesha caalamka iyo
ururrada gargaakaba ugu baaqday inay gargaarka si toos ah u gaadhsiiyaan
dadwaynaha Soomaalida Ogaadeenya, isla markaana ayna ugu dhiibin
xukuumadda aan xil-kaska ahayn ee Meles Zenawi, oo gargaarka dadwaynaha
tabaalaysan loogu talagalay ku quudisa askarteed dulmiga ku joogta
dhulka Ogaadeenya ee xasuuqa iyo gumaadka ku haysa dadwaynaha Soomaalida
Ogaadeenya.
Guddoomiyaha
CUD oo indha la'aan ka badbaaday.
Guddoomiyaha
isbhaysiga CUD Hailu Shawel ayaa la sheegayaa inuu ka badbaaday indha
la'aan looga cabsanayay, ka dib markii dhakhaatiir ay xukuumadda Meles u
qabatay ay si xun uga qaleen Il, taasoo keentay in caabuq xun uu Isha
kaga dhasho.
Hailu Shawel oo
ka mid ah madaxda mucaaradka ee xidhxidhan waxaa qalliin dambe ku
sameeyay dhakhaatiir shisheeye ah, kuwaasoo talaadadii sheegay inay
qalliinkaas ku guulaysteen, isla markaana uu Hailu Shawel ka badbaaday
indha la'aan looga baqayay.
Dhakhaatiirtan
shisheeyaha ahi waxay sheegeen inuu hadda caafimaadkiisu aad u fiican
yahay, ka dib markii caabuq Isha bidix kaga dhashay, iyo qalliinkii
xumaa ee dhakhaatiirta dawladu ku sameeyeen ay khatar galiyeen
mustaqbalka indhihiisa.
Bisha Fabrawri
17-dii waxaa caafimaadka Hailu Shawel walwal aad u ballaadhan ka
muujiyay masuul sare oo ka tirsan Midowga Yurub oo xabsiga ku booqday
madaxda mucaaradka iyo suxufiyiinta u xidhxidhan xukuumadda Zenawi.
Baydhabo oo
kulanka Baarlamaanka isu diyaarinaysa.
Masuuliyiinta
magaalada Baydhabo iyo qeybaha bulshada ayaa sameeyay diyaargaow
ballaadhan oo ku aaddan sidii loo soo dhowayn lahaa xildhibaanada ku soo
jeeda magaalada Baydhabo ee ka qayb qaadan doona kulanka Baarlamaanka
Soomaaliya ee magaalada Baydhabo lagu qabanayo maalinta axadda ah ee
bisha Fabrawri 26-ka tahay.
Xubno isugu
jira wasiirro iyo xildhibaano ka soo jeeda beelaha gobollada Bay iyo
Bakool iyo qaybaha bulshada ee ka hawlgala magaalada Baydhabo ayaa
dhammaystay diyaar garowgoodii ku aaddanaa soo dhawaynata xilidhibaanada
Baarlamaanka.
Guddoomiyaha
Baarlamanaka Shariif Xasan Sheekh Aadan ayaa dhawaan magacaabay xubno
guddi ah oo u xilsaaran soo dhawaynta masuuliyiinta magaalada imanaya
iyo sugidda amnigooda.
Waxaa sidoo
kale la xaraynayaa malleeshiyooyinka hubaysan ee ka jira magaalada
Baydhabo, kuwaasoo xeryo loo diyaariyay lagu xaraynayo. Waxaana
qaybohoodii ugu horreeyay lagu xareeyay xero ku taall deegaan Daynuunay
oo dhawr iyo toban km ka baxsan magaalada Baydhabo.
Ilaa iyo
afartan xildhibaan oo arbacadii ka ambabaxay magaalada Muqdisho ayaa
nabadgelyo ku gaadhay magaalada Baydhabo, halkaasoo si wayn loogu soo
dhaweeyay. Xildhibaanadan ayaa lagaga hortegay meel magaalada
duleedkeeda ah, waxaana iyagoo la galbinayo la soo galiyay magaalada
Baydhabo oo ay horay ugu sii sugnaayeen xubno Baarlamaanka ka mid ah oo
isu diyaarinaya ka qayb galka kulankii ugu horreeyay ee muddo sannad ah
uu si wadajir ah u yeesho Baarlamaanka ku meelgaadhka ah ee Soomaaliya.
Radio Xoriyo
24 February 2006.
Axmed Xidig
Radio Xoriyo waxaad ka dhegaysan kartaa Mawjadda 31 MB ee dhererkeedu
yahay 9820 KHZ, Maalmaha Talaadada iyo Jimcaha 7: 30PM waqtiga Afrikada
Bari
Ciidamada Isbahaysiga Dooxada Jubba oo
kusii Jeeda Muqdisho
»Indha-Cadde:
isbahaysiga Muqdiso waa mid shareed..
»Saraakiil
Itoobiyaan ah oo soo gaaray Gobalka Sh/Dhexe
»Max’ed
Dheere oo deg deg ugu ambabaxay Nairobi...
iyo Warar
GooGoos ah ka akhri halkan... Guji... Feb 23
Shiikh
Aweys oo sheegay in dagaalka uu socon doono ilaa ay ka toobad
keenaan...
iyo
Xaabsade iyo Aadan Saransoor oo noqday Xubnihii ugu
horeeyey ee Cidamadooda ka saara Baydhabo
iyo Warar
GooGoos ah ka akhri halkan Feb 22
Baaq ku
wajahan dagaalada ka socda Muqdisho
Soomaalida
Minnesota oo si weyn uga Qayb galay Bannaanbaxii Minneapolis
Warbixin iyo sawiro laga qaaday Bannaanbaxii
lagu muujinayey Jacaylka Nebi Muxamed NNKH...
Guji...
Faafin: SomaliTalk.com Feb 23, 2006