Shoobtoo
Soo carar, Maxaa dhacay Aay Maana?, Ma ogid miyaa in la
dilay Muriidi?, “Waa Muridiigee?”, “Waa Muridiigii Biibitada
yar ku lahaa Marwaas Hoostiisa?” “Hadaan gartay, Alla waa
wiilkaa yaraa ee Masaakiinka ahaa, waa u maleehaayey in
dhibaatadan ku dhaceyso, Ilaahaa joogo, ilaahaa joogo,
Shoobto maxaa loo dilay Muriidi?”, “Niman mooryaan ah oo
Gaari watay ayaa mid iyaga ka mida wuxuu rabay in uu shaah
ka iibsado, markii uu shaahii labo jeer dhedhemiyey, ayuu ku
yiri Muriidi, “Doofaaryahow maxaa nooga iibisay Shaaha
qaraar”, intii uusan jawaab bixin Muriidi ayaa afka xabad
loo geliyey meeshii uu ku dhacay” “Waa u maleehaayey meeqa
sanaaan dhahayey, halkoo Mukulaal Madow ah iska keenso” “Waa
runtaa, amba xitaa waxaan kula taliyey in halkaas Mukulaal
Madowgaa iska keensado, balse wuxuu igu yiri ‘lacag aan ku
kharashgareeyo oo aan siiyo ma hayo, Biibitadana wax sidaasi
ah igama soo galaan”.
Qolo mooryaan ahoo Biibito ku
hor qayileysa ayaa wiil yar oo Garaabiisti ah oo reer Xamar
ah waxa uu damcay in uu Caleemaha yar yare ee ka daatay
ragaasi, in uu hoostooda ka gurubsado, mid ka mid ah
Mooryaantii ayaa Bistoolad inta uu la baxay Lugahana kor u
qaatay madaxa ku dhiftay cunugii, dhulka lama soo dhicin,
kooxdii Mooryaanta ahayd wax jixin jix ah dilkaas kama
muujin oo qayilaadoodii ayey sii wateen, durbadiiba waxaa
goobtii yimid Hooyadii iyo Aabihii dhaley wiilkaasi oo ay
daba ordayaan Haween iyi Dhallinyaro kale, gabar baa ku
barooratay “Alla waa dhintayeey Cumarey” Mooryaantii mid ka
mid ah ayaa dhowr xababood kor ugu riday dadkii meeshiina ku
kala eryey, Aabbihii iyo Hooyadii dhalay wiilka waxay kari
waayeen sidii ay ku soo qaadan lahaayeen Maydka wiilkooda,
Gabar la yiraahdo Jiijo ayaa Odeygii iyo Habartii ku tiri
“waxaan idiin hayaa talo aad ku soo qaadan kartaan maydka
cunuga”, Hooyadii oo ay iline ka da’eyso ayaa tiri “Maxay
tahay noo sheeg yaakhee, Ilaahaa jiroo joogee” Odeygii
dhalay wiilka iyo Habartii ayaa isku soo jeestay, meeqaa ku
dhahaayey wadankaan naga wad oo aan ka tahriibno.
Odeygii
ayaa Gabadhii Jiija ahayd ku yiri “Aawey taladaan noo haysay”,
waxayse ku tiri “Aw-Cismaan Minankiisa ayaa waxaa jooga
Igaarkoo Mukulaal Madow ah” “Waa runtaa” ayuu Odeygii jawaab
ka dhigay.
Gurigii
Cismaan ayaa loo yaacay, markii la gaaray waxaa iridkii kaga
hor yimid, Cismaan Qudhiisii, oo weydiiyey waxa dhacay “Ma
ogid miyaa in la dilay Cumarey?” “Cumareygee ma kii yaraa ee
9-jir un ahaa?” “haa isaga waaye, xitaa waxaa naloo diiday
in aan soo qaadano maydkiisii, waxaan u baahanay in aan nagu
dartaan Baroonshe si uu maydka noogu soo qaado”.
Baroonshe oo qol ku jira oo qayilaya, ayaa Odeygii Aw-Cismaan
ahaa u tagay oo ku yiri “Baroonshow cid Deriskeena ah ayaa
wiil yar laga dilay Maydkiina loo diiday”, Baroonshe oo
indha banaanka keenay ayaa dibadda u soo baxay oo Odeygii
iyo Habartii weydiiyey “Ragga dilay wiilka waa reerkee?”,
“Anaga maxaa ka kaseenaa reer reer” ayay si wada jir ah u
yiraahdeen Odeygii iyo Habartii, “Waxay ku hadlayaan waa
maxay, wadankaan waad la socotaan xaalkiisa reer baa wax
lagu dhaqaajiyaa ee cid la iska abaari karo ma jirto”.
Odeygii Baroonshe la joogay ayaa baryey Baroonshe, sidii
ayuuna ku tegay goobtii Maydka yiilay, markiiba raggii ayay
is aqoodeen sidii ayaana Maydkii lagu soo siiyey reerkiina
kuna aasteen.
Subax
waagu soo baryaayo, ayaa cid reer Xamar ah gurigooda waxaa
la soo hor dhigay nin mayd ah, subixii markii ay indha kala
qaadeen ayay waxay arkeen gurigoodii oo uu horyaalo nin mayd
ah. Ninka maydka ah koox mooryaan ah oo uu ka tirsanaa ayaa
gurigii isku hareeyey, mid ka mid ah mooryaantii ayaa amar
ku siiyey Ciddii inay soo bixiyaan ninka dilay ninkan,
haddii kalesa ay arki doonaan Madaxyadoodoo Qalalan, Ciddii
inta yaabtay ayey wax ay sameeyaan garan waayeen, Odeygii
reerka ayaa qoorta dariishadii ka soo dhiibtay, oo yiri
“Yaakhee anaga ninkaan ma dilin, Maydkan meesha waa la soo
dhigay” “Muxuu ku hadlayaa Odeygu, Yaakhee Yaaakheeydaada ma
aqaanee, soo saar ninka haddii kale……….”
Reerkaas,
waxay ku qasbanaadeen in ay bixiyaan diyadda ninkaasi, xitaa
waxaa dhacday in dhowr jeer loogu soo noqnoqday diyo ninkaa
oo keliya ah, waxay markii dambe isaga tahriibeen dalka
iyadoo aaday dalka Yemen
.Dhacdooyinkaa
xanuunka badan ee aan ka soo sheekeeyey waa kuwo dhacay 16
kii sano ee la soo dhaafay marka ereyga Mukulaal Madowga waa
erey reer Xamarka u yaqanaan Beelaha hubeysan waxaana dhihi
karaa”Isku Ilaali iskana Ilaali”
Nin reer
Xamar ah ayaa laga hayaa in uu yiri “Yaakhee anaga manala
yasaa, maa hubka aan hayno nalaka wareejiyo, reer hebelba
waa laga qaadaye” “War hub miyaad haysataan sacabooleey
ayaad tihiini” “Mukulaal Madowyaashaan guriga ii fadhiya ma
arkeysid miyaa, iyagaaba hub ahee oo loo baahan yahay in la
wareejiyo”, Abuu Mansuur oo ah Guddoomiye ku xigeenka
Ammaanka Golaha Maxaakiimta ayaa waxa uu yiri ‘waa dhamaatay
xiligii Mukulaal Madow, xitaa Mukulaal cad.