Markii Golaha Maxaakiimtu ay la wareegeen gebi ahaan Magaalada Muqdisho ayaa waxaa arrintaani si aad ah u soo dhaweeyey shacabka soomaaliyeed oo iyagu qayb ka ahaa la wareegidaasi, kaddib markii ay u adkeysan waayeen mudo 16 sano ah qabqablayaashii dagaalka.

Markii meel lagu ogaaday raggii xooga ku haystay magaalada Muqdisho ayaa waxaa qaar ka mid ah Maxaakiimta Islaamiga ah ay bilaabeen in ay weeraro ku qaadaan goobaha laga daawado Aflaanta, waxaana weerarkaasi xoogeystay intii uu socay Koobkii Adduunka, hase yeeshee arrintaasi qaar ka mid ah dhallinyarada cabasho ayay ka keeneen, waxaana arrintaan wax laga weydiiyay Guddoomiyaha Golaha maxaakiimta oo yiri “Xirid Shineemo waa nooga weyn arrimo fara badan oo na hor yaala”, hadalkaasi ayaa Milkiilayaasha shaneemooyinka aad ugu farxeen, waxaana ka fuqday neef weyn, hase yeeshee Maxaakiimta Islaamiga ah ee ku yaala xaafadaha ayaa iyagu iska watay howshii ka hortaga iyo xirida shaneemooyinka, waxayna milkiilayaasha lagu amray in aysan furi Karin Shaneemadooda, habeenada qaarkood ayaa ciidamo ka socda Maxaakiimta waxay u soo dhuuntaan Shaneemooyinka ku yaala xaafadaha dhexdhexdooda halkaas oo ay ka bilaabaan in ay dhallinyarada xoog uga saaraan isla markaana ay burburiyaan Tabeelayaasha iyo qalabka kale oo halkaasi yaala.

Ciidamada Maxaakiimta ayaa inta badan waxay is ticmaalaan marka ay imaanayaan shaneemooyinka Gawaarida loo yaqaano Cabdi Bilayaasha oo leh guux ay si aad ah uga argagaxaan dhallinyarada daawata Aflaanta.

Gaari Caasi ah ayaa isagoo ag maraya goob Shaneemo waxa uu u guuxay sidii uu Cabdi Bile,waxaa dhacday dhallintii fiirsaneysay shaneemada u qaateen in ay yimaadeen Maxaakiimta Islaamiga ah, markiiba waxaa dhacday is buurasho, iyadoo dhallinyarada qaarkood uu ka soo gaareen dhaawacyo fudud, markii ay banaanka u baxeen ayaa mid ka mid ah Dhallinyaradii waxa uu u sheegay saaxiibadii in guuxa yeeray uusan aheyn Cabdi Bilihii Maxaakiimta balse uu ahaa Caasi meesha marayey , mid baase yiri “War heedhe wadnihii ayaa na caddaaday, sidee ayaan ka yeelnaa guuxa kan ee Cabdi Bilaha”.

Habeen kale ayaa Gaari kale oo u guux dhow Cabdi Bilaha, waxa uu ag maray Goob shaneemo ah, markii uu labo jeer, Hiim………Hiim………Hiim… ka siiyey ayaa dhallinyaradii oo ay dhega u taagnaayeen halkii ku kala baxsadeen oo is buurasho weyni ka dhacday goobtii, waxaana halkaasi gacani uga jabtay wiil dhallinyaro.

Haweenay meeshaa Shaah ku iibineysay ayaa tiri “Guuxaani ma ahan kii aad ka carari jirteen ee waa gaari kale oo meesha iska marayey”, Wiil Dhallinyaradii ka tirsanaa oo naagtii la hadlaya ayaa yiri “Mar dambe shaneemadaan soo ma galo”, waxa uuna intaas u sii daba dhigay “Shaneemo xaafd ag teenaa ku tiil ayaan uga soo cararay guuxaan ee mar walba muxuu ii daba socdaa”.

Qaar ka mid ah Shaneemooyinka ayaa waxay bilaabeen in ay ilaalo kore sameystaan si ay isaga ilaaliyaan Baabuurta Maxaakiimta.

Habeen sii horeysay ayaa Gaari Cabdi Bile ah oo aysan lahayn Maxaakiimtu qorina uu saarneyn waxa uu ka soo muuqday meel fog mid ka mid ah dhallinyaradii ilaalada ku jirtay ayaa qaylo dhaan gaarsiiyey saaxiibadiisii kale oo ku qayliyay “War waa la soo socdaaye, ka soo baxaay oo isaga cararaay meesha”, markiiba waxaa bilaabatay in Dhallinyaradii ku jirtay gudaha shaneemada ay ku qayliyaan “Nin walibow naftaa,cagahaaga wax ka day”, waxayna halkaasi waxyeelo ka soo gaartay qaar ka mid ah dadkii daawanayey iyo qalabkii yiilay shaneemada markii la jiiray, Sidoo kale cunug daawanayey shaneemada ayaa waxa qabsatay koronto hase yeeshee waa laga soo gaaray oo isagoo suuxsan ayaa la soo bixiyey.

“Maxaakiimta Islaamiga ah waa in labo midood ku dhaqaaqaan, waa tan horee, in gebi ahaanba ay Amar ka soo saaraan shaneemooyinka, ama ay iska dhaafaan” ayay ku talo bixiyeen dadka daawada aflaanta qaarkood waxayna intaa raaciyeen “Habeen walba kuma jiri karno carar iyo kala orod”.

Dhibaatadan iyo khasaarahan soo gaaraya habeen walba dhallinyara daawata Shaneemooyinka ayaa waxaa ka dooday dad iyago la socday is bedelka cusub ee dhacay, waxayna qaarkood soo jeediyeen inaan la joogin xiligii ay Maxaakiimtu isku mashquulin lahaayeen in ay xiraan Shineemooyinka, waayo ayay yiraahdeen, waxaa weli hor yaala arrimo ka waaweyn xiritaanka Shaneemooyinka. waa in ay Maxaakiimtu ku xisaabtamaan khasaaraha ka imaan karan is buurashada dhallinyarada oo nafta lagu weyn karo, haddii ka.le Maxaakiimtu waa in ay go’aan ka soo saaraan