WARARKII AGOOSTO 16, 2006
- Dowladda Itoobiya oo u soo jeedisey
Geeddi in uu dedejiyo magacaabista..
- Golaha Maxaakiimta oo ogolaaday ka
qaybgalka kulanka Khartuum..
- Cabqi Qaybdiid iyo ciidamo uu wato
oo u soo dhaqaaqay dhinacaa iyo deegaanka…
- Golaha Maxaakiimta Islaamiga oo
digniin ka soo saaray in ciidamadooda loogu yeero..
- Ururka SOWJO oo siminaar u qabtay
Suxufiyiin ka kala socotay qaybaha warbaahinta..
-
Dagaalo calculus oo lagu naafeeyey
ciidanka gumaysiga Itoobiya.
- GAROOWE : Hay'adaha Diakonia iyo
Contenberg oo dib u eegis ku samayna waxqabadka...
Dowladda
Itoobiya oo u soo jeedisey Geeddi in uu dedejiyo magacaabista..
Dowladda Itoobiya oo iyadu ka dambeysay in
la soo afjaro khilaafkii u dhaxeeyay Dowlaadda Fedaraalka kaasoo dhaliyey in
Wasiiro fara badan ay iska casilaan Dowladdii Cali Max’med Ceeddi ayaa lagu
waramay in Ra’iisul Geedi ay farriin uga timid Dowladda Itoobaya farriintaas
oo ah in Ra’isul Geeddi uu dedejiyo magacaabista Golaha Wasiirada oo
waqtigii loogu talagalay ay dhaaftay muddo seddex maalmood ah, Ra’isul
Wasaaraha ayaa waxaa la sheegay in wadatashiyo uu la leeyahay Mas’uuliyinta
sare ee Dowladda kaasoo la xiriira sidii loogu dhawaaqi lahaa Golaha
Wasiirada. Kulan qaatay mudo dhowr saacadood ah ayaa waxaa yeeshay
Madaxwayne C/laahi yuusuf, Gudoomiyaha Baarlamaanka Shariif Xasan iyo
Ra’isul Geeddi waxaana la sheegay in wali ay jiraan khilaafyo yar yar oo la
xariira cidda loo magacaabayo ama ka mid noqoneysa Golaha Wasiirada, warar
aynu ka helnay xarunta Madaxtooyada ee Magaalada Baydhabo waxay sheegayaan
in Wasiirka arrimaha Dibada ee Itoobiya uu dib ugu soo laaban doono
Magaalada Baydhabo si uu u dhameeyo khilaafka wali ku ku kala dhexjira
Mas’uuliyiinta Dowladda si mar kale uu u soo afjari la haa khilaafka wali
taagan, arrimaha la isku mari la’ yahay waxaa ka mid ah sidii Beelaha loogu
qaybin la aa Xubnaha Wasiirrada Dowlada Fadaraalka, Iyadoo saddex mas’uul uu
mid waliba wato rag oo uu doonayo in ay ka mid noqdaan golaha Wasiirada.
Golaha
Maxaakiimta oo ogolaaday ka qaybgalka kulanka Khartuum..
Kulan ay shalay isugu yimaadeen labada Gole
ee ay ka kooban yihiin Maxaakiimta Islaamiga aha ayaa waxaa looga hadlay
arrimo fara badan oo la xirira ammaanka goobaha ay ka gacanta ku hayaan
Maxaakiimta Islaamiga ah iyo waxa laga yeelayo kulanka Khartuum.
Dood dheer iyo falanqeyn kaddib ayaa
xubnaha Golaha maxaakiimta waxay isku afgarteen ka qaybgalka kulankaasi oo
la doonayo in lagu heshiisiiyo iyaga iyo Dowladda Federaalka.
Maalintii doraad ahayd ayaa wafdi ka socday
Dowladda Kenya waxa uu soo gaaray Magaalada Muqdisho, waxa uuna kulan la
yeeshay Golaha Maxaakiimta oo uu ka dalbaday inay ka qaybgalaaan kulankaasi,
sidoo kale wafdigaani waxa uu kulan la yeeshay mas’uuliyiinta Dowladda
Federaalka oo ay isla soo qaadeen ka qaybgalka kulankaasi waxayna sheegeen
inay ka qaybgalayaan kulankaasi, ilaa iyo haddana lama oga waqtiga la
qabanayo kulankaasi, iyadoo Jaamacadda Caraba ay aad u daneyneyso isku
imaanshaha labada dhinac ee isku haysta arrimaha Soomaaliya.
Cabqi Qaybdiid iyo ciidamo uu wato oo u soo
dhaqaaqay dhinacaa iyo deegaanka…
Wararka naga soo gaaraya gobalada dhexe
waxay sheegayaan in Cabdi Qaybdiid oo looga adkaaday dagaalkii ka dhacay
Magaalada Muqdisho oo maalmahan abaabul dagaal ka waday Gobalka Mudug ayaa
waxaa la sheegay in maalintii shalay ahayd ciidamo uu horkacayo ay u soo
dhaqaaqeen dhianca deegaanka Bandiiradley halkaas oo ay ku sugan yihiin
Ciidamo ka tirsan Golaha Maxaakiimta.
Cabdi Qaybdiid waxaa ku wehliya ciidamada
uu wato ciidamo ka socda Puntland waxaana la sheegay in markii uu ka soo
baxayey Gaalkacyo uu kulan la soo yeeshay Madaxweynaha Maamul Gobaleedka
Puntland Cadde Muuse oo ay isla soo qaadeen sidii wadajir ah looga hortagi
lahaa Ciidamada Maxaakiimta oo ku sii siqaya Magaalada Gaalkacyo.
Ciidamada Maxaakiimta Islaamiga ah oo horey
ugu sugnaa deegaanka Gelinsoor ayaa waxaa la sheegay inay fariisin ka
dhigteen deegaanka Bandiiradley oo 60Km u jirta Magaalada Gaalkacyo ee
Gobalka Mudug waxaana la sheegay in ay wataan tikniko fara badan.
Golaha Maxaakiimta Islaamiga oo digniin ka
soo saaray in ciidamadooda loogu yeero...
Sheekh C/raxmaan Cali Muudey oo golaha
Maxaakiimta u qaabilsan dhinaca Dacwada iyo warfaafinta ayaa waxa uu sheegay
in Maalmaha soo socda ay Magaalada Muqdisho ay ka howlgali doonaan ciidamo
ka socda Golaha Maxaakiimta oo wata darees ka duwan kuwii hore, kuwaas oo la
sheegay in ay sugi doonaan Ammaanka Magaalada Muqdisho.
Sheekh C/raxiim waxa uu Saxaafadda uga
digay in wixii haatan ka dambeeya aan ciidamada Maxaakiimta loogu yeeri
Karin maleeshiyo, balse loogu yeeri karo Ciidamada Ammaanka Golaha
Maxaakiimta ee Gobalka Banaadir.
Sheekh C/raxiim waxa uu sheegay in ereyga
Maleeshiyo uu gef ku yahay ciidamada Maxaakiimta Islaamiga, waxa uuna u soo
jeediyay Saxaafadda in ay ka digtoonaadaan ereygaasi.
Golaha Maxaakiimta ayaa sidoo kale waxay
doraad u digeen meelaha Footooyinka ay ka furan yihiin meelaha laga kireyso
Cajaladaha iyo Shaneemooyinka.
Ururka SOWJO oo siminaar u qabtay
Suxufiyiin ka kala socotay qaybaha warbaahinta..
Maalintii shalay ahayd ayaa xarunt ururka
Suxifiyiinta Haweenka Soomaaliyeed ee SOWJO lau qabtay siminaar soconaya
mudo labo maalmood ah kaasoo ay ka qaybgalayaan 30 xubnood oo ka kala
socotay qaybaha warbaahinta.
Siminaarkaan oo lagu baranayey xeerarka iyo
shuruucda saxaafadda ayaa waxaa cashiro ka bixinayey Shariif Cali Shire oo
isagu si aad ah ugu dheeraaday sida loo sameeyo wararka.
Qamar Salaad oo ka mid ah Saraakiisha
sarsare ee Ururka SOWJO ayaa waxa ay sheegtay in ujeedada siminaarkaan loo
qabtay ay tahy sidii kor loogu qaadi lahaa aqoonta suxufiyiinta, waxaa furay
siminaarkaan Nuurto Sheekh Max’ed oo ah guddoomiyaha Xoriyatul Qowlka.
W/D Amiin Yuusuf Khasaaro
E-Mail:
amiinkhasaaro@hotmail.com
GAROOWE
: Hay'adaha Diakonia iyo Contenberg oo dib u eegis ku samayna waxqabadka
Barnaamijka Danyarta oo ay si wadajir ah u wadaan.
Hay'adaha Diakonia Sweden iyo Contenberg oo
si wadajir ah u wada Mashruuca loogu magacdaray Mashruuca danyarta ka soo
xirfad ay ku shaqaystaan dadka lagu barayo , ayaa maanta Workshop ay dib u
eegis ku samaynayaan waxqabadkooda 6-da billood ee la soo dhaafay ku qabtay
Xarunta Jaamacada puntland state university( PSU) ee magaalada garowe ku
qabtay.
Mashruucaan oo ay labadaas hayadood iska
kaashanayaan ayaa socday mudo halsano ah waxaana workshopkan looga
danleeyahay sidii la isugu baraarujinlahaa sidii loo sii wadi lahaa iyo
waliba guulihii lagaaray mudadii uu socday mashruucani.
C/samad Ibraahim Jaamac oo isagu
xiriirinayay aqoon-iswaydaarsigan ayaa ku soo dhaweeyay Xiriiriyaha
Waxbarashada ee Hay'adda Diakonia C/salaam Biligsay si uu tafaasiil uga
bixiyo ula jeedada Workshopkan.
C/casiis Jaamac Nugaal oo ka socday
Hay'adda Contonberg ayaa isna warbixin kooban ka bixiyay ulajeedada
aqoon-iswaydaarsigaan , wuxuuna xusay in 6 bilood kadib markasta ay munaasib
tahay in la qabto aqoon-iswaydaarsi kan la mid ah oo dib u eegis logu samayn
doono wixii ka qabsoomay mashruuca.
Mashruucan , oo soconayay muddo halsano ah
ayaa waxaa ka faa'iidaystay oo xirfadlayaal iminka ku noqday dad gaaraya
ilaa 1, 500 oo qof ku waa soo la baray , farsamooyin kala duwan oo ay ka mid
yihiin , farayaamo , tolida dharka , naqshadayntooda IMM.
Si kastabaha ahaatee aqoon is waydaarsigan
oo socon doona mudo2 maal mood ah ayaa waxaa looga gol leeyahay in la isku
baraarujiyo isii loo bahin lahaa wax tar ka iyo ka faa iidaysiga mashruucan
waxaana la is waydaarsan doonaa talooyin wax ku ool ah si looga mira gaaro
ulajeedii laga lahaa mashruucan oo socday hada mudo halsano ah oo ayna wax
ku barteen dad gaaraya 1,500 oo ah dad dan yar ah kuwaaso oo hahad qaatay
aqoon wax barasho ay kala mid nqon doonaaan dad badan oo ah dad aqoon bartay
iyaga oo awalna ahaa dad aan aqoon lahayn dantuna u saamixi wayday in ay wax
bartaan.
Mudadii halka sano ahayd ee uu socay
mashruucani ayay si wayn uga faa iidaysteen in ay noqdaan dad wax bartay oo
iyaga oo aan lumin fursadii ay heleen.
A/rizak koronto
Garowe puntland
Xaggee ku dambeysey Ballantii
Gaagaab in Toos looga waraysan doono Telefishanka Soomaalida ee
Minnesota?
Habeenimadii Isniinta (Agooso 14,
2006), sidii horay Soomaalida loogu sheegay, waxaa la sugayey in
Wasiirka Maaliyadda DGPL, Maxamed Cali Yuusuf (Dr. Gaagaab) uu soo
fariisto Telefishanka Somalida Minnesota si toos dadweynuhu ay su'aalo u
weydiiyaan. Laakiin, markii la gaarey xilligii la filayey in wasiirku
telefishanka soo fariisto ayaa waxaa shaashadii soo qaabilay
weriyayaashii oo meeshii laga filayey hadalka ah: "hadana ku soo
dhowaada wasiirka", ayaa mid ka mid ah uu sheegay in waraysigaasi uu
baaqday, weriyaha oo arrintaas ka hadlayana waxa uu yiri "Barnaamijyada
aan caawa idiinku talo galay ayaa waxaa ka mid ahaa in aan idiin soo
gudbino waraysi aanu la yeelan doono wasiirka maaliyadda ismaamulka
Soomaalida ee Puntland..... .... nasiib darro.... ..... .... arrimo
awgeed waa uu baaqday caawa anagoo mar labaadna jecel in aan idinka
raali gelino duruufo jira awgeed." [Halkan
ka dhegeyso hadalkii weriyaha.]. Telefishanku ma sheegin wax farriin
ah oo uu wasiirku u soo faray Soomaalida Minnesota ee sugeysey in ay
su'aalaha tooska ah weydiiyaan amaka dhegeystaan warbixin.
Nidaamka la qorsheeyey ayaa ahaa in
muddo soddon daqiiqo ah uu wasiirku fadhiyo telefishanka halkaasna ay
dadweynaha daawanaya si toos ah su'aalaha u soo weydiiyaan. Arrintaas oo
aad uga duwan qaabka ay u shaqayso saxaafada Puntland ee ay wasiirdu
xakumaan lagana siidaayo waxa ay rabaan oo qura, ama la weydiiyo
su'aalaha ay rabaan oo keliya.
Waxay ahayd habeenkii Jimcada Agoosto
11, 2006 markii uu wasiirka maaliyadu la kulmay Soomaalida Minnesota,
waxaan ahabeenkaas dadka loo sheegay in waqtigu uu wasiirka hadda ku
yaryahay oo aan su'aalo la weydiin karin, laakiin uu telefishanka soo
fariisan doono si su'aalo loo weydiiyo, ballantaas oo ahayd Isniin
Agoosto 14, 2006, waana tan noqotay mid baaqatay.
|
Barnaamijkii Radio Xoriyo
15 Aug 2006
================================
-
Dagaalo
calculus oo lagu naafeeyey ciidanka gumaysiga Itoobiya.
-
Gabdho badan oo ciidammada
gumaysigu faraxumeeyeen iyo dad la xidhxidhay
-
Shirweynihii 10aad ee
Jaaliyadaha Ogadenya oo guul ku dhamaaday.
-
Police-ka Port
Elizabeth ee K/afrika oo baadhay dukaamada Somalida.
-
-
Sanadguuradii 22aad ee
aas-aaskii JWXO.
Warar Goos-Goos ah.
================================
Wariyaha RX uga soo
warrama dalka Ogadeenya ayaa sheegaya in labadii toddobad ee u denbeyay ay
meelo kala duwan oo Ogaadeenya ka mid ah ka dhaceen dagaallo dhawr ah oo si
wayn loogu nafeeyay cidammada gumaysatada Itoobiya.
Markii ay
taariikhdu ahayd 07/08/06 dagaal kulul oo ka dhacay meesha lagu magacaabo
Balli-cigaal, oo ka tirsan gobolka Qorraxey, waxaa jab iyo halaag loogu
gaystay ciidammada maxaysatada ah ee gumaysatada Itoobiya. Dagaalkan, oo
ahaa mid aad u adag oo dhex-maray ciiammadii Cirjiidh iyo kuwa nugul ee
gumaysatada Itoobiya, waxaa ciidammada gumaysiga lagaga dilay 120 askari.
Waxaa sidoo kale lagaga dhaawacay 141 askari.
Wariyuhu wuxuu
kaloo noo soo sheegay in intii u dhaxaysay 01 – 08/08/05 dagaallo kala duwan
oo ka dhacay meelo kala duwan oo Ogaadeenya ka mid ah ciidammada gumaysiga
lagaga dilay 48 askari, 34 kalana lagaga dhaawacay.
Dagaal sidoo kale
ciidammada xoreynta Ogaadenya iyo kuwa gumaysiga Itoobiya ku dhex-maray
Bulqa-yar markii ay taariikhdu ahayd 12/08/06 waxaa ciidammada gumaysiga
lagaga dilay 16 askari, waxaa sidoo kale lagaga dhaawacay 20 kale
Gabdho badan oo ciidammada gumaysigu
faraxumeeyeen iyo dad la xidhxidhay
50 gabdhood oo reer
Ogaadeenya ah ayay Seddexdii bilood ee u denbeeyay ciidammada gumaysatada
Itoobiya ku kufsadeen nawaaxigii uu ka dhacay dagaalkii Quusiye, oo ka
tirsanaa Dhanaan.
Gabdhahan ayaa la
sheegayaa inay badankoodu uuraysteen, ka dib markii ay ciidammada gumaysigu
kufsigaas u gaysteen.
Xadgudubkan
waxshinimada ah ee loo gaystay gabdhahan da’yarta ah waxaa ka hadlay wadaado
deegaanka ka tirsan, kuwaasoo tilmaamay foolxumada denbiyada ay ciidammada
Wayaanuhu kula kaceen gabdhahaas. Markii ay taariikhdu ahayd 24/07/06 ayaa
wadaadadan xabsiga loo taxaabay, waxayna kala yihiin wadaadadaasi;
1-
Sh Axmed
Aaden Huriye
2-
Sh Maxamed Cabdi
Dalal iyo
3-
Sh Cabdinaasir.
Dhinaca kale:Kabtii-naag, oo ka tirsan gobolka
Qorraxey, waxaa ka qaxay dadkii ku noolaa, ka dib markii ay ciidammada
Wayaanhu u hanjabeen.
Markii ay
taariikhdu ahayd 03/08/06 waxay ciidammada Wayaanuhu boobeen tuulada
Qudhunley, oo ka tirsan degmada Fiiq, waxay halkaas ku dhaceen hanti
dadwayne oo kala duwan, waxay sidoo kale gubeen aqallo ay dad shacab ahi
lahaayeen. Dadka dhibaatooyinkan loo gaystay waxaa ka mid ah;
1-
C/llaahi Axmed
Jiilal, oo laga dhacay lacaga gaadhaysa 2200 oo Bir.
2-
Deeq Maxamed Sagal,
oo isagana oo laga dhacay seddex Jeergaan oo Subag ah.
Waxay sidoo kale
ciidammada Wayaanhu aqalladoodii ka gubeen dadka kala h;
1-
Xasan Qorane
2-
Sh C/llaahi Wali
3-
C/llaahi Dheere
4-
Maxamed Cali Cumar
5-
Ilma Shuuriye Sh C/llaahi
iyo
6-
Sh Cabdi Sh C/llaahi
Dhinaca kale markii
ay taariikhdu ahayd 12/08/06 waxay ciidammada Wayanuhu ku dileen tuulada
Burqayar nin rayad ah oo lagu magacaabo Shaafi Maxamed.
Shirweynihii 10aad ee Jaaliyadaha Ogadenya oo
guul ku dhamaaday.
Shirweynihii jaaliyadaha Ogadenya oo socday
sadex maalmood 11-13 ayaa Axadii lagu soo gabagabeeyey halkii uu ka dhacayay
Copenhagen-Denmark.
Shirkan oo sadexdii maalmood ee uu socdayba ay kasoo qayb galeen dadweyne
aad utiro badan oo isugu jira bulshada qaybaheeda kala gadisan,ayaa
maalintii Axada ahayd kusoo xidhmay guul iyo isafgarad buuxda.
Shirkan oo ay kasoo qayb galeen madaxsare oo JWXO ah ayaa dadkii su'aalo ku
asqeeyeen si wanaagsan oo waafi ahna looga wada qanciyey iyagoo u riyaaqay
sida madaxda jabhadu iskugu kalsoon yihiin una danaynayaan inay ka
shaafiyaan shacabka ogadenya waxyaabaha sadrigoodu rogrogayo ee bushi
bixinta u baahan.
Shirka waxaa kaloo kasoo qayb galay marti sharafeed sarsare oo ay kamid
yihiin C/fataax Jaamac Caamir iyo Faarax Afeey,waxayna shirka kasoo
jeediyeen khudbado dhaxal gal ah oo meelo badan taabanaya,dhiiga kasoo qayb
galayaashana dhaqaajiyey.
Dhinaca kale waxaa maalintii Axada ahayd shirka khadka Telefonka ugu
hambalyeeyey gudoomiyaha JWXO Adm:Mohamed Cumar Cismaan iyo N/hurayaal la
joogay xarunta dhexe ee JWXO ee Ogadenya, gudoomiyuhu wuxuu u sheegay
xaadiriintii shirka siday ugu faraxsan yihiin shirka jeclaan lahaayeena inay
joogi lahayaeen halkaas, sidoo kale wuxuu gudoomiyuhu sheegay inay awood
milatari oo aan la loodin karin ku joogaan Ogadenya iyagoo aysan jirin cid
ay uga baqayaan dhulkooda hooyo.
Waxaa kaloo shirka khadka Telefonka ugu soo hambalyeeyey gudoomiyihii hore
ee JWXO Sheekh Ibrahim Cabdalla oo aad ujeclaa inuu madasha shirka goob joog
ku ahaado hasa-yeeshee ay suuroobi weyday, Sheekh Ibrahim wuxuu yidhi ummada
Ogadenya qadiyadeedii si dhab ah ayay u fahantay gumaysiguna waa sii
dhicitaan israacis kaliya ayaa u hadhay ee gacmaha is qabsada.
Waxaa kalo shirka khudbado iyo talooyin dhaxal gal ah kasoo jeediyey
wufuudii kala kala socotay jaaliyadaha ogadenya ee wadamada: Canada,Germany,
Australia, Sweden, Norway ,Finland, London-Uk, Midland-Uk, Swiss iyo
jaaliyada Denmark.
kasoo qayb galayaashii shirka ayaa madasha shirka ka cadeeyey inay hiil iyo
hooba la garab taagan yihiin JWXO,iyadoo weliba halkaas ay hadalo gaagaaban
kasoo jeediyeey wiil 10 jir ah oo u dhashay Ogadenya,iyo gabadh da,yar ah oo
buraanbur ka tirisay halkaas waxayna labadaas da,yar ka oohiyeen dadkii
madasha shirka fadhiyey.
fiidnimadii habeenkii isniinta ayaa shirka lasoo afjaray iyagoo weliba
dadkii isu xiisa qaba jeclaan lahaana inuu shirku sii socdo.
Xidhitaankii shirka aya lagu xidhay heestii
calanka, kadibna dadweynihii loo fasaxay inay jalabuteeyaan halkaasna ay
dhaanto lalayaabo ku cayaareen.
Shirka waxaa laga soo saaray goaano dhaxal gal
iyo weliba baaq ku wajahan shacabka somalida Ogadenya.
Police-ka Port Elizabeth ee
K/afrika oo baadhay dukaamada Somalida.
Wariyaha RX uga soo warama wadanka K/Afrika
ayaa noosoo tabiyey in maaalinkii Axada ee ay taariikhdu ahayd 13ka August
ay Booliska wadankaasi baadhitaan laxaadleh kusameeyeen tukaamada soomaalida
ee kuyaala magaalada Port-Elizabeth aga gaarkeeda.Booliska ayaa ula qiil
baxay baadhitaanka tukaamadaas inay baadigoobayaan hubka sharci darrada lagu
haysto ee wadanka yaala si ay nabad galya xumida wax uga qabtaan balse
arintaas ayaa sababtay in tukaamo badan la xidho kuwa kalana laboobo.
warku wuxuu intaas kudarayaa inay boolisku
qabteen ugu yaraan 10 Bistooladood oon shar ciyayasnayn isla markaana waxay
xabsiga utaxaabeen dhalinyaro badan oo soomaali ah oo ah kuwii loogu yimid
tukaamada Bistooladahan lagasoo qabqabtay.
dhalinyaradan la xidhixidhay ayaa isugu jira
mulkiilayaal iyo shaqaale ka shaqaynayay tukaamada labaadhayay ee laga dhex
helay Bistooladaha aan sharciyaysnayn.
dhalinyarada la xidh-xidhay oo tira badan ayaa
waxaan magacyadooda haynaa oo kaliya 3 waxayna kalayihiin:
1=Cali Booy-booy
2-shariif
3- C/wali
4- waxaana kamid ahaa mulkiilayaasha
tukaamadooda lagalay Tamaan maxamed Cabdi oo la xidhay iyo wiil shaqaale u
ahaa oonaan magiciisa haynin, halka laboobay tukaan uu lahaa nin lagu
magacaabo Siyaad oo kuyaalay xaafada Injooli.
Goos-goos.
Q/dahare.
wararka naga soo
gaadahaya magaaada qabridaha ayaa
sheegayaan in
shalay niskii danbe baabuur waaweyn oo ah nooca xamuulka qaada ay cgi
xabsiga u
taxaabeen.baabuurtan oo in kabadan todobaad
ku xanibnaa magaalada qabridahar loona diiday
in ay
baxaan magaaladaasi islamarkaasna xamuulkii ay
wadeen
ilaa iyo hada uu saaraa ayaa wxaa shalay
taxaabay jeelka xerada cgi ee kuyaala magaalada
qabridahar ilaa iyo hada macada sababta dhabta
ah ee
babuurta loo xidhay .
wararka naga soo gaadahaya islamagaalada
qabridahar
ayaa waxay sheegayaan in shalay niskii hore uu
CWXO
raashin u qabshay shacabka tuulada dalaad ee
degmada
qabridahar iyo agagaarkeeda.
Sidoo kale shalay mar aan khadka telka kula
xidhiidhnay wariyaheena gobolka Qoraxay ayaa noo xaqiijiyey dagaal ka dhacay
tuulada Yucub oo markii dambana sii gaadhay ilaa Qamuuda,dagaalkaas ayuu
wariyuhu noo sheegay in jab weyn loogu gaystay ciidanka maxaysatada ah ee
gumaysiga itoobiya.
Jigjiga.
Maalintii shalayto ahayd waxaa magaalada
jigjiga lagu xidhay wiil magaciisa aanaan helin laakiin ina ayihiisa naloogu
sheegay ina Cabdi Xirsi Cawl laguna naanayso Laangadhe.
wiilkan oo ka yimid wadanka maraykanka ayay
CGI ee jigjiga shalayto ka qabteen magaalada kadibna geeyeeyn Xabsiga weyn
ee Garabcase ilaa iyo hadana lama oga xaalka wiilkaas wuxuu ku sugan yahay.
Qabashada wiilkan ka yimid Maraykanka ayaa la
sheegayaa inay ka dambeeyaan qaar kamid ah dabaqoodhiga doolka ah ee
baryahanba ku sugnaa ogadenya oo farta ku fiiqay.
Dhinaca kale golaha dhexe ee maamul ku sheega
jigjiga ayaa si dagdag ah looga yeedhay xafiiska KT zenawi waxaana loo
haystaa baxsashadii Cali Kunaay oo u baxsaday dalka isutaga imaaraadka
carabta.
15
Aug 2006.
C/nuur
Sheekh Maxamed
Info@radioxoriyo.com
raadioxoriyo@yahoo.com
Radio
Xoriyo waxaad ka dhegaysan kartaa Mawjadda 25 MB ee dhererkeedu yahay 11865
KHZ,iyo internetka Radioxoriyo.com,Ogaden.com Maalmaha Talaadada iyo
Jimcaha 7: 30PM waqtiga Afrikada Bari
Faafin: SomaliTalk.com | Aug 16, 2006
Roobabkii ka da’ay Muqdisho oo khasaaro u gaystay jidadka
Muqdisho
»Minnesota:
Xaggee ku dambeysey ballantii Gaagaab..
»Isqabqabsi
hareeyey ku dhawaaqistii Golaha Wasiirada..
»Golaha
Maxaakiimta oo shuruud ku xiray Shirka..
»Ciidamada
Itoobiya oo shalay xayiraad ku soo Rogay..
»Baydhabo:
Wafdi ka socda kenya oo si wayn loogu soo..
»War
saxaafadeed ku saabsan Ciidamada Ethiopia..
»Darusalaam:
Go'aankii Shirweynihii AW DIGIL...
Wararaka oo dhan ka akhri halkan... Aug 15
(Aug 7, 2006)
DHEGEYSO:
Hadalkii uu Jeediyey Geeddi
Codbixintii Baarlamaanka Kaddib.... (July 30, 2006)
DHEGEYSO:
Doodii
Baarlamaanka ee Kalsoonida Ra'iisul wasaaraha ee July 30, 2006
|