Indhoolayaal  la Barey Farta Braille-ka  kana Qalin Jabiyey Dugsiga Al- Nuur

Xaflad si heer sare ah loo agaasimay ayaa waxay ka dhacday dugsiga AL-Nuur waxayna xafladaasi ku saabsaneyd qalinjabin la xiriirta farta Braille-ka oo la barayay dad indhoolayaal ah oo tiradoodu gaareysay ilaa iyo 10 oo isugu jiray haween iyo rag.

            Ardaydaas oo mudo bil iyo bar ah baranayay fartaasi ayaa waxaa xafladda qalinjabintooda ka qaybgalay mas’uuliyiin ka socotay Hay’adaha xaquuqda, Aadanaha, madaxda hay’adaha samafalka, dalladdaha Waxbarashada, Jaamcadaha iyo marti sharaf kale, waxaan augu horeyntii halkaasi heeso Anaashiido ah ka akhriiyay ardayda wax ka barata dugsiga Indhoolayaasha AL-Nuur kuwaasoo ay si aad ah ugu qushuuceen dadkii daawanayay.

Kutubka Quraanka oo ku qoran farta braille-ka | Ibraahim oo sharxaya farta Bareelka

Macallin Ibraahim Cabdulaahi  oo ah Macallin Indhoole ah si aad ahna uga soo qalinjabiyay farta Braill-ka waxbarashadiisuna ay tahay ilaa iyo heer jaamacadeed kana mid ahaa macalimiintii wax bareysay ardaydaasi ayaa waxa uu sheegay in farta Braill-ka ay tahay mid u fududeyneysaa dadka indhoolayaasha ah in ay wax qoraan waxna akhriyaan.

“waa nasiib daro in far la soo saaray labo boqol oo sano ka hor in maanta Soomaaliya ay soo gaarto, gaar ahaan dadka Indhoolayaasha ah” ayuu yiri Macallim Ibraahim oo ka codsaday dadka Soomaaliyeed ee Illaah wax siiyay in ay gacan siiyaan dadka indhoolayaasha ah oo u baahan gacan aad u balaaran si ay wax ula qaybsadaan bulshada inteeda kale, waxaa kalloo ka hadlay Aadan Max’ed Xerow oo ah madaxa Warfaafinta iyo xiriirka caalamiga  ah ee Jaamacadda Muqdisho ayaa waxa uu isna sheegay  in xafladdaani ay tahay tii ugu fiicneyd ee uu ka qaybgalo xafladihii horey uu uga qaybgali jiray, wayo ayuu yiri “waxaa I faraxgeliyay dad indhoolayaal ah oo la barayo in ay wax akhriyaan waxna qoraan”, isagoo balanqaaday in Jaamacadda Muqdisho ay ka qayb-qaadan doonto iyo gacan siinta dadka indhoolayaasha ah.

Yaasmiin Mayow oo shahaado guddoonsiineysa gabar qalin jibeysey | Maxamed Axmed Hadlaya

            Waxa kalloo ka hadlay Sarkaall oo ka socday Hay’adda Muslim Aid, Uk waxa uuna u mahadceliyay intii ka shaqeysay in ay waxbaraan dad Indhoolayaal ah oo iyagu mar kasta u baahan in wax la baro, si ay ula qaybsadaan noloshada bulshada inteeda kale, isagoo sheegay in Hay’addiisu ay diyaar u tahay in ay wax u qabato dadka indhoolayaasha ah, waxaa kalloo halkaasi ka hadlay Prof. C/raxmaan Maxamuud Macow (Dhalxa) oo ka socdey  Hayada Xaquuqda Aadanaha ee Khaliif Huudow) oo isna u soo jeediyay maamulka Dugsiga AL-Nuur in ay farta Braill-ka ah wax ku baraan si ay iyana wax u baraan dadka Indhoolayaasha ah oo aan fursadda u helin dugsi, ama wax ku barida farta Braill-ka

            Sidoo kale waxaa halkaasi ka hadlay Guddoomiye ku xigeenka Dugsiga Al-Nuur C/fitaax Max’ed Daahir, waxa uuna sheegay in Dugsiga AL-Nuur ay fureen dad indholayaal ah oo horey wax u soo bartay kuwasoo doonaya in ay aqoontooda uga faa’iideeyaan dadka Soomaaliyeed ee indhaha la’ isla markaana aan fursadda u helin ay wax bartaan, waxa uuna u soo jeediyay Hay’adaha Samafalka, Shirkadaha, Ganacsatada in ay gacan siiyaan dadka indhoolayaasha ah si ay ula mid noqdaan dadka kale ee caadiga, maadaama marba marka ka dambeysa adduunyadu ay horumar sameyneyso.

Cabdi Fataax | Faadumo

            Ardayda ka qalinjabisay waxbarashada dadka waaweyn oo indhoolayaal ah ayaa waxaa shahaadooyin iyo abaalmarino kale gudoonsiiyay Yaasmiin Mayow Max’ed oo ka socday Web-Site-ka 4Somaliwomen.com oo inta badan ka hadla arrimaha haweenka, waxaa kalloo shahaadooyinka guddoonsiiyay ardaydaasi Eng. Siidow Xasan Mahdi oo ka socday Hay’adda Xaquuqda Aadanaha ee Wanlaweyn Human Rights iyo shaqsiyad kale.  

Kaalinta koowaad waxaa gashay Aamino  Cabdul Majiid oo ah gabar indhoola ah kol dhoweedna ku guuleeysatay tartan quraan aqris labada jeerba aamino waxay gashay kaalimaha koowaad,  kaalinta labaadna  waxaa  ku guuleysatay Abshiro C/naasir  labadaas gabdhood waxa ay ka mid yihiin tobanka ardey ee loo xiray siminaarka kor loogu qaadaayo barashada  Farta indhoolayaasha

“ Weligeey isma aanan dhihin adigoo indhoola ah ayaad wax aKhrisan doontaa waxna Qori doontaa   waxaan maanta gaarsiisanahay heerkii jaamacadee”   Sidaa waxaa tiri  Faadumo Axmed Maxamed oo  ka mid aheyd ardeyda la gudoonsiiyay shahaadada”

waa dugsigii ugu horeeyay ee noociisa ah oo laga furo Magaalada Muqdiso, waxa uuna bilaabay tababar labo sano ah oo uu furay ardaydii ugu horeysay oo gaareysay 22 arday oo isugu jiray 12 Wiil iyo 10 gabdhood, waxaana sababaha loo furay dugsiga ay tahay baahi weyn oo la factirsatay dadka Indhaha la’ mudo dheer xagga aqoonta, kor u kicidda tirada dadka indhaha la’ ee gudaha Soomaaliya sanooyinkaan dambe dhinacyada kala duwan haddii ay noqon lahayd dabiici, nafaqo daro, iyo naafeynta dagaalada sokeeye, dadka indhaha la’ ee Soomaaliyeed ee dibadaha iyo dalka wax ku bartay oo garwaaqsaday in loo gurmado walaalahooda dhibaateysan ee gudaha ku nool.

Yaasmiin oo shahaado gudoonsiineysa | Ing. Siidow oo shahaado guddoonsiinaya

Dadka gacanta ka gaystay aasaasidda dugsiga waxa ka mid ah jaaliyadda Soomaaliyeed ee Magalada Birmingham ee dalka Engiriiska, Shirkadda Al-Towba, Mu’asasada Imaamu Shaafici, Shirkadda Jubba Airways, Shirkadda Telcom Somalia iyo shaqsiyaad kheyr jecel oo Soomaaliyeed.  

W/D Amiin Yuusuf Khasaaro
E-Mail amiinkhasaaro@hotmail.com

Faafin: SomaliTalk.com | April 29, 2006

Dil Ka Dhacay Tuulada Cabdille Biroole Ee magaalada Kismaayo...