WARARKII APRIL 20, 2006
-
Saraakiil Mareykan ah oo wax kama jiraan ka soo qaaday
hadalkii Geeddi....
-
Geeddi “Waa nasiibdaro in
15 sano kaddib lagu gorgortamo dhiiga shacabka”…
-
Barre
Hiiraale iyo Max’ed Dheere oo xiriir dhinaca isgaarsiinta ah uu dhex maray
-
Xaaladda Nabadgelyo ee
Magaalada Kismaayo oo cirka isku shareertay
-
Prof. Guure oo si kulul u
beeniyay in ururkoodu uu qiimeyn ku sameeyay
-
4-qof oo lagu
dilay Magaalada Muqdisho kaddib markii
-
Xarunta Ismaaciil Jimcaale oo cambaareysay
falal dhawaan ka dhacay…
-
Axmed Qare “Isbahaysigu waxa uu damacsan
yahay in uu madaafiic la beegsado suuqyada…
-
Jaamacadda Badweynta
Hindiya oo uu codsi uga yimid arday Soomaaliyeed oo ku nool dalka dibaddiisa..
Saraakiil Mareykan ah oo wax kama jiraan ka soo qaaday
hadalkii Geeddi....
Sarakiil Maraykan ah ayaa beeniyey hadalkii
Ra'iisul wasaaraha Soomaaliya Cali Maxamed Geedde ee uu Talaadadii sheegay in
Soomaaliya ay heshiis la gashay dawlada Maraykanka heshiiskaas oo uu yiri in
ciidamada Maraykanku ay burcadda ka ilaalinayaan xeebaha Soomaaliya. Warkaas oo
saraakiisha maraykanku ka soo qaadeen mid aan jirin.
Cali Maxamed Geeddi waxa uu warfidiyeenada u
sheegay in maraakiib Maraykan ah oo joogey Baxreyn ay usoo dhaqaaqeen badaha
Soomaaliya si ay uga waardiyeeyaan burcadda. Laakiin saraakisha Maraykanku waxa
ay yiraahdeen "ma jiraan wax heshiis ah oo ku saabsan ilaalinta badaha
Soomaaliya oo lala galay Soomaaliya.", sidoo kale sarkaal u hadlay
ciidanka Maraykanka ee aagga Baxreyn ayaa arrintaas beeniyey..
Cali Maxamed Geeddii beenintaas ka dib weli war
kala arrinta kama soo saarin. {Isha:
News Search}
Geeddi “Waa nasiibdaro in
15 sano kaddib lagu gorgortamo dhiiga shacabka”…
Ra’isul Wasaare Cali Max’ed
Geeddi ayaa shalay shir jaraa’id ku qabtay Magaalada Baydhabo oo ah caasimadda
ku meel gaarka ah ee Dowladda Federaalka ayaa waxa uu sheegay in Dowladda
Federaalka ay aad uga xun tahy abaabulka dagaal ee maalmahan ka socda qaybo ka
mid ah Magaalada Muqdisho, isagoo sheegay in abaabulka dagaaladaasi ay yihiin
kuwo dhibaato ku ah bulshada Soomaaliyeed oo mudo 15 sano ah ku jiray dagaalo
sokeeye. “waa nasiibdaro in maanta dhiiga shacabka lagu gorgortamo iyadoo ay
muuqato raadkii dagaaladii sokeeye” ayuu yiri Cali Maxed Geeddi oo intaa
raaciyay in ay soo baxeen kooxo u adeegaya dano shisheeye goostayna in ay dilaan
walaalahooda, carruurtooda iyo waalidiintooda. Cali Max’ed Geeddi waxa uu
sheegay in raggaasi goor ay ahaataba ay taariikhdu xusi doonto mar unna lala
xisaabtami doono, “Dagaalka ay abaabulayaan waa mid doqonnimo ah oo ay wadaan
kooxo garaadkoodu uu hooseeyo oo aan ka fikireyn danta ummadda Soomaaliyeed”
ayuu yiri Cali Max’ed Geeddi oo ka codsaday caalamka ay gacan ku siiyaan sidii
loo joojin lahaa dagaalkaasi. Ra’isul Wasaaruhu waxa uu u soo jeediyay shacabka
Soomaaliyeed in ay u guntadaan sidii ay uga hortagi lahaayeen danaha shisheeye,
waxa kalloo u soo jeediyay in ay ka shaqeeyaan sidii nabad loogu soo dabaali
lahaa Magaalada Muqdisho oo uu sheegay in ay tahay caasimadda soomaaliya.
Wasiiro ka tirsan Dowladda Federaalka ayaa iyagu ka mid ah ragga sida aadka ah
abaabulka dagaal uga wada Magaalada Muqdisho taasoo lagu tilmaami karo mid wiiqi
karta dowladda uu madaxda ka yahay Cali Max’ed Geeddi.
Axmed Qare “Isbahaysigu waxa uu damacsan
yahay in uu madaafiic la beegsado suuqyada…
Axmed Max’ed Cabdule
(Axmed Qare) oo ah guddoomiyaha kacdoonka difaacad Diinta iyo dalka ayaa shalay
shir jaraa’id ku qabtay Magaalada Muqdisho waxa uuna ugu horeyntii sheegay in
isbahaysiga isku magacaabay la dagaalanka Argagixisada uu damacsan yahay in uu
madaafiic la dhaco suuqyada waaweyn ee Magaalada Muqdisho gaar ahaan Suuqa
Bakaaraha iyo Suuq Bacaad, sidoo kale waxa uu Axmed Qare sheegay in isbahaysigu
uu qorsheenayo in weeraro iyo Huubiyaba ka gaysto dugsiyada Gobalka Banaadir.
Axmed Qare waxa uu
sheegay in arrintaasi abaabulkeeda ay wadaan isbahaysigaasi oo uu sheegay in ay
gacan ka helayaan Dowladda Mareykanka oo aan dooneyn in Soomaaliya nabad ka
dhacdo heshana dowladda, isagoo u soo jeediyay shacabka inay ka feejignaadaan
shirqoolada iyo weerarada ay damacsan yihiin kooxaha isku sheegay la dagaalanka
argagixisada, waxaa kalloo uu sheegay Axmed in ay la socdaan dhaqdhaqaaqyada
isbahaysigaasi, isagoo uga digay dhallinyarada la marin habaabinayo in
xubnahaasi ay wataan dano gaar ahaaneed oo aysan marnaba ka shaqeyn doonin danta
ummadda Soomaaliyeed.
Isbahaysiga kacdoonka
ayaa waxa uu dhawaan soo qabanqaabiyay Banaanbax balaaran oo looga soo horjeeday
kooxaha isku magacaabay la dagaalanka Argagixisada, waxaana banaanbaxaasi ka soo
qaybgalay dadweyne aad u fara badan kaasoo ka dhacay Fagaaraha Tarabuunka,
iyadoo dadkii ka qaybgalay halkaasi ay ku muujinayeen shucuurtooda ah siday u
taageersan yihiin Midowga Maxaakiimta Islaamiga ah iyo sida ay uga soo
hor-jeedaan isbahaysigaasi.
Barre Hiiraale
iyo Max’ed Dheere oo xiriir dhinaca isgaarsiinta ah uu dhex maray
Wararka naga soo gaaraya Magaalada Nairobi waxay
sheegayaan in dadaal loogu jiro sidii Barre Aadan Shire (Hiiraale) uga mid noqon
lahaa Isbahaysiga la dagaalanka argagixisada, waxaana Magaalada Nairobi haatan
ka socda kulamo la doonayo sidii Barre ugu soo biiri lahaa Isbahaysigaasi.
Warar ayaa waxay sheegayaan in
Barre Hiiraale dhawaan safaaradda Mareykanka ee Magaalada Nairobi kulan kula
yeeshay diblumaasiyiin ka socota safaaraddaasi, waxaana la isla soo qaaday
arrimo ku saabsan xaaladda wadanka Soomaaliya iyo kooxaha isku haya Magaalada
Muqdisho.
Warara kale ayaa waxay
sheegayaan in Barre Hiiraale iyo Max’ed Dheere ay ku wada xiriireen qadka
Taleefanka ayna ka wada hadleen sidii Barre Hiiraale ugu biiri lahaa isbahaysiga
uuna u xiran lahaa nambarka 12-aad.
Xiriirka dhex maray Barre
Hiiraale iyo Max’ed Dheere ayaa lasheegay in uu ku dhamaaday waji is faham,
waxana wararka qaar ay sheegayaan in Barre Hiiraale uu maalmaha soo socda kasoo
degi doono Garoonka Diyaaradaha ee Jowhar.
Dhawaan ayaa waxaa isbahaysiga
ku biiray Cabdi Xasan Cawaalwe Qaybdiid oo isna loo xiray nambarka 11-aad.
Barre Hiraale waa haddii uu ku
biiro Isbahaysiga la dagaalanka Argagixisada waxa uu cadaadis kaga imaan doonaa
Dadweynaha ku nool Magaalada Kismaayo., sidoo kale way ku adkaaneysaa sidii uu
jari lahaa xiriirka Isbahaysiga dooxadda Jubba maadaama ay xubno ka yihiin
raggii gacanta ka gaystay qabsashadii Magaalada Kismaayo.
Xaaladda Nabadgelyo ee
Magaalada Kismaayo oo cirka isku shareertay
Waxaa maalinba maalinka ka dambeeya cirka isku sii
shareeraya xaaladda nabadgelyo ee Magaalada Kismaayo kaddib markii habeenadii la
soo dhaafay lagu dilay dhowr qof, isla markaan lagu dhacay tiro intaa la eg.
Isbahaysiga Dooxadda
Jubba ilaa iyo haatan waxba kama qaban nabadgelyo xumida ka jirta Magaalada
Ksimaayo, iyadoo dhawaan la soo gebgabeeyay khilaafyadii gacan ka hadal ee
dhacay, ayaa haddana isbahaysiga uusan wax tixgelin ah siin dhinaca nabadgelyada
ee Magaalada Kismaayo.
Guddoomiyaha
Isbahay-iga dooxadda Jubba Barre Aadan Shire ayaa isagu haatan ka maqan
Magaalada Kismaayo waxa uuna arrimo siyaasadeed u jooga Magaalada Nairobi ee
dalka Kenya lama garanayo goorta uu dib ugu soo noqon doono Magaalada Kismaayo.
Prof. Guure oo si kulul u
beeniyay in ururkoodu uu qiimeyn ku sameeyay
Maxamuud Cali Daahir
(Porf. Guure) oo ah guddomiyaha ururka khareenada Soomaaliyeed ayaa si kulul u
beeniyay war uu horey u qoray wargeysku oo ahaa in Ururka khareenada
Soomaaliyeed uu qiimeyn ku sameeyay Nootaayooyinka Magaalada Muqdisho isla
markaana Nootaayada Dr. Diirshe loo doortay sanadkii tagay Nootaayadii ugu
wanaagsaneyd Nootaayooyinkii ka jiray dalka waxa uuna wararkaasi Prof. Guure ku
tilmaamay kuwo aan sal iyo raad toona lahayn uuna warkaasi ka soo bixin ururka
Khareenada Soomaaliyeed, isla markaana awood uusan u lahayn ururku in uu
qiimeeyo waqtigaan Nootaayooyinka.
Prof. Guure waxa uu
sheegay in waxa wax qiimeeya ay tahay Dowlad ee uusan urur ahayn, waxa uuna ugu
dambeyntii u soo jeediyay dadka ku been abuuranaya ururka in ay ka waantoobaan.
4-qof oo lagu dilay Magaalada Muqdisho kaddib markii
Maalintii shalay
ahayd ayaa afar qof oo saarneyd gaari Karoolo ah oo marayay xaafadda Wardhiigley
ayaa waxaa soo weeraray koox dabley, waxayna halkaasi rasaas oodda uga qaadeen
gaarigii, waxaana goobtii ku naf baxay labo ka mid ah dadkii saarnaa gaariga,
iyadoo goor dambe labadii kalana ay ku naf baxeen Isbitaalka Madiina, ilaa iyo
hada lama garanayo sababaha loo dilay raggaasi.
Waxaa maalmahan
Magaalada Muqdiso ku soo kordhayay dilalka macnada darada ah, afduubyada iyo
jidgooyooyinka, waxayna tani keeneysaa in ay cirka isku shareerto xaaladda
nabadgelyo ee Magaalada Muqdisho oo waayadan dambe aad u sii liidatay.
Dadweynaha Magaalada
Muqdisho ayaa iyagu welwel iyo walbahaar ka muujiyay abaabulka dagaal oo ay
wadaan labada dhinac ee isku haya Magaalada Muqdisho oo kala ah midowga
Maxaakiimta Islaamiga ah iyo isbahaysiga la dagaalanka argagixisada, iyadoo wali
ay muuqato diiftii iyo darxumadii dagaalkii dhacay bilihii Feebaraayo iyo Maarso,
waxaana dagaalkaasi ku dhaawacmay dadweyne aad u fara badan, markaad booqato
Isbitaalada waxaad halkaasi kala kulmeysaa colaal xumo iyo murugo.
Xarunta Ismaaciil Jimcaale oo cambaareysay
falal dhawaan ka dhacay…
Xarunta Dr. Ismaaciil
Jimcaale oo uruurisa tacadiyadda ka dhaca dalka ayaa cambaareysay falal xadgudub
ah oo loo gaystay Cali Max’ed Gaabow (Haamey) oo 6/4/2006 lagu dilay agagaarka
gurigiisa oo ku yaala degmada Kaaraan, C/risaaq Max’ed Kulan oo 15/4/2006 lagu
dilay jidka Warshadaha ee Degmada Yaqshiid, sidoo kale waxaa iyana afduub loo
gaystay wiil lagu magacaabo Maslax Shiikh Cali Dheere oo isna la afduubtay 16/kii
Bishii April lagana afduubtay degmada Yaqshiid, waxayna ugu baaqeysaa hay’addu
dadka afduubka gaysanaya in ay si shuruud la’aan ah ku soo daayaan wiilkaas oo
aan wax dambi ah aan lahayn, sidoo kale falalka dilka ayay Hay’addu ku
tilmaantay kuwo xadgudub ku shareecadda Islaamiga ah, Xeerarka Dhaqanka
Soomaali-yeed iyo baaqa caalamiga ah ee xaquuqda aadanaha, sidoo kale Hay’addu
waxay cosaneysaa in deg deg loo damiyo colaadaha wajiyada cusub leh ee keeni
kara dhimasho dhaawac iyo barkac, waxaana qoraalkaani ku saxiixnaa gudoonka
xarunta Maryan Xuseen Owreeye.
Jaamacadda Badweynta Hindiya
oo uu codsi uga yimid arday Soomaaliyeed oo ku nool dalka dibaddiisa..
Jaamacadda Badweynta
Hindiya oo ka mid ah jaamacadihi ugu horeeyay ee laga aasaaso Magaalada Muqdisho
wixii ka dambeeyay dagaalada sokeeye, ayaa maalinba maalinta ka dambeysa waxay
ku talaabsaneysaa horumar, waxaana dhawaan Jaamacadda Badweynta Hindiya codsi
uga yimid arday Soomaaliyeed oo ku nool wadanka Ingiriiska oo sheegay inay
daneynayaan Manhajka waxbarasho ee Jaamacadda Badweynta Hindiya.
Hormuudka Jaamacadda
Prof. C/qaadir Maxamuud (Cutuush) ayaa waxa uu sheegay in Jaamacaddu ay si aad
ay u soo dhaweyneyso codsigaasi.
Profosoorku waxa uu
sheegay in Jaamacaddu ay aad ugu faraxsan tahay sida ay ardaydaasi u daneynayaa
in ay qaataan manhajka dhaqankooda ku saleysan.
Jaamacadda Badweynta
Hindiya waxay ku baxdaa Luuqadda Ingiriiska, waxayna bixisaa Shahaadooyinka BSC,
MBA, iyo PHD.
W/D Amiin Yuusuf Khasaaro
E-Mail: amiinkhasaaro@hotmail.com
|