Isbahaysiga la dagaalanka
Argagixisada oo isku khilaafay cidda
Gudoomiye u noqoneysa..
Maalintii shalay ahayd ayaa
deegaanka Deyniile waxaa kulan ku yeeshay
xubnaha Isbahaysiga la dagaalanka
Argagixisada, waxa uuna kulankaasi uu ahaa
mid ay albaabadu u xirnaayeen loona diiday
inay wax ka ogaadaan kooxaha Warbaahinta.
Kulankaas oo saacado qaatay ayaa waxaa xubno
hoose oo ka tirsan Isbahaysiga ay noo
sheegeen in kulankaasi looga hadlayay cidda
Guddoomiye looga dhigayo Isbahaysigaasi,
iyadoo raggaasi ay noo sheegeen in ay si
weyn isugu khilaafeen cidda gudoomiye u
noqoneysa Isbahaysiga qaarkood waxay soo
jeediyeen in Guddoomiye laga dhigay Max’ed
Qanyare Afrax, halka ay kuwo kalana soo
jeediyeen in Guddoomiye laga dhigo Max’ed
Dheere. Dowladda Mareykanka ayaa lagu
eedeeyay in ay ku lug lahayd dagaaladii
dhawaan ka dhacay Magaalada Muqdisho kaddib
markii xoogaa lacag ah ay siisay Isbahaysiga
la dagaalanaka Argagixisada, Sanatar ka
tirsan Dowladda Mareykanka ayaa waxa uu
sheegay in Dowladda Mareykanku ay baari
doonto in ay wax lug ah ku lahayd dagaaladii
ka dhacay Magaalada Muqdisho oo ay isga hor
yimaadeen Isbahaysiga la dagaalanka
Argagixisada iyo Maxaakiimta Islaamiga ah.
Aqoonyahano Soomaali-yeed ayaa Dowladda
Mareykanka u gudbiyay qoraal ay kaga
codsanayaan in aysan wax gacan siin
Isbahaysiga la dagaalanka Argagixisada,
iyagoo isbahaysigaasi ku tilmaamay mid 15
sano argagax iyo cabsi gelin ku yahay
shacabka Soomaaliyeed. Isbahaysiga la
dagaalanka argagixisada ayaa waxa uu
raadinayaa maalmahan kalsoonida shacabka,
iyadoo dhawaan xubin ka tirsan Isbahaysiga
oo lagu magcaabo Cabdi Nuure Siyaad uu
gargaar gaarsiiyay xero qaxooti ah oo ku
taala Xaafadda Buula-Xuubey.
C/llaahi Yuusuf oo caafiamaad
ahaan ugu ambabaxay wadanka ingiriiska..
Madaxweyne C/llaahi
Yuusuf Axmed ayaa shalay ambabaxay Magaalada
Baydhabo oo haatan xarun ku meel gaar ah
Dowladda Federaalka, waxa uuna isla shalay
gaaray Magaalada Nairobi ee Dalka Kenya.
Madaxweynaha ayaa la sheegay
in uu caafimaad ahaan ugu sii jeedo wadanka
Ingiriiska, maadaama halkaas oo degan yahay
takhtarkii horey qalliinka ugu sameeyay.
Madaxweynaha ayaa inta uu
joogo Magaalada Nairobi waxa uu kulamo la
yeelan doonaan madaxda Hay’adaha Smafalka,
Diblumaasiyiinta shisheeyaha ee ku sugan
dalka Kenya, isagoo kala hadli doona sidii
gacan loo siin lahaa Dowladda Federaalka.
Madaxweynaha ayaa dadaalkiisa
ugu xoogan ee haatan waxa uu yahay sidii
dalka loo keeni lahaa ciidamo shisheeye,
iyadoo mar uu la hadlayay Golaha
Baarlamaanka uu sheegay in wadamo fara badan
ay diyaar la yihiin in Soomaaliya ay keenaan
ciidamo ka qayb-qaata nabadda iyo hub ka
dhigista.
Qaar ka mid ah Xildhibaanada
oo si weyn uga soo horjeeda ..
Wararka naga soo gaaraya
Magaalada Baydhabo waxay sheegyaan in qaar
ka mid ah Xildhibaanada Baarlamaanka ay si
aad ah uga soo horjeedaan in Soomaaliya la
keeno ciidamo ka socda wadamada Safaka hore
gaar ahaan wadamada Kenya, Jabuuti iyo
Itoobiya.
Xildhibaan Cumar Xaashi Aadan
ayaa waxa uu sheegay in ay soo dhaweynayaan
in Ciidamo shisheeye la keeno dalka balse ay
ka soo horjeedaan in ciidamo ka socda
wadamada safka hore la keeno, isagoo sheegay
in ciidamadaasi ay keeni karaan burbur iyo
dagaalo hor leh oo dalka ka dhaca,
Xildhibaanad Caasha Axmed Cabdala ayaa iyadu
gebi ahaanba ka soo horjeeda in dalka la
keeno ciidamo shisheeye, iyadoo sheegtay in
ciidamadaasi dalka u horseedi karaan mid ka
balaaran dhibaatadii ay gaysteen ciidamadii
UNISOM.
Madaxweyne C/llaahi Yuusuf
Axmed ayaa ka codsaday xubnaha Baarlamaanka
in ay aqbalaan in Soomaaliya la keeno
ciidamo ka socda wadamada IGAD iyo Midowga
Afrika, taas oo uu sheegay in la’aantood
aysan shaqeyn Dowladda Federaalka isla
markaana aysan huba dhigi Karin kooxaha
hubeysan.
C/llaahi
Yuusuf, Shariif Xasan iyo Geeddi oo kulan la
yeeshay xubnaha ..
Saddexda
mas’uul ee ugu sar sarreeya dawladda
federaalka Soomaaliya, ayaa shalay warbixin
siiyay Golaha Baarlamanka Soomaaliya,
warbixintaas oo badneyd mid ka hadleysay
safaradii ay dhawaan ku tageen dalka
dibaddiisa iyo kulmadii ay la yeesheen
madaxda dalalka ay tageen iyo kuwa beesha
caalamkaba.
Madaxweyne C/llaahi
Yuusuf, Ra’isul Geeddi iyo Guddoomiye
Shariif Xasan ayaa u sharraxay Golaha
Baarlamaanka
Soomaaliyeed, dhowr shir madaxeed oo ay kaga
qayb galeen Magaalooyinka Khartoum Brussels
iyo Nairobi, waxaana halkaas warbixin ka
dhiibay Madaxweyne C/llaahi Yuusuf oo ka
hadlay kulankaas, wuxuuna baarlamaanka u
sheegay in shirkii Nairobi ee dalalka IGAD
iyo deeq bixiyayaasha ay meel isla dhigeen
in Soomaaliya laga qaado cunaqabataynta
hubka.
“Soomaaliya
waxaa ka jirta Dowlad, suuragalna ma ahan in
Dowladdaasi lagu sheeko in ay tahay mid aan
awoodi karin in ay ammaankeeda sugto iyo
waxaliba sidii ay ciidan Qaran u dhisi
lahayd, una xaqiijin lahayd kala dambeynta
iyo xasiloonida dalka oo dhan” ayuu yiri
Madaxweyne C/llaahi Yuusuf, isagoo intaa
raaciyay in go’aanka rasmiga ah ee ah in
cunaqabateynta laga qaado Soomaaliya uu
leeyahay golaha Baarlamaanka.
Sidoo kale waxaa halkaas
isna warbixin ka jeediyay Ra’isul Wasaare
Cali Max’ed Geedi oo ka warbixiyay heshiis
ay la galeen Dowladda Mareykanka oo ku
saabsan I la iska kaashado nabadgelyada iyo
Siyaasadda, sidoo kale guddoomiyaha
Baarlamaanka oo isagu furay hadalka ayaa
isaguna hadal kooban oo uu jeediyay ku
sheegay in ay meel wanaagsan marayaan
howlihii Baarlamaanka, gaar ahaan xiriiradii
dibadda iyo waxyaabihii lagama maarmaanka
ahaa ee Baarlamaanku ka sugayay wadamada
Dibadda.
Saddex
nin oo ganacsato ah
oo u dhashay beesha Murile oo lagu afduubtay
...
Shalay
subaxnimadii ayaa saddex nin oo ganacsato ah
una shaqeeya shirakadda diyaaradda
ee Al-Nasri ee soo daabusha qaadka la
keeno magaalada Muqdisho ayaa mar ay
marayeen agagaarka isbitaalkii hore ee
Digfeer ayaa waxaa lagu hor gooyey gaari
kale oo yar, waxaana gaarigaasi ka soo degay
niman dabley ah oo saddexdaasi nin kala soo
degay gaarigii shirkadda, kuwaasi oo la
sheegay iney ka soo jeedaan beesha Murile.
Saddexdan nin
oo kala ah maamulihii shirkadda iyo laba ka
tirsan hawl wadeenada shirkaddaas ayaa waxey
magacyadooda kale yihiin Aadan Cali Cilmi,
C/raxmaan Xuseen Shafeec iyo Muxuddiin
Xuseen Yuusuf {Timacadde} ilaa iyo haatan
lama garanayo sababihii loo afduubtay
nimankaasi, balse warar ayaa waxey
sheegayaan in raggaasi loo afduubtay rag
beeshooda ah oo dhacay lacag ay lahaayeen
ragga wax afduubtay, rag ay xigto yihiin.
Odayaasha
beesha Murile ee ku nool magaalada Muqdisho
ayaa waxey ka codsadeen beesha ay ka soo
jeedaan kooxda afduubatay raggaasi iney
gacan ka geystaan sidii loo soo deyn lahaa,
saddexdan nin ee la afduubtay.
Markab
siday Dhuxul oo shalay uu dab ku qabsaday
meel ku dhow xeebta..
Maalintii
shalay ahayd ayaa meel ku aadan Xeebta
Dekedda Ceel-Macaan waxaa uu dab ku qabsaday
markab siday dhuxul fara badan oo ku sii
jeeday dalka Imaaraadka Carabta, wuxuuna
markabkaani dhuxusha ka qaaday dekedda
Baraawe ee Gobalka Sh/hoose.
Markabkaan
ayaa waxaa markii dambeu u gurmaday
shaqaalaha Shirkadda Banaadir oo ku
guuleystay in ay damiyaan dabkii qabsaday
markabkaasi, iyadoo maanta in markabkaasi
loo soo jiido dhinaca Dekedda Ceel-Macaan si
uu u helo farsamo ku aadan waxyaabihii uu ka
gubtay.
Maraakiibta
dhuxusha ka qaada dalka ayaa waxaa rara
ganacsato Soomaaliyeed kuwaasoo xaaluf ba’an
ku haya dhirta Soomaaliyeed waxaan dhowr
jeer ragga ganacsatada ah looga digay inay
ka waantoobaan xaalufkaasi oo dhibaato u
keenaya dad iyo duunyabada.
Wiil arday ah oo mudo
5-maalmood ah af-duub loogu haystay Muqdisho..
C/raxmaan
Shiikh Max’ed oo mudo shan maalmood ah
afduub loogu haystay Magaalada Muqdisho
ahaana arday wax ka baranayay Dugsiga
Fatxu-Raxmaan ee Xaafadda Huriwaa, waxayna
da’diisu ahayd 13 jir ayaa la sii daayay,
iyadoo sii deyntiisa ay gacan weyn ka
gaysteen Maxkamadda Islaamiga ah ee
Wardhiigley gacanta ku soo dhigtay saddex ka
mid ah raggii wiilkaasi afduubtay.
Shalay subax ayaa waxaa
Dugsiga Fatxu-Raxmaan ka dhacday xaflad
balaaran oo lagu soo dhaweynayo ardaygaasi
oo shalay xoriyaddiisii helay, iyadoo
waalidiintii ardaygaasi si weyn ugu
mahadceliyay shacabka Gobalka Banaadir iyo
bahda saxaafadda iyo waliba Maxkamadda
Islaamiga ah ee degmada Wardhiiley, waxaana
dhacday in ardaydii uu wax la baranayay ay
si weyn ugu farxeen markii ay arkeen C/raxmaan
oo dib u soo laabtay.
W/D Amiin Yuusuf Khasaaro
E-Mail:
amiinkhasaaro@hotmail.com
Faafin:
SomaliTalk.com | April 17, 2006
Xidlhibaan
barre hiraale oo maanta neyroobi u
kicitimay
Wasiirka wasaaradda dib u dhiska iyo
dib u dejinta dowladda federaalka ku
meel gaarka ah xildhibaan Barre
Aadan Shire Barre Hiiraale ayaa
saaka safar aan horay loo sii
shaacinnin ugu kallahay wadanka
Kenya gaar ahaan magaalada neyroobi
halkaasoo la sheegayo in uu kulamo
kula yeelan doono madax ka socota
safaarada mareykanka .
Safarka wasiirka ayaa waxa aan ka
wareysannay afhayeenka isbahaysiga
dooxada Jubba Bile Cabdille Cabdi oo
ku tilmaamay safar aan horay loo sii
shaacinnin ayadoo wasiirka
bixintaankiis aysan cidina ku
wehelin sidoo kale waxaa war hoose
oo soo baxaya ay sheegayaan in
xildhibaan barre uu magaalada
neyroobi kula kumi doono
madaxweynaha dowlada FKG ah ee
somaliyeed mudane cabdulahi yuusuf
oo galabta u baqooli doona dhanka
kenya gaar ahaan magaalada neyroobi.
Dhanka kale dadweynaha reer Kismaayo
ayaa waxa ay arrinta safarka
wasiirka ku tilmaameen mdi daba
soota socdaal uu horey magaalada
neyroobi ugu anbabaxay gudoomiye ku xigeenka
isbahaysiga dooxada jubba xidlhibaan
seraar kaasoo kulamo halkaas kula
yeeshay saraakiil ka socota
safaarada mareykanka ee neyroobi.
cabdi qadar nuur maxamed (filipiin)
kismaayo somaliya
cabdiqadar84@hotmail.com
Faafin:
SomaliTalk.com | April 16, 2006