Mas’uuliyiinta Sarsare ee DFKMG
oo isku khilaafsan in Dowladu dib ugu laabato Magaalada Jowhar.
Warar
hoose oo aanu helnay ayaa waxay sheegayaan in Mas’uuliyiinta sar sare ee
Dowladda sida Madaxweyne C/llaahi Yuusuf Axmed, Guddoomiye Shariif Xasan
Shiikh Aadan iyo Ra’isul Wasaare Cali Max’ed Geedi ay si weyn isugu
khilaafsan yihiin in Dowladda Federaalka ay dib ugu laabato Magaalada Jowhar.
C/llaahi Yuusuf waxaa la sheegay in uu diidan yahayba in Dowladdu ay ku
laabato Magaalada Jowhar, halka Guddoomiyaha Baarlamaanka ay ku mowqif
yahay Madaxweyne C/llaahi Yuusuf, hase yeeshe Ra’isul Wasaare Cali Max’ed
Geedi ayaa la sheegay in uu doonayo in Dowlddu ay degto Jowhar oo uu ku
tilmaamay in ay tahay Magaalo nabadeeda la isku halayn karo horeyna ay
dowladdu ugu shaqeysay. Kulankii ka dhacay Magaalada Nairobi oo lagu
heshiisiinayay Madaxweynaha iyo Guddoomiyaha Gobalka Sh/dhexe Max’ed Dheere
ayaa waxyaabihii ugu weyn ee la iskula soo qaaday ay ahaayeen in Dowladdu
ay ku shaqeyso Magaalada Jowhar, waxaana arrintaani si ay aad ah u doonaya
Dowladda Itoobiya oo iyadu soo qaban-qaabiday dib heshiisiinta Max’ed Dheere
iyo Madaxweyne C/llaahi Yuusuf. Inkastoo C/llaahi Yuusuf uu horey u sheegay
in guuritaanka Magaalada Jowhar ay ku xiran tahay Golaha Baarlamaanka ayaa
haddana ay adag tahay in Baarlamaanku uu aqbalo in Dowladdu ay u guurto mar
kale Magaalada Jowhar, haddii ay taasi dhacdo waxaa dib u soo laaban kara
kala qaybsanaantii Dowladda ee Muqdisho iyo Jowhar oo haatan saameynteedu ay
ka muuqato Magaalada Baydhabo. Madaxweyne C/llaahi Yuusuf Axmed ayaa isagu
la sheegay in uu martiqaad gaar ah ka helay Dowladda Itoobiya dhawaana la
filayo in uu deg deg ugu duulo Magaalada Adis-Ababa ee dalka Itoobiya taasoo
ay Dowladda Itoobiya ay ku dooneyso in C/llaahi Yuusuf uu dib ugu soo laabto
Magaalada Jowhar ee Gobalka Sh/dhexe.
Cismaan
Caato iyo xubno la socday oo shalay Hobyo Gaaray.
Iyadoo
ay socoto dib u heshiisiintii Beelihii ku dagalamay Gobalada Dhexe ayaa
maalintii shalay ahayd Wasiirka Howlaha Guud iyo Guryeynta Cismaan Xasan
Cali Caato oo shalay gaaray Magaalada Hobyo ee Gobalka Mudug.
Maanta
ayaa lagu wadaa in Magaalada Hobyo ay gaaraan Wafdi iyana ka socda Degmada
Cadaado oo uu horkacayo Wasiirka Horumarinta Reer Miyiga Max’ed Shiikh
Maxamuud Guuleed (Gacma-Dheere), waxaana Magaalada Hobyo berito ka
bilaabanaya wajigii labaad ee dib u heshiisiinta beelihii ku dagaalamay
gobalada Dhexe.
Waxaa
dhawaan la soo gebagabeeyay wajigii hore ee dib u heshiisiintii Beelaha
Sacad iyo Suleymaan, waxayna ka dhacday Magaalada Gelinsoor, oo ka tirsan
Degmada Cadaado, iyadoo dhawaan degmad Cadaado ay ka dhici doonto xaflad aad
u balaaran oo lagu soo gebagabeynayo wajigii hroe ee dib u heshiisiinta
beelihii ku dagaalamay Gobalada Dhexe, waxaana dib u heshiisiintaas gacan ka
gaystay xubno wasiiro ah oo ka tirsan labada Beelood ee uu dagaalku ku dhex
maray Gobalada Dhexe.
Cabdi Waal iyo Maleeshiyo uu
wato oo looga kala caray Xaafadda Buulo Xuubey.
Cabdi
Nuure Siyaad oo xubin ka ah Isbahaysiga isku magacaabay la dagaalanka
Argagixisada ayaa maalintii shalay ahayd ciidamo uu wato waxay soo degeen
xaflad ka mid ah Degmada Wadajir oo lagu magacaabo Buula Xuubey gaar ahaan
dhinaca wadada aadda Garoonka Diyaaradaha ee Magaalada Muqdisho.
Makii
uu halkaasi soo degayay Cabdi Waal waxaa la socday dhowr maleeshiyo ah iyo
dhowr tikniko, waxaana soo degitaankiisii halkaasi si weyn walwal uga
muujiyay dadweynaha deegaanka Buula Xuubey oo ka codsadya in Cabdi Nuure uu
halkaasi ka guuro.
Cabdi
Nuure mar wax laga weydiiyay sababta uu halkaasi u soo degay waxa uu sheegay
in uu doonayo in uu halkaasi ka dhiso Dugsiyo waxbarasho, xarumo caafimaad
iyo adeegyo kale oo bulsho, isagoo sheegay in Isbahaysiga loo abuuray in uu
gacan siiyo dadka dhibaateysan isla markaana uu gacan ka gaysto horumarinta
Bulshada.
Waxaa
lagu waramay in dad fara badan ay ka qaxeen guryihiin ku dhawaa halka uu soo
degay Cabdi Nuure iyagoo ka cabsi qaba in halkaasi uu ka dhaco dagaal la mid
kuwii dhawaan ka dhacay duleedka Magaalada Muqdisho.
Xasan Abshir oo lagu eedeeyay in uu
shati siiyay Maraakiibta Mareykanka.
Dableyda haysata Markabta kalluumeysiga ee Kuuriya laguna haysto xeebaha
Xarardheere ayaa waxa ay dalbadeen dableyda haysata lacag ay ku tilmaameen
ganaax oo gaareysa 500-Kun oo Doolar.
Markabkaas ayaay sheegeen in uu si sharci daro ah uga Kalluumeysanayay
xeebaha Soomaaliya, hase yeeshee afhayeen u hadlay kooxda haysta markabka
ayaa wuxuu sheegay in ay shaqaalaha Markabka ay tusiyeen warqad qoraal ah oo
ay ku leeyihiin in ay fasax ka haystaan Dowladda Federaalka gaar ahaan
Wasiirka Kalluumeysiga iyo kheyraadka Badda Xasan Abshir Faarax.
“wax dowlad ah oo aan aqoonsanahay ma
jirto, Xasan Abshirna warqaddaasi ma bixi karo” ayuu yiri Afhayeenka oo
sheegay in shaqaalaha markabka looga baahan yahay in ay bixiyaan lacagtaas
ganaaxa ah maadaama ay ku soo xadgudbeen xeebaha Soomaaliya oo ay si sharci
daro ah uga kalluumeysanayeen.
Shariif Xasan oo dib ugu soo labatay
Magaalada Baydhabo.
Waxaa dib ugu soo laabtay
Magaalada Baydhabo Guddoomi-yaha Baarlamaanka Shariif Xasan Siikh Aadan iyo
wafdi uu hogaaminayo, iyagoo kulamo la qaatay xubnaha Dowladda ee ku sugan
Magaalada Baydhabo
Guddoomiyaha ayaa kal
hore u socdaalay Magaalada Nairobi waxaana ay kulan ku wada qaateen
Madaxweyne C/llaahi Yuusuf iyo Ra’isul Wasaare Cali Max’ed Geedi, iyagoo
isla soo qaaday qodob dhowr ay oo ay ka mid ahaayeen in Xukumaddu ku
shaqeyso Magaalada Jowhar iyo waliba qodobo kale oo xasaasi ah.
Guddoomiyaha ayaa la
sheegay in ay isku afgarteen qodobada qaarkood Madaxweynaha iyo Ra’isul
Wasaaraha, isla markaana ay wasaaradaha Dowladdu ku shaqeeyaan Magaalada
Jowhar, waxaase warar hoose sheegayaan in Shariifku uu wali ka cagajiidayo
arrinkaasi uuna ku adkeysanayo in Baarlamaanka la horgeeyo waxa uu ka
yiraahdana laga qaato, haddii kalase ay uu arrinku ku laabanayo meeshiisii
hore,
Kulankii Magaalada Cadan
ku dhex maray Madaxweyne C/llaahi Yuusuf iyo Guddoomiye Shariif Xasan ayaa
qodobadii lagu heshiyay waxaa ka mid ahaa in Dowladdu ay ku sii shaqeyso
Magaalo ka madaxbanaan labada Garab ee Dowladda ee uu khilaafku u dhexeeyay,
waxaase la is weydiinayaa sida ay arrintaasi ku suurageylso mar haddii
Ra’isul Wasaaruba uu doonayaan in ay Jowhar Wasaaradaha Dowladdu ku sii
shaqeeyaan.
Prof.
Dhalxa oo u tacsiyeeyay dowladda Jabuuti..
Guddoomiye ku xigeenka
Baarlamaanka Federaalka Soomaaliyeed Prof. Max’ed Cumar Dhalxa ayaa uga
tacsiyeeyay Dowladda Wadanka Jabuuti musiibadii dhawaan ku habsatay dad
Reer Jabuuti ah oo ay Dooni kula qarqatay Xeebaha wadankaasi.
Prof. Dhalxa ayaa sheegay
in ay aad uga xun yihiin musiibadaas oo uu sheegay in ay tahay wax xag alle
ka yimid, waxa uuna tacis tiiraanyo leh u diray Dowladda Wadankaasi iyo
Shacabka Reer Jabuuti, isagoo ugu baaqay in ay samaraan, wuxuuna Illaah uga
baryay dadkii ay ku geeryooday Doonidaasi degtay in uu Janadii Fardowsa ka
waraabiyo inta waxyeeladu ka soo gaartayna uu Alle u fududeeyo.
Doonidaan oo siday 300 oo
Qof kuna sii jeeday Gobalka Tojore ee Waqooyiga Jabuut ayaa ku dhintay 70
qof, waxaana ku dhaawacmay tiro kale oo fara badan, waxayna doonidaani ku
socotay munaasabad diineed, iyadoo ay saarnaayeen Wadaado Tabliiq ah iyo dad
kale oo ku sii jeeday munaasabaddaasi.
150 Askari oo loo qaaday Magaalada Mombasa
Wararka ka imaanaya
Magaalada Baydhabo waxay sheegayaan in maalintii shalay ahayd garoonka
Diyaaradaha ee baydhabo ay ka ambabaxeen 150 Askari oo si gaar ah u ilaalin
doona saddexda mas’uul ee ugu sareysa Dowladda.
Ciidamadaan oo si gaar ah
loo soo tababari doono ayaa waxa qarashka ku baxa bixisay Dowladda Kenya,
maadaama ay horey u martigelisay shirkii dib u heshiisiinta Soomaaliyeed ee
lagu qabtay dalkeeda.
17-askri waxay ka socdaan
dhinaca Madaxweynaha, Ra’isul Wasaarahana waxa dhiniciisa ka socda 40
askari, halka guddoomiyaha Baarlamaanku ay isna ay ka socdaan 40 askari,
waxayna ciidamadaani ay yihiin kuwo aan lagu xulin habka 4.5 waxayna kas oo
jeedaan saddexda Mas’uul ee ugu sareysa Dowladda.
Wafdi ka
socda Dowladda Talyaaniga oo ku soo jeeda Magaalada Jowhar
Waxaa maalmaha soo socda
Magaalada Jowhar soo gaari doona wafdi ka socda Dowladda Talyaaniga, waxaana
wafdigaani uu u kuurgali doonaa howlihii ay Dowladda Talyaanigu ka fulisay
Magaalada Jowhar, markii ay Dowladdu ku sugneyd halkaasi.
Wafdigaan oo dhowr jeer
horey u baaqday ayaa waxaa xiligaan ku soo beegay markii ay dhawaan
mas’uuliyiinta ugu sareysa Dowladda Federaalka ay isla ogolaadeen in xubnaha
xukumadda ay ku shaqeeyaan Magaalada Jowhar.
Warar ayaa waxay
sheegayaan in Ra’isul Wasaaruhu uu horey u soo raaci wafdigaasi waxaana ku
wehliya wasiirka Qorsheynta iyo iskaashiga caalamiga ah C/risaaq Jurile.
Dowladda Talyaaniga aaa
lagu wadaa in ay gargaar mar kale gaarsiiyo Magaalada Jowhar, waxaana
gargaarkaani xoogiisu noqon doonaa raashin ay Dowladda Taylaanigu ugu
talagashay dadka ay waxyeeladu ka soo gaartay abaarta ee ku nool Gobalka Sh/dhexe.
Jaamacadda Badweynta Hindiya
oo kaalinta..
Dhamaadkii bishii Maarso 2006 ayaa waxaa
magaalada Laagoos ee caasimadda Naajeeriya ka dhacay kulan ay ka qaybgaleen
ilaa 500 oo Jaamacadood oo ku yaal Qaaradda Afrika waxaana goob joog ka ahaa
Parafasooro Soomaaliyeed, waxaana ka mid ahaa Prof. Gandi oo ah
guddoomiyihii hore ee Jaamacadda ummadda Soomaaliyeed oo hadda wax ka dhiga
Baariis, Prof. Samatar oo isna wax ka dhiga Mareykanka iyo Prof. Max’ed
Shiikh Mukhtaar oo isna ku sugan Cariga Mareykanka.
Qiimeyn halkaasi ka dhacday ayay
Jaamacadda Badweynta Hindiya kaalinta 25-ka gashay jaamacadihii halkaas
isugu tagay kaddib markii lagu qiimeeyay iyada oo ku shaqeysa xaalad adag.
Yuusuf
Khasaaro
E-Mail: amiinkhasaaro@hotmail.com