Waxaa
bisha May la qaban doonaan doorashadii xubnihii hogaamin lahaa xiriirka
Soomaaliyeed ee K/cagta kaddib markii uu dhowr sano uu ka taagnaa khilaaf
iyo is qabqabsi waxaana markii dambe la go’aamiyay in doorasho la qabto,
waxaana go’aamiyay xiriirka K/caga ee Adduunka FIFA.
Markuu dhinacyo badan ka eegay isla markaana dad badan
kula taliyeen inuu ka mid noqdo xubnaha guddiga fulinta ee Xiriirka
Soomaaliyeed ayuu Amiin Yuusuf Khasaaro si weyn u soo dhaweeyay arrintaasi.
Haddii aan howlihii Isboorti ee uu soo qabtay waxa uu
ahaa ninkii ugu horeeyay ee keenay in uu la qabto cayaar sagootin ah waxayna
dhacday sanadkii 1988-dii mar uu Aamin ka soo qalinjabiyay Kuliyaddii
Saxaafadda, waxa uuna goostay in xaafaddii uu ku dhashay ee Waabari uu ka
soo uruuriyay Dhallinyaro oo la ciyaartay xulka K/cagta ee Kulliyadda
Lafoole, taasoo uu ku soo sagootiyay Jaamacadii uu dhiganayay.
1989-kii waxaa laga shaqaaleeyay Wasaaradda Warfaafinta
waxa uuna ka mid noqday shaqaalihii Taleefishinka Jamhuuriyada Soomaaliyeed,
waxa uuna markaa la wareegay soo diyaarinta Barnaamijka Isboortiga.
Markii uu dhacay dagaalkaasi sokeeye Amiin ma uusan
joojin howlihiisii Isboorti, waxa uuna qoraa Isboorti ka noqday Wargeyska
Qaran, sidoo kale waxa uu qoraa ka noqday Wargeyska Dadka, gaar ahaan
qaybtiisa Isboortiga.
1999-kii wuxuu aasaasay Kooxdii K/cagta ee Qaran Press
oo uu u ahaa guddoomiye iyo waliba Tababare, iyadoo cayaartii ugu horeysay
ee lafu furayay tartankii Xidigaha ay la yeesheen Kooxda Elman, waxaana
tartaankaas Amiin kooxdiisa ay ka muujiyeen dadaal dheraad ah.
Markii uu dhamaday tartanka waxa uu Amiin albaabada u
furay in Kooxdii Qaran uu u kaxeeyo Gobalka Sh/hoose, halkaas oo ay cayaar
kula soo yeeshen xulka Degmada Marka, waana kooxdii ugu horeysa ee safar
gobaladaa ugu ambabaxda, waxa uuna safarkaas Amiin ku bixiyay qarash fara
badan.
Doorashadii Guddiga Olombikada Soomaaliyeed, xiriirada
iyo ururada ee 1997-kii ayaa Amiin loo magacaabay Guddoomiyaha ururka
Suxufiyiinta Isboortiga, sanad kaddib Amiin waxaa Guddoomiye looga dhigay
wargeyskii ugu horeeyay ee GOS ee uu lahaa Guddiga Olombikada Soomaaliyeed
taasoo uu ku muteystay abaalmarino bada, kaddib Doorashadii GOS 2001-kii
waxaa Amiin loo magacaabay Guddoomiye ku xigeenka Ururka Jaamacadaha.
Isla sanadkaasi ayaa shahaado sare ka helay Guddiga
Olombikada Adduunka, waxaana shahaadadaasi ku saxiixnaa Guddoomiyaha xiligaa
ee Guddiga Olombikada Adduunka Antonio Sammarach, waxaana shahaadadaasi
Amiin loo gudoonsiiyay howlgarnimadiisii dheeraadka ahayd, isla sanadkaas
ayuu Amiin waxa uu koob qurux badan ka helay Jaaliyadda Soomaaliyeed ee
Sweden kaddib markii uu sameeyay dadaal dheeraad ah.
Mudo 10-sano ah waxa uu uruursaday ilaa iyo 70 Shahaado
oo uu ka helay Qaybaha kala duwan ee bulshada, ururada Isboortiga, Xiriirka
K/cagta iyo Guddiga Olombikada Soomaaliyeed, waxa uuna Amiin
shahaadooyinkaasi ku muteystay kor u qaadista Isboortiga Soomaaliyeed.
Amiin waxa uu sameeyay wargeys Isboorti oo si weyn
looga akhristo dalka oo lagu magacaabo GOOL oo dhisan mudo 9-sano iyo bar ku
dhawaad ah, sidoo kale Amiin intii uu hayay Guddoomiyanimada ururka
Suxufiyiinta Isboortiga Soomaaliyeed waxa uu ururkaasi u guuleystay in uu
qabto Siminaaro fara badan.
Taariikhdiisii oo kooban (CV)
Magaca: Amiin Yuusuf
Khasaaro
Magaca Hooyo: Ashkiro
Kaahiye Jimcaale.
Ku dhashay: Muqdisho
sanadkii 1965-kii
Luuqadaha: Ingiriis
iyo Carabi
Heerarka
Waxbarasho
1972-76 Dugsiga
Hoose.
1976-80
Dugsi Dhexe.
1980-1984
Dugsiga Sare.
1984-1988
Jaamacadda Kulyada Saxaafadda.
Shaqaalenimo
1988-90
Wasaaradda Warfaafinta.
1992-97
Wargeyska Qaran.
1997-2006
Wargeyska Ayaamaha, Wargeyska Gool, Wargeyska GOS, Wargeyska
Dadka.
W/D: Faarax
Maxamed Cali (Faarax Blue)
Email:
farahblue_545@hotmail.com
Faafin: SomaliTalk.com | April 6, 2006