Barnaamijkii
Radio Xoriyo
28 October.
2005
-
Kofi Annan oo ka digay xaaladda Itoobioya iyo
Eritereya.
-
Dad reer Eritereya ah oo
Midowga Yurub ku bannaabaxay.
-
Golaha Ammaanka oo
arrimaha Soomaaliya ka hadlaya.
-
Ururrada samafalka oo
joojiyay hawlihii ay Uganda ka hayeen.
-
Maraykanka oo wasiir Kenyan ah fiiso
u diiday.
Barnaamijkii Xog-Warran(Baraaruga
Siyaasadeed)
======================
Xogahayaha guud ee Qaramada Midoobey
Kofi Annan ayaa Golaha Ammaanka u diray baaq degdeg ah
oo ku saabsan xaaladda khatarta ah xadka Eritereya iyo
Itoobiya, ka dib markii ay dawlada Eritereya xayiraad ku
soo rogtay dhaqdhaqaaqa ciidammada nabad ilaalinta ah,
Itoobiyana ay qiratay inay ciidammo dheeri ah xadka
keentay.
Kofi
Annan ayaa warqad uu isniintii u diray Golaha Ammaanka
ku sheegay inuu warqad ka helay madaxwaynaha dalka
Eritereya, taasoo uu ku sheegay in Qaramada Midoobey iyo
Golaha Ammaankuba ay ku guul darraysteen inay nabad iyo
xasillooni ka dhex-abuuraan Eritereya iyo Itoobiya.
Kofi
Annan wuxuu ka digay in khilaafka xuduudeed ee Eritereya
iyo Itoobiya uu meel xun gaadhay, wuxuuna Golaha
Ammaanka ugu baaqay inuu awooddiisa oo dhan isticmaalo,
si uu uga hortego in xaaladdu ay sidaas ka sii xumaato
iyo inuu soo afjaro xayiraada ciidammada nabad ilaalinta
la saaray.
Qaramada Midoobey waxaa xadka Eritereya iyo Itoobiya ka
joogay ciidammo nabad ilaalin ah oo gaadhaya in k abadan
3200 oo askari, hase yeeshee waxay toddobadkii hore
sheegtay inay ku adag tahay inay ka sii hawlgasho ugu
yaraan 60% goobihii ay ka hawlgeli jirtay.
Qaramada Midoobey waxay kaloo sheegtay inay
shaqaaleheedii shisheeyaha ahaa kala soo baxday meelah
xadka ku dhaw, ka dib markii duullimaadyada diyaaradaha
Qaramada Midobey xayiraada lagu soo rogay.
Dad reer Eritereya ah oo
Midowga Yurub ku bannaabaxay.
Dad kumayaal gaadhaya oo u dhashay dalka
Eritereya ayaa isniintii bannaanbax wayn ku sameeyay ka
soo horjeedka xarunta Baarlamaanka Yurub, si ay u
muujiyaan cadhadooda ku saabsan diidmada ay xukuumadda
Itoobiya diiday inay aqbasho go’aankii maxkamada
caalamiga ah ee xadka Eritereya iyo Itoobiya ku
saabsanaa.
Bannaanbaxayaashu waxay Baarlamaanka
Yurub ka codsadeen inuu xukuumadda Itoobiya ku dirqiyo
inay aqbasho go’aankii maxkamada caalamiga ah ka soo
baxay sannadkii 2002.
Midowga Yurub wuxuu ahaa dhinacyadii ugu
muhiimsanaa ee arrintan damaanad qaaday, wuxuuna saaran
waajib akhlaaqi ah ka saaran yahay inuu Itoobiya ku
qasbo inay go’aanka aqbasho, sidaas waxaa yidhi Solomon
Semere oo ka qayb galka bannaanbaxan uga yimid dalka
Swedan.
Bannaanbaxan waxaa soo qabanqaabiyay
dadwayanaha reer Eritereya ee ku dhaqan dalalka Yurub.
Bannaanbaxan iyo tallaabooyinkii ay dhawaan qaaday
dawlada Eritereya waxay u muuqdaan kuwo looga dan
leeyahay in beesha caalamka lagu qasbo inay tallaabo ka
qaado xukuumadda Itoobiya oo dheg u dhigi wayday
go’aankii xadka ku saabsanaa ee ka soo baxay maxkmada
caalamiga ah.
Golaha Ammaanka oo arrimaha
Soomaaliya ka hadlaya.
Golaha Amaanka ee Qaramada Midoobey ayaa
la sheegay inuu toddobaadka foodda inagu soo haya kulan
ka yeelan doono arrimaha Soomaaliya, iyadoo fadhigaasi
lagu gorfeynayn doono qaabka xal loogu heli karo
khilaafaadka kala geeyay labada garab ee dawlada ku
meelgaadhka ah ee Soomaaliya.
Warar aya ajira sheegaya in xafiiska
Qaramada Midoobey u qaabilsan arrimaha Soomaaliya uu
diyaarinayo qoraal ku saabsan xaalada dalka Soomaaliya,
iyadoo ergayga xoghayaha guud u qaabilsan arrimaha
Soomaaliya Francois Lonseny Fall uu hakad geliyay safar
uu ku tegi lahaa magaalada Muqdisho, ka dib markii
socdaal gaaban ku tegay magaalada Jowhar oo uu kula
kulmay Madaxweyne C/llaahi Yuusuf.
Danjire Fall ayaa sheegay in Qaramada
Midoobey ay dadaal wayn ugu jirto sidii loo
dhexdhexaadin lahaa labada garabyada ee dawlada ku
meelgaadhka ah ee Soomaaliya u qaybsan tahay, isagoo
xusay inuu arrintaas kala hadlay madaxweyne C/llaahi
Yuusuf oo muujiyay siduu u jacel yahay in xal loo helo
dhibaatooyinka ka dhex-taagan xukuumadda iyo
Baarlamaanka.
Fall ayaa lagu wadaa inuu kulanka Golaha
Ammaanka ka jeediyo warbixin ku saabsan heerka uu
gaadhay khilaafka dawlada Soomaaliya iyo dadaalladii
nabadeed ee lagu guul darraystay.
Ururrada samafalka oo
joojiyay hawlihii ay Uganda ka hayeen.
Ururrada gargaarka ee caalamiga ah ayaa
sheegay inay joojiyeen hawlihii samafalka ahaa ee ay ka
wadeen dalka Uganda oo dhan, ka dib markii labo weerar
oo kala duwan lagu dilay labo qof oo u shaqaynayay
ururro samafal ah, sidaas waxaa sheegay qaybta Holland
ee dhakhaatiirta aan soohdinta lahayn.
Dilalkani waxay arbacadii ak dheceen
gobolka Kitgum oo ku dhaw xadka uu dalka Uganda la
leeyahay waddanka Sudan iyo gobolka Pader, waxaana lagu
eedeeyay kooxda Ciidamada Ilaahay ee LRA ee ka soo
horjeeda dawlada Uganda.
Weerar kale oo seddexaad ayaa lagu qaaday
saraakiil arrimaha gargaarka ka shaqaynayay oo ka
hawlgalayay gobolka Lira, waxaana weerarkaas ku
dhaawacmay afar qof. Ururrada samafalka ee Uganda ka
hawlgala ayaa sheegay inayna waligood la kulmin weerarro
noocanoo kale ah.
Maraykanka oo wasiir Kenyan
ah fiiso u diiday.
Dawlada Maraykanka ayaa fiisaha
dal-ku-galka u diiday wasiirka gaadiidka ee dalka Kenya
Chris Murungaru. Maraykanku wuxuu diidmadan saldhig uga
dhigay in Murungaru uu ku kacay arrimo musuqmaasuq ah,
sidaas darteed aan loo oggolayn inuu galo dalka
Maraykanka.
Waddanka Britan ayaa isagun dhawr bilood
ka hor wasiirkan u diiday inuu fiiso siiyo. Murungaru
ayaa sheegay in go’aanka uu Maraykanu fiisaha ugu diiday
uu yahay mid uu kaga dayday dawlada Britan.
Murungaru, oo hadda ku guda-jiro dacwad
uu ku soo oogayo dawlada Britan, ayaa mar kale ku
celiyay inaanuu wax lug ah ku lahayn musuqmaasuqa lagu
eedaynayo, wuxuuna labada dawladood ugu baaqay inay soo
bandhigaan caddaymaha ay denbigiisa u cuskanayaan.
Radio
Xoriyo
28 October.
2005
Axmed Gaal-Eri
info@radioxoriyo.com
raadioxoriyo@yahoo.com
Radio Xoriyo waxaad ka dhegaysan kartaa Mawjadda 19 MB
ee dhererkeedu yahay 15670 KHZ, Maalmaha Talaadada iyo
Jimcaha 7: 30PM waqtiga Afrikada Bari