Baaq ka soo Baxay kulan cilmiyeedkii
Boosaaso....
Kulan cilmiyeed lagu soo gabagabeeyay
Boosaaso
Waxaa lagu soo
gabagabeeyay magaalada Boosaaso Kulan cilmiyeedkii seddexaad ee lagu qabtay
masjidka Al-Rowda oo halkudhegiisu ahaa (CAQIIDADA ISLAAMKA), wuxuuna socday
muddadii u dhaxeysay 11-23 Rabiic Al Awal 1426 oo waafaqsan
21/04-02/05/2005.
Ujeedooyinka loo
qabtay kulan cilmiyeedkaan waxaa ka mid ah: In dadweynaha loo soo bandhigo
caqiidada toosan, lagana soxo khaladaadka dadka qaarkiis ka galay, In la
dareensiiyo bulshada ahmiyadda caqiidadu u leedahay iyo dhibaatada ka
imaanaysa haddii laga bayro, In dadkeennu yeeshaan awood ay isaga difaaci
karaan duullaanada ku wajahan caqiidadooda, In dadweynaha la dareensiiyo in
caqiidadu tahay aasaaska diinta.
Waxaa ka
qaybqaatay jeedinta duruusta iyo ka jawaabista su’aalihii dadweynaha qaar
kamid ah culimada Soomaaliyeed oo ay ka mid yihiin :
-
Sh. C/qaadir
Nuur Faarax.
-
Sh. C/laahi
Cali xaashi
-
Sh.
Axmed-Daahir Xasan Xuseen.
-
Sh. Daahir Aw
Cabdi yuunus
-
Sh. Axmed
Xaaji C/ramaan.
-
Sh. C/qaadir
Maxamed Cabddalla.
-
Sh. Maxamuud
Xaaji Yuusuf.
-
Sh. C/naasir
Xaaji Axmed.
-
Sh. Bashiir
Jaamac Kite.
-
Sh. Maxamed
Cali Faarax.
Duruustii halkaa laga soo jeediyay waxaa ka
mid ahaa: Ahmiyadda caqiidada islaamka, Sifooyinka Ahlu sunnah waljamaaca,
In Alle kaliya la caabudo, Sifooyinka iyo magacyada Alle, In Nabiga la raaco
bidcadana laga fogaado, Xiriirka ka dhexeeya muslimiinta iyo kan kala
dhexeeya gaalada, isku xukunka sharciga Alle I.W.M.
Waxaa duruusta
garab socday su’aalo ay ka jawaabayeen culimadu, seminar diini ah oo la
siiyay haweenka iyo muxaadarooyin kale oo laga jeediyay meelo ka mid ah
magaalada.
Waxaa xusid mudan
in kulan cilmiyeedekaan intii uu socday ay si toos ah u baahinayeen
idaacadaha SBC, Midnimo iyo STN ee magaalada Boosaaso, waxaana laga
dhagaysanayay magaalooyinka Boosaaso, Qardho, Garoowe, Laag iyo Galgala.
Waxaa kale oo magaalooyinka qaarkood loogu gudbinayay taleefoonka, sida
magaalada Carmo iyo waliba taarka oo loogu xidhiidhinayay magaalada Qandala.
Duruusta iyo fataawada waxaa lagu duubayay maqal iyo muuqaalba. Dadka
dibaduhuna waxay kala socdeen aaladda internetka.
Kulan
cilmiyeedkaan waxay dadweynuhu uga faa’iidaysteen si weyn meel kasta oo ay
joogaanba, waxaana la rajaynayaa in si ballaaran loo faafiyo duruustii iyo
fataawadii laga duubay.
Xafladdii
xiritaanka kulan cilmiyeedka waxaa ka hadlay Sheekh Cabdulqaadir Nuur Faarax,
guddoomiyaha jaamacadda bariga Afrika Prof. Cabdulqaadir Max’ed Cabdullaahi,
wasiir ku xigeenka wasaaradda arrimaha diinta Axmed cali Gamuute, Suldaan
Cabdisalaan Suldaan Max’ud, waxaa kale oo xafladda laga akhriyay baaq ay soo
saareen culimadii ka qayb qaadatay kulan cilmiyeedka oo uu soo jeediyay
Sheekh Fu’aad Max’ud Xaaji Nuur, waana kan qoraalkii baaqa oo dhammaystiran:
Baaq ka soo Baxay kulan cilmiyeedkii
Boosaaso.
Waxaannu ugu baaqaynaa bulshada
soomaaliyeed iyo guud ahaan muslimiinta arrimahan soo socda:
1. In la barto caqiidada toosan ee
Islaamka, maadaama ay tahay tan lagu badbaadayo Adduun iyo Aakhiraba,
lagana digtoonaado waxyaabaha dhaawici kara.
2. Dhawridda iyo qabsashada Xadiiska
Rasuulka ( NNKH), lagana difaaco cid kasta oo duullaan ku ah.
3. Barashada, ku dhaqanka iyo faafinta
Diinta Islaamka iyadoo loo hurayo naf iyo maalba taas oo ah xil saaran qof
walba oo Muslim ah, sidaa darteed waa in qof walba uu qaataa kaalintiisa ku
beegan ha ahaato Culimada, Maamulka, Oday dhaqameedyada, Ganacsatada,
Aqoonyahanka, Haweeynka iyo Dhalinyarada.
4. Maadaama ummada soomaaliyeed tahay
muslim boqolkiiba boqol 100% laguma dhex faafin karo diimo iyo mabaadi’ aan
ahayn islaamka.
5. Waxaan ugu yeeraynaa masuuliyiinta
Soomaaliyeed inay u tanaasulaan danta guud ee dalka iyo dadka, ayna ka
fogaadaan wax kasta oo dhaawacaya diinta, qaranimada, midnimada iyo sharafta
ummadda Soomaaliyeed, isla markaasna ay qiimeeyaan baahida bulshadu u qabto
dawlad. Annaga oo xasuusinayna in mashaakilka ina haysta lagu xallin karo
shareecada islaamka oo kaliya .
6. Bulshada soomaaliyeed waxay soo
martay waqti dheer oo ay ku jirtay burbur , dagaallo sokeeye iyo duruufo
adag oo dhamaan saameeyay, hadaba waxaa waajib ah inay si dhab ah u
walaaloobaan, isgacan qabtaan, isuna naxariistaan.
7. Manaahijta Waxbarashada Dalku waa in
ay noqoto mid tayaysan, kana tarjumaysa Diinta iyo baahida bulshada
Soomaaliyeed, lagana ilaaliyo faragalinta, dibindaabyada iyo marinhabaabinta
ay ku hayaan Shisheeyuhu.
8. Warbaahinta Soomaaliyeed waa inay u
adeegto danaha Bulshada, kana tarjumto Diinteenna iyo Dhaqankeenna suubban,
isla markaana ay ka fogaato baahinta wax kasta oo wax yeelaya Umadda
Diinteeda, dadnimadeeda, akhlaaqdeeda iyo wadajirkeedaba.
9. Waa in mudnaanta koowaad la siiyo
ilaalinta iyo horumarinta qoyska, lagana hortago khatarta ku wajahan
haweenka iyo da’yarta, isla markaana loo hawlgalo xallinta mashaakilkooda,
korna loo qaado aqoontooda iyo wacyigooda.
10. Waa in bulshada soomaaliyeed ay iska
kaashato hirgalinta mashaariicda danta guud iyo horumarinta adeegyada
bulshada sida:- dhismaha iyo dayactirka masaajidda, wadooyinka, garoomada,
isbitaalada, dakadaha, jaamacadaha I.W.M. taas oo ciddii ka qayb-qaadata u
noqonaysa sadaqo ajar joogta ah leh.
11. Waxaan bogaadinaynaa mashruuca dhismaha
garoonka diyaaradaha Boosaaso annaga oo bulshada ugu baaqayna meel ay
joogtaba dibad iyo gudo inay ka qayb qaataan fulintiisa.
12. Waa in dadka soomaliyeed ee u qaxay
dalalka gaalada ay ku soo laabtaan dhulkooda, si ay uga badbaadaan iyaga iyo
ubadkooduba khatarta haysata diintooda, waana in maamullada iyo shacabku
iska kaashadaan sidii loogu diyaarin lahaa dadkaas jawi ku dhiirigaliya
inay soo noqdaan.
13. Waa in la joojiyo dagaallada sokeeye ee
ka dhex aloosan bulshada soomaaliyeed meel kasta oo ay joogaan,
khilaafaadkoodana ay ku xalliyaan shareecada Islaamka, arintaana waa inay ka
qayb qaataan culimada iyo waxgaradku .
14. Joojinta iyo ka fogaanshaha Cudurada
bulshada ee ragaadiyay dadkeenna sida qabyaaladda , gobolaysiga, Dulmiga,
musuqmaasuqa I.W.M.
15. Waa in ay iska kaashadaan maamullada
iyo dadwaynuhu sidii dalka looga ciribtiri lahaa munkaraadka kala duwan
sida: filimada xunxun, faaxishada, dhaqamada xunxun, burcadnimada,
jidgooyada, dilka, afduubka, iyo maandooriyayaasha (qaadka, xashiishada,
khamriga, sigaarka I.W.M) kuwaas oo khalkhal galinaya degenaanshaha iyo
dhaqanka suubban ee ummadda.
16. Waxaan si gaar ah u dhiirrigalinaynaa
la shayqaynta iyo maalgalinta hay’adaha samafaridda iyo xumaan-reebka ee ka
jira dalka.
17. In la joojiyo lana celiyo dadka
shisheeyaha ah ee sida xad dhaafka ah ugu soo qulqulaya dalkeenna kuwaas
oo ummadda ku haya dhibaato diimeed, caafimaad, degaameed, dhaqan, dhaqaale,
nabadgalyo, akhlaaqeed iwm.
18. Waxaan si adag uga digaynaa sunta
khatarta ah ee lagu aasayo xeebaha iyo gayiga soomaaliyeed, waana in loo
guntado sidii arrintaa looga hortagi lahaa, lalana xisaabtamo cid kasta oo
arintaa ku lug yeelata.
19. Waa in si adag oo wadajir ah looga
hortago xaalufinta ba’an ee lagu hayo khayraadka badda iyo barriga.
20. Waxaan shacabka soomaaliyeed guud ahaan
ku waaninaynaa inay ka waantoobaan tahriibta badaha iyo saxaaraha ee ay ku
hoobteen, waana in maamullada dalku arintaa si adag wax uga qabtaan.
21. Waxaan ugu yeeraynaa dawladaha carbeed
in ay ka qaadaan xayiraadda ay ku soo rogeen xoolaha Soomaalida, taas oo
dhibaato weyn u gaysatay dhaqaalaha dadweynaha oo horayba u tabaalaysnaa.
22. Waxaan muslimiinta caalamka ugu
yeeraynaa in ay ku midoobaan kitaabka Alle, iskuna xukumaan sharcigiisa,
ayna tuuraan qawaaniinta dadku sameeyeen, waana inay si wadajir ah uga
hortagaan duulaamada milatari, dhaqaale, siyasadeed, maskaxeed iyo dhaqameed
ee kaga imaanaya cadawgooda.
23. Waxaan ugu baaqaynaa dhammaan dawladaha
iyo shucuubta muslimiinta ah in ay isgarab taagaan walaalahooda dulman meel
kasta oo ay joogaanba, ayna ku baraarugaan waxna ka qabtaan khatarta ku
wajahan masjidka barakaysan ee Al-Aqsaa.
24. Waxaan si gaar ah u adkaynaynaa
ilaalinta iyo sugidda nabadgalyada labada Xaram ee Makka iyo Madiino iyadoo
la dhawrayo xurmada Ilaahay ku gaar yeelay
25. Waxaan ugu baaqaynaa dhammaan dawladaha
iyo shucuubta muslimiinta ah inay ka digtoonaadaan kana hortagaan fitnada
iyo dagaallada dhexdooda ah.
26. Waxaan ugu yeeraynaa dhammaan
bulshooyinka caalamka in ay soo galaan diinta islaamka oo ah diinta kaliya
ee xaqa ah laguna badbaadayo adduun iyo aakhiro.
27. Gabagabadii waxaan ugu baaqaynaa
culimada xambaarasan dhaxalkii Nabiyada inay iska ilaaliyaan khilaafaadka,
ayna si wadajir ah ugu dhaqaaqaan fidinta diinta iyo badbaadinta ummadda.
Allaah ayaa mahad leh
Culimada soo saartay baaqa.
- 1. Sheekh C/Qaadir Nuur Faarax
______________________
- 2. Sheekh C/Laahi Cali Xaashi
______________________
- 3. Sheekh C/Naasir Xaji Axmed
______________________
- 4. Sheekh Daahir Aw Cabdi
______________________
- 5. Sheekh Axmed-Daahir Xasan
______________________
- 6. Sheekh Maxamuud Xaaji Yuusf
______________________
- 7. Prof. Dr. C/Qaadir Maxamed C/Laahi
_____________________
- 8. Prof. Dr. Axmed Xaaji C/Raxmaan
______________________
- 9. Sheekh Bashiir Jaamac Kitte
______________________
- 10. Sheekh Maxamed Idriis
______________________
- 11. Prof. Maxamed Cali Faarax
______________________
- 12. Sheekh Axmed Cabdi Aadam
______________________
- 13. Sheekh Xasan Maxmed Ibraahim
______________________
- 14. Sheekh Axmed C/Samad ______________________
Boosaaso 23/03/1426 - 02/05/2004
Kala xiriir:
dacwah@hotmail.com