Barnaamijkii
Radio Xoriyo
27 May.
2005
-
Qaabkii loo dilay Dr. Abiib iyo dad
badan oo lagu xidhxidhay magaalada Garbo.
-
Eriteriya oo u dabbaal degtay
14-guuradii kasoo wareegtay xornimadeeda.
-
Guddiga doorashada ee Itoobiya oo
taladu gacantoodii ka baxday.
======================
Qaabkii loo dilay Dr. Abiib iyo dad
badan oo lagu xidhxidhay magaalada Garbo.
18/5/05 magaalooyinka Shaygoosh iyo Birqod
dhexdooda,ayay ciidamada cadowgu ku dileen Dr. Ahmed Gurey Abiib, oo ahaa
takhtarka kaliya ee ka shaqeeya Isbitaalka magaalada Qabridaharre.
Dhakhtarku wuxuu la scoday baabuur ay saarnaayeen nimanka Itoobiya u adeega
ee kala ah Jamiil Muxumed Gaas iyo Khadar Macallin. Markii ay marayeen meel
Shaygoosh iyo Birqod u dhexaysa ayay ciidamo Wayaane ah oo jidka ku jiray
xabbad ku fureen baabuurtii iyagoon wax digniin ah siinin ama ka codsanin
inay joogsadaan.
Markii ay tacshiiradu wax yar socotay ee la
is-gartay ayuu sargaal ka tirsan ciidammada Wayaanuhu xanaaqay, ka dibna
rasaas huwiyay meeshii ay taagnaayeen dadkii baabuurta saarnaa, isagoo
ujeeddadiisu ahayd inuu laayo. Nasiib darrose waxay xabbadaasi isla goobtii
ku dishay Alla ha u naxariistee Shahiid Dr. Axmed Abiib Gurey. Waxaa kaloo
halkaas ku dhaawacmay labo qof oo kale.
19/4/05, Tuulada Buur-yare oo degmada Iimay ka
tirsan ayay ciidamada gumaysiga Itoobiya ku dileen ragga kala ah:
1-Khadar Cabdulahi Moh/ed Sulub.
2-Ahmed Sh. Barkhadle Cabdulahi.
10 20/5/05, ayaa magaalada Garbo
lagu xid-xidhay dad 200 oo ruux ka badan, oo markay xabsiyadii qaadi waayeen
xeryo loo ooday. Dadkaas faraha badan ee la xidh-xidhay waxaa ka mid ah,
carruur yaryar, haween iyo dad waayeel ah oo qaarkood 90 sano da,doodu dhan
tahay. Waxaa kale oo dadkaas la xidhay ka mid ah laba Ugaas oo ka mid ah
ugaasyada beelaha deegaankaas dega.
Dadkaas waxaa loo haystaa inay ku
lug lahaayeen, baabuur ay ciidamada cadawgu lahaayeen oo hadda ka hor ay
Jabhaddu Garbo iyo Agagarkeeda ku gubtay, kuwaasoo 8 askari oo ciidamada
Wayaanaha ah oo 7 sargaal ku jiraan ayku dhinteen.
Dhinaca kale 23/4/05, magaalada
Baabili gudaheeda hawlgal laga fuliyay ayaa lagu dilay 2 askari oo
ciidammada gumaysiga itoobiya ka mid ah.
14/5/05, Kolonyo ciidamada gumeysiga
itoobiya ah oo maraysay meel u dhow Yucub ayaa waxaa weerartay fallaadh ka
mid ah ciidammada xoreynta Ogaadeenya, waxayna weerarkaas ciidammada
gumaysiga itoobiya kaga dileen 6 askari,halka kuwo kalana lagu dhaawacay.
Eriteriya oo u dabbaal degtay
14-guuradii kasoo wareegtay xornimadeeda.
Dadka Eriteriya ayaa 24 kii Bisha
May 2005 u dabaal degay sanad guuradii 14aad ee kasoo wareegtay markay
gobonimadooda ka qaateen gumaysiga madoow ee itoobiya. Waxaa dalka oo dhan
looga dabaal degay si aad ah oo waxyaalo badan oo dhinaca horumarka iyo
dhaqanka dalka ku saabsan lagu soo bandhigay.
Garoonka weyn ee kubbada cagta ee ku
yaala caasimada Eriteriya magaalada Asmara ayaa lagu qabtay xafladda sanad
guuradii 14 ee gobonimada Eriteriya. Halkaasoo madaxweynaha dalka Eriteriya
Isaias Afwerki uu salaan kaga qaatay ciidanka salaan sharafta bixiya, waxaa
iyadana gaardi ku maray cutubyo ka mid ah ciidanka qalabka sida dalkaasi
Eriteriya. Sidoo kale ardayda dhigata dugsiyada Hoose/Dhexe iyo sare ee
dalka Eriteriya ayaa munaasabadaas kusoo bandhigay Mahrajaan cajiib ah.
Waxaa bilowgii xafladda khudab dheer
ka jeediyey Madaxweyne Isaias Afwerki oo ku dheeraaday in dhibaatada
horumarka dalka Eriteriya ka hortaagan inay tahay Xukuumadda Wayaanaha oo
gardaradeeda garab ku haysata.
Wuxuu yidhi Madaxweyne Isaias, 14
sano kuma badna nolosha qaranimada; gaar ahaan dal uu burburiyey dagaal 30
sano socday. Wuxuu sheegay Madaxweynuhu,inaan muddada ay xorta ahaayeen la
qiimayn karin haddii aan la soo qaadanin turunturooyinkii ay Taliska
Wayaanaha iyo kuwa la jira ay dalkiisa ku hayaan. Wuxuu sheegay markii la
eego muddada yar ee ay xorta ahaayeen iyo dhibaatada la soo gudboonaatay
inuu horumarka ay gaadheen ka sareeyo sidii caadiga ahayd ee la filayey.
Wuxuu Madaxweynuhu ku dheeraaday
mawqifka Golaha Ammaanka ee u janjeedha dhinaca Itoobiya ee ku saabsan
mushkilada degmada laysku haysto.
Wuxuuna yidhi madaxweynuhu; Bishii
la soo dhaafay ayey 3 sano ka soo wareegtay go’aankii Guddigii Xuduudda,
wuxuuna sheegay in dhaqanka Golaha Ammaanku uuna ahayn oo kaliya mid ka
turjumaya xaaladda qalalaaso ee dunidu maanta ku jirto, balse uu horseedayo
siyaasad aad khatar u ah.
Waxaa la yaab leh ayuu yidhi
Madaxweynuhu, in fikirka diidan in xadka la calaamadeeyo uusan ka soo fulin
Wayanaha, laakiin ay kuwa taageera ku yidhaahdeen “ku dhawaaqa inaad mabda’a
ahaan ogolaateen go’aanka, inta kalena anaga noo dhaafa”.
Madaxweyne Afawarki ayaa carrabka ku
adkeeyey in taageerayaasha Wayaanaha ay u qorshaysan tahay in Eriteriya la
curyaamiyo,isla markaana Wayaanaha laga caawiyo dhinacyada dhaqaalaha,
siyaasadda, diblomaasiyada iyo dacaayadda intaba.
Kuwa gargaara Wayaanaha waxay ka
dhaafeen, dayntii, iyo gargaar loogu magac daray “cuntadii ayaa ka yaraatay
Itoobiya” ayuu yidhi Madaxweyne Afwerki. Wuxuuna Madaxweynuhu cadeeyey in
gaargaar Ciidan lagu siiyo Wayaanaha magaca “is kaashiga ka hortagga
argagixisada” iyo waxay ku tilmaameen “tirtiridda waxa lagu magacaabo Al
Itixad oo Soomaaliya ka jira”, taasoo abuuraysa duruuf lagu farageliyo
dalkaas, isla markaas laga difaaco Wayaanaha.
Guddiga doorashada ee Itoobiya oo
taladu gacantoodii ka baxday.
Guddida doorashada Itoobiya ayaa u
muuqda inay farahooda ka baxday hawshii tirinta codadka doorashadii la
qabtay 15-kii May,2005 sidaasna waxaa lagu sheegay warbixin ka soo baxday
kooxdii Midowga Yurub u qaabilsanayd u kuur-gelidda doorashada Itoobiya.
Warar lagu kalsoon yahay ayaa
sheegaya in laga yaabo in Midowga Yurub uu si muuqata u canbaareeyo qaabka
ay wax u socdaan, si uu lafihiisa uga fogeeyo eedda ka dhalan karta in
doorashadu ayna ahayn mid nadiif ah.
In ka badan toban maalmood ayaa ka
soo wareegtay xilligii doorashada la qabtay, hase yeeshee siyaasad ahaan iyo
xog ahaanba qalalaase ayaa ka jira natiijada doorashada.
Warbixintu waxay intaas ku dartay in
Guddiga Doorashooyinka Itoobiya uuna si fiican uga hawl gelin sidii codadka
sax loogu tirin lahaa, isla markaana uu wararka ka sugo oo kaliya shaqaalaha
u qaabilsan goobaha doorashooyinka ee kala duwan.
Natiijada doorashada ee la raajiyay
ayaa laga cabsi qabaa inay keento qalalaase wayn oo dalkoo dhan ka abuurma.
Ilaa iyo haddana xukuumadda Itoobiya ma ayna sheegin sababta ay dib ugu
dhigayso dabool ka qaadista meesha ay marayso cod tirintu.
Xisbiga ugu wayn xisbiyada
mucaaradka ee CUD ayaa isaguna dhiniciisa ku hanjabay inuu natiijada
doorashada qaaddici doono, wuxuuna xisbigu ka sheegtay dhibaatooyin fara
badan oo ay xukuumaddu ku hayso, isagoo tilmaamay inuu ka cabsi qabo in
isbahaysiga EPRDF uu doorashada ku shubto, sidii uu beryihii horaba yeeli
jiray.
Radio
Xoriyo
27 May.
2005
C/nuur Sh. Mohamed
info@radioxoriyo.com
radioxoriyo@ogaden.com
raadioxoriyo@yahoo.com
Radio
Xoriyo waxaad ka dhegaysan kartaa Mawjadda 19 MB ee dhererkeedu yahay 15670
KHZ, Maalmaha Talaadada iyo Jimcaha 7: 30PM waqtiga Afrikada Bari
Faafin: SomaliTalk.com | May 27, 2005
DENMARK: QAXOOTIGA
SOOMAALIYEED CIDNA UMA MAQNA, CEELNA UMA QODNA
Xaaladda ay ku sugan yihiin Qaxootiga
Soomaalida ee ku jira xeryaha ku kala baahsan dalka Denmark ayaa..
Guji
Daabaco
Boggan | Print