Barnaamijkii Radio Xoriyo

24  May 2005 

• Guddoomiyaha JWXO oo dhanbaal hanbalyo ah u diray madaxwaynaha iyo dadwaynaha Eritereya. 

•  Shir ballaadhan oo ka dhacay dalka Norway. 

• JWXO oo bayaan canbaarayn ah ka soo saartay Dhakhtar caan ah oo gumaysigu dilay.

• Dad doorashada Itoobiya goobjoogayaal ka ahaa oo magangelyo dalbaday.

• Iyo waraysiyo aan la yeelanay masuuliyiinta Jaaliyadda Ogaadeenya ee Norway iyo qaar ka qayb galayaasha shirka ka mid ah.

 Guddoomiyaha Jabhadda Waddaniga Xoreynta Ogaadeenya Admiral Maxamed Cumar Cismaan ayaa isagoo ku hadlaya magaca Jabhadda iyo magaca dadwaynaha Soomaalida Ogaadeenya, dhanbaal hanbalyo ah u diray madaxwaynaha dalka Eritereya Isaias Afwerki iyo dadwaynaha Eritereya, isagoo  ugu hanbalayeeyay sannad guurada 14aad ee ka soo wareegtay xornimadii waddanka Eritereya. 

Guddoomiyahu wuxuu dhanbaalkan ku sheegay inay farxad wayn u tahay inuu madaxwaynaha iyo dhammaan raggii iyo dumarkii naftooda iyo maalkooda qaaliga ah u huray gaadhista madaxbannaanida uu dhambaalkan u diro, kuwaasoo ayuu yidhi gudoomiyuhu tusaale fiican u ah dadka u halgamaya aaya-ka-talintooda. Wuxuu, isagoo munaasabaddaas ka faa’iidaysanaya ugu mahad celiyay taageerada walaalnimo ee Eritereya ay la garab taagan tahay halganka gobanimo doonka. 

Guddoomiyuhu wuxuu u rajeeyay dadwaynaha Eritereya nabad iyo barwaaqo, wuxuuna ugu hanbalyeeyay sida ay isugu duuban yihiin, si ay isaga caabiyaan gardarrada qaawan ee Itoobiya u gaysato qaranimadooda iyo dawladnimadooda. Wuxuuna sheegay inuu dadwaynaha Eritereya ku taageersan yahay inay la soo noqdaan dalkooda iyo nabad waarta iyo xasillooni ka dhacda gobolka Geeska Afrika, oo aan la helaynin haddii aan dadyowga ku dhaqan loo oggolaanin xuquuqda ay u leeyihiin inay aayahooda ka tashadaan. 

Shir ballaadhan oo ka dhacay dalka Norway. 

Maalintii sabtida ahayd ee taariikhdu ku beegnayd 21/05/05 waxaa magaalada Oslo ee dalka Norway lagu qabtay shir ballaadhan oo dadwaynaha Jamhuuriyada Soomaaliya iyo Ogaadeenya ay kaga arrinsanayeen sidii taageero loogu fidin lahaa gobanimo doonka Ogaadeenya, isla markaana dadwaynaha soomaaliyeed loo dareensiin lahaa khatarta Itoobiya ku hayso dhammaanba ummada soomliyeed. Shirkan oo dadwayne aad u fara badan ay ka soo qayb galeen, waxaa soo qabanqaabisay Jaaliyadda Ogaadeenya ee dalka Norway. 

Shirkan waxaa xogbixino ku saabsan marxaladda uu marayo halganka Ogaadeenya iyo jabka soo gaadhay cadowga Itoobiya ka soo jeediyay goddoomuye ku xigeenka iyo madaxa Hooggaanka Warfaafinta ee Jabhadda Waddaniga Xoreynta Ogaadeenya. Masuuliyiintu waxay ergooyinkii shirka ka soo qayb galay uga warrameen xaaladda halganka Ogaadeenya iyo marxaladaha cusub ee uu galay.  

Waxay sidoo kale u faahfaahiyeen qaabka uu halganku u socdo iyo mabaadii'da gundhigga u ah, iyagoo tilmaamay in halganka Ogaadeenya uu yahay halgan ku salaysan isku tashi, isla markaana si madaxbannaan ay gacanta ugu haynaa dadwaynaha Soomaalida Ogaadeenya, oo hadafka ay higsanayaan uu yahay inay aaya-ka-tashi buuxa helaan. Waxay sidoo kale u sharraxeen siyaasada Itoobiya ee ku wajahan Jamhuuriyadda Soomaaliya iyo siday ugu talajirto in Soomaaliya ayna marna lugeheeda dib iskugu taagin.

 Ergooyinkii soomaaliyeed ee shirkaas ka soo qayb galay ayaa iyaguna hadallo kala duwan halkaas ka soo jeediyay, waxayna dhammaantood isku raaceen sida ay muhiimka u tahay in la taageero Jabhadda Waddaniga Xoreynta Ogaadeenya, arrintaasoo ay ku tilmaameen inay tahay waddada kaliya ee la iskaga difaaci karro gardarrada Itoobiya, isla markaana lagu badbaadin karo qaranka Soomaaliya, garabna lagu siin karo dadyowga soomaaliyeed ee Itoobiya gumaysato.

 Dadkii soomaaliyeed ee shirkaas ka hadlay waxaa ka mid ahaa Kornayl Axmed Maxamed Kaasrshe, oo labo mar ku dhaawacmay dagaalka xoryenta Ogaadeenya . Kornaly Kaarshe wuxuu sheegay inuu dagaalka Ogaadeenya ku dhaawacmay sannadihii 1964 iyo 1977. Wuxuu ka sheekeeyay kornaylku sababta uu u qortay ciidammada Soomaaliya oo ahayd gardarro ay ciidammada gumaysiga Itoobiya u gaysteen, sidaas darteed, marka laga tego dadka soomaaliyeed ee ay gumaysto, uu doonayay inuu ka aar-goosto. 

Kaarshe wuxuu ka sheekeeyay sida ay quwadaha waawayn uga hiiliyeen ummada soomaaliyeed, isla markaana ay ugu dadaalayaan in mar kastaba ay Itoobiya gacanta sare yeelato, wuxuuna yidhi; "Way na burburiyeen, si ay Itoobiya u difaacaan". Kaarshe wuxuu kaloo yidhi; "Haddii aad tihiin Jabhadda Waddaniga Xoreynta Ogaadeenya waxaad nagu abuurteen yididiilo ah inaan Xabashi ka adkaan karno".Kornayl Karshe markii uu ka sheekaynayay dagaalkii Qabaridaharre lagu xoreeyay oo uu ku dhaawacmay, waxaa hadalkiisii kala goysay Oohin uu xakamayn kari waayay, hase yeeshee waxay ilmadii ka hooraysay joogsatay markii uu ka faallooday sidii ay u jabiyeen ciidammadii Xabashida ee Qabridaharre ku sugnaa oo qaybtii ugu denbaysay ay ku qaqabteen magaalada Shaygoosh.

 Ergooyinkii soomaaliyeed ee shirkan ka soo qaby galay waxay ballanqaadeen inay taageero hiil iyo hooba ah la garab istaagayaan gobanimo doonka Ogaadeenya ee dagaalka hubaysan kula jira gumaysiga Itoobiya, waxayna iska qabteen Guddi 7 qof ka kooban oo ka soo shaqayn doona sidii taageero dhinac walba leh loogu fidin lahaa halganka Ogaadeenya. 

Masuuliyiinyta Jaaliyadda Ogaadeenya ee dalka Norway ayaa RX  u sheegay inay ku faraxsan yihiin sida uu shirku u qabsoomay iyo midhaha ka soo baxay, waxayna u mahad celiyeen dadwaynihii ka soo qayb galay iyo xubnihii Jaaliyadda ee ku dadaalay inuu sidan u qabsoomo.

 JWXO oo bayaan canbaarayn ah ka soo saartay Dhakhtar caan ah oo gumaysigu dilay.

 Jabhadda Waddaniga Xoreynta Ogaadeenya ayaa maanta oo taariikhdu tahay 24/05/05 soo saartay bayaan ay ku canbaaraynayso dilkii waxshinimada ahaa ee ciidammada Itoobiya arbacadii la soo dhaafay u gaysteen Alla ha naxariistee Dr Axmed Abiib Gurey, oo ahaa dhakhtar sare oo u adeegi jiray dadwayhaha Soomaalida Ogaadeenya, gaar ahaa Isbitaalka magaalada Qabridaharre.

 Dr Gurey wuxuu ku guulaystay inuu qalab caafimaad ka helo Hay'ado shisheeya ah oo tegay dalka Ogadeenya, arrintaasoo qayb ka ahayd hawlihii samafalka ahaa ee ay ku caawinayeen dadwaynaha Soomaalida Ogaadeenya, waxaana la filayaa in arrintaas darteed loo dilay dhakhtarka.

 Dilka Dr Gurey wuxuu daliil cad u yahay tallaabooyinka xadaarada ka qaawan ee ciidammada Itoobiya qaadaan, si ay u curyaamiyaan hawlaha samafalka ah ee sida madaxbannaanida ah loo gaadhsiiyo dadwaynaha Soomaalida Ogaadeenya, iyo si ay gumaysigooda u sii cimri dheeraayaan. 

Dad doorashada Itoobiya goobjoogayaal ka ahaa oo magangelyo dalbaday.

 Toddobaatan ka mid ah dadkii uu ururka mucaaradka ah ee Oromo National Congress (ONC) u doortay inay doorashada goobjoogayaal uga noqdaan ayaa ku soo cararay xarunta Ururka Laanqayrta Cas ee magaalooyinka Bedeno iyo Weter, waxayna codsadeen in magangelyo la siiyo, ka dib markii ay soo gaadheen hanjabaadyo ka yamid dhinaca ciidammada dawlada, isla markaana ay naftoodu khatar gashay. Hase yeeshee Ururka Laanqayrta Cas ayaa diiday inuu magangelyo siiyo.

 Masuul sare oo ka tirsan Ururka ONC ayaa xaqiijisay in goobjoogayaasha doorashada ee Ururkeedu ay magangelyo waydiisteen Ururka Laanqayrta Cas, ka dib markii ay naftooda u cabsadeen. Waxay kaloo intaas ku dartay in Ururka Laanqayrta Cas uu ka diiday inuu magangelyo siiyo, isagoo sheegay in magangelyada la siiyo oo kaliya dadka ku waxyeellooba isku dhacyada iyo masiibooyinka dabiiciga ah.  

Waxay kaloo sheegtay in dadkaasi ay kaalmo ka codsadeen koox goobjoogayaal doorashada ahaa oo ka socday Midowga Yurub oo deegaankaas ku sugan, ka dib markii uu Ururka Laanqayrta Cas codsigoodii ka diiday, isla markaana ay hadda qoxooti ku yihiin guryo gaar ah oo kala duwan.

  Radio Xoriyo

24 May 2005

C/nuur Sh. Mohamed
info@radioxoriyo.com

radioxoriyo@ogaden.com
raadioxoriyo@yahoo.com

Radio Xoriyo waxaad ka dhegaysan kartaa Mawjadda 19 MB ee dhererkeedu yahay 15670 KHZ, Maalmaha Talaadada iyo Jimcaha 7: 30PM waqtiga Afrikada Bari

Xafiis Qaabilsan Dhowrida Anshaxa Suuban oo Laga Furay Bosaso
»Laascaanod: dadweynaha SSC iyo baaqii isimada..
»Hargeysa: Siilaanyo & Riyaale iyo garabsiinta saleebaan G..
»Maamulka Hargeysa iyo Wasaaradaha Riyaale...
»Dhibaatada Roobabkii iyo Biyo La'aanta hargeysa..
»Badhan: Warbixin Dugsiga Yube/Sanaag...
»Kismaayo: Siminaar lagu baranayay maamulka...
»Jilib: Robab lixaadleh oo ka da’ay G/jubbada dhexe...
Wararka oo dhan halkan ka akhri.... Guji... May 24