Muqdisho oo si weyn looga xusay maalinta LaanQayrta Cas iyo
Bisha Cas
Maalintii shalay (May 9) ahayd
ayaa Hotel Shaamow ee magaalada Muqdisho waxaa lagu qabtay
xaflad aad u balaaran waxaana xafladaasi lagu xusayay maalinta
LaanQayrta Cas iyo Bisha Cas,waxaana munaasabadaasi ka soo
qaybgalay xildhibaano, wasiiro, qaybaha kala duwan ee bulshada
iyo madaxda Hay’addaha samafalka waxaana ugu horeyntii halkaasi
ka hadlay madaxa LaanQayrta Cas ee Muqdisho Xuseen Cali Salaad
oo isagu si aad ah ugu dheeraaday u jeedooyinkii iyo sababihii
loo aasaasay Hay’addaha LaanQayrta Cas iyo Bisha Cas wuxuuna
sheegay in la aasaasay markii ugu horeysay hay’adda LaanQayrta
1863-dii waxaana fikrada aasaaskeeda lahaa nin u dhashay wadanka
Switzerland oo lagu magacaabo Henery Dunnan kaddib markii uu
arkay dad fara badan oo ku dhaawacmay dagaal ay isaga hor
yimaadeen labo wadan.
Xuseen Cali Salaad waxa uu
sheegay in markii ugu horeysey LaanQayrta Cas ee Soomaaliya ka
qayb qaadato xuska 8-da May isagoo sheegay in xuskaan ku ekaan
jiray Bisha Cas ee Soomaaliyeed hase yeeshee labada hay’addood
si wada jir ah ayay u xusayaan maalinkaasi oo uu sheegay in ay
tahay maalin ku weyn bulshada caalamka.
Waxa uu sheegay in
Soomaaliya Hay’adahaasi ay ka hirgeliyeen barnaamijyo badan oo
samafal ah oo ay ka mid yihiin daaweynta dadka ku dhaawacma
dagaalada, dadka ay ku dhacaan musiibooyinka sida fatahaada,
cudurada iyo Iwm.
Sidoo kale waxa uu sheegay in
ay wax ka qabteen dhinaca biyaha isku xirka dadkii ku kala lumay
dagaaladii sokeeye iyo la socoshada xaaladda dadka maxaabiista
ah ee ku xirxinan xibsiyada waxa uuna tusaale u soo qaatay
iyagoo ka war hayn jiray xaaladda nololeed maxaabiistii ay kala
qabsadeed Soomaaliya iyo Itoobiya dagaalkii 1977-kii. Waxaa
kalloo halkaasi ka hadlay madaxa Bisha Cas Max’ed Axmed Cadale
oo isna si aad ah ugu dheeraaday howlaha ay qabato Bisha Cas ee
soomaaliyeed wuxuuna sheegay in dalka ka hirgeliyeen barnaamijyo
fara badan oo dhanka samafalka ah wuxuuna sheegay in soomaaliya
ka furan yihiin in ka badan 44 xarumood isagoo sheegay in labo
ka mid ah xarumahaasi ay haatan xiran yihiin wuxuuna u soo
jeediyay xubnaha labad gole ee dowladda Federaalka, qaybaha kala
duwan ee bulshada in la furo xaruntii degamda Ceel Buur oo uu
sheegay in ay u xiran tahay amaan daro sidoo kale waxa uu
sheegay in amaandaro u xiran tahay xaruntii Farjano. Ee
Kismaanyo
Waxaa hobolada Horyaal Band
halkaasi ku soo bandhigeen ruwaayad ay ugu magacdareen FIKRADII
SHEEKADA waxayna ruwaayadaani ka hadlaysay u jeedooyinkii loo
aasaasay hay’addaha LaanQayrta Cas iyo Bisha Cas, waxayna
ruwaayadaasi dareen xoog leh ku abuurtay dadkii daawanayay oo
iyagu maalinkaa ka dhergay waxaayaba ay qabtaan labada Hay’adood.
Miss Anita oo ah madaxa
isgaarsiina ee Hay’adda LaantaQayrta Cas ee soomaaliyeed ayaa
iyadu halkaasi ku soo bandhigtay filim ka hadalaya waxyaabaha ay
qabtaan hay’addaha LaantaQayrta Cas iyo Bisha Cas oo ay ka mid
haayeen daaweynta dadka dhaawaca ah, ka warqabka maxaabiista
lagu qabto dagaalada, wax ka qabashda musiibooyinka sida
dabeylaha, fatahaadaha, dhul gariirada Iwm, sidoo kale waxaa
filimkaasi lagu muujiyay sida Hay’adahaasi baadi goobka ugu
sameeyaan dadka ku lumay dagaalada iyadoo u sahasha dhinaca
Telefoonada iyo waraaqaha waxaana Miss Anita la gudoonsiiyay
qoraal farshaxan ah oo ay soo diyaarisya Iftin Arts waxa uun
farshaxankani uu muujinayay sawiro ah waxyaabaha ay qabtaan
Hay’addaha LaantaQayrta Cas iyo Bisha Cas waxaana ka dhex
muuqday calaamadaha labada Hay’adood waxaana gudoonsiiyay
gudoomiyaha Iftin Arts Cilmi Dheere.
Duqa magaalada Muqdisho
Ibraahim Cumar Sabriye Shaaweeye ayaa koobkii munaasabada 8-da
May gudoonsiiyay mutadawiciinta Bisha Cas ee degmada Xamar
Jabjab kaddib markii ay ka adkaaden Mutadawiciinta degmada
Waabari.
Dhinaca kale xaflad tan la
mid ah ayaa lagu qabtay degmada Marka ee gobolka Sh/hoose
waxaana soo qabanqaabiyay Hay’addaha LaantaQayrta Cas iyo Bisha
Cas waxaana ka qaybgalay qaybaha kala duwan ee bulshada, madaxda
Hay’adaha samafalka iyo mas’uuliyiinta maamulka gobolka Sh/hoose
waxaana ugu horeyntii halkaasi ka hadlay xoghaya samafalka ee
maamulka C/llaahi C/raxmaan (Tootoole) oo isagu u mahadceliyay
intii soo qabanqaabisya xafladaasi waxaa kalloo ka hadlay
gudoomiyaha Bisha Cas ee Marka Garweyne Kuulow Aweys oo isna
faahfaahiyay u jeedooyinkii loo aasaasay Hay’adaha Bisha Cas iyo
LaantaQayrta Cas, waxaa kalloo ka hadlay madax u qaybsanaha ICRC
ee gobolka Sh/hoose Max’ed Ibraahim Ducaale, waxaa kalloo ka
hadlay Xoghayaha Bisha Cas ee G/Sh/Hoose Jamaal Cali Siciid
waxayna xubnahaani dulmar ku sameeyeen waxqabadka Hay’adahaasi
waxaana halkaasi lagu soo bandhigay ruwaayad loogu magacraday ha
takoorin qofka qaba Aids
W/D: Amiin Yuusuf Khasaaro
E-Mail AmiinKhasaaro@hotmail.com