Barnaamijkii Radio Xoriyo

10  May 2005 

• ·        Sadex qof oo gaajo ugu dhimatay magaalooyin Ogaadeenya ku yaalla

• ·         Ciidammada itoobiya oo odayaal ku xidhxidhay degmooyin Doollo ka tirsan

• ·        ONLF iyo OLF oo bayaan wadajir ah soo saaray

• ·        Nayjeeriya oo sheegtay inay Soomaaliya ciidammo u diyaarisay

• ·        Kumanyaal ka mid ah taageerayaasha mucaaradka Itoobiya oo isugu soo baxay Addis-Ababa

• ·        Iyo Baynaan ay wadajir u soo saareen ururrada ONLF iyo OLF

====================== 

Sadex qof oo gaajo ugu dhimatay magaalooyin Ogaadeenya ku yaalla 

Wararka naga soo gaadhaya meelo ka mid ah gobollada Ogadeenya ayaa sheegaya in seddex ruux ay gaajo ugu dhinteen degmooyinka Garigo’an iyo Birqod, iyadoon wali wax gargaar ah la gaadhsiinin dadka meelahaas ku dhaqan.

Dhinaca Goday ayaa la xaqijiyay in meelo ka mid ah gaar-gaar ay geyeen Dayuuradaha qumaatiga u kaca, balse magaalooyin kale ayaan  ilaa iyo hada wax gurmad ah gaadhin, iyadoo dhamaan gawaadhidu aysan awood u lahayn inay u kala gooshaan dhulka ay isku xidho waddada cad, dhibaatada soo gaadhay waddada cad  ee isku xidha Dhagaxbuur iyo Qabridaharre awgeed.

Wararku waxay sheegayaan inay go’day Buundadii ku taallay Sasabane oo markii horaba ayna xaaladdeedu aad u fiicnayn. Wararku waxay kaloo intaas ku darayaan inay cudurrada duumada iyo shubanku ka dillaaceen meelihii ay daadadka xunxun ku dhifteen labadii toddobaad ee u denbeeyay. 

Ciidammada itoobiya oo odayaal ku xidhxidhay degmooyin Doollo ka tirsan. 

Ciidammada xukuumadda Itoobiya ayaa xabsiga dhigay odayaal badan oo laga soo qaqabtay tuulooyin kala duwan oo ka tirsan gobolka Doollo. Odayaashan waxaa laga qaqabtay tuulooyin hoos yimaadda degmooyinka Wardheer iyo Gallaadi, waxaana lagu soo warramayaa in odayaashan lagu eedeeyay dagaallo sokeeye oo dhawaan ka dhacay ka  meelahaas, kuwaasoo la xaqiijiyay in ciidammada Itoobiya ay ka denbeeyeen. 

Lama xaqiijinin tirada iyo magacyada odayaashan, hase yeeshee waxay ciidammada Itoobiya toddobaadyadii u denbeeyay oodhan ka ugaadhsanayeen tuulooyinka ku teedsan xadka uu Ogaadeenya la leeyahay gobolka Galguduud iyo gobollo kale oo dalka Soomaaliya ka mid ah. 

Dhinaca kale warar xogogaal ah ayaa sheegaya in magaalada Xuddur ay dhawaan soo gaadheen hub iyo saanad kale oo xukuumadda Itoobiya ay siisay qaar ka mid ah masuuliyiinta isku haya gobollada Bay iyo Bakool oo hadda ku sugan Xuddur. 

ONLF iyo OLF oo bayaan wadajir ah soo saaray 

Ururrada ONLF iyo OLF ayaa dhawaan isla soo saaray bayaan wadajir ah oo ay kaga hadleen xaaladda Ogaadeenya iyo Oromiya iyo mawqifka ay ka taagan yihiin doorasho ku-sheegta la sheegay in Itoobiya laga hirgelinayo 15 bishan May. 

Xubno sarsare oo ka tirsan madaxda labada urur ee ONLF iyo OLF ayaa seddexdii May isugu yimid kulan ay ku qadaa-dhigeen xaaladda gobolka ka jirta, isla markaana ay dib ugu qiimeeyeen xidhiidhkii iyo iskaashigii ka dhexeeyay labada urur ee dhawrkii sano ee u denbeeyay soo taxnaa. 

Labada urur waxay tilmaameen inay ku qanacsan yihiin qaabka ay u meel-mareen qodabbadii lagu heshiiyay sannadkii 2002 iyo sida ay isaga kaashadeen arrimo badan oo la xidhiidha halganka ay labada urur kula jiraan gumaysiga Itoobiya. 

Labada urur waxay isla soo saareen baaq ay ku muujinayaan xadgudubyada xuquuqda aadanaha iyo cadaadiska siyaasadeed ee lagu hayo dadwaynaha Soomaalida Ogaadeenya iyo Oromiya. Waxayna beesha caalamka ka codsadeen inay Itoobiya ku cadaadiso inay ixtiraamto xuquuqda aadanaha iyo xaqa ay labadan shacab u leeyihiin inay aayahooda ka tashadaan.  

Waxay kaloo beesha caalamka ugu baaqeen inay xukuumadda Itoobiya ku cadaadiyaan inay ka waantowdo siyaasadeeda dhul-ballaadhsiga ah iyo xasillooni darrada ay ku hayso dalalka deriska ah. 

Nayjeeriya oo sheegtay inay Soomaaliya ciidammo u diyaarisay 

Dawlada Neyjeeriya ayaa markii ugu horraysay daboolka ka qaaday inay diyaarisay ciidammadii ay ugu talagashay inay kaga qayb qaadato qorshaha nabad ilaalinta Soomaaliya, kuwaasoo qayb ka noqon doona ciidammada ay dalalka IGAD u soo dirayaan dalka Soomaaliya. 

Wasiirka gaashaandhigga ee dalka Nayjeeriya Rabiu Musa ayaa sheegay in dalalka caalamka, gaar ahaan kuwa Afrika, ay u diyaar garoobayaan sidii ay ciidammo nabad ilaalin ah Soomaaliya ugu diri lahaayeen, iyadoo waliba meelo Soomaaliya ka mid ah ay dagaallo ka soo cusboonaadeen.

Wasiirku wuxuu sheegay in ciidammada Nayjeeriya ee loogu talagalay hawlaha nabad sugidda Soomaaliya iyo gobolka Daafuur ee galbeedka Suudaan ay hadda diyaar yihiin, isla markaana ay sugayaan amar ka yimaada dhanka Midowga Afrika. 

Wasiirku wax faahfaahin ah kama aanuu bixin tirada ciidamada, goobaha ay tagayaan iyo xilliga ay Soomaaliya ku soo beegan yihiin, wuxuuna ku gaabsaday oo kaliya in arrimahaasi ay yihiin kuwo u yaalla Midowga Afrika. 

Kumanyaal ka mid ah taageerayaasha mucaaradka Itoobiya oo isugu soo baxay Addis-Ababa 

Dad 20,000 kor u dhaafay oo ka soo horjeeda siyaasada xukuumadda uu madaxda ka yahay keligii taliye Meles Zenawi ayaa axaddii isugu soo baxay badhtamaha magaalada Addis Ababa, kuwaasoo sheegay inay socodkii ugu denbeeyay magaalada ku dhex marayaan, ka hor inta aan la qabanin doorasho ku sheegta Itoobiya laga qabanayo doono 15 bishan May. 

Dadkan ayaa shaaca ka qaaday inay taageeri doonaan xisbiyada mucaaradka ah, waxayna xukuumadda Zenawi ku eedeeyeen inay ku guul darraysatay inay wax ka qabato gaajada daashatay malaayiinka qof ee Itoobiya ku dhaqan, iyo inay shaqooyin abuurto, isla markaana wax ka qabato arrimaha caafimaadka iyo waxbarashada. 

Waxaa la joogaa xilligii is-beddal la samayn lahaa, xukuumaddanina waxay talada dalka haysatay 14 sano, walina ma haysano shaqo iyo lacag midna, sidaas waxaa yidhi Rasadana Getahun oo cilmiga kombiyuutarka soo bartay, isla markaana shaqo raadinayay tan iyo markii uu waxbarashada ka soo qalan-jabiyay afar sano ka hor. 

Doorasho ku-sheegta Itoobiya laga qaban doono badhtamaha bishan ayaan wax rajo ah laga qabin inay wax ka beddasho wadciga siyaasadeed ee Itoobiya, sababtoo ah ma noqon doonto doorasho xor ah oo cadaalad ku salaysan. Waxay noqon doontaa mid aan waxba ka duwanayn kuwii hore ee magac u-yaalka ahaa ee dunida lagu khaldayay, waxaana sidii hadda ka hor dhacday ku soo bixi doona isbahaysiga EPRDF, sidaas waxaa rumaysan xisbiyada mucaaradka ah. 

 Radio Xoriyo

10 May 2005 

C/nuur Sh. Mohamed

radioxoriyo@ogaden.com

raadioxoriyo@yahoo.com  

Radio Xoriyo waxaad ka dhegaysan kartaa Mawjadda 19 MB ee dhererkeedu yahay 15670 KHZ, Maalmaha Talaadada iyo Jimcaha 7: 30PM waqtiga Afrikada Bari

www.radioxoriyo.com

Nin Jarmal ah oo Diley Xaaskiisii oo Soomaali ah, Laba Carruur ah iyo Labadiisii waalid.