Shirkada Dell oo Shaqadii Dib ugu Celisey
31 Muslimiin ah oo oo Markii Hore Shaqada Uga tegey Salaada Makhrib ee
loo Diidey Awgeed
Maarso 18, 2005
Nashville, Tennessee, USA: Shirkadda
Computerada ee Dell ayaa shaqaddii kusoo celisey 31 Muslimiin ah oo u badan
Soomaali kuwaas oo markii hore shaqada looga cayriyey ama shaqada ka
huleelay bishii Febraayo kaddib markii loo diidey in ay salaada Makhrib
waqtigeeda ku tukadaan.
Shirkada Dell waxa ay hadda shaqadii kusoo
celisey dhammaan shaqaalahaas oo tiradoodu dhan tahay 31 qof, waxaana
shaqaalahaas la siinayaa lacagtii intii maalmood ee ay shaqada ka maqnaayeen.
Arrintaas oo ka dambeysey kaddib markii heshiis laga gaaray arrintii markii
hore muranka dhalisay oo ahayd Salaadda Makhrib.
Heshiiska waxaa kale oo kamid ah in
shirkada Dell ay tababar dheeraad ah siiso maamulayaasha shirkada si ay dib
ugu eegaan siyaasadaha ama xeerarka hadda ee shirkada ee ku aadan arimaha la
xiriira ogolaanshaha cibaadaysiga (ee goobta shaqada).
Heshiiskaasi waxa uu shacay Khamiistii
Maarso 17, markaas oo uu wada hadal dhex maray Shirkada Computerada ee Dell,
Hay'adda Muslimiinta u doodeysey ee CAIR, Shaqaalaha hadda shaqada lagu soo
celiyey, Guddiga magaalada (Nashville) u qaabilsan
xiriirka dadweynaha iyo shirkada
Spherion Corp oo shaqaalaha u qorta Dell. Sida ay shaaca ka qaaday CAIR.
Madaxa CAIR, Nihad Awad waxa uu yiri "Waxaan
aad ugu faraxsanahay qodobada heshiiska iyo wada shaqaynta dhinacyada
heshiisku dhex maray", waxan uu intaas ku daray "Waxaan u mahad celineynaa
dhammaan dadkii daafaha dunida kala soo xiriiray shirkada Dell si ay goobta
shaqada ugu ogolaato cibaadaysi macquul ah".
CAIR waxa ay sheegtay in aan la shaacin
qodobada kale ee heshiiskaas.
...Codbixintii
Wargeyska Tennessean....
ISHA:
http://islamonline.org |
http://www.cair-net.org |
http://www.tennessean.com
Tarjumadii SomaliTalk | Maarso 18, 2005
WARARKII HORE EE SHAQAALAHA MUSLIMIINTA
Shirkada
Computerada ee Dell oo 30 Soomaali ah Shaqada ka Cayrisay Salaada Makhrib oo
ay Tukanayaan Awgeed.
CAIR oo Ku Baaqday in lala Xiriiro Dell
si ay Shaqada Ugu Soo Celiso Muslimiinta Shaqada looga Caysriyey Salaadda
Makhrib [Mesha lagala xiriiri karo ka eeg dhammaadka warkan]
- Tarjumadii
SomaliTalk.com | Maarso 11, 2005
Abdi Halane (bidix) iyo, Hassan
Ahmed oo qorrax dhaca (Makhribka) ku tukanaya xarunat
Jaaliyada Soomaalida "Somali Community Center" ee Nashville.
Sawirka:
www.tennessean.com |
Qoraal dheer oo shalay (Khamiis
Maarso 10, 2005) kusoo baxay jariidada tennessean [www.tennessean.com]
oo ka soo baxda gobolka Tennessee ayaa qoraal dheer kubilowday sidan:
Shaqo ama Salaad.
Go'aan adag ayaa la
soo gudboonaadey, Abdi H. Nuur waxa uu iska
xayuubiyey calaamdii shaqada waxana uu bishii hore ka huleelay shirkadda
Computerada Dell xarunteeda Nashville oo uu ka ahaa dareewal aaladda wax
lagu qaado ama lagu raseeyo ee loo yaqaan "forklift". Asaga iyo 29
kale oo Soomaali Muslimiin ah waxay yiraahdeen waxaa nalaku khasbay in aan
kala doorano diintanada iyo shaqadanada.
Guddiga magaalada (Nashville) u qaabilsan
xiriirka dadweynaha ayaa isku deyaaya in uu soo dhexgalo iska-hor imaadka
dhaqanka waxsoosaarka ameerikaanka iyo Islaamka oo looga baahan yahay in ay
maalin kasta tukadaan xilliga qorraxdu dhacdo (Salaada makhrib).
"Waxay noo sheegeen in aanaan tukan karin
qorrax dhaca," ayuu yiri Nuur, oo intaas ku daray "waxay noo sheegeen in aan
sugno xilliga biririftayada."
Waxa uu yiri waxaan sharaxay in qaybo kamid
ah shanta salaadood ee maalintii ay waqtigoodu yarehe durki karo, laakiin
salaada qorrax dhaca (makhribku) iyadu sidaas ma ahan. Qorraxduna isku xilli
ma dhacdo maalin kasta. [Woqooyiga Ameerika salaadda Makhrib aad ayey isu
bededbedeshaa, tusaale ahaan bilaha June iyo July waxaa makhribka la tukadaa
9:00pm, Halka December iyo Janaayo laga tukado 4:30 ilaa 5:00pm).
Shaqo bixiyaasha aagga Nashville jawaabo
aad u kala duwan ayey ka qaateen Muslimiinta u shaqeeya weydiisashadooda in
ay shaqada ka baxaan shan daqiiqo oo ay kusoo tukadaan salaadda.
Tusaale ahaan, shirkada Whirlpool Corp.,
sannadkii hore waxaa muran sidaas oo kale ah ay hor geysey qareen dawlada
dhexe ah, kaas oo shirada ku raacay in ay shaqaaleheeda weydiisashadooda
salaadda qorrax dhaca in ay wersheda shirkada ee La Vergne jadwalkeeda wax
soosaarka ku abuurtay culays adag oo aan loo baahnayn.
Sida laga soo xigtey hoggaamiyayaasha
jaaliyada Soomaalida ee aagga Nashville, shirkadda Dell waxay ahayd mid
kamid ah dhawr shaqo bixiyaal oo aagga ah oo lahaa taariikh adag oo ah
in ay tix gelin gaar ah siiyaan shaqaalaha Muslimiinta ah.
Laakiin taas waxaa muuqata in ay hal-mar
istaagtey bishii Febraayo kaddib markii shaqada laga cayriyey 30 shaqaale
ah. Dadkaas oo ay shaqada qortay shirkada shaqa qorista ee lagu magacaabo
Spherion, taas oo shaqaalaha u qorta shirkada Dell ee Nashville, sida laga
soo xigtey David Perez oo ah sarkaal ka tirsan Guddiga magaalada u qaabilsan
xiriirka dadweynaha.
Afhayeenka Dell waxa uu ka gaabsaday in uu
ka faallodo wax ku saabsan arrimahan, asagoo dhehay shirkadu ma helin
cabasho khaas ah.
"Dell waxa ay qiimeysaa kala duwanaanshaha,
oo ay kujiraan aaminsanaata diimaha" ayuu yiri afhayeenka Dell, Mark Drury,
oo intaas ku daray "Shirkadu waxay mudnaan gaar ah siisaa diimaha,
inta mudnaantaasi ay macquul tahay, oo aysan carqaladaynayn hawlgalka
ganacsiga, ayna waafaqsan tahay siyaasadanada ah ka shaqaynta goob-shaqo oo
tixgelin leh".
"Shaqaalaha waxaa loo ogolaadaa waqti ay
tukadaan oo lacagtoodu usocoto. Waxaan u qoondaynay meel socodka ka
caagan oo ay ku tukadaan". Laakiin marmarka qaarkood baahida diimuhu waxay
ka hor yimaadaan ganacsiga. Drury oo hadalkiisii sii wata waxa uu yiri "marka
la ogolaanayo waqti biriirf ah xilliga shaqada lagu jiro waxaa carqalad
gelaya khadka isku xiriirsan ee wax soo saarka, waxaan ka shaqaynay hab
macquul ah, sida in aan u cayino waqtiga uu qofka shaqaalaha shaqada ka
baxayo si uu soo tukado una soo laabto, taas oo u ogolaaneysa shaalaha ku
xigaana waqti uu khadka ka bixi karo si uu usoo tukado."
Laakiin waxa uu yiri kama jawaabi karo
su'aalaha la xiriira 30 shaqaalaha ee Soomaalida ah.
Saraakiisha Spherion kama ay soo jawaabin
weydiisashadii wargeyska The Tennessean uu weydiistey in ay arintaas
faallo ka bixiyaan.
Bilowgii toddobaadkan ayaa dersin kamid ah
shaqaalihii shaqada laga cayriyey waxay isugu yimaadeen xarrunta Jaaliyadda
Soomaalida oo kutaal Thompson Lane (Nashville, Tennessee) si ay u miisamaan
fusadaha u furan. Qaar waxay rabaan in ay ku laabtaan oo keliya shaqo ay
jecel yihiin oo ay qadariyaan.
Qaar kale, sida Nuur, waa xanaaqsan yihiin,
ayagoo yiri waxaa xoog looga cayriyey shaqada si degdega, mana ku fekerayaan
in ay ku laabtaan, xataa haddii dib shaqadii loogu yeero.
"Waxey nagu yiraahdeen, haddaan salaada
tukano, shaqada ayaa nalaka ruqsaynayaa" asagoo intaas ku daray in uu
dareemay in ay waajib ku tahay Salaada sababtoo ah waa diintiisa.
Iimaamka Masjidka Nashville, Abdishakur
Ibrahim, oo hada kahor soo dhex galay arimo noocan oo kale ah, oo arinta
hadda taagan ka hadlayey waxa uu yiri "Waxay tahay in aad fahamtid waa in
Islaamku yahay diin aan kala saarin aaminsanaata iyo nolosha. In badan oo
masiixiyiin ah waxaa dhici karta in ay guriga aadaan oo tukadaan. Laakiin
Islaamka waxaa jira waqtiyo cayiman oo ay waajib tahay in aad tukatid. Dadka
Muslimiinta ahna, in aadan tukan waa adigoo caasiyey Allah. Dadkuna waxay
aaminsan yihiin haddii aad Allah caasidid waxaad geleysaa naarta."
Abdi Halane (bidix) iyo, Hassan
Ahmed oo qorrax dhaca (Makhribka) ku tukanaya xarunat
Jaaliyada Soomaalida "Somali Community Center" ee Nashville.
Sawirka AP |
5,000-8,000 oo Soomaali ah ayaa kunool
Nashville, ayuu yiri Ibrahim, asagoo intaas ku daray in badan oo Muslimiin
ah waa garwsan yihiin baahida waqtiyada kala duwan ee goobaha shaqada.
Guddiga magaalada u qaabilsan xiriirka
dadweynahu wuxuu rajayanayaa in ay caawin karaan in ay arrintaas
dhexdhexaadiyaan. "Aad ayey u wanaagsanaan lahayd hadday gaaraan heshiis
dhexdhexaadineed" ayuu yiri Perez oo ah sarkaal ka tirsan guddiga magaalada.
Waxana uu sheegay in maamulaha Dell uu asaga soo wacay Talaadadii asagoo wax
ka weydiinayey arintan. Spherion asagu weli ma soo wecin ayuu yiri.
Hadda waxa uu qorayaa cabsho laga diiwaan
gelinayo dawlada degmada, taas oo ku salaysan cabashada ay shaqaalaha
Soomaalida ah soo gudbiyeen. Haddii gudigaasi ku helo in cabashadaasi ay
tahay mid ka hor-imaneysa xeerka degmada, markaas waxaa dhici karta in
shirkada la ganaaxo.
Shaqaaluhu waxa kale oo ay cabasho ku
saabsan kala faquuqa ka furi karaan hay'adaha gobolka iyo dawlada
dhexe.
Cabasho taas la mid ah oo ayaa sannadkii
hore waxay sabatay dacwad markii dambe ku dhammaatay in xukunka heshay
wershed maxalli ah.
Saraakiil la tirsan shirkada Whirlpool
waxay (sannadkii hore) xaakim ka socda dawlada dhexe u sheegeen in shirkadu
isku dayday in ay tixgelin gaar ah siiso in badan oo shaqaaleheeda
Muslimiinta ah weydiisashadooda la xiriirta diinta. Tusaale ahaan, waxaa wax
laga bedeley cuntada laga cuno makhaayasha shirkada, dumarkana waxa loo
ogolaaday inay xirtaan dharka hidaha ah haddii aysan ka hor imanayn xeerarka
ammanka "Safety".
Laakiin Whirlpool waxay tiri arinta salaada
qorrax dhacu waxay ay curyaamineysaa wax soo saarka.
Shirkadu waxay shaqaalaha ka mamnuucday ay
shan daqiiqo shaqada ka siibtaan si ay u tukadaan, in kastoo ay shaqaaluhu
tilmaameen in aan horjoogayashooda iyo shaqaalaha kale ee ay wada
shaqeeyaan aysan waxba ka qabin in ay shaqada usii qabtaan.
Xaakim ka socda Nashville waxa uu xukunka u
ridey ama uu raacay dhanka Whirlpool taas oo uu sheegay in weydiisasha
Salaada qorrax dhacu in ay shaqa bixiyaha ku abuurtay adkaansho aan loo
baahnayn.
Shirkad kale oo aad u weyn ayaa qaadatay
hab aad uga duwan marka laga hadlayo baahida Muslimiinta ee salaada.
Sannadkii 2001, shirkada Tyson Corp. waxa
ay wershed hilib ka furtay Goodlettsville, taas oo hilibka u qabsida
dukaamada aagaas. Wershedaas qofka u qaabisan shaqaaluhu waxa uu yiri
wershedu waxa ay leedahay laba meelood oo Muslimiintu ku tukadaan. Waxa kale
oo shirkadu soo dhejisaa jadwalka waqtiyada salaada, waxaana shaqaalaha
shaqada laga bedelaa marka qorraxdu dhacdo si ay u tukadaan.
"Haa, waa arin adag waayo qaar kamid ah
maamulayaashayadu waa in ay dadka hadba meel u kaxeeyaan," ayuu yiri Gary
Denton oo katirsan shirkada Tyson. Laakiin shirkada waxaa ka go'an in ay
arintaas ka shaqaysiiso. "Sidaan u aragnaa waa in shirkada dadka ka shaqeeya
ay yihiin dad kala duwan" ayuu yiri. Sidaa ayuu wargeyska The Tennessean
qoraalkiisii kusoo gabagabeeyey.
Wargeysku waxa uu soo bandhigan
codbixin iyo dood furan oo uu dadka afkaartooda ku weydiinayo in ay
tahay in tixgelin gaar ah la siiyo 'aaminsnaanta diimaha' iyo in kale.... [Guji...].
Muslimiin iskaga Huleelay Shaqo...
30 Muslimiin ah oo Shaqada Iskaga Huleelay
Muray la Xiriira Salaada oo soo dhex galay ayaga iyo Dell, sidaas waxaa
werisey (Sabti Maarso 12) hay'adda wararka ee AP, oo intaas ku dartay
Abdirizak Hassan oo
kamid ah madaxda Jaaliyada Soomaalida ee Nashville waxa uu yiri Soomaalidu
waxa ay shaqadaas iskaga huleeleen bishii hore waayo waxaa loo diidey waqti
ay salaada ku tukadaan.
AP waxa ay intaas ku dartay in afhayeenka
Dell, Mark Drury, uu yiri saraakiil ka tisan shirkada ayaa eegaya dhacdadii
Febeeryo 4.
Hay'ada AP oo warkeedii sii wadata waxa ay
tiri dhacdadan oo kale waxa ay horay uga dhacday Minnesota oo ah meesha ay
ku nool yihiin Soomaalida ugu badan ee deggan Maraykanka oo AP ay ku
qiyaastay 20,000 oo Soomaali ah in ay deggan yihiin Minnesota. Sannadkii
2003 ayaa shirkada Electrolux Home Products ay heshiis ku xalisay
cabasho loo gudbiyey dawlada dhexe, waxana ay shirkadaas wershedeeda kutaal
magaalada St. Cloud, Minnesota ay hadda Muslimiinta u ogoshahay in ay
salaadda qorrax dhaca (makhrib) tukadaan. Sannadkii hore Soomaali ayaa
qaadacday in ay u shaqeeyaan shirkad Minnesota kuleh Cell-phone-nada ayagoo
taas kaga mudaharaadayey arimo la xiriira Salaadaha iyo arimo kale.
CAIR oo Ku Baaqday in lala Xiriiro Dell si ay
Shaqada Ugu Soo Celiso Muslimiinta Shaqada looga Caysriyeye Salaadda Makhrib
Ururka ay leeyihiin Muslimiinta Maraykanka
ee loo yaqaan CAIR (Council on American-Islamic Relations) ayaa ku
baaqay in Muslimiinta shaqada looga caysriyey salaada ay tukanayeen dib
shaqadoodii loogu soo celiyo.
Warqad uu agaasimaha CAIR,
Arsalan Iftikhar,
u diray maadxweynaha shirkadda Dell, Kevin B. Rollins, waxa uu ku weydiistey
in shaqaalaha shaqadooda dib loogu soo celiyo inta wada xaajoodka arintaas
lagu xallinayaa uu socdo, waxana uu sheegay in shaqaalaha CAIR oo xirfad u
leh xallinta arimahan oo kale ay diyaar u yihiin in ay dhexdhexaadinta ka
qayb qaataan.
CAIR waxa ay soo bandhigtay meel si
toos ah loogala xiriiri karo Madaxweynaha Dell,
Mr. Kevin B. Rollins, taas oo ay CAIR
xustay in si xushmad leh loola xiriiro, cinwaanka lagala xiriiri karona
waxay kusoo bandhigeen dhanka hoose ee
boggan... Guji...
ISHA:
www.tennessean.com |
www.cair-net.org |
islamonline.org
Tarjumadii SomaliTalk.com | Maarso 11, 2005
| Updated: March 12, 2005
Warar Degdeg
ah oo Khuseeya Soomaalida Deggan USA
War kasoo baxay Xafiiska Legal Aid
ee Minneapolis ayaa shaaca ka qaaday in dad badan oo Soomaaliyeed loo
soo diray warqado ka yimid wasaaradda Amniga Gudaha USA kuwaas oo...
Guji...
Mar 9
Waraysi Samsam
iyo Codsasho Caawinaad Soomaalino...
iyo
Shirkadda Dahabshiil oo Sanduuq Mucaawino u Furtay Samsam...
Samsam waxa ay shaaca ka qaaday in ay dacwadeeda u
gudbineyso Maxkamadaha Aduunka ee Caalamiga ah, waxana ay...
Guji...
Kulaabo bogga www.SomaliTalk.com
Daabaco
Boggan | Print