Midgaankii Cali Khaliifow calankaa ha dhaco!
C/Rahman Eelay
eediran@yahoo.com
Dulli, duf ku bax! Yaa
yidhi wuxu waa Harti! Hawiye taageere! Midgaankiiyow Muuq xume! Ma quustow
sowteey ku soo baacsadeen, maxaa ku daba dhigay.! Maanta maanta maanta waa
maalin weyne maanta. Maanta maanta madaxweynaheena maanta. Maanta maanta
maanta madaxiis ha raagee maanta!
Waxay hadaladaasi ka mid
ahaayeen kuwa ay si caro leh u lahaayeen islaamo Soomaaliyeed oo ka
careysnaa Cali Khaliif oo la sheegay inuu ka hadlayo shir lagu taageerayo
go’aankii uu Baarlamaanku ka qaatay inaan ciidan ka socda Itoobiya waddanka
la keenin. Waxay ahayd Maalin Axad ah 20 Maarso 2005 oo dad badan oo
Soomaaliyeed ay u dareereen meeshii uu shirku ka dhici lahaa. Waxaa la
buuxiyey Golihii lagu shirayey. Waxaase si xawli ah ku socday qabanqaabo ay
wadeen rag Jaaliyado iska leh ama ku tiirsan oo soo daad gureynayey
Hooyooyin qufulo sakatuuro ah lagu soo jebiyey. Waxaa shirkii furay oo isaga
danbeeyey labada Wadaad ee Shiikh Xasan Jaamici iyo Sheekh C/Rahmaan. Waxay
labaduba dadka xusuusiyeen, haddayba na geleyso, Alla ka cabsi iyo isku
duubnaan. Waxaa kaloo ay si wacan uga hadleen dhibaatada ciidamadada
shisheeya ay leeyihiin iyo fasahaadka ka dhalan kara. Waxay sheegeen inay
taageeransan yihiin Dowlada iyo Baarlamaakeeda iyo go’aankii ay soo saareen
Culimada Soomaaliyeed. Waxay xusuusiyeen dadweynihii inaysan Soomaalidu
xiise u qabin Ciidamo Shisheeye oo aanu hore u soo aragnay waxay noo
geysteen oo ilaa iyo haatan meel walba looga sheekeysto. C/llaahi Kulmiye oo
metelayey Ardayda Jaamacada ayaa isna intaa ay wadaadadu yiraadeen oo kale
hore u sii qadimay. Wiil dhallinya ah oo meel gees ah taagnaa ayaa si
jees-jees ah intuu u qoslay buu yidhi: “ Haddee waxaa sidaa loo galay sow
Hawiye daba madoobe ma ahayn”! Anigiibaa afkii I kala tegey: “Adduunow
xaalkaa ba’! Haddiiba dunidu noo kala taqaano Midgaan, Hawiye, Daarood,
Digil, Dir, Isaaq, Jareer ama Reer Xamar ma dhib baan qabi lahaa! Haddiiba
kii la dilo ama la kufsado ama la ceejiyo aysan oran lahayn waa Soomaali ee
ay qabiilkiisa sheegi lahaayeen waxba ma ahaateen!”. Anigu koley sawirada
laga naxo ee ay Biljamkii, Kanadiyaankii iyo Talyaanigiiba sameeyeen ee meel
walba lagu sawiray waxaa ku qornaa: “ Soomaali sida xoolaha la hogaaminayo!,
Soomaali sida Hilibka la dubayo! Soomaali sida musqusha lagu kaajayo!
Soomaali sida neef bakhtiyey gaadhi lagu jiidayo! Soomaaliyad sidii eey la
nacay wadada ku dhalaysa!”iwm
Mar keliya uun baa
shirkii waxaa ka kacay Dr. Hussein Cigaal oo wixii qolyihii ka horeeyey
carabka kala meermeerayeen ku bariijiyey: “Xabashi waa cadowgeena, ma rabno!
Yay na soo gelin! Baarlamaankuna wuu ku saxsanaa arrintaas waanan ku
taageersanahay”! Wuxuu tusay dadkii Calaamado ku dheganaa gidaarada oo lagu
diidan yahay ciidamada safka hore. Isagoo doonaya Hussein inuu si
faahfaahsan u sheego dhibaatooyinkii ay Itoobiya noo geysatay ayaa mar
keliya qaylo iyo bulaan la bilaabay haba ugu darnaadeen kooxo dumar ahaa oo
iyagu si wanaagsan isu soo abaabulay, meelo gooni ahna fadhiyey. Saaxiib
Dotoore yaa hadalkaas dheh ku yidhi? Bug! Qaylaa yeedhay iyo bulaan aad u
dheer: “ Itoobiya ka daa afkaaga afku ku go’ye! Ka naxow nafta waa! Adiga
yaa kaa Amxaarsan waadiga Kismaayo xooga ku haystee! Maxaad ku diidasaa mid
kaa kiciya in laguu keeno haddaad garan weydey dadka masaakiinta ah u arxan
oo xaqooda sii! Iska nac-nacleeye!
Xiriiriyihii shirka ayaa
caqli kaashaday markaasuu weydiiyey in inta Itoobiya taageersan iyo inta
diidan ay marba mid gacanta taagaan. Dad badan baa gacanta u taagay
Itoobiyaankii, laakiin waxaa labanlaab iyo saddex laaba ka badnaa intii ka
soo horjeeday Xabashida. Haddaba waxaa uu Xiriiriyaha Shirku kusoo
gabagabeeyey in caqli laysu yeelo oo ay qolada Itoobiyaanka wakiilka u ahi
ay iska soo doortaan qof u hadla si loo dhegeysto fikradahooda. Waxaa la soo
doortay Oday la yiraado Cubeyd.
Hal cabaar ah
markii warku socday ayaa waxaa mar keliya isagoo maqiiqan soo booday Cabdi
Barre isagoo leh qof keliya waa nagu yar yahay ee 4 qof baanu doonaynaa inay
na metelaan. Waxaa isna meeshaa qaylo iyo bulaan aad u badan ka wadey Sulub
oo ah nin mayal adag isagoo ay caro aad u badan ka muuqatay. Wadaadkii
martida ahaa ee aan weli hadlin ee nooga yimid Seattle ayaan dhawaqiisa iyo
Alla xasuusintiisa dheg loo dhigin kadibna Sheekh Ibraahim wuu iska
fariistay. Xoogaa haddii aan dib jaleecay oo aan wax dhega dhegeeyey ayaa
waxaa uu Jaamac leeyahay: “Anigu waxaan la yaabay ninkaan isagu isu
magacaabay Afhayeenka Ururka SRRC ee Jimcayaashana Masaajidka hortiisa
sadaqada ka uruuriya” Mid kalaa soo booday oo yidhi: “ Ma aragtay yaakhii!
Baarakumulaahu Fiikum! Sadaqada Masaajidka uu ku haayaa, haddana waxaanuu
sameynaa”. Cabdi baa halkan ka yidhi: “ Acuudi Bilaahi sadaqa aruuris aa!
Masaajidkee waayena” wiilkii kalaa yidhi: “ Masaajidka Hawiyaha!”. Anigiibaa
iska yaabay uun!. Mid kaloo I agtaagnaa ayaa ila yaabay oo yidhi Miyaadan
garanayn Masaajidka Daaroodka iyo kan Hawiyaha! Maya-e, Yaasiinka! Tabaaraga!
See wax u jiraan Masaajidka Ikhwaanka iyo kan Odayaasha leeba ogaaye! Bal
Halkan ka akhri
qoraalkii hore
Waxaa uun aan ku
baraarugay Boolis ciiddaa ka badan oo meel walba soo buuxiyey iyo iyadoo cod
baahiyaha laga leeyahay: “ Deg-deg uga baxa meesha”! Maxaa dibada nalal
walac-walac leh, Maxaa Eeya ah! Waxaad uun moodi in meesha masiibo ka
dhacday!.Waxaa warkoodii ku noqday dad badan oo ka hadli lahaa Golahaas oo
uu Dr. Cali Khaliif iyo Sheekh Ibraahim ka mid ahaa. Waxaa wejiyada dadkii
diifoosaha u ahaa Itoobiya ka muuqday farxad weyn iyo guul weyn oo ay ka soo
hoyeen burburinta shirkii lagu taageerayey Baarlamaanka. Dadweynihii kale oo
caro dardeed isla hadli la’ ayaa Golihii shirka ka huleelay.
Jaamac oo soo daalay diif
xumina ay ka muuqato ayaa gabal dhicii isoo qaabilay. Wuxuu Jaamac ii
sheegay in burburkii shirkii ka dib aanba intaa lagu harin, Wuxuu yidhi:
“Waxaa horey loo sii qaatay calamo iyo durbaano waxaana lasii istaagay
Aqalka looga taliyo Gobolkan Minnesota si warbixin loo gaarsiiyo Madaxda
Gobolkan. Waxaa caadi ah in qofku uu sameysto ballan si uu u arko Odayga
metela xaafada ama magaalada uu degan yahay loona sii ogaado imaanshahiisa.
Maxaad naga taqaanaa anaga Soomaali ma nihinoo! Iyadoo uu Islaamahan hor
boodayo Xubin ka mid ah SomaliShow TV Mr. Xaayow ayaa waxaa layska hor
dhoobtay Aqalkii Odayaasha oo sawaxan iyo qaylo la bilaabay: “ Taageera
dowlada Soomaaliya! Taageera Itoobiyaanka la keenayo!”
Wuxuu ii sheegay in uu
Laab Qerer ku dhici gaaray mar gabadh dhalinyara ah oo Mareykan ah ay I
weydiisay waxa ay u banaanbaxayaan. Wuxuu yidhi anigoon u jawaabin ayaa qof
uun halkan ka soo booday oo ku hadashay Ingriiskii Daraawiishta: “ You know,
you know love Itoobiya! Free Somalia!”. Gabadhii oo in la habaaray iyo in la
amaanay garan la’ baan ku idhi buu yidhi: “Waxaanu u banaan baxaynaa in
Mareykanku taageero dowlada cusub ee noo dhalatay iyo in Ciidamo Itoobiyaan
ah la keeno si ay amaanka u sugaan”. Gabadhii baa is hayn kari weydey caro
awgeed, markaasey iyadoo haddana dhoola cadeynaysa tidhi: “ Miyeydaan idinku
mas’uul qaadi Karin oo mas’uul noqon Karin” Waxaan ku hadlo intaan garan
waayey baa halkii ay jawaab iga sugeysay tobon goor iska idhi Thank you!
Thank you! Thank you!
Qoladii laga banaday
shirka ayaa waxay isku dhaarsadeen inay shir kale qabtaan oo ay si xor ah u
muujiyaan taageerada Go’aankii Baarlamaanka is kursiyeeyey! La arki doonee!
Waa yaab! Maantaanu
Itoobiya haa iyo Itoobiya maya isku haynaa! Rah baa waxaa laga sheegay inuu
yidhi: “ Hadday biyo naf leeyihiin dabadeyda ka daya”.
Hadday Itoobiya naf
leedahay Ogaadeenya ka eega!
C/Rahman Eelay
eediran@yahoo.com
Afeef: Aragtida qoraalkan waxaa leh
qoraaga ku saxiixan
QORAALADII HORE EE EELAY...
Faafin: SomaliTalk.com |
April 4, 2005
Kulaabo bogga www.SomaliTalk.com