WARARKA MAANTA:::
- Dowladda
Ethiopia oo gaarsiisay Saanad iyo hub maamulka la
baxay Midland ee G/Hiiraan
- Gaadiidka ka
howlgala wadada isku xirta G/banaadir iyo SH/hoose
oo si rasmi ah u bilaabay socodkoodii barqanimadii
maanta
- Dowlada maraykanka oo
taageertay go'aamadii W/Arrimaha dibada ee IGAD.
-
Shirkii lagu
taageerayay go'aankii dowladda oo la soo celinayo.
-
Kal fadhigii labaad ee
looga arinsanayo arimaha maamul u samaynta gobolada
jubbooyinka
- Wadamo islaam ah oo ka
hadlay geerida Pope-ka labaad tacsina u diray.
Dowladda Ethiopia oo
gaarsiisay Saanad iyo hub maamulka la baxay Midland ee
G/Hiiraan
April 4, 2005
Wararka ka imaanaya
xarunta Gobolka Hiiraan ee Beledweyn ayaa sheegaya in
subaxnidii saakay ay gaareen gawaari ay ku raran yihiin
noocyada kala duwan ee hubka.
Wararka ayaa intaa ku
daraya in hubkaasi uu kaga yimid beledweyne dhinaca
dowladda Ethopia, iyadoo uu ku yimid wadada Feerfeer
abaarihii 10 barqanimo waxaana la sheegayaa in hubkaasi
dowladda Ethiopia ay ugu deeqday madaxweynaha maamul
goboleedkaasi la baxay Midland ninka la yiraahdo C/Kariin
Faarax Laqanyo.
Deeqdaan ayaa timid
sida la tilmaamayo markii Mr. Laqanyo uu muddo toddobaad
ah uu ku sugnaa wadanka Ethopia oo ay halkaasi ku
qaateen wadahal dheer.
Waxaana la filayaa in
saanad kale ay soo gaarto maalmaha foodda inagu soo haya,
iyadoo lagu waramayo in hubkaas wax looga qabanayo
arimaha la xiriira nabadgelyada G/Hiiraan sida ay
sheegeen qaar kamida maamulkaasi.
Imaatinka hubkan ayaa
saakay laga dareemayay magaalada beledweyn kadib markii
halkaasi laga maqlayay dhawaaqa kala duwan ee rasaasta
oo la tijaabinayo.
Ma ahan markii 1aad ee
saanad ka timaada Ethiopia ay soo gaarto beledwene
waxaana jiray dhowr jeer oo maamulkii hore ay hub iyo
rasaasba ka heleen dowladda Ethiopia.
Hubkaan ayaan waxaa uu
xadgudub ku yahay cunaqateytii hubka ee
Q/Midoobay ay saartay soomaliya abaarihii horaantii
90maadkii.
Gaadiidka ka
howlgala wadada isku xirta G/banaadir iyo SH/hoose oo si
rasmi ah u bilaabay socodkoodii barqanimadii maanta
Waxay aheyd ku dhowaad
36saacadood markii ay joogsadeen howlihii safarada ee ay
sameyn jireen gaadiidleyda wadada Afgooye iyo Muqdisho
isku xirta,iyadoo sababtana lagu sheegay badashada
Isbaarooyinka yaala wadadaasi oo marba marka sii
danbeeysa cirka isku shareerayay.
Waxaana si xoog leh
arintaasi looga dareemay magaalada muqdisho oo qiimaha
qudaarta iyo caanahuba ay laba lixaadsadeen.
Haseyeeshee waxaa saaka
la arkayay haweenkii caanaha oo shaqadoodii dib u
bilaabay,sidoo kale waxaa la arkayay qudaartii oo
iyaduna ka imaaneysa dhinaca afgooye iyo xitaa waxyaabo
farabadan oo halkaasi ku xayirnaa shalay
Isu socodka gaadiidka
dadweynaha ee wadadaas ayaa waxaa suurtatageliyay
wadahadal dheer oo ay qaateen Guddi ay leeyihiin
gaadiidleyda iyo Horjoogayaasha isbaarooyinka halkaasi
bilqan.
Warka ayaa intaa ku
daraya in weli ay jiraan cabashooyin ay qabaan
gaadiidleyda iyagoo weli saluugsan tirada Isbaarooyinka
weli baaqiga ah oo gaaraya 4-Jidgooyo halkii markii hore
ay gaarayeen ilaa 12-fariisin,sidoo kale gaadiidleyda
ayaa qaba in weli ay badantahay lacagta wadada laga
qaadayo oo ay ku sheegeen 160,000sh/s maalinkasta hase
yeeshee waxaa aysan meesha ka saarin in xaddiga
qarashkani uu wax badan ka hooseeye qiimihii ay markii
hore bixin jireen
Si kastaba ha ahaatee
dadweynaha ku kala nool labada gobol ayaa si weyn u soo
dhoweeyay is afgaradkaan ay gaareen horjoogayaasha
Isbaarooyinka iyo gaadiidleyda Ka howlgasha wadadaasi.
Hassan
A.Dhaaleey
Tel: 002521576666/653623
Email:
dheel10@hotmail.com
mogadishu,Somalia
Dowlada maraykanka
oo taageertay go'aamadii W/Arrimaha dibada ee IGAD.
Canab Mumtaz |
SomaliTalk | kenya
Email:
canabmumtaz@yahoo.com
| Apr 3, 2005
Dowladad maraykanka ayaa
markale ku celisay in ay ka soo horjeedo ciidamo ka
socda wadamada safka hore oo la geeyo soomaaliya,.warqad
maanta laga soo saaray safaarada maraykanku ku leeyahay
magaalada Nairbo ayay ku sheegeen in ay taageersan
yihiin go'aankii ugu dambeeyay ee wasiiradda IGAD ay
gaareen kuna saabsanaa in somaliya loo diro ciidamo ka
socda wadamada Ugandha iyo suudaan.
Warkan oo laga soo saaray
safaarada maraykanka ee magaalada Nairobi waxa uu intaas
ku darayaa in ay ka caawin doonaan qarashyada ay u
baahan yihiin ciidamada ka socda wadamada IGAD ee aan
ahayn kuwa safka hore.
Warkan ayaa ku soo beegmay
xili ay wasiirada gaashaan dhiga u raadiyaan qarash lagu
diyaariyo ciidamada sahaydooda iyo waxyaabaha kale ee ay
u baahan yihiin ka hor inta aysan soomaaliya meel ka mid
ah ku dagin,hadii la isla ogolaado in ciidamaaas ay
galaan soomaaliya.
Dalka maraynkan waxa uu
horay usoo saaray dhowr qoraal uu kaga digayo wadamada
safka hore in aysan gaynin soomaaliya ciidamo,waxa ayna
taageereen go'aankii baarlamaanka ku diiday ciidamada
safka hore bishii.
Dowlada itoobiya ayaa
todobaadkan ka saartay dalkeeda saraakiil maraykan
ah,kadib markii uu maraykanku ku eedeeyay itoobiya in
aysan ilaalin xuquuda dadka laga badan yahay isla
markaana ay caburiso xoriyatu qowlka.
Shir la soo celinayo
mar kale.
Shirkii dhacay 1Dii bishan
laguna taageerayay go'aankii wasiiradda ee ku aadanaa in
ay Dowladu dagto magaalooyinka baydhabo iyo jowhar,isla
markaana looga soo horjeeday go'aankii baarlamaanka ayaa
lagu wadaa dib loo qabto markale maalmaha soo socda.
Guddi ka kooban toban
xubnood uuna mid yahay Salaad Cali jeele wasiiru dowlaha
warfaafinta ayaa wada qabanqaabada lagu soo celinayo
shirkaas,sababta loogu celinayo mar aan wax ka waydiiyay
Wasiirka dakadaha Xasan Abshir waxa uu sheegay in ay
damacsan yihiin in ay soo bandhigaan magacyadii iyo
saxiixi xubnihii labada golle ee taageeray mowqifka
dowlada kana soo horjeeday go;aankii baarlamaanku ku
ansaxiyay diidista ciidamo ka socday wadamada safka hore.
Khilaafka ku dhex jira
labada golle maahan wali mid soo afjarmay wali,waxaana
soo muuqanaya kala fogaansho xagga aragtida dastuurka
ah,xubno saakay safar ugu soo ahaa magaalada mogadisho
ayaa baaqday,waxaana la filayaa in ay arbcada ka
ambabaaan magaalada Nairobi,safarkoodan baaaqday ayaa ka
dambeeyay kadib markii ay deeqbixiyayaasha ka dalbadeen
in ay sugaan ilaa maalinta arbada ah si loo xaliyo
khilaafka siyaasadeed ee ka dhex jira labada golle ee
dowladda iyo baarlamaanka xiligaas ka hor oo la filayo
in wafidiga iyo madaxweynaha ay soo gaaraan magaalada
Nairobi.
Kal fadhigii labaad
ee looga arinsanayo arimaha maamul u samaynta gobolada
jubbooyinka oo ay maanta yeesheen odayaasha beelaha
gobolka jubbada hoose iyo aqoonyahano
Kal fadhigii maanta oo
ahaa kii labaad oo ay yeeshaan nabadoonada beelaha wada
daga gobolada jubooyinka iyo aqoonyahanada gobolkaan
ayaa waxaa uu daba socdaa shirkii dhacay dabayaaqadii
bishii maarso ee looga arinsanaayay maamul u sameynta
gobolada jubooyinka oo ay yeesheen saraakiisha ugu
saraysa ee isbahaysiga dooxada jubba iyo odayaal
dhaqamneedyada ka socday beelaha wada daga gobolada
jubbooyinka.
ugu yaraan kontan
odayaal beeleedyo iyo aqoonayahno ayaa kulankii maanta
ka hadlay iyagoo gabi ahaantoodna qalinka ku duugay in
ay soo dhoweynayaan howlahan ugubka ah islamrkaana ay
dardar galinayaan sidii looga dhabayen lahaa hadafkaan
ah in maamul goboleed loo simanyahay uu yeelan lahayeen
gobolada ku abtirsada jubbooyinka .
Shirkii maanta ayaa
waxaa qudbado kala duwan kasoo jeediyay aqoonyahanadii
iyo odoyaal dhaqameedkii halkaasi isugu yimid ayadoo uu
ka dhexmuuqday ugaaska beesha sade ugaas ciise ugaas
cabdule oo isagu ahaa shirgudoonka kala fadhigii halkaa
saakay lagu qabtay waxaa sidoo kale saakay shirkaas ka
hadlay suldaanka beesha gaaljecel suldaan rashiid dhure
iyo waliba nabadoonka guud ee beesha jajeele xasan
ibraahim warsame iyo nabdoono kale oo ayagu
dhamaantood ka mid ah beelaha wada daga gobolada
jubooyinka .
Shirkaan oo maanta ka
dhacay xafiiska maamulka degmada kismaayo ayaa Intii uu
socday waxaa si weyn loogu lafa guray islamarkaana loo
tagkiidiyay ka dhabayenta hadafka umada gobolada
jubooyinka oo ah in ay hesho sinaan nabad iyo waliba
midnimo ayadoo la isku afgartay in sida ugu dhaqsiiyaha
badan looga soo gabagabeeyo loona muujiyo dhisida
maamulka.
Maamulkaan ayaa
noqonaya mid gogol xaar u ah islamarkaana qaybka ah
howl fududyenta dowlada F.D.K.MG ah ee soomaaliyeed ee
la filayo in dhawaan ay ka howl gasho gudaha dalka
soomaaliya.
Hadaba ma ahan markii
ugu horeysay oo ay masuuliyiinta gobolada jubooyinka u
tafa xaytaan maamul u samayenta gobolkan balse ay ku
fashilmeen kadib markii ay isku maandhaafeen
masuuliyiinta iyo odayassha dhaqankla ee gobolkaan balse
uu shirkaan u muuqdo mid shirarkii hore ka duwan lagana
dhabaynayo sharuucda ay siyasiyiinta iyo odayaal
dhaqameedka doonayaan in ay si hufan oga hirgaliyaan
gobolada jubbooyinka taasoo wax weyn ka badali doonta
hanaanka nabadeed ee gobolada jubbooyinka
cabdi qadar nuur
maxamed (filipiin)
kismaayo soomaaliya
cabdiqadar84@hotmail.com
Wadamo
islaam ah oo ka hadlay geerida Pope-ka labaad tacsina u
diray.
Geerida Pope John
Paulka-labaad ee xalay ku geeriyooday dalka talyaaniga kadib
markii uu muddo xanuunsanaa,saamaynta uu ay dunida dadka ku
nool ee haysta Madhabta katooliga ee masiixiga ku yeeshay
aad looga dareemayay meelo badan oo ay mid yihiin
kaniisadaha.
Geeridiisa oo madax badan oo
dunida ahi ay u direen dhamaalo tacsi ah ayaa waxaa ka mid
ahaa ,shaqsiyaad, ururo iyo madax ka soo jeeda dunida
islaamka ah.
Madaxweynaha dalka
falastiiniyiinta Maxamuud cabaas ayaa ku tilmaamay in
wadaadku ka soo qayb qaatay wadahadalii bariga dhexe ee lagu
dhexdhexaadinayay falastiiniyiinta iyo israa'il,sidoo kale
waxa uu ku tilmaamay in uu ahaa nin ka soo horjeestay in
shacabka reer falastiin aan la duudsiinin xuquudiisa.
Ururka Xamaas oo ka mid ah
ururada islaamiga ah ee ka jira dalka falastiin ayaa wadadka
u tilmaamay inuu ahaa mid nabadeed wax badana ka soo qaatay
dhexdhexaadinta labada dal ee falastiin iyo isra'il,waxa
ayna intaas ku dareen in uu ku baaqay in la soo celiyo
xoriyadda dadka reer falastiin dagaaldana laguna dhameeyo
wadahadal.
Madaxweynaha dalka iiraan
Maxmaad Khatami ayaa tacsi u diray isagana pope john paul-ka
labaad waxa uuna ku tilmaamay inuu qayb wayn ku lahaa isku
soo dhawaanshaha diimaha,waxa uuna ahaa nin nabadeed oo aan
dagaalka jeclayn sida hadalka loo dhigay,dalka iiraan oo ay
ku nool yihiin muslimiin shiico iyo sunniyiinba ah
boqolkiiba sagaashan waa muslim.
Wadamada kale ee tasiyadda u
diray wadaadka ugu sareeyay madhabta diinta masiixiga ah oo
xalay geeriyooday waxaa ka mid ah wadamo ku yaalada qaarada
aasiya,wadanka indonesia ayaa ka mid ah wadamada looga
dhiray tacsida,waxa ayna ku tilmaameen in uu ahaa nin
nabadeed.
Dalka lubnaan wadaadka lagu
magacaabo Aayatullah maxamad Xusen ayaa dhamaal tacsi ah u
diray pope-ka labaad isagoo sheegay in wadaadka lagu
xasuusto booqasho uu ku yimid masaajid ku yaala magaalada
Dimish ee dalka suuriya,sanadkii 2000,waxa uu intaas ku
daray in uu ahaa shaqsi nabada jecel.
Wadaadka ugu sareeya diinta
katooliga oo lagu magacabayay Pope John Paul-ka 2aad ayaa
booqday in ka badan labaatan dal oo muslim ah,sida ay
sheegayaan wararka wakaalaha ay ka qoreen maanta pope-ka.
Dalka kenya oo laga dareemay
geerida wadaadkii masiixiyiinta.
Caadiyan Dalka kenya masiixiyiinta
ku dhaqan waxa ay tagaan maalinta axada ah kaniisadaha si ay ugu
cibaadaystaan,laakiin maanta waxaa laga dareemayay kasiidaha iyo
meelaha kale ee ay iskugu yimaadaan masiixiyiinta niyad jab iyo
hadal hayn ku aadan odayga ugu sareeya diinta masiixiga ee Pope
John paul ka labaad oo xalay ku geeriyooday xarunta Vaticanka ee dalka
Talyaniga.
Madaxweynaha dalka kenya Mwai
Kibaki oo ka mid ahaa boqolaal kirishtan ah oo saakay u dareeray
kaniisadaha ayaa tacsi u diray dhamaan masiixiyiinta dunida ku
nool ee u barooranaya wadaadka Gaar ahaan xarunta
Vaticanka,Warsaxaafadeed uu madaxweynaha saakay soo saaray ayuu
ku sheegay in shabanka kenya iyo dowladdaba haystana diinta
masiixiga ay aad uga tiiraanyaysan yihiin geerida Pope- iyagoo
la qaybsanaya asaxaabta kale ee dunida ku nool haystana diinta
masiixiga ah,
Waxa uu madaxweynuhu intaas ku
daray in wadadku wax badan ka qabtay faafinta diinta
masiixiga,Nabadana uu u ahaa horseede sida uu hadalka u
dhigay,Madaxweynaha oo saakay shacabka kenya ee kirishtanka ah
kala hadlaya TV-yada dalka isagoo ku sugnaa kasiinada ugu wayn
magaalada Nairobi.
Dalka kenya waxa uu ka mid ahaa
wadamada uu wadaadka soo booqday xili uu booqanayay wadamo ku
yaala qaarada Afrika waxa uun soo booqday dalka kenya mudo sadex
jeer ah oo sanado ay u dhexeeyeen kalana ahaa 1980-85-95,sida ay
saakay qoreen wargasyada dalka kenya maanta.
BOB JON. WADAADKII KAATHOOLIGA UGU
WEYNAA.
AKTARNIMO ISU BADASHAY WADAADKA
IGU WEYN KAATHOOLIGA.
Markii loo dhiibay jagada
wadaad-nimada ugu saraysa Kaathooliga 1978. Waxay da’diisu ahayd
58. jir. Waa wadadkii ugu da’da yara ee loo dhiibo jagadaas.
Sidoo kale, waa markii u horeysay oo uu xilkaas qabto Wadaad aan
dalka Talyaaniga u dhalan.
Bilowgii noloshiisa kuma
fakarayn inuu noqdo wadaad weyn. Wuxuu jeclaa
dhalinyaro-nimadiisi Banooniga iyo shaneemoyinka, wuxuu hankiisu
ahaa inuu noqdo jilaa weyn. Waxayse mar qura isbadalay
fakarkiisii dagaalkii labaad ee dunida, markaas oo uu sir ah ku
bartay Cilmiga Laahuutka ilaa uu noqday Qasiis weyn sanadkii
1946.kii, kadibna wuxuu kamid noqday Kahanada Kaathooliga.
Sanadkii 1964.tiina wuxuu noqday ninka ugu sareeya Usqufyada
magaalada afraad ee wadanka Bolan. 1967.kiina wuxuu isu badalay
Kardinaal. 1978.na waxaa loo dhibay jagada ugu sareysa Mad-habta
Kaathooliga. Wuxuu dhashay 1920.kii.
Intii uu xilka Boobnimda hayey
27. jeer ayuu dunada ku soo wareegay, isagoo booqday ilaa
100.wadan. oo ay kamid tahay 20.dal oo dunida Islaamka ah. Waa
Boobkii ugu horeeyey ee cagihiisa dhiga Masjid ay Muslimiintu
leeyihiin, waana markii uu booqday Dimishq Caasimadda Suuriya.
Sidoo kale wuxuu booqday goob cibaado oo ay Yahuudu leedahay.
Wuxuu lahaa aragtiyo u gaar ah
oo ay xitaa isku khilaafeen qayb ka tirsan Culimadda Kaathooliga.
Wuxuu ahaa nin aysan jeclayn wadada isaga ku xiga,. Waxay u
arkeen nin dhuminaya haybadii Kaathooliga, wuxuu dhunkada
Musxafka quraanka, wuxuu booqday qabrigii Nabi Yaxye. Taasoo ka
caraysiisay wadaado isaga la shaqeeya.
Wuxuu aad u taageeray
Falastiiniyiinta 1981 ayuu qaabilay Hogaamiyihii Falastiin
Yaasir Carafaat. Wuxuu aad u mucaaraday duulaankii Ciraaq ay
xulifadu ku qaadeen. Dhinaca kale 1986. ayuu aqoon saday
Dowladda Israa’il .
YAA BADALI DOONA BOOBKA
Intii uusan dhiman Boobku ayuu
dajiyey sidii wax loo maamuli lahaa kadib marka uu geeryoodo.
22.Feb 1996. dii ayuu dhigay sharci qeexaya in Kardinaal (
Kamer-Leng) uu hago dhamaan hawlaha wakhtiga kala guurka, si’uu
udiyaariyo qaabkii lagu dooran-lahaa wadaadka loo dhiibi doona
jagada uu ka dhintay.
TARTAMAYAASHA.
Ilaa iyo hadda waxaa xilkan u
sharaxan Wadaado badan oo ku kala dhashay Talyaaniga. Jarmalka.
Austeriya. Laatin Ameerika. Hindiya iyo Wadaado Afrikaan ah.
Yurub waxaa u taagan ilaa
5.wadaad oo u kala dhashay wadamada R/Yurub. Hindiya waxaa
taagan laba wadaad. Laatiin Ameerakana waxaa taagan 4.
Musharax. Qaarada Afrikana waa
hal wadaad oo kaliya.
Loolan aday ayaa ka dhexmuuqda
wadaada u tartamaya iney helaan jagadaan muhimka ah. Waxay dad
badani qabaan in xiligan la dooran doono wadaad ka soo jeeda
Laatiin Ameerika maadama dadka Kaathooliga ah kala barkood ay
halkaas ka soo jeedaan. Sidoo kale Wadaada ka soo jeeda Afrika
ayaa qaba in markaan loo dhiibo iyaga. Naajeeriya wadaado u
dhashay ayaa leh waa in markan Boobnimda loo dhiiba nin madow.
Faafin: SomaliTalk.com |
April 3, 2005
Wasiirro
Soomaali ah oo saraakiil Itoobiyaan ah la kulmay
ka akhri wararkii radio Xorriyo ee maanta...
Guji.. Apr
1
Odayaal
Dhexdhexaadin ah oo Maanta Gaarey Hobyo
Odayaashaan oo saakay kasoo ambabaxay
magaalada gaalkacyo ayaa waxaa ay soo mareen...
Guji...
April 1
Warbixin:
Soomaalida Deggan Dalka Jarmalka
Socdaalkii Hassan Cookaar(Salahuddin)...
Guji...
Apr 1
Koobka
Ciyaaraha ee Soomaalida Norway::
Waxaa baryahan magaalada Oslo ee dalka
Norway ka socday koob loogu magac daray..
Guji
Apr 1
Shirkii
Soomaalida Oslo Oo Guul Ku Dhammaaday
Dad tiradooda lagu
qiyaasay (1700) oo soomali ah ayaa soo gaba-gabeeyey shir islaami ah oo...
Guji...
Waraysi Samsam
iyo Codsasho Caawinaad Soomaalino...
iyo
Shirkadda Dahabshiil oo Sanduuq Mucaawino u Furtay Samsam...
Samsam waxa ay shaaca ka qaaday in ay dacwadeeda u
gudbineyso Maxkamadaha Aduunka ee Caalamiga ah, waxana ay...
Guji...
Kulaabo bogga www.SomaliTalk.com