Barnaamijkii Radio
Xoriyo
29 Apr. 2005
-
Hanbalyadii ay
Jaaliyadaha Ogaadeenya u dirayeen ciidammada Xoreynta
-
Ogadeniya oo wali
socda.
-
Khasaarihii daadadka
oo soo kordhay.
-
Ciidammo Itoobiyaan ah
oo la soo dhoobay dhinaca koonfureed ee Soomaaliya.
======================
Hanbalyadii ay Jaaliyadaha Ogaadeenya u
dirayeen ciidammada Xoreynta Ogadeniya oo wali socda.
Jaaliyadaha Ogaadeenya ee
dalalka kala duwan ee adduunka ku kala yaalla ayaa
toddobaadyadii u denbeeyay waday shirar ay uga dan-leeyihiin
inay ku xoojiyaan halganka hubaysan ee lagaga soo horjeedo
gumaysiga Itoobiya.
Waxay kaloo Jaaliyaduhu hanbalyo u gudbinayeen ciidammada
xoreynta Ogaadeenya ee guusha wayn ka soo dheelmay ciidamada
gumaysiga Itoobiya iyo sida ay ugu guulaysteen Hawlgalkii
Mandad.
Haddaba waxaa goor dhawayd na soo gaadhay qaar ka mid ah
hambalyooyinkii ay Jaaliayaduhu dirayeen CWXO waxaana kamid ah
hambalyada ay soo dirtay;
Jaaliyada Ogaadeeniya ee magalada Edmonton, ee dalka Kanada,
waxayna Jaaliyaddu hambalyadeeda ku billowday;
Annagoo ah Jaaliyadda Ogaadeenya ee magaalada Edmonton ee dalka
Kanada, waxaan hambalyo iyo bogaadin u diraynaa dhamaanba
Ciidamada Jabhadda Waddaniga Xorayta Ogaadeenya, oo guushii la
filayay ka soo dheelmay Hawgalkii Mandad.
Waxaana aad iyo aad ugu hanbalyaynaynaa dhamaan Ciidamadii ka
qayb qaatay hawgalkaa taariikhiga ah, iyo ciidammada kale ee
jilibka udhigay daandaansiga gumaysiga Itoobiya, waaxaanan
leenahay guulaysta waan idin garab taaganahay oo waan idinku
dhaadanaynaa.
Jaaliyada Ogaadeenya ee Koonfur Afrika ayaa iyaduna qabatay
shirar kala duwan oo looga gon-lahaa xoojinta halganka
Ogaadeenya iyo dhiirri gelinta Hawlgalkii Mandad ee ay CWXO ku
qaadeen ciidanka Waayanahaa ah ee cabudhiska u jooga ciidda
Ogadeenya.
Shirarkii ugu horreeyay waxaa lagu qabtay xarunta Jaaliyadda oo
fadhigeedu yahay Gobolka Easten Cape, gaar ahaan Magaalaada Port
Elazabeth, halkaasoo maalintii axadda ahayd ee taariikhdu ku
beegnayd 24/04/05 lagu qabtay laba shir oo kala duwan oo ragga
iyo dumarka kala ah.
Waxaa
shirarkan goob-joog ka ahaa dhammaan qaybaha kala duwan ee
bulshada Ogaadeenya ee dalkaas ku dhaqan iyo waliba dadwayne ka
socda jamhuuriyada Soomaaliya.
Shirarkan waxaa ka hadlay guddoomiya Jaaliyadda oo soo bandhigay
warbixintii guud midii u danbeeysay ee Ciidanka Xoreynta
Ogaadeenya ay wacdaraha ka muujiyeen, waxaana halkaas loogu soo
jeediyay CWXO hanbalyo iyo bogaadiin. Waxay halkaas dadwaynuhu
ka ballanqaadeen inay taagero dedeg ah u fidinayaan ciidammada
xoreynta Ogaadeenya.
Waxaa
isla maalintaas shir noocanoo kale ah lagu qabtay magaalada Cape
Town, kaasoo isaguna si habsami ah u dhacay, dadwaynuhuna ay ku
ballanqaadeen inay qayb libaax ka qaadanayaan hawlaha dagaalka
ka socda ciidda Ogaadeenya.
Jaaliyadda Ogadeeenya ee Afrikada Koonfureed iyo dhamaan ummada
Soomaliyeed ee halganka jecel ee ku nool Koonfur Afrika waxay
hanbalyo iyo bogaadin u dirayaan madaxda JWXO iyo CWXO ee ka
qaybqaatay howlgalkii "Mandad" iyo kuwa kale heeganka u ah
xoreynta dalka Ogaadeenya.
Khasaarihii daadadka oo soo kordhay.
Qiyaastii 88 qof ayaa ku dhintay daadad ka dhashay roobab xoog
leh oo ka da’ay dhulka Ogaadeenya, kuwaasoo si xidhiidh ah u
da’ayaya muddo labao caana-maal ah, waxaana laga yaabaa in
dhimashadu ay intaas ka sii badato haddii aan gargaar degdeg ah
lala gaadhin dadka daadadkan ku waxyeelloobay, sidaas waxaa
sheegay ururrada samafalka.
Dad
kumayaal gaadhaya ayaa guryo la’aan noqday, ka dib markii uu
Wabiga Shabeelle fatahay oo qaaday tuulooyinkii ku dhawaa oo
dhan. Tuulooyinka ay biyuhu qaadeen waxay hadda gaadhayaan 40
tuulo, iyadoo ugu yaraan 60,000 oo qof ay guryo la’aan yihiin.
Dadkii
ku noolaa bariga iyo galbeedka Iimay ayaa la sheegayaa inay wali
geedaha saaran yihiin, isla markaana ayna wax gargaar ah helin.
Nawaaxiga Qabridaharre ayaa la xaqiijiyay inay ku dhinteen 16
qof, 9000 oo kalana ay guryo la’aan noqdeen, daadadkuna ay
qaadeen 15 tuulo. Waxaa kaloo
la sheegay in 1000 Neef oo xoolo ah ay daadadku dileen.
Dhinaca
Mustaxiil waxaa la xaqiijiyay in 6 qof ay ku dhinteen, 2000 oo
kalana ay guryo la’aan noqdeen, waxaa kaloo ku dhintay 317 Neef
iyo 17 Dameer.
Dhimashada ayaa
laga cabsi qabaa inay intaas aad uga badato haddii aan tallaabo
degdeg ah la qaadin. Yaxaasyo gaajaysan oo daadadka soo raacay
ayaa cabsi ballaadhan ku haya dadkii daadadka ka badbaaday.
In ka badan 4000
oo Adhi ah ayay daadadku qaadeen, waxay kaloo la tegeen 2000 oo
Geel ah iyo dhawr boqol oo Lo’ ah.
Adeeg yar oo
gargaar ah ayaa gobolka la geeyay, hase yeeshee shaqaalaha
gargaarka waxaa ku adkaatay inay gargaarkaas gaadhsiiyaan dadkii
dhibaatadu soo gaadhay, sidaas waxaa yidhi Axmed Cabdi oo ka
tirsan Barnaamijka Cuntada Adduunka ee Qaramada Midoobey oo u
warramayay wakaaladda wararka ee AP.
Ciidammo
Itoobiyaan ah oo a soo dhoobay dhinaca koonfureed ee Soomaaliya.
Ciidammada
Itoobiya ayaa dhaqdhaqaaq xoog leh ka wada magaalooyin ka mid
gobolka Bakool ee dalka Soomaaliya. Ciidammada Itoobiya ayaa soo
buuxiyay magaalooyinka Ceel Barde, Rab-dhuurre, Moora Gaabey iyo
Ceel Garas oo ka tirsan gobolka Bakool, halkaasoo dadka laga
joojiyay inay wax dhaqdhaqaaq ah sameeyaan.
Wararka ka
imanaya magaalada Xuddur ayaa sheegaya in maalintii arbacada
ahayd iyo fiidnimadii khamiista ahayd la demiyay tilifoonnadii
magaalada laga isticmaali jiray, iyadoo xilligaas ay magaalada
soo gaadheen saraakiil ka tirsana ciidammada gumaysiga Itoobiya,
kuwaasoo wadahadal la yeeshay xubnaha labada gole ee dawlada ku
meelagaadhka ah ee Soomaaliya ee sii joogay magaalada Xuddur.
Dadwaynaha ku
dhaqan nawaaxiga ay ciidamada Itoobiyaanka ahi yimaadeen ayaa
sheegaya in dhaqdhaqaaqa millatari ee Itoobiyaanku uu kuwii hore
aad uga duwan yahay, isla markaana uu gudaha u soo galayo
gobolka Bakool.
Masuuliyiinta
xukuumadda ku meelgaadhka ah ee Soomaaliya ayaa ka gaabsaday
inay faahfaahin ka bixiyaan sida wax u socdaan iyo arrimaha ay
kala hadleen saraakiisha Itoobiyaanka ah.
Dhinaca kale
malleeshiyooyin isku dhaf ah oo laga kala keenay galbeedka iyo
bariga magaalada Baladweyne ayaa dhawaan tababar uga furmay
meesha lagu magacaabo Sariiraale oo ku dhaw magaalada FeerFeer,
waxaana tababarkaas siinaya saraakiil Itoobiyaan ah.
Tababarkan waxaa
malleeshiyada Hiiraan loo furay, ka dib markii uu guddoomiyaha
maamulka Midland State C/kariim Faarax Laqanyo ka soo laabtay
booqasho uu ku tegay Ogaadeenya, halkaasoo uu kula kulmay
saraakiisha ciidammada gumaysiga Itoobiya eek u sugan dalka
Ogaadeenya.
Halkan ka
dhegeyso wararka Xorriyo
Radio
Xoriyo
29 Apr. 2005
C/nuur Sh. Mohamed
radioxoriyo@ogaden.com
raadioxoriyo@yahoo.com
Radio Xoriyo waxaad
ka dhegaysan kartaa Mawjadda 19 MB ee dhererkeedu yahay 15670
KHZ, Maalmaha Talaadada iyo Jimcaha 7: 30PM waqtiga Afrikada
Bari.
Faafin: SomaliTalk.com | April 28, 2005