- Diblomaasiyiin
shisheeye oo ku guuleystay in ay baajiyaan laba shir oo iska
soo horjeeday oo ay qaban lahaayeen labada gole.
- Haween iyo caruur ku
xirnaa xabsiyada Sucuudiga oo soo gaaray Muqdisho
- Kulan Albaabadu u
xiran yihiin oo ka dhacay Degmada Xuddur ee G/Bakool.
- Khadkii cagaarnaa ee ka
jiray degamada Wadajir oo maanta la qaaday
- Wafti Soomaaliyeed oo
Booqasho Ku Jooga Jakarta, Indonesia
Diblomaasiyiin shisheeye oo ku
guuleystay in ay baajiyaan laba shir oo iska soo horjeeday oo ay
qaban lahaayeen labada gole.
- Canab Mumtaz |
SomaliTalk | nairobi
canabmumtaz@yahoo.com
Nairobi April 22: Shirar aan caadi
ahayn oo lagu waday in ay kala qabtaan laba koox oo siyaasad
ahaan iska soo horjeeda kana wada tirsan baarlamaanka iyo
dowlada ayaa maanta baaqday kadib markii uu goobta shirarka
tageen mas'uuliyiin ka socotay IGAD iyo IIPF-ta dalbadeena in la
joojiyo.
Shirarkan mid ka mid ah waxaa
qaban lahaa xildhibaabo gaarayay 99,oo todobaadkii hore u
gudbiyay mowshin gudoomiyaha baarlamaanka FKMG ah ka hadlayay in
la qabto shir lagu fulinayo go'aankii dowlada ee dagista
baydhabo iyo jowhar ay ka mid ahaayeen iyo in la maxkameedyo
hogaamiyayaasha hubaysan hadii ay diidaan hubkooda in ay
dhiibaan lana saaro maxkamad dambiyadeed caalami ah.
Shirkan waxa uu ka dhici lahaa
hotelka Sagret ee magaalada Nairobi waxaana soo qaban qaabiyay
urur dhawaan la magac baxay ururka dardargalinta baarlamaanka oo
dooran lahaa gudoomiye iyo ku xigeeno ka dhan ah kuwa
baarlamaanku leeyahay,iyaga laf ahaantooda waa qayb ka mid ah
baarlamaanka iyo dowlada ninka ay dooranayeena waa mid banaanka
ah baarlamaanka.
Kulankan oo daqiiqado socday
markii ay ururkani ku dhawaaqeen Aadan Maxmad Cali in uu
gudoomiye u noqday ayaa waxaa soo galay Am.kiplagad oo ka
dalbaday in ay si dag dag ah u joojiyaan shirka ay wadaan sidaas
ayaana lagu joojiyay.
Dhinaca kale ee shirkan iyagana
lagu waday in ay qabtaan waa guruubka kale ee ka soo horjeeday
moshinka ay keeneen kooxdan u badan dowladda iyagoo ku qaban
lahaa hotelka grand regecy ee magaalada Nairobi,balse iyagana
waxaa joojiyay kooda isla kiplagad oo ka dalbaday in ay
joojiyaan.
Hadaladii uu danjiraha shirka
Somalida u qaabilsan kenya waxaa ka mid ahaa isagoo yiri"Waxaa
niyad jab nagu ah inaan aragno baarlamaankii oo mid ahaa lahaana
nidaam iyo gudoomiye ay maanta u kala saftaan laba koox oo
mucaarad isku ah iyadoo aan la gaarin dalkii iyo waxqabad
midna,waana mid si wayn noogu abuurays walwal,mid keena ka
badana waxaa qaba shacabka soomaaliyeed ee aad xilka u haysaan
ee fadlan si dagan u wada hadla xalku waxa uu ku jiraa
wadahadalka".
Gudoomiyaha baarlamaanka xiliga
waxani dhacayaan waxa uu ku sugan yahay qolka uu ka dagan yahay
Hotelka Grand Regency ee Nairobi,kooxda ku qaban lahayd shirka
secret waxaa la joogay oo shirkaas kala qayb galay gudoomiye ku
xigeenka koowaad Prof Maxamad Cumar dhalxa.
Ugu dambayn shirarkan hadii ay
qabsomi lahaayeen waxaa dhici lahaa sii kala fogaansho iyo
khilaaf cusub oo ka dhex dhasha baarlamaanka soomaaliya ee lagu
dhisay dalka kenya.Canab
Mumtaz | SomaliTalk | nairobi
canabmumtaz@yahoo.com
Mudanayaal ka tirsan
baarlamaanka Soomaalida oo isugu yimid Sagret Hotel ee magaalada
Nairobi galabta Hotelka
kulanka
Xubnaha ka tirsan mudanayaalka Baarlamaanka ayaa waxay ahayd in
lagu lafaguro Mashaariicda iyo Go'aamada Xukuummadda iyo
Dhamaystirka dhismaha Golaha baarlamaanka,ayna doonayaan
Xildhibaanadu sida ay sheegeen inay ku dhaqaaqaan ka soo
bixitaanka Xilka loo doortay,iyagoo Xildhibaanadu si gacan taag
ah ku aqbaleen codsigii uu soo jeediyey Kiplagat ka dib markii
Xildhibaan Aadan Maxamed Cali oo u hadlay Xubnaha baarlamaanka
ku taliyey in shirka baarlamaanka la baajiyo oo la aqbalo
dalabka Kiplagat.
Kiplagat oo
isagu halkaasi hadal dheer ka jeediyey ayaa waxa uu sheegay inuu
dhawaan socdaal ku soo maray dalalka Mareykaanka, Masar, Koonfur
Afrika, iyo Nayjeeriya, islamarkaasna dhamaan dalalkaasi
muujiyeen inay taageero u heelan yihiin Dawladda FKMG ah,hase
yeeshee khilaafka ka soo shaacbaxay ee ka dhextaagan gudaha
baarlamaanka iyo Xukuumadda ayuu ku tilmaamay mid u baahan in
lagu xaliyo wada hadal,ayna ku dedaali doonaan inay farqiyada
jira isu soo dhaweeyaan si looga mira dhaliyo guulihii laga
gaaray shirkii dib u heshiisiinta soomaalida.
Betheul Kiplagat ayaa waxa uu la socodsiiyey Xubnaha
baarlamaanka inay jirto kulan dhawaan isugu imaan doonaan
Deeqbixiyaasha caalamka oo ku saabsan sidii dawladda looga
caawin lahaa dib u guuritaanka,islamarkaasn uu ku rajo weyn
yahay in kulankaas arrimo wax ku ool ah ka soo bixi
doonaa,isagoo sheegay inay dhinaca kale jirto sidii lagu buuxin
lahaa kaalintii Wakiilka Xoghayaha guud ee Qaramada Midoobey ee
Soomaaliya Mr.Tubman oo hawlgab noqday,ayna socdaan dedaal lagu
soo magacaabi doono Wakiil Xoghayaha Guud u qaabilsan Soomaaliya
oo ah shaqsi noqon doona mid leh khibrad dheeraad ah.
Ugu dambeytii Kiplagat ayaa ku ammaanay dadka Soomaaliyeed in
ilaah hibo u siiyey inay khilaafaadka soo dhexmara uga gudbaan
iscafis iyo wada hadal ku dhisan samir iyo dulqaad,isagoo ka
codsaday Xildhibaanada inay ku dedaal taabo galinta heshiiskii
la gaaray.
Waxaa halkaa
ka hadlay Xidhibaan Adan Maxamed Cali oo sheegay in Xubnaha
Baarlamaanka ee Goobta joogaa ay dhanyihiin 146 Xidhibaan isagoo
intaa ku daray in Xubnahani yihiin ku wii ugu badnaa ee qabta
kulan baarlamaan.
Dhinaca kale
waxaa isaguna halkaa ka hadlay Xidhibaan Cabdi Warsame Isaaq oo
isaga oo ku hadlayay Gudiga Qabanqaabada Shirka Salaan Diiran
gaarsiiyay Xubnaha Xidhibaanada ee Goobta fadhiyay.
Kulankan kama
uusan qaybqaadan Gudoomiyaha Baarlamaanka Soomaaliya Sh Xasan Sh
Adan ku Xigeenkiisa Koowaad Prof Maxamed Cumar Dalxa.
Khilaafka
xaga Aragtida ah ee u dhaxeeya Xubnaha Baarlamaanka Soomaaliyeed
ma ahan mid farax galinaya Beesha Caalamka oo iyadu Juhdi&
Dadaal badan shirka ku bixisay.
Sidoo kale
Umada Soomaaliyeed ee ku tabaalaysan Daafaha Dunida ayaan
iyaduna ku farxayn khilaafkan waloow aad moodo in lagu jiro
dadaal la doonayo in lagu dhameeyo Muranka uu dhaxeeya
Mudanayaasha Baarlamaanka.
Wali go aan
cad lagama gaarin Arimo badan oo ay sharciyeyeen Golaha
Wasiiradu waloow qaar ka tirsan Golaha Wasiiraduna ay sheegayaan
in aan wasiiradu isku raacin go aanka dib uguurista.
Hadaba
Khilaafka u dhaxeeya Baarlamaanka& Xubnaha ugu sareeya Doowlada
ayaa ah Qodobadan oo aad moodo in qolabo si udoonayso.
1.Go'aankii Wasiirada Arrimaha
Dibedda ee IGAD
2.Qorshaha dib u guurista dalka:
B. Nabadaynta , dib u
heshiisiinta iyo maamul ka dhisidda Degmooyinka iyo Gobollada
dalka .
T. Goobaha KMG ahaan Xukuumaddu ku sii shaqayn doonto:Baydhabo
iyo Jowhar iyo Muqdisho oo laga furayo xafiis Qaran oo fulinaya
barnaamijka nabadaynta magaalo madaxda.
J. Barnaamijka magaalo madaxda Qaranka ee Muqdisho ee hadda hor
yaal Golaha Wasaaradda.
3.Hub ka dhigista iyo xeraynta
maleeshiyooyinka oo laga hirgeliyo dalka oo dhan muddo saddex(3)
bilood gudahood ah.
4.Ballan qaad cusub ee xabbad
joojin iyo hub ka dhigis oo ay saxiixaan dhammaan xubnaha
Xukuumadda ,Baarlamaanka iyo cid kasta oo haysata maleeshiyo
hubaysan,ciddii jebisa ballanqaadkaas la saxiixayna waxaa la
horgeyn doonaa maxkamadda dembiyada ee caalamiga ah.
5.Waa in la sameeyaa hab lagu
hubiyo meel marinta xabbad joojinta iyo hub ka dhigista oo ay
hogaaminayaan dalalka IGAD,Midowga Afrika,dalalka Jaamacadda
Carabta iyo xubno ka kooban oo ka tirsan beesha caalamka.
6.Marka lixdanka(60-ka ) beri
ee baarlamaanku dhammaado ,Baarlamaanku wuxuu fadhigiisa ugu
horreeya ku yeelanayaa meel kasta oo nabad ah ee dalka gudihiisa
ah,haddii amniga iyo nabadaynta magaalo madaxda Muqdisho aanay
meel marin mudadaas lixdanka (60-ka) cisho ah,isla markaana
aanay soo caddayn Hay'adaha ku xusan qodobka shannaad(5aad) ee
isla warqaddan ,shirka Baarlamaanka waxaa lagu qabanayaa Jawhar
ama Baydhabo.
7.Marka ay timaaddo xaalad
degdeg ah ,Baarlamaanka waxaa isugu yeeraya Madaxweynaha
Dawladda Federaalka KMG ee Jamhuuriyadda Soomaaliya sida uu qabo
xeerka KMG ah.
Axmed
Muusse Cabdulle(Idaawaqaca)Kenya_Nairobi
axmeddheere65@hotmail.com
Haween iyo
caruur ku xirnaa xabsiyada Sucuudiga oo soo gaaray Muqdisho
Muqdisho April 22: Haweenkan iyo
caruurtan oo ay dowladda sucuudigu soo tarxiishay ayaa tiradoodu
gaareysaa Sideetan ruux,kuwaasi oo dhamaantood faramaran
islamarkaasina ay ka muuqaato diif xooggan.
Dadkan ayaa waxaa ka mid ah qaar
aan laheyn dhimir kadib markii si xun loogu garaacay xabsiyada
Sucuudiga sida ay sheegtay Abshiro Cali Geni oo ka mid ah dadkaasi
waxayna intaa ku dartay in jiifka ay ku seexan jireen baakado
islamarkaasina.
Waxay tilmaantay in raashinka ku
filan aysan helin,waxayna sidoo kale sheegtay in raashinka qofba kan
uu ka xoog weynyahay uu ka qaato gudaha xabsiyada Sucuudiga.
Soomalida u baqoosha sucuudiga ayaa
inta badan halkaasi u xoogsi tagta,waxaase xusid mudan in qaar kale
oo soomali ah,kana taga dalka iyo dibadahaba ay sucuudiga u tagaan
gudashada waajibaadka diiniga ah sida xajka iyo cumrada.
Cabashadan ay sheegayaan dadka
maanta soo gaaray muqdisho ee tarxiilka ah ayaa ku soo beegantay
xilli quluubta shacabka soomaaliyeed ay weli ka sii guuxeyso
gowracii aan loo meel dayin ee dhowaan lix dhalinyaro soomaliyeed ah
loogu geystay wadanka boqortooyada Sucuudi Areebiya,kaasi oo ay
cambaareeyeen hay`adaha xuquuqul insaanka u dooda ee jooga gudaha
iyo kuwa caalamiga ahba.
Kulan
Albaabadu u xiran yihiin oo ka dhacay Degmada Xuddur ee G/Bakool.
Kulankaan oo ay ka qaybgaleen
Wasiirka Garsoorka Sheekh Aaden Madoobe iyo Gudiggii xaldoonka ahaa
ee maalmahan ku sugnaa gobolada Bay iyo Bakool oo ahaa mid saxaafada
loo diiday ayaa hadana qaar ka mida xubaha kulankaasi ka qeyb gelaya
oo diiday shaacinta magacooda waxay sheegeen in kulankan looga
hadlayo arimaha la xiriira dhexdhexaadinta iyo nabadeeynta garabyada
RRAda ee dirirtu dhexmartay.
Kulankaan ayaa sida wararku
sheegayaan waxaa uu hordhac u yahay kulan balaaran oo lagu
ballansanyahay maalinta berri ah,kaa soo ay ka qeyb qaadanayaan
dhamaan garabyada RRAda oo ay kala hogaamiyaan Xaabsade,Shiiq Aadan
Madoobe, Shaatiguduud, Kiishbuur, iyo xubno kale oo ka mid ah labada
gole ee dowladda federaalka KMG Soomaaliya.
Sida ay ku waramayaan dadka
deegaanada Bay iyo Bakool,kulankaan ayaa haddii uu sida loo
qorsheeyay u qabsoomo waxaa laga fili karaa isu soo dhawaasho iyo is
faham dhexmara garabyada RRAda ee ku kala duwanaa aragtida ku aadan
soo qorshayaasha dowladda federaalka.
Tan iyo markii ay bilawdeen
dadaalada nabadeeynta goboladaas waxaa jiray isku dayo in la isugu
keeno mas`uuliyiinta sarsare ee RRAda oo sidii loo qorsheeyay aan u
qabsoomin taasoo loo aaneynayay in xubno kamida mas`uuliyiintaas ay
xagal daacinayaan dadaalada nabadda ee ay wadeen gudigga xaldoonka.
Qadkii cagaarnaa
ee ka jiray degamada Wadajir oo maanta la qaaday
Qadkaan oo u
dhaxeeyay taageerayaasha ka kala amar qaata wasiirada gacancsiga iyo
awqaafta iyo arimaha diinta,muuse suudi yalaxoow iyo cumar finish
ayaa waxaa uu soo taxnaa muddo seddax sanno ah.
Waxaa maanta la
arkayay dadka reer Madiino oo si niyad furnaan iyo kalsooni ah u
kala gooshaya goobihii kala caaganaa ee cabsidu ay ka jirtay,ka hor
inta aysan dadweynuhu isaga gudbin qadadkii kala xirnaa,waxaa
bilaabay isu socodka dableeydii halkaas ka dagaalami jiray ee labada
dhinac,iyagoo is marxabeysiinayay oo midba midka kale uu xabadka
xabadka u saarayay.
Sidoo kale waxaa
la arkayay Odayaasha Dhaqanka ee labada dhinac oo iyaguna qeybtooda
ka qaadanaya furitaanka qadkaasi,iyadoo dadweynaha ku dhaqan
halkaasi ay ka daba luxayeen caleemo qoyan,waxaana goobtaasi ka
muuqatay farxadda ay u hayaan talaabadaas horay loo qaaday.
Axmad Maxamad
Culusoow oo aan maanta goobtaas kula sheekeeystay ayaa ii xaqiijiyay
niyadda ay u hayaan talaabada maanta ay qaadeen dadka degaanka
madiina taasoo sida uu ii sheegay qeyb ka ah dadaalka nabadeed ee
lagu doonayo nabadda iyo amaanka muqdisho,si aysan u seegin
magaceedii caasimadeed.
Degmada Madiina
ayaa culeeys xoog leh oo dhinaca nolosha dadweynaha uu heystay tan
iyo markii uu biloowday qadkan cagaaran waxaana laga yaabaa iney
tusaale u noqo hanaanka nabadda ee laga fuliyay goobtaas guudahaan
G/Banaadir.
Hasan dhaaleey
Dheel10@hotmail.com
Mogadishu Somalia
Wafti Soomaaliyeed oo Booqasho
Ku Jooga Jakarta, Indonesia
- Waftiga oo uu Hogaaminayo
Wasiirka Arrimaha Dibedda DFKMG ayaa ka Qaybgelaya shirkii
Madaxda labada qaaradood ee Aasiya iyo Afrika ee ka Socda
Jakarta
Wasiirka Arrimaha Dibedda ee
Dawladda Federaalka KMG, Amb. Abdillahi Sheikh Ismail, ayaa
wuxuu ka qeybgalay shirkii Madaxda
labada qaaradood oo maanta furmay Jakarta, wuxuuna socon doonaa ilaa
24/04/2005, Wasiirka wuxuu wakiil ka yahay oo uu matalayaa
Madaxweynaha DFKMG ee Soomaliyeed, isagoo magaca Madaxweynaha, kan
Ra'iisul Wasaaraha & Xukuumadaba ku hadlaya ayuu marlabaad khudbad
ka jeedin doonaa Shirka Madaxda Asia Africa, waxaana shirkaas ku
wehlin doonaa, Dr. Hussein Ali Ahmed, Md. Mohamud Olow Barrow, & Md.
Abdisaid Muse.