-
Dagaal Xamar
ku Dhexmaray labo Sheekh oo ka tirsan Darriiqada Qaaddiriyada ee
Suufiyadda
-
Golaha
guurtida Hawiye oo baaq nabadeed u soo jeediyay kooxaha ku
dagaalamaya soomaliya
-
Sadex qof ayaa
dhimatay ugu yaraan lix kalana waa ay ku dhaawacmeen kadib markii
gaari nooca dhaynaha ah uu ku rogmaday tuulada Aamineey ee gobolka
jubbada dhexe
- Amaanka Tuulada SOS ee
magaalada muqdisho oo la adkeeyay.
- Gudoomiyaha Baarlamaanka
Soomaaliya Sh Xasan Sh Adan ayaa soo dhaweeyay Warqadii Madaxweynaha
ee 18/4/05
Dagaalo xalay iyo Maanta
ka kala dhacay Magaalada Muqdisho
(Muqdisho April 20,
2005): Dagaal ay isaga soo horjeedeen Warasadii labada Sheekh ee lagu
tixgelin jiray Darriiqada Qaaddiriyada ee Suufiyadda ayaa habeenkii xalay
ahaa isaga horyimid Xarunta Shiikh Aadan Dheere ee Xaafadda Geed jaceyl ee
Degmada Wardhiigleey.
Dagaalkaan ayaa la isu
adeegsaday noocyada kala duwan ee hubka,waxaana uu ka bilowday lahaanshaha
milkiyadda dhulka ee Xeyndaabka Xertu ay degantahay, Dhulkaasoo qiyaastii ku
fadhiya ilaa boqol Boos.
Murankan keenay gacan ka
hadalka ayaa waxaa uu soo jiitamayay ilaa iyo markii uu geeriyooday Sheekh
Maxamad Faarax oo ahaa sheekhii Jaazada siiyay sheekh Aadan dheere, hase
yeeshee Ismaandhaafkan dagaalka sababay ayaa waxaa uu sii xoogeystay kadib
dhimashadii Sheekh aadan dheere oo dhowr bilood ka hor ku geeriyooday
magaalada Muqdisho.
Dagaalkan oo aan ilaa
hadda la ogeyn qasaaraha uu sababay ayaa haddana dadka ka agdhow dhismaha
xerada waxaa uu ku beeray cabsi farabada iyadoo habeenimadii xalay aheyd la
arkayay dad ka huleelaya guryahoodii,inkastoo ay subaxnimadii saakay ay dib
ugu soo laabteen xaafadahoodii, Inkastoo xabaddii ay joogsatay hadana ma
jiraan wax waan waan ah oo laga dhex sameeyay dhinacyada is haya ee dirirta
milkiyadda dhulka uu ka dhaxeeyo.
Dhanka kale laba qofood
ayaa ku dhimatay shan kalana waa ay ku dhaawacmeen dagaal maanta ka dhacay
xaafadda suuq-boocle ee degmada dharkeeynley, dagaalkan ayaa la sheegayaa
inuu isna ka curtay milkiyadda ceel biyood ku yaala deegaankaas.
Dagaalkaan oo ay isaga
horyimaadeen laba meliishiyo ayaa labada dhaawacantay waxaa ay ka mid
ahaayeen dableydii dagaalameysay.
Shaqaaqadan ayaa ka
dhacday dhulka uu gacanta ku hayo wasiirka ganacsiga ee dowladda federaalka
muuse suudi yalaxoow oo xilligan ku mashquulsan sugidda amaanka magaalada
muqdisho.
Golaha guurtida Hawiye oo baaq nabadeed u soo
jeediyay kooxaha ku dagaalamaya soomaliya
Baaqaan oo ay soo saareen xubnaha ku sugan
magaalada muqdisho ayay uga hadleen is afgaranwaaga iyo khilaafaadka mar
walba sii laba lixaadsanaya ee ka dhex jira labada gole ee dowladda
federaalka soomaliya iyo dagaalada ka soo cusboonaaday meelo ka mid ah dalka
tan iyo markii la dhisay dowladda.
Golaha ayaa ugu baaqay dowladda federaalka
inay xaliyaan muranka ka dhex aloosan mar haddii shacabka soomaliyeed ay u
heelan yihiin garab is taaggidda dowladda isla markaana ay muddo ku dhow
shan iyo toban sanadood aysan helin wax nidaam ah oo la taaban karo.
Golaha guurtida Hawiye ayaa cambaareeyay,
dilalka macna darada ah ee lagula kacaya shaqsiyaadka u adeegaya shacabka
taagta daran iyagoo tusaale u soo qaatay haweeneydii madaxda ka aheyd hay`ad
ka shaqeeysa howlaha caafimaadka oo maalin ka hor lagu toogtay KM4 iyo
weerarkii bambaanada ahaa ee lagu qaaday tuulada SOS oo ay ku dhaawacmeen
laba soomali ah iyo haweeney sooro ah oo u dhalatay waddanka talyaaniga.
Ugu danbeeystii ayay baaqooda ayay kaga
codsadeen in kooxaha iminka hurinaya colaadaha soomaaliya ay joojiyaan
iyagoo eegaya danta iyo maslaxadda umadda soomaliyeed oo ay sheegeen inaan
loo celin Karin dhibaato kale.
Baaqan golaha ayaa ku soo beegmay xilli ay
magaalada muqdisho ka jiraan qulqulatooyin iyo dagaalo goos goos ah iyo
nabaddoonimo ay wadaan qaar ka tirsan labada gole ee dowladda oo ay ku
doonayaan,ballana ay ku qaadeen sugidda amaanka magaalada muqdisho.
HASSAN DHAALEEY
Dheel10@hotmail.com
Mogadishu Somalia
Sadex qof ayaa dhimatay ugu yaraan lix
kalana waa ay ku dhaawacmeen kadib markii gaari nooca dhaynaha ah uu ku
rogmaday tuulada Aamineey ee gobolka jubbada dhexe
(Kismaayo April 20, 2005): Gaarigaan saakay
rogmaday ayaa waxa uu ahaa gaari nooca loo yaqaan Caasi Dhayno oo kasoo anba
baxay magaalada Muqdisho kuna si jeeday deeganka Dhoobleey ee gobolka
Jubbada Hoose ayadoo gaarigan uu ku rogmaday tuulada Aaminey oo 15 km
koonfur galbeed kaga beegan magaalada Jilib ee gobolka jubbada dhexe.
Dadkii saakay ku geeriyooday gaarigaas ayaa
waxaa meedkoodii lagu xabaalay magaalada Hargaysa yereey oo 7km u jirta
magaalada jilib halka dhaawaciina loola cararay isbitaal ku yala magaalada
mareerey oo ay gacanta ku hayso hay'ada MSF Holand.
Dadkaan saakay ku dhintay qaarkoodna ay ku
dhaawacmneen shilkaan gaari ayaa waxa ay u badnaayeen dhalinyaro intooda
badan u socday dalka Kenya kana soo tagay magaalada Muqdidho si ay halkaas
ugu galaan imtixaanka responserka oo oo ay filayeeen in ay ku aadaan dibada
.
Hadba shilkaan foosha xun ee saakay ay ku
la'deen sadexda qof ayaa sida la soo sheegayo waxaa sababtay kadib markii uu
darawalkii baabuurka uu u waday si xowli ah ayadoo ay wadada isku xirta
gobolada jubbooyinka iyo magaalada muqdisho ay tahay mid aad ula ildaran
burburkii kasoo gaaray dagaaladii ahliga ahaa ee afar iyo tobanka sano ka
socday dalka soomaaliya haatana aysan jirin cid wax ka qabanaysa wax yeelada
soo gaartay wadadaas halbolaha u ah isku socodka gaadiidka u kala goosha
gobolada jubbooyinka iyo magaalada muqdisho.
cabdi
qadar nuur maxamed (filipiin)
kismaayo soomaaliya
cabdiqadar84@hotmail.com
cabdiqadar@somalitalk.com
Amaanka Tuulada SOS ee magaalada muqdisho
oo la adkeeyay.
Taxadarka amaanka SOS ayaa yimid kadib
markii weerar bambaano lagu qaaday shalay oo ay ku dhaawacmeen laba Somali
ah iyo haweeney Sooro ah oo u dhalatay waddanka Talyaaniga, laguna magacaabo
Marzo.
Adkeynta amaanka SOS ayaa waxaa uu abuuray
in gaadiidka dadweynaha ee halkaasi ka shaqeeya, inaan loo ogolaan iney
istaagaan afaafka hore ee ku aadan albaabadeeda Si kooxihii weerarkii shalay,
aaney uga faa`iideysan markale.
Waxaana sidoo kale jiray maanta in si weyn
loo baarayay dadka raashinka u wada bukaanka ku jira SOS ama kuwa soo
booqanaya kuwaasi oo laga cabsi qabo in ay gelbin karaan waxyaabaha
qarxa,waxyeelana u geysan karta bukaanka iyo shaqaalaha SOS mar haddii
shalay gebi ahaanba la joojiyay howlihii caafimaad ee ay hay`addu shacabka u
heysay ka gadaal markii bam gacmeed lagu weeraray.
Hase ahaatee waxaa maanta si caadi ah u
socday howlihii caafimaad ee hay`adda SOS Sida uu ku waramayo ninka u
qaabilsan nabadgelyada.
Dadka ku dhaqan caasimadda Muqdisho ayaa si
xooggan uga xumaaday falka bambaano ee loo geystay tuulada caruurta iyo
hooyada ee SOS,iyo xitaa dilalka lagula kacayo shaqsiyaadka wax u qabanaya
shacabka,waxaana jira baaqyo kala duwan oo ay ka soo saarayaan falalkaas
dhanka ka ah insaaniyadda.
Hay`adda SOS ayaan sinnaba uga bixin
soomaliya mudadii afar iyo tabanka sanno aheyd ee dagaalada sokeeye ay dalka
ka socdeen,waxaana ay bixisaa kaalmooyin caafimaad oo lacag la`aan ah,iyadoo
si gaara u daweysa hooyada iyo dhalaanka soomaaliyeed.
Bambo lala
beegasaday Tuulada Caruurta ee SOS Muqdisho
Hassan dhaaleey
Dheel10@hotmail.com
Mogadishu Somalia
Gudoomiyaha
Baarlamaanka Soomaaliya Sh Xasan Sh Adan ayaa soo dhaweeyay
Warqadii Madaxweynaha ee 18/4/05
WARSAXAAFADEED
Nairobi
20 April , 2005
Guddoomiyaha Golaha
Baarlamaanka Federaalka KMG ah ee Jamhuuriyadda Soomaaliyeed
Mudane .Shariif Xasan Shiikh Aadan waxa uu si diirran u soo
dhoweynayaa baaqii taariikhdiisu ahayd 18 April , 2005 ee uu
soo saaray Madaxweynaha Jamhuuriyadda Federaalka KMG ah ee
Soomaaliya Mudane .Cabdullaahi Yuusuf Axmed taas oo furaysa
albaabkii wada hadalka.
Maadaama albaabkii furmay
waxaa muuqata in loo wada hadlo si rasmi ah iyo si aan rasmi
ahayn, wadahadalkaas oo mar walba la waafajinayo Axdiga KMG
ah ,si loo helo tubta toosan.
Albaabkaa furmay waa inuu
keenaa dib u heshiisiin,midnimo iyo wadashaqayn labada gole
ka dhex dhalata oo ka tarjumaysa sida Axdigu sheegayo.
Taa haddii la helo waxa
fududaanaya arrimaha ina horyaala oo ay ugu horrayso
midnimada iyo wadashaqaynta golayaasha Dowladda ,si loo
hirgeliyo waxa ay naga sugayso ummadda Soomaaliyeed iyo
caalamka oo dhan gaar ahaan dowladihii iyo ururadii
caalamiga ahaa oo ku bixiyey maalkooda iyo moodkooda shirka
badbaadinta Soomaaliyeed ee socdey labada sano iyo barka oo
ay ka dhalatay dowladnimadii Soomaaliyeed.
Waxaan si xushmad iyo
qadarrin leh aan ugu mahad naqayaa beesha caalamka oo gacan
weyn ka geysatey maal badana ku bixisay arrimaha nabadaynta
Soomaaliyeed ,ilaa maantana u ah heeggan nabadaynta iyo
xallinta khilaafaadyada yaryar ee ka soo ifbaxa maamulka
dowladda dhexdiisa.
DHAMAAD
Akhri:
Warqadii C/Laahi
Yuusuf u Diray Geedi & Shariif Xasan |
Dhinaca kale Rasulwasaaraha
Xukuumada Federaalka kumeelgaarka ah ee Soomaaliya Prof Cali Maxamed
Geedi ayaa isagu shalay ogolaaday Baaqa Madaxweynaha sheegayna in uu
dhiniciisa diyaar uyahay Midnimada iyo wada shaqaynta Xukuumada&
Baarlamaanka.
Madaxweynaha ayaa isagu codsaday in
la sharciyeeyo lana qeexo qodobadan
.Go'aankii Wasiirada Arrimaha
Dibedda ee IGAD
2.Qorshaha dib u guurista dalka:
B. Nabadaynta , dib u heshiisiinta
iyo maamul ka dhisidda Degmooyinka iyo Gobollada dalka .
T. Goobaha KMG ahaan Xukuumaddu ku sii shaqayn doonto:Baydhabo iyo
Jowhar iyo Muqdisho oo laga furayo xafiis Qaran oo fulinaya
barnaamijka nabadaynta magaalo madaxda.
J. Barnaamijka magaalo madaxda Qaranka ee Muqdisho ee hadda hor yaal
Golaha Wasaaradda.
3.Hub ka dhigista iyo xeraynta
maleeshiyooyinka oo laga hirgeliyo dalka oo dhan muddo saddex(3)
bilood gudahood ah.
4.Ballan qaad cusub ee xabbad
joojin iyo hub ka dhigis oo ay saxiixaan dhammaan xubnaha Xukuumadda
,Baarlamaanka iyo cid kasta oo haysata maleeshiyo hubaysan,ciddii
jebisa ballanqaadkaas la saxiixayna waxaa la horgeyn doonaa
maxkamadda dembiyada ee caalamiga ah.
5.Waa in la sameeyaa hab lagu
hubiyo meel marinta xabbad joojinta iyo hub ka dhigista oo ay
hogaaminayaan dalalka IGAD,Midowga Afrika,dalalka Jaamacadda Carabta
iyo xubno ka kooban oo ka tirsan beesha caalamka.
6.Marka lixdanka(60-ka ) beri ee
baarlamaanku dhammaado ,Baarlamaanku wuxuu fadhigiisa ugu horreeya
ku yeelanayaa meel kasta oo nabad ah ee dalka gudihiisa ah,haddii
amniga iyo nabadaynta magaalo madaxda Muqdisho aanay meel marin
mudadaas lixdanka (60-ka) cisho ah,isla markaana aanay soo caddayn
Hay'adaha ku xusan qodobka shannaad(5aad) ee isla warqaddan ,shirka
Baarlamaanka waxaa lagu qabanayaa Jawhar ama Baydhabo.
7.Marka ay timaaddo xaalad degdeg
ah ,Baarlamaanka waxaa isugu yeeraya Madaxweynaha Dawladda
Federaalka KMG ee Jamhuuriyadda Soomaaliya sida uu qabo xeerka KMG
ah.
III. Waxaan ka rajaynayaa Guddoomiyaha Baarlamaanka Federaalka KMG
ah iyo Wasiirka Kowaad in ay qaadaan tallaabooyinka muhiimka ah ,si
loo meel mariyo dhammaan qodobbada aan kor ku soo sheegnay.
Laakiin Gudoomiyaha Baarlamaanku
Amuurtaan Sooma hadal qaadin oo isagu waxa uu hadalkiisa ku koobay
uun soo dhaweynta Hadalkii Madaxweynaha iyo in dhinaca Baarlamaanku
diyaar uyihiin Midnimada iyo wada jirka bulshada Soomaaliyeed,
Waxaa Jiray Xubno ka tirsan
Baarlamaanka Soomaalida oo iyagu Gudoomiyaha Baarlamaanka ka
codsaday in la qabto shir aan caadi ahayn balse ilaa iyo hada
Gudoomiyaha Baarlamaanku kama uusan bixin wax wara.
Xidhibaanada Soomaaliyeed ee ku
sugan Nairobi ayaa mudo Labo goor ah gacanta iskula tagay
Madaxweynaha iyo Xidhibaanadii Dalbaday Shirka aan caadiga ahayn
macade sida ay ufaraxgalin doonto Warqada uu manta soo Saaray
Gudoomiyaha Baarlamaanka Sh Xasan Sh Adan
Axmed Muuse Cabdulle | nairobi,
Kenya | axmeddheere65@hotmail.com
Nin
wacyigeliye isku sheegay oo Rasuulka aflagaadayey
Faafin: SomaliTalk.com | April 20, 2005
BOOSAASO
& LA DAGAALANKA ANSHAX XUMIDA
Waxaa (19-04-2005) lagu qabtay Hoolka
Jamacada Bariga afrika Boosaaso Shir aad u balaaran oo ay yesheen
Wasaarada Diinta iyo Awqaafta iyo Culumo owdiinka Gobolda Puntland
Qaar ka mida...
Guji...
Kulaabo bogga www.SomaliTalk.com