Barnaamijkii Radio Xoriyo
15 Apr. 2005
- Shacab fara badan oo ciidamada cadowga
itoobiya ay ku xidh-xidheen Ogaadeenya
- Dagaalladii ugu denbeeyay ee dhex
maray cwxo iyo kuwa cadowga itoobiya
- Heshiis ciidammo heegan ah loogu
samaynayo dalalka Bariga Afrika
- Labo milyan oo qof oo AIDS ugu dhiman
doona Itoobiya
- Madaxweynaha DFKM ee Soomaaliya oo ku
hanjabey inuu kalsoonida kala laabanayo xukuumada Cali Maxamed Geedi
- Iyo Barnaamijkii Aragtida Halgamaaga
======================
Shacab fara badan oo ciidamada cadowga
itoobiya ay ku xidh-xidheen Ogaadeenya .
Ciidammada gumaysiga Itoobiya ayaa 22/3/05
dadwayne badan ka soo xidhxidhay deegaanka Daratoole, waxayna arrintaasi ka
denbaysay, ka dib markii dagaal halkaas ka dhacay si wayn loogu naafeeyay
ciidammada cadowga itoobiya. Dadka deegaanka Daratoole laga soo qabqabtay ee
hadda ku xidhan magaalada Wardheer ayaa waxaa ka mid ah:
- 1- Xasan Xayd.
- 2- Maxamed Xasan Xirsi.
- 3- Maxamed Magan Dalmar.
- 4- Gaaciye Wacdi Xaashi Jiis.
- 5- Eemar Aw-daa’uud.
- 6- Cabdi Dhiico.
- 7- Maxamed Cabdi
- 8- Faarax Cali Barkhadle.
- 9- Fadumo Maxamed.
- 10- Iyo Food-cadde.
Isla 22/3/05, waxaa Magaalada Wardheer lagu
xidhxidhay dadka kala ah:
- 1- Naado Xasan Barre.
- 2- Xaliimo Sh. Cabdi.
- 3- Axmed Jaamac waranle.
- 4- Cabdi Faarax Maxamuud.
- 5- Cabdi-kariin Siraad Koodey.
- 6- Cabdulaahi-suud Il-cirro.
- 7- Cabdulaahi Xuseen Budul.
Meesha lagu magac-aabo Ban-yare oo Iimey ka
tirsan ayaa 8/4/05,lagu xidhay dad rayid ah oo aan waxba galabsanin,iyadoo
weliba dadkaas lagu sooxidh-xidhay si naxariis darro ah oo dil iyo
jidhdilkujiro,waxaana dadkaas ka mid ah:
- 1- Beddel Muleec Laag.
- 2- Maxamed Qorane Muleec Laag.
- 3- Rumaan Beddel Muleec.
- 4- Cabdi Jawaab Axmed.
- 5- Hire Cabdi Jawaab.
- 6- Weli Suufi Garaad.
- 7- Axmed-Ciid Xasan Xuseen
- 8- Shire Cabdi Sheekh.
Waxaa kaloo jira dad shacab ah oo meelo
kale lagu kala xidh-xidhay oo aan magacyadooda dib ka soo sheegi doono.
Dhinaca kale gumaysiga Wayanaha oo siyaabo
kala duwan u cadaadiya dadwaynaha Soomaalida Ogaadeenya ayaa toddobaadkii la
soo dhaafay billaabay inuu dadwaynaha ka af-qabto Ceelashii biyaha. 10/4/05,
ayuu gumeysigu dadka iyo duunyadaba ka xidhay ceelashii waaweynaa ee waqtiga
kulaylaha loo baxsan jiray, waxaana Ceelashaas ka mid ah Ceelka Hadhaawe iyo
Ceelka Dhanaan oo labadaba loo diiday dadkii iyo dunyadiiba inay ka cabaan,
diidmada noocan ah ayay sabab uga dhigeen in Ceelashan ay Jabhaddu ka cabto.
Dagaalladii ugu denbeeyay ee dhex maray
cwxo iyo kuwa cadowga itoobiya.
Wariyaha RX uga soo warama jiida hore ee
cwxo ayaa noo soo tabiyey dhacdooyinkii dagaal ee ugu dambeeyey ee dhexmaray
naftood hurayaasha cwxo iyo ciidamada nacabka gumaysiga itoobiya waxaana
dagaaladaas ka mid ah:
Dagaal ka dhacay duleedka Iimey
10/3/05,dagaalkaas ayaa ciidamada Wayaanaha lagaga dilay 5 askari, halka 3
kalana laga dhaawacay.
18/3/05, dagaal ku dhexmaray ciidammada
JWXO iyo kuwa Wayaanaha meesha lagu magac-aabo Magaalo-cad,ayaa 2 kamid ah
ciidammadii Wayaanaha lagu dilay midna lagu dhaawacay.
Dagaal ku dhex maray Daratoole
22/3/05,ciidamada xoraynta Ogaadeeniya iyo kuwa Wayaanaha itoobiya, ayaa
ciidamada Wayaanaha lagaga dilay 2 askari, 3 kalana lagaga dhaawacay.
5/4/05, Walaal-goo, oo Dhanaan ka tirsan,
ayaa lagu qab-qabtay koox Dabaqoodhi ah, ka dibna intii hubkii laga qaatay
ayaa la sii daayay.
Sidoo kale 6/4/05, Dhooba-weyn ayaa iyana
lagu qabtay koox Dabaqoodhi ah,kadib markii hubkii ay siteen laga qaatay
ayaa lasii daayey.
Heshiis ciidammo heegan ah loogu samaynayo
dalalka Bariga Afrika.
Kulan horraantii toddobaadkan ay ku
yeesheen madaxda dalalka Bariga Afrika caasimada itoobiya magaalada Addis
Ababa ayaa lagu go’aamiyay in ciidammo heegan ah loo sameeyo dalalka Bariga
Afrika, waxaana go’aankan gogol-dhig looga dhigay qorshe ay soo diyaariyeen
wasiirrada gaasdhaandhigga ee wadammada Bariga Afrika.
Kulankan waxaa ka qayb galay
madaxweynayaasha dalalka Suudaan, Soomaaliya, Jabuuti iyo ra’iisal wasaaraha
gumayisga Itoobiya. Waxaa sidoo kale ka qayb galay wasiirrada gaashaandhigga
iyo kuwa arrimaha dibada ee dalalkaas. Dalka Eritereya oo ka mid ah dalalka
muhiimka ah ee Bariga Afrika ayaa kulankan ka baaqday.
In kastoo ayna dawlada Eritereya hadal
rasmi ah ka soo saarin baaqashadeeda haddana waxaa la filayaa in meesha
kulanka lagu qabtay oo Eritereya ayna ku faraxsanayn ay ahayd sababta ugu
weyn ee baaqashada keentay. Waxaa kaloo jira warar kale oo sheegaya in
sababta ay Eritereya arrintan uga gaabsatay ay tahay iyadoo xukuumadda
Itoobiya ay lahayd fikrada samaynta ciidammada heeganka ee Bariga Afrika,
isla markaana ay aad uga shaqaysay sidii loo gaadhi lahaa heshiis ciidammo
noocan ah lagu sameeyo.
Ciidammadan ayaa loogu talagalay inay si
dhakhsa ah uga hawlgalaan meelaha ay qulquladuhu ka dhacaan ee wadammada
Bariga Afrika, waxaana xarun looga dhigi doonaa caasimada gumaysiga Itoobiya
ee Addis Ababa.
Labo milyan oo qof oo AIDS ugu dhiman doona
Itoobiya.
Tirada dadka Itoobiya ugu dhinta cudurka
dilaaga ah ee AIDS-ka ayaa seddex sano godohood labanlaabmi doonta, isla
markaana gaadhi doonta 1,8 milyan oo qof, sidaas waxaa tilmaantay daraasad
uu Maraykanku sameeyay oo arbacadii la faafiyay.
Dadka Itoobiya AIDS-ka ugu dhintay
sannadkii 2003 waxay ahaayeen 900,000 oo qof waxaana la filayaa in tiradaasi
ay gaadho 1,8 milyan oo qof sannadka 2008, haddii ay xaaladdu ku sii socoto
sida ay hadda tahay, arrintaasoo dhibaato wayn u keeni karta guud ahaan
dadwaynaha ku dhaqan gobolka Geeska Afrika.
Daraasadaasi waxay sheegtay in dadka
waawayn ee Itoobiya hadda ku dhinta, marka seddex meelood loo dhigo, meel ka
mid ah ayaa u dhinta cudurka AIDS-ka, sidaas waxaa tilmaantay daraasadaas.
Waxay kaloo muujisay daraasadaasi in dadka ku jira da’dii la shaqaysan lahaa
ee cudurkan u dhimanaya ay ka dhalan karto dhibaato dhaqaale oo aad u xun.
Daraasadani waxay kaloo tilmaantay in
ciidammada Itoobiya ay qayb wayn ka qaataan faafinta cudurka AIDS-ka.
Qiyaastii 75,000 oo ka mid ah ciidammadii la ruqseeyay markii uu dhammaaday
dagaalkii Itoobiya iyo Eritereya dhex maray ayaa la sheegay inay cudurkan si
wayn u faafiyeen markii ay guryohoodii ku noqdeen.
Isbitaal wayn oo lagu daweeyo saraakiisha
ciidammada hadda ka tirsan iyo kuwii horay uga tirsanaan jiray ayaa 80%
sariirihiisa waxaa jiifa dad qaba cudurka AIDS-ka. Marar badan oo hore ayaa
laga dhawaajiyay in ciidamada gumaysiga Itoobiya ay si ula-kac ah cudurka
AIDS-ka ugu faafiyaan dadwaynaha Soomaalida Ogaadeenya.
In kastoo ayna warbixintani si toos ah u
sheegin ciidammada Itoobiya ee Ogaadeenya ku sugan inay faafiyeen cudurka
AIDS-ka, haddana waxay warbixintu tilmaantay in ciidammada Itoobiya ee
furimaha jooga ay cudurkan faafiyaan.iyadoo Ogaadeenyana ay ka mid tahay
furimaha ay Itoobiya ciidammada badan gayso.
Madaxweynaha DFKM oo ku hanjabey inuu
kalsoonida kala laabanayo xukuumada Cali Maxamed Geedi
Madaxweynaha Dowladda federaalka ee
Soomaaliya Cabdullaahi Yuusuf Axmed ayaa ku hanjabey inuu kala dirayo
xukuumadda Cali Mohamed Geedi hadii ay ku guul-dareeysato wax ka qabashada
qorshaha horyaala ee shacabka loogu adeegayo,hasa-ahaatee madaxweynuhu ma
aanu sheegin xiliga uu kala eryayo dowladda Ra’iisal Wasaare Geedi wuxuu
kaloo madaxweynuhu intaas raaciyey in uu jiro khilaaf ka dhex aloosan golaha
wasiirada ee dowlada federaalka.
Madaxweynaha ayaa sheegay inaanu shacabka
soomaaliyeed dooneyn Ciddii ka gaabineeysa Howlaha wax loogu qabanayo
Qaranka iyo umadda somaaliyeed.
Wargeeyska Al khaleej ee ka soo baxa
Imaaraadka carabta oo uu hadalkaan siiyey ayaa sheegay in madaxweynahu uu ku
wargeliyey labada Gole ee xukuumadda in guud ahaan Umadda soomaaliyeed ay
dareemeen waxa ka dhex jira labada Gole.
Cabdulaahi yuusuf ayaa hadalkiisa intaa
raaciyey in dhawaan ay dowladdiisu sal dhigan doonto Gudaha soomaaliya
inkastoo uusan cayimin Goobta la geeynayo dowlada,wuxuuse Kal hore sheegay
in lakala geynayo magaalooyinka Jowhar iyo Baydhabo.
Madaxweynaha ayaa sidoo kale sheegay in
beesha caalamka ay diyaar ula tahay wax ka qabashada baahida dowladda hase
yeeshee Sharuud looga dhigay in Dowladdu ay tagto gudaha soomaaliya oo kal
hore looga baahnaa in ay gaadho.
Hadalkaan ayaa ku soo beegmey Xili labada
Gole ee dowlada ay isaga so horjeedaan xagga afkaarta oo qaarkoodna ay
muqdisho ku sugan yihiin ayagoo wada Ol ole balaadhan oo ay ku doonayaan
sugida amaanka ee magaalada Muqdisho.
Radio Xoriyo
15 Apr. 2005
C/nuur Sh. Mohamed
radioxoriyo@ogaden.com
raadioxoriyo@yahoo.com
Radio Xoriyo waxaad ka dhegaysan kartaa
Mawjadda 19 MB ee dhererkeedu yahay 15670 KHZ, Maalmaha Talaadada iyo
Jimcaha 7: 30PM waqtiga Afrikada Bari
Faafin: SomaliTalk Apr 15, 2005
Minnesota: Soomaali Dembi Loogu Soo oogey Arrimo La Xiriira Cashuur Celinta
Dawlada
»Canada:
Hal qof oo loo xiray dilkii aqooyahankii Soomaaliyed
»USA:
Laba qoys oo Soomaaliyeed oo iskaga hor yimid gabar
»Baaritaan
lagu sameeyey cashuur celinta Soomaalida MN
Wararka oo dhan ka akhri halkan...Guji...
Kulaabo bogga www.SomaliTalk.com