Maxaa
u sabab dharbaaxada ku dhacday Xisbiga
Dimuqraadiga?
Marka hore
doorashadaii dhacday Noveembar 2 deedii,
waxay ku soo gabagabowday sidii la
saadaaliyay oo ahayd dagaalka ugu xun waxuu
ka dhacayaa Gobalka Ohio oo ninkii ku raaya
ayaa aqalka cad fariisan doonaa.Waxaa la
isla soo gaadhay 254 Electoral Vote uu helay
Madexweyne Bush iyo Sen.Kerry oo helay 252
Electoral College, waxayna arrini isugu
ururtay ninkii hela Ohio ayaa gaaraya 270
kii loo baahnaa, wax macno ahna ma sameynayn
gobaladii yar yaraa ee markaas harsanaa sida
New Mexico iyo Iowa.Labada oday waa Bush iyo
Kerry e waa tii kabaha uga dhammaadeen
labadii sano ee la soo dhaafay Gobalka Ohio,
iyagoo reer Ohio ka codsanayay inay siiyaan
Codkooda, sidii bayna noqotay oo Dagaalka
Ohio ninkii ku raayay ayaa aqalka cadna ku
raayay
Gobalka Ohio
intii uu xukunka hayayay Bush waxaa la soo
gudboonaatay dhaqaalo xumo iyo shaqo la,aan
baahsan, waxaa ka xirmay warshado badan oo
ay caan ku ahayeen, ilaa 240 kun oo shaqo
ayaa luntay,busaarad tii u xumayd ayay u
ahayd sanadahan reer Ohio, halkii markii
Clinton haystay uu xaalka dhaqaaluhu sida
dalka intiisa kale uu heer sare marayay oo
lagu jiray badhaadhe.
Haddaba iyadoo
arrintaas xasaasiga ah jirto maxaa dhegaha
looga furaystay John Kerry oo loo door biday
Madexweyne Bush?
Jawaabta laga
bixiyay sababaha guud ahaan Xisbiga
Dimuqradiga ugu dhacday dharbaaxadu,ayadoo
xagga Madexwenimada ka sakow lagaga adkaaday
tirada Congareyska- oo ugu yaraan laga
xayuubsaday seneternimda 4 saaida (waxay
heleen Jamhuurigu hadda 55,halkii ay hore u
haysteen 51 seneter), aqalka wakiiladana ugu
yaraan 5 dheeriya ku sii darsadeen
majoortigii hore oo meeshii ay ka haysteen
227 hadda waxay gaadheen 232, waxaa jabkaas
u sabab ah baa la leeyahay labada waxyaalood
ee Maraykanka ku wayn ee Faith and
Value, oo ah arrimo ku taxaluqa
Diinta iyo dhaqanka. Madexweyne Bush waxa
kaliya oo taageerayaashiisu ku ammaanaan
waxaa weeye inuu yahay nin cibaado badan oo
mar walba ku xiran kaniisadda, isla markaana
uu si xun uga soo horeejeesto arrimaha
anshax xumida iyo iska soo tuurka Ilmaha.
Maalmihii u
dambeeyay dadka u ololaynayay Bush waxay la
soo baxeen ololo cusub oo lagu
shaabadaynayay Kerry iyo Dimuqradiga waxaa
hadaladooda ka mid ahaa ilaah waxuu abuuray
Aden iyo Xaawo ee ma abuurin Aden
iyo Yuusuf maxaa waxaad u codayn
nin la jira inay is guursadaan labo nin
amase labo naagood,taasoo loola jeedo Kerry
inuu si toosa u diidin arrinta dadka laga
roonayaasha (Quumaloodka), walow uu marar
badan Kerry yiri Guur waxaan u aqoonsanahay
Nin iyo Naag, haddana doodihiisu markay
arrintaas timaado sida cad ee bush u diido
Quuma loodka iyo ilma iska soo tuurka iyo ku
xirnaanta Eebbe si fiican uma cadda oo Kerry
waxaa ku dhegtay eedayntii Jamhuuriga ee
ahayd inuu yahay nin Liberaal ah.Dadka
Maraykanka gaar ahaan dadka ku nool dhulka
magaalooyinka waawayn ka durugsan wax walba
waxa uga wayn arintaas marka Bush hiil
fiican ayuu ka helay doodaas lagu
shaabadeeyay Kerry iyo Xisbiga
Dimuqraadiga.oo xitaa hogaamiyihii xisbiga
Senterada Dimuqraadiga ee Tom Daschle waxuu
ku waayay kursigiisii laga soo dooran jiray
South Dakota,isagoo muddo ka badan 26 sano
ku jiray xayndaabka Congaraysaka,isna waxuu
sabatay Liberaalnimda oo aan la maqashiin
karin Gobalka baaxdda wayn balse dadka yar
ee iska reer beeralayda ah .
Markay timaado
xisbiyada Dimuqraadiga iyo Jamhuuriga ma
kala dad badna, oo waa isku dhawyihiin,balse
arrimahaas dartood (Faith and Value), dad
Dimuqraadiya ayaa u codeeyay
Jamhuuriga.Markay timaado arrimaha
dhaqalaha, shaqada, howlgabka
,waxbarashada,Caafimaadka , xoriyadda qofka,
dadku waxay u janjeereen dhanka
Dimuqraadiga, laakiin markay timaado
arrimaha la dagaalanka argagixisada,
dhaqanka iyo diinta waxay dadku u janjeereen
Jamhuuriga,arrinta Ciraaq waa la sinaa oo
dadku waa ku kala qaybsanaa.
Dadka
Siyaasaddau odorosa waxay leeyihiin xisbiga
dimuqraadigu waxuu u baahan yahay inuu dib u
habayn isku sameeyo oo ay wax ka bedelaan
debecsanaanta ay u debecsan yihiin kuwa
ilaah ifka ku ciqaabay ee laga
roonayaasha(Qoomuluudka), iyo kuwa laynaya
ilmaha uurka ku jira ee aan dhalan(
Abortion),oo waxay leeyihiin waa in la helaa
aydayiloojadii Madexweynihii hore ee
dimuqraadiga ahaa ee Rosevelt,oo isku waday
dhaqanka iyo Furfurnaanta bulshada.
Dadka laga
tiro badan yahay oo Soomaalidu ka mid tahay
waxay si xoog leh ugu codeeyeen Xisbiga Dimuqraadiga ee
Kerry,waxayna u door bideen sababaha ay u
joogaan dalkaan oo ay ugu horayso shaqada,
waxbarashada, caafimaadka, guriyeenta iyo Ku
xadgudub la,aanta xoriyadooda oo u janjeedha
xagga xisbiga Dimuqraadiga.
Cynthia Mckinney oo dib u hanatay
kursigeedii ka dib markii ay ka maqnayd
muddo labo sano ah.
Cynthia
Cynhia
Mckinney oo sida lala socda marar badan
saxaafaada Soomaaliga gaar ahaan Websityada
Internetka lagu soo bandhigay siday ugu
doodi jirtay laajiyiinta iyo dadka
Muslimiinta ee Soomaalidu ugu horayso,ayaa
sanadkii 2002 dii lagaga guulasytay aqalka
wakiilnimda ee Degmada 4aad ee Gobalka
Georgia, ka dib markii loo adkaysan waayay
sida hagar la,aanta ah ee ay ugu hiilinaysay
Muslimiinta,ayadoo aan indhaha ka qarsan
xadgudbyada lagu hayo masaakinta reer
falastiin,waxayna marar badan ku celcelisay
in dhexdhexaad laga noqdo arrinta beriga
dhexe oo runta loo sheego yahuuddu tacadiga
ay ku hayso muslimiinta adduunka.Yahuudda
Maraykanka oo awood dhaqale iyo mid
siyaasadba ku leh dalkan Waxay awoodoodii
isugu geeyeen sidii looga takhalusi lahaa
Marwo Mckinney, hanti aad u faro badanna waa
lagu kharashgareeyay sidii kursiga looga
tuuri lahaa sandkii 2002dii, ayadoo nasiib
darro dadkii ay u hiilinaysay ee ugu
horeeyaan Muslimiintu ayan u hurin dhaqaale
olole sidii kuwa ka soo horjeeday ay ugu
hureen inay hanti badan geliyaan sidii ay
udhici lahayd marwo Mckinney,waxaana
xisbigeedii Dimuqraadiga kula loolamay
gabadh madow isla yihiin Lafo maroodi iyagaa
la isku jabiyaa) kagana guulaysatay
Primarigii hore ee isreebreebkii
Dimuqraadiga, sidaana Cynthia Mckinney waxay
kursigeedi ay ku lahayd aqalka wakiilada oo
ay fadhiday muddo dhan 10 sano ku wayday
sanadkii 2002dii ayadoo sababsatay u
doodidda dadka dulman.
Cynthia
Mckinney waxay usuurowday inay ku guulaysato
kursigan ka dib markii gabadhii ka hantiday
sanadkii 2002dii oo lagu magacaabo Dennise
Majette ay u hanqaltaagtay kursiga
Seneternimada Georgia halkaasoo banaanaatay
ka dib markii seneterkii hayay ku dhawaaqay
inuu howlgab yahay, Nasiib darose Dennise
Majette waxaa ku dhacday sida John Edwards(
oo Seneterrnimadiisi baneeyay si uu helo ku
xigeenimada Kerry) oo miro guti ku jira kuwa
geed saaran looma daadsho ayaa Soomaalidu
oran jirtaye,koodiinna waa lumiyeen kii ay
haweysteenna waa waayeen.Cynthia Mckinney
waxay si xoog leh uga badisay ilaa 20-eeyo
isku soo sharaxay isreebreebkii hore,ka
dibna waxay si sahlan uga adkaatay loolankii
dhexmaray iyada musharxii ka socday
Jamhuuriga.Jannaayo 20keeda ayay dib ugu soo
noqon kursigeedii Washington DC,iyadoo waliba
haysata sanadka soo socda iyo wixii ka
dambeeya garabweyn-waa ninka sideeda u dooda
dadka la dulmiyo oo noqday Seneterada
awoodda badan waa Barack Obama oo si xoog
leh looga soo doortay Gobalka Illinois.