AAGGAN ANAGAA KA TALINA!
Ismail
A. Hassan (khaliil)
<khaliilha484@hotmail.com>
Oraahdan kor ku xusan waxaan filayaa inaanay ahayn
mid dhagaheena ku cusub waana waxyaabaha laga dhaxlay xaaladda
dawlad la’aanta ee Soomaaliya ku sugnayd afar iyo tobankii sanno ee
aynu soo dhaafnay.
Waxay ahayd maalmo yar uun kadib markii Maxamaed
Siyaad laga saaray magaaladii caasimadda u ahaan jirtay Soomaaliya
markii aan ka raacay baabuur bas ah magaaladaas anigoo u jeeddda
dhinaca Afgooye. Markii aanu soo gaarnay kantaroolka Afgooye ayaa
wiil qori AK ah sitaa inta uu baabuurkii soo fuulay uu mid mid isha
u mariyay rakaabkii baabuurka saarnaa ka dibna inta uu ka degay
dhinaca daaqaddii wadaha istaagay weydiiyay sababta uu baabuurka ugu
qori waayay SPM, kuna sii daray isagoo hadalkii sii wata “miyaanad
ogeyn in aaggan SPM ka taliso”.?
Marka aad fiirisid wadankoo idil xilligaas
kooxaha aag ka taliyaa kama badnayn afar urur, SPM-na waxay gacanta
ku haysay sidii uu Mengiste u soo qoondeeyayay laga soo bilaabo
xadka Kenya ilaa duleedka magaalada Muqdisho carigaas oo ah dhulka
Soomaaliya ugu dadka iyo khayraadka badan.
Inkastoonan sannadihii u danbeeyay maqal dhul la
leeyahay SPM ayaa ka talisa hadana toddobaadadii aan soo dhaafnay
mar kale ayay magacaasi aad u hadal haysay saxaafaddu siiba marka
laga hadlayo dagaalada ka soo cusboonaaday Jubbooyinka.
Maanta magaalo, tuulo iyo geed wal oo Soomaaliya ku
yaala dadbaa hub la yuurura oo leh aaggan anagaa ka talina. Bal u
fiirso caasimaddii Soomaaliya immisa goobood oo kooxo, dagaal
oogayaal iyo xataa ganacsato ka taliyaan ayay u kala qoqobantahay.
Aag ka talintu waxay noqotay awood ay dagaal
oogayaashu ku gorgortamaan laguna qiimeeyo marka ay isugu yimaadaan
waxa loogu yeero shirarka dib u heshiisiinta, iyagoo isla markaana
aaminsan ciddii aanan aag ka talin xaq u lahayn ka ariminta ayaaha
Soomaaliya , nin kasta oo damac xukun qabana waxaa hortaala
su’aasha ah horta aaggeed ka talisaa?!
Dhanka kale aag ka talintu waa hab ay dagaal
oogayashu ku helaan dakhli fara badan oo siday doonaan u
isticmaalaan kuna maal geliyaan maleeshiyooyinkooda
Arrintani waxay sii holcisay dagaaladii sokeeya
maadaama dagaal ooge kastaa ama koox kastaa isku dayday sidii ay
dhul ballaaran oo ay ka amar ku taagleyso u qabsan lahayd,
waxaana dhacday in magaalooyinka qaarkood lix jeer
iyo in ka badan la kala qabsado oo marba qolo ay gacanteeda gasho
shacabka deegaankaasna dhib iyo dibindaabyo joogto ah mutaan.
Maanta Soomaaliya dadka ugu ayaanka darani waa dadka
nabadda jecel ee aan iyagu hubaysnayn oo inta dhulkooda la qabsado
mararka qaarkoodna addoonsi loogu sii daro.
Waxaa jira qabiilooyin dhulkoodii ka soo guuray oo
beelo kale oo masaakiin ah sida ayaxii ugu dul habsaday cid uga
miciintaana aanay jiri, Soomaaliyana waxay noqotay meel ciddii xoog
leh la tix geliy oo qoriga keliya wax lagu qiimeeyo.
Beelo badan oo xilliyadii dagaalada sokeeya
bilaabmeen la isku dul haystay oo marba qolo u talin jirtay ayaa
markii ay qoriga qaateen ee ay iska xoreeyeen kuwii xaqdarrada ku
haystay maanta tix gelin weyn la siiyaa oo aan cadkooda cid kale
damac ka geli karin.
Sidaan hore u soo sheegnay kulan kasta oo looga
hadlayo arrimaha Soomaaliya waxaa mudnaanta la siiyaa ciddii aag ka
talisa iyadoo aan marka hore la is weydiin in dadkaasi xaq u
leeyihiin inay aaggaas ka taliyaan iyo in kale.
Shirka hadda gebagebada ah ee ka socda Kenyana waxa
uu bilawday iyadoo ay jiraan goobo badan oo ay xoog ku haystaan dad
ka soo duulay deegaano kalena, la iskumana deyin in marka hore xal
loo helo dhibaatooyinkaas ee waxaa xoogga la saaray sidii xal guud
loo gaari lahaa taasoo u muuqata in arrinka kor laga dhoodhoobo
iyadoon marka hore dhibaatooyinka jira la lafa gurin.
Waa ayaan darro in waqtigan oo la filayo in
dawlad Soomaaliyeed wadanka looga soo diro dhinaca Kenya in hadana
dhanka kale ay bilaabmaan dagaalo ujeedada keliya ee laga leeyahay
ay tahay aag ka telin.
Jenaraal Morgen oo dad badni ku eedeeyaan inuu
yahay ninka isagu mas’uulka ka ah dagaaladaas ayaa in badan ay
dhibaato ka haysatay siiba intii uu ka qayb gelayay shirka Kenya
sidii uu jawaab ugu heli lahaa su’aasha ah aaggeed ka talisaa?
Hadaba dagaalada iyo dhaq dhaqaqa uu hadda Jananku
ka wado deegaanka Jubbooyinka ayaa u muuqda mid uu kaga jawaabayo su’aashaas
mudada dheer lala daba taagnaa hase yeeshee weydiinta meesha ku
jirta ayaa ah mar haddii dawlad la dhisayo maxay tahay qiimaha ay
yeelanayso aag ka talintu maadaama ay wadanka oo dhan iyadu u talin
doonto?
Waxaa jira wax yaabo badan oo mugdi ku jira oo aanay
cadayn sida ay ka yeeli doonto dawaladdaas qaybaheedii ugu horeeyyay
la unkay ee dhammaytirkeedana la wada sugayo.
Sida ku xusan axdi qarameedka mudada shanta sanno ee
soo socota wadanka lagu maamuli doono Soomaaliya waxaa lagu dhaqayaa
nidaamka federaalka inkastoo aanay caddayn waxa uu federaalkaasi ku
salaysnaan doono sida qabiil, gobolada hadda jira,waqooyi iyo
koonfur, kala duwanaanta afka maadaama la xusay in Soomaaliya laba
af looga hadlo, maamul goboleedyada iyo aagagga ay hadda dagaal
oogayaashu ka taliyaan iwm.
Waxaan shaki ku jirin in dhibaatooyin badan oo adagi
ay ku soo fool leeyihiin dawladda Soomaaliya dhawaan ka dhalan
doonto.wax ka qabashadooduna waxay ku xirantahay sida ay daacadda
uga yihiin dagaal oogayaasha iyo guud ahaanba shacabka Soomaaliyeed
dhismaha dawladdaas.
Si kastaba xaalku ha ahaatee waxaan cidna daah ka
saarnayn in dagaalada jubbooyinka iyo gobolada kale ee xoogga looga
taliyaa ay noqon doonaan imtixaanka ugu horeeya ee la filayo inay ka
gudubto dawladdan la sugayaa..
C/qaasim, Yalaxow, Caato, Indh cadde, Barre Hiiraale,
Morgan iyo kuwa kale ee maanta la sheegayo inay isku haystaan
gobaolada jubbooyinku waxaa keliya ee ay ka wada siman yihiin waa
iyadoo uuna midkoodna u dhalan goboladaas ay isku dagaalamayaan iyo
aaggag kale oo ay ka taliyaanba.
Hadaba iyadoo aan rajo fiican laga qabin wax qabadka
dawladda dhismaheeda lagu gudo jiro ayaa hadana ay noqon doontaa mid
isha lagu hayn doono bal in shan sanno oo tii Carta oo kale ah loo
tiriyo iyo inay ka dhabayso rajada shacabka Soomaaliyeed ee
dawladnimada u ooman.
Ismail A. Hassan (khaliil)
<khaliilha484@hotmail.com>