Quruxda yaan u leenahay, Qalabka yaan u
sidanaa!!!
C/Rahman eelay
eediran@yahoo.com
Waxaa ii sheekeeyey saaxiibkay Mohamed.
Mohamed wuxuu yidhi: “sanooyin hore ayaa anagoo dhalinyaro badan ah ayaan
College dhigan jirnay. Waxaa nala fasal ahaa Gabadh Soomaaliyeed. Gabadhu
waxay ahayd mid Eebe Weyne ku xardhay qurux dheeraad ah, Asturan oo diinta
aad u taqaana, Xariifadna ah oo naga wada buunda badan, waxayna ahayd
gabadha keliya ee nala joogtay magaalada. Tartan dheer iyo is reebreeb ayaa
naga dhex bilowday oo ah ninkii ku guuleysan lahaa helida gabadhaas. Waxaa
naga dhamaaday ayuu Mohamed yidhi lebiskii, is jejebintii iyo istuskii.
Waxaa uu mid walba oo anaga naga mid ah jeclaysan jirey in uu ka kale kaga
hor maro salaanta iyo bariidada gabadha si uu maalintaa uga diyaariyo in uu
iyada la fariisto.
Anagoo baratankii, ganbar bajiskii,
hadiyadii iyo booqashadii naga dhamaatay oo nin waliba uu ka kale waxba u
ogolayn, sida Dagaal Oogayaashii, ayaa waxaa nagu soo biiray mid na yidhi
bal bareega qabta. Cabaas oo bacdiisii qaba ayaa diyaarad ka soo degay
waxayna markiiba is nabdaadiyeen gabadhii oo sheeko dheer iyo waayo waayo
laga sheekeystay. Waxaanu u soo kala dhuumanay habeenkii gurigii Cabaas ku
soo degay oo aanu weydiinay su’aalo badan oo aanu ku raadraacayno gabadhan
na xiijisay iyo asalkeedu meesha uu ka soo jeedo. Cabaas baa mar keliya
afkiisa furtay: “Laa Ilaaha IllaLaahu! Waar ma Midgaantii aanu isku xaafada
ahayn baad u baratamaysaan”! Yaab baa Illaahay noo keenay! Waxaanu bilawnay
istaaqfureysi iyo shalaayti aanu ku soo jeednay habeenkii oo dhan. Ragga
qaarkii waxay ahayd markii u horeysay ee ay la kulmaan Midgaan oo ay la
sheekeystaan! Osman baa yidhi: “ Weligey ma arag Midgaan! Aniga iyo Midgaan
waxaanu isku ahayn Reer guuraa Raac iyo Ilmahii lagu cabsiinayey waayo
weligood isma arkaan”!.
Subixii baa waagu beryay anagoo welwelsan
oo u kalahnay iskoolkii. Waxaa fasalkii nooga soo horeeyey Zamzam oo fadhida
kursigeedii. Anaguna salaan iska daayoo waxaanu ka wada fariisanay xaggii ay
dabeeyshu ka soo dhacaysan si aysan noogu neefsan!. Aad bay u yaabtay oo
dhowr goor bay na soo eegtay mise cirkaanu wada eeganaa!. Way iska fahantay
in Cabaas cudur nagu abuuray!. Inta ay ooysan bay albaabka halhaleel uga
siibatay maalma ka dibna gabadhiiba waanu ku diinay”!. Mohamed wuxuu ii
sheegay in uu ilaa iyo maanta gabadhii raadiyo si uu cafis uga dalbado una
wanaajiyo, wuxuuna yidhi isagoo ilmaynaya: “caqliga aan maanta leeyahay
haddaan waagaas lahaan lahaa walaashay dhibkaasi sooma gaareen anagana dhib
nama soo gaareen”!. Waxaan weydiiyey dhibta uu tirsanayo, wuxuuna I
weydiiyey su’aasha ah
Maxaa ku kelifay nimanka Soomaaliyeed in ay
doontaan haween ajnabi ah oo aan dhaafi Karin albaabka, barruur darteed?.
Meeshii uu jawaab sugayey ayaan qosol is hayn waayey oo waxaan soo xasuustay
sheekadii naga qabsatay fasalkii aanu ku jirnay aniga iyo Ciise!.
Waxaad ogaataan in bulsho waliba ay quruxda
si gooni ah u taqaan. Tusaale ahaan marka la tilmaamayo quruxda haweenka ee
wadankan Mareykanka waxaa dadku eegaan sida ay gabadhaasi caato u tahay oo
lafaheeda looga arki karo maqaarkeeda: waa in la tiring karaa lafaha luqunta,
laf dhabarta iyo kuwa miskaha iyo suxulada. Inkastooy jiraan waxyaaba kale
oo qiimeynta quruxda soo gelaya oo ay ka mid tahay daaman dhuudhuuban oo
dhaadheer oo caata ah haddana qiimeynta u horeysa waa u ekaanshaha Reer
Aakhiraadka. Sababtaa darteed ayaa dumarkeenii yimid qurbaha ay u bilaabeen
in ay is caateeyaan oo waxaad maqlaysaa beryahaa waxba ma cuno oo waan is
macaluuleynayaa, is caateynayaa ama cuntadaan ka soomayaa(Diet baan ku jiraa).
Inkastooy faaiido ku jirto ismacaluuleyntu si looga baxsado cudurada aynaan
garanayn ee ay keeneen deegaankan nagu cusub ee cuntadiisa iyo hawadiisuba
kiimikadu ka buuxdo iyo dhaqdhaqaaq la’aantu, haddana dad badan ayaa qaba in
quruxdu ay tahay lafalafonimada. Waxaad arkasaa hooyo kula doodaysa
dhakhtarka ilmaheeda in uu fiitamiino u qoro carruurteeda waayo waxay u eg
yihiin qaxooti!. Dhakhtarkii oo yaaban baa ugu jawaabaya: “nasiib baad
leedahay haddii aad haysatid carruur sidan u caata ah! Alla qurux badanaa”
Hooyadii Soomaaliyeed baa xanaaqasa oo ka bedelanaysa dhakhtarkaa oo
raadinasa mid ka fiican oo u qora fiitamiino si carruurteedu u cayilaan.
Waa sharixii quruxdee waxaa jirta in haddii
gabadhu ay lafaheeda qarsoon yihiin ama ay hilib yar leedahay aysan heleeyn
nin shukaansada ama ka damacsan mustaqbal waxaana lagu bilaabaa dacaayad iyo
cay joogta. Waxaa gayaankeed iyagoo ku dhega hadlaya ay ku yiraahdaan orod
oo doono raga madmadow waayo dhexdayada suuq badan kama lihid!. Waxaa halkaa
gabdhahaa kaga dhacay niyad jab weyn oo ay markaa ka haajiraan bulshadoodii
una guuraan xaafadaha ay ka degan yihiin magaalada dadka ajnabiga ah ama
meelaha ay ku caweeyaan si ay saaxiibo ugu soo yeeshaan.
Waxaan la yaabaa sida ay Soomaalida iyo
wadamadani u kala fog yihiin marka laga hadlayo xaga quruxda: Soomaalidu
gabadha wayta(caato) ah waxaaba loo yaqaanay in ay cudur qabto oo waa laga
carari jirey, haddii ay nafaqaysan tahayna waxaaba loo yaqaanay “Jiroos”
Haddii reer dhan oo wada buurbuuran ama cas cas la arkana waxaa qasab ahayd
in markiiba la yiraahdo aabahood ayaa wasiir ah oo dowlada soo boobay ama
aabahood ayaa lacag leh oo ay dowladu u ogolayd in uu keligii taajiro.
Waxaaba ka sii daran in marka la arko reerkii naaxnaaxsanaa ee cadcadaa oo
gaadhi dhalaalaya wata in markiiba la yiraahdo waa reerkii dawlada haystay
ee Soomaaliya ka talinayey, taasina waxaa keenay musuqmaasuqa iyo u nixid
la’aanta xoolaha dadweynaha iyo qaranka ee layska caadeystay in sidii la
doono laga yeelo. Waxaase jirey dad yar oo fara ku tiris ahaa oo xag Eebe
iyo Maalinta Danbe xasuusnaa oo faraha ka laabtay dhacaa loo geysanayo
hantidii qaranka. Waxaa kaloo jirey qaar kaba dheeraaday oo wadankaba iskaga
haajirey. Akhristoow waxaa la weriyey in nin wasiir ahaa oo Dawladii
kacaanka ka tirsanaa oo la oran jirey ina Buraale (Reer Sool) uu lugeyn
jirey, reerkiisuna ay busaarad sanaayeen halka ay karaaniyadiisa iyo kuwa ka
hooseeya ay ka wateen gawaadhi Land Cruiser ah lahaayeena guryo qasriyo ah.
Waxaa ninkaas wasiirka ahaa la yaabanaa dhamaan dadka ehelkiisa ah iyo
Soomaalida oo dhan marka la arko isagoo dhididku ka da’ayo oo lugeynaya
dariiqyada Muqdisho!. Waxaa la oran jirey waa nacas oo waxbaa u dhiman waayo
isagoo wasiir ah buusan waxba qabsan: Guryo badan kama dhisan Xaafadii Booli
Qaran, baabuur ma leh, lacag ma haysto! markaa sibaa wax ka yihiin!.
Waa yahay, warkii baa iga baahaye aan u soo
noqdo markii la weydiiyey Ciise oo dhiganey Minneapolis Community College
sanadkii 1994 in uu sharax dheer ka bixiyo gabadhii uu jeclaan lahaa in uu
guursado. Ciise wuxuu markiiba qoray laba xaanshi oo buuxbuuxa oo uu ku soo
farayareystay isagoo maanka ku hayey in uu heli doono 100%. Maxaase kala
qabsaday Ciise iyo asxaabtiisii la dhiganaysey fasalka lagu barto sida
haboon in loo qoro Ingriiska. Fasalkii oo dhan baa isu bedelay qosol, bulaan
iyo in uu macallinkii aamusin kari waayey ardaydii! Waxaa ay ardaydu mar
keliya ku wada qayliyeen: “Oh! Esse you’r killing me! She is a monster!
Handicap!”!. “tilmaamihii aad Ciisow ka soo sheekeysay qurux maahe waa qof
waraaba dadoow ah ama curyaan ah, markaa ma sidaasaad qurux u taqaanaan”.
Ciise wuxuu ku bilaabay sidan:
Gabadhaan jeclahay waa in ay ahaataa mid
dheer, buuran, timo dhaadheer, garaara leh, cabaadhyo leh, indho waaweyn,
kubab waaweyn, badhi weyn, dhex yar. Ciise ayaa markii uu wax qorayey
isticmaalay turjumaada tooska ah Ingriiskiisuna wuu liitay. Wuxuu ku
bilaabay: I would like to marry a very beautiful fat girl with curved hands,
big legs, big hips, long neck with rounds, big eyes… halkaasuu la maray.
Maalintaa waxbaa meeshaa naga raacay!. Ilaa usbuucyo ayay foorjada iyo
qosolku socday oo marka nala arko ardaydu waxay ku dhawaan jireen in ay
suuxaan qosol dartii iyagoo na leh qurux wax la yiraahdo garan meysaane
quruxdu waa taas inta ay na tusaan mid qalalan oo meel dhug dhug leh.
Markaasaanu ku niraahnaa taasi AIDS bay
qabtaa oo way jiran tahay!
Waxaanu baranay in dadkaa quruxda
qalalnaanta u yaqaana ay gabdhaha buurbuuran ay xagooda heerin ka soo
noqdaan. Haddaba iyada oo dadka Soomaalidu ay abuur ahaanba yihiin dad caata
ah ooba lagu caayo looguna yeedho magaca lafalafo(skinny) ayaa waxaad
arkaysaa raggii Soomaaliyeed oo u tartamaya in ay shabaq u dhigtaan dumarka
buurbuuran ee dadkoodu ay soo naceen. Waxaad ku arkaysaa suuqyada iyadoo
wiil dhuuban oo Soomaali ahi uu wato qof dumar ah oo baruur la socon kari
la’ albaabkana geesgees u geleysa!
Waxaa xaqiiqa ah in wiilkan Soomaaliyeed
uusan waayin gabadh Soomaaliyeed oo ah ta halkan laga jecel yahay ee
qalfoofta ah laakiin uu ka doortay in uu raaco nafaqada haraacinaysa isku
kalsoonaan la’aan iyo u arkid in jinsigeedu ka sareeyo ka Soomaaliga ah
awgeed, ama in uu meelahaa kaga faano in uu qabo gabadh cadaan ah, ama in uu
la dhuuqo waxyaabaha ay gabadha Soomaaliyeed dhaqankeeda iyo diintuba aysan
marnaba ogolaanayn. Waxaa laga yaabaa in ninkan Soomaaliyeed uu lahaa xaas
iyo carruur, kana saaqiday.
Waxaa xaqiiq ah in Jaamacadaha iyo
Iskoolada ay u badan yihiin dumarka Soomaaliyeed oo ku raran buugaag iyo
boorsooyin; markaad tagto goobaha shaqada waxaad arkaysaa dumarkii oo la
rogmanaya mashiinada waaweyn ee warshaduhu leeyihiin ama iyagoo qolalka
waaweyn ee ay yaalaan sariiraha hoteelada iyo musqulaha ka dhextaalahaya
hawsha badan awgeed. Waxaad arkaysaa iyadoo dumarku aysan wejiga siin Karin
dhakhaatiirta iyo kalkaaliyayaasha caafimaadka kadib markii la weydiiyo
aabihii ilmaha dhalay iyo meesha uu jiro iyo waxa uu ugu iman waayey? Aaway
raggii?
Raggii sidii ay u badnaayeen waxaa laga
shaqeeyaa wadida taksiga. Salaada subaxba waa dhaqaajiyaan waxayna soo
noqdaan saqda dhexe. Qaar baaba bustuhu meesha u yaalaa oo aan soo noqonba!
Kuwa kale wadooyinka waaweyn ee Mareykanka ayay isaga gooshaan iyagoo saaran
gawaarida waaweyn ee quudiya Mareykanka ee har iyo habeenka u kala goosha
gobolada kala duwan ee waddankan.
Intaasi waa in yar oo u googo’day shaqo oo
aan xil badan iska saarin carruur iyo xaas ee aaway intii badnayd! Waa shaam
shaam, waa fadhi ku dirir, waa qaadiro, waa nafaqo la jiif, waa usbuucan
shaqee ka ku xigana ku qayil, waa maxbuus, waa homeless, waa dariiq ka
tuugsade, waa meereyste dalxiise ah oo marba gobol ama wadan taga.
Iyadoo markii horeba ay dumarku ka garaad
badan yihiin raga sida ay ku doodaan qolada cilmi maskaxeedka yaqaanaa ayaa
waxaa ay arrintani dhabowday markii 6 wiil iyo 6 gabdhood ay tartan u galeen
kedis ay soo abaabuleen akhyaarta u qaabilsan waxbarida dhalinteena ee
masaajidka Abubakar As-sadiiq ee Minneapolis. Wiilashii ayaa la yidhi waa
inoo sanadka danbe oo waxaa guushii halkaa ku raacday 4 gabdhood oo helay
lacag doolar ah iyo weliba 2 gabdhood oo kale oo helay doolar iyo dahab!.
Gabdhaha xishoodaa ee dhaqankooda iyo diintooda ku adagi waxay meel waliba
kaga hormareen raggii Soomaaliyeed ee afkii iyo calooshiiba uu madoobeeyey
geed jiniga lagu magacaabo Qaadka.
Haddaba waxaan u maleynayaa in ay raggan
aanu ka soo sheekeynay ee u tartamaya Nafaqada haraacinaysa ay aad u
daawadeen jilaagii Shallow Hall ee kula kulmay ninkii Hindiga ahaa wiishka.
Hindigii bay sheekeysteen jilaaga filankan markaasuu ka dhaadhiciyey in
quruxdu aysan ahayn waxa ay indhuhu qabtaan ee ay tahay mid hoose oo la
niyeysan karo. Niyadaada uun u sheeg in waxaad aragtaa ay qurux badan yihiin
ayuu yidhi Hindigii!. Shallow Hall ayaa ka soo baxay dhismihii dheeraa
markaasuu markiiba isha ku dhuftay qof dumar ah oo baaxad Illaahay siiyey,
markaasuu ku bilaabay sheeko iyo xodxodosho. Iyadoo aad ula yaaban bay
weydiisay in uu dumar kale soo waayey iyo waxa ku kelifay in uu soo
damaaciyo. Wuxuu u sheegay in ay aad u qurux badan tahay far keliyana uu ku
qaadi karo! Dadkii meelaha marayey ayaa jaanta wada rogay markay arkeen
ninkan dhuuban ee la socda kaaraha gurguurta iyo siduu ugu qanacsan yahay
iyo sida uu u hadlayo marka la weydiiyo ee uu ku sheekeynayo in ay niyadiisu
la socoto qofka adduunka ugu quruxda badan uguna dhuuban! Waan niyeystay
ayuu hadalka ku soo jaray!
Waxaan tusaalaha sare u soo qaatay in aad
fahantaan sababta xilligan oo ay dumarkii Soomaaliyeen buuxiyeen meel walba
oo dunida ah iyo sida ragga badidiisu ay uga door bideen in ay u daba
hashleeyaan dundumooyin aan dhaqaaqi Karin! Waxay qaxootigu yimaadeen
dacalada dunida iyadoo raggii ay dawladii soo dirsatay iyo kuwii soo
tahriibay ay ka soo agtoosaan guumeyso buura ah oo dabeecad ay u ahayd: Soo
soco lacagta, Soo soco qamriga, Soo soco doonfaarka, Sii soco haddii aad
iswaashid! Markaasaan la yaabi jirnay dhibaatada iyo dulliga ka muuqda
raggaas. Markii aanu weydiinayna waxay jawaabtu noqotay Sharcigaan ku
qaadanayaa oo 5 sanoo danbe baa ii haray inaan Green Card helo, 10 horena
sidaasaan ku soo jiray! Laakiin Alle mahadiiye Qarootigii kama horeyn in ay
indhaha u furaan raggaas aasmay hadday ahaan lahayd xag dumar, ilbax, shaqo,
dhowrsanaan, diin, dhaqan, baayacmushtar iwm.
Waxaase nasiib darro ah in iyadoo meel
waliba ay Yoobsan ama Ceel Gaab oo kale tahay waxa weli maanka ka sii qaaday
raggii Soomaaliyeed badankoodii. Xataa haddii ay ragu jecel yihiin baaxad
weyni dumarkeeniiba sidii ay dibada u yimaadeen kuwa kale habeen ama labo
ayay ka sokeeyaan ee maxaa sababay dib u gurashada?!
Haddaba maxaa ku kelifay Baruuro raadiska?
Ma naago yaraanbaa! Ma xoolo raadisbaa! Ma
diin nacayb baa! Ma qurux raadisbaa! Ma baruur jacayl baa! Ma hab casriya
raadisbaa! Ma luuqad barashaa! Ma sharci raadisbaa! Ma nasab raadisbaa! Ma
faan raadisbaa! Ma ilbaxnimadaa sida ah! Ma iska caadiyoos baa!
Sheekadu ma iska Niyeeyso oo iska Nasiibsaa
C/Rahman eelay
eediran@yahoo.com
Afeef: Aragtida qoraalkan
waxaa leh qoraaga ku saxiixan
Faafin: SomaliTalk.com |
Sept 23, 2004
SOMALITALK
JAWHAR:: WARAYSI GABAR SOOMAALIYEED OO QABTA CUDURKA AIDS-ka
»Reerkii ay ka dhalatay gabdhaas oo go’aan la yaab leh ka gaaray iyo war
naga soo gaarey Jawhar waraysiga ka dib
Guji
Kulaabo bogga www.SomaliTalk.com
|