-
Wafdigii culimada oo soo gaaray
Berbera
-
Wafdi culimo ah oo booqday
Boorama
-
Culimo hawlgal dacwadeed ka
fulisay Hargeysa
Wafdigii culimada oo soo
gaaray Berbera
Wafdi culimo ah oo beryahaanba
olole dacwadeed ka waday magaalooyinka waaweyn ee dalka ayaa
soo gaaray magaalada dakadda ah ee Berbera 14/09/2004.
Culimadu waxay habeenimadii muxaadarooyin kala duwan ka soo
jeediyeen masaajidda waaweyn ee magaalada, waxay kale oo
culimadu booqdeen muxaadarooyin aad u xiiso badanna ka soo
jeediyeen dugsiga sare ee Bursade. Waxaa kale oo ay u soo
bandhigeen dadweynaha reer Berbera mashruuc ku saabsan
ciribtirka qoris iyo akhris la'aanta Afka Carabiga,
mashruucaas oo dadweyuhu aad ugu riyaaqeen una soo
dhaweeyeen ayaa qaar ka mid ah aqoonyahanka magaaladu ku
ballanqaadeen inay dadka walaalohood ah si lacag la'aan ah
wax ku baraan, kuwo kalana waxay ku yabooheen kutub iyo
sabuurado dadka wax lagu baro.
Waxaa xusid mudan in magaalada
Berbera ay ka mid tahay magaalooyinka tirsan ee ku yaal
bariga Afrika oo leh xadaarad iyo ilbaxnimo qadiim ah, taas
oo ka soo jeedda dawladdii islaamka ahayd oo muddo dheer ka
talin jirtay, walina ay ku yaallaan dhismayaashii ay ka
dhistay, mashaariicda waaweyn ee dawladdii khalaafadu ka
hirgalisay magaalada waxaa ka mid ah biyaha magaalada oo aan
marna horay uga go'in. Waxaa kale oo ay caan ku ahayd
magaaladani in dadkeedu ku hadli jireen afka Carabiga waqti
dhaw ka hor. Waxay ku ballanqaadeen ducaadda iyo aqoon
yahanka kale ee magaaladu in ay ka dhabeeyaan fulinta
mashruucan. Waxay kale oo la kulmeen culimadu ducaadda
magaalada, waxayna ka wada hadleen sidii sare loogu qaadi
lahaa dhaqdhaqaaqa dacwadeed ee ay ka wadaan magaalada iyo
sidii loo awdi lahaa baahida waxbarasho iyo barbaarineed ee
bulshada, waxayna culimadu aad ugu boorriyeen ducaadda inay
sii labanaabaan dadaalkooda, ayna xoog saaraan say uga
hortagi lahaayeen wax kasta oo wax u dhimaya bulshada, sida:
fawaaxishta, maandooriyayaaasha …iwm.
Tillaabooyinka muhiimka ah oo
ay qaadeen dadweynaha reer Berbera iyagoo ka ambaqaadaya
baaqyadii culimada waxaa ka mid ah in ay ballanqaadeen in ay
bil kasta soo duubaan cajalado diini ah oo farabadan si
loogu qaybiyo ama loo caariyeeyo dadka saboolka ah ee aan
soo iibsan Karin, taas oo qayb weyn ka qaadan doonta
hanuuninta iyo waxbarista bulshada.
Gabagabadii culimada waxaa si
diirran u soo dhaweeyay ducaadda reer Berbera, ka dib markii
ay dhammaysteen hawlohoodii dacwadeedna waxaa sii sagootiyay
qaar ka mid ah ducaadda magaalada.
Xafiiska dacwada iyo tarbiyada
dacwah@hotmail.com
Wafdi culimo ah oo booqday
Boorama
Wafdi culimo ah oo ay ka mid
yihiin Sh. Cali Warsame, Sh. Maxamed Idriis iyo Sh. Axmed
Maxamed Suleymaan ayaa booqasho gaaban ku tagay magaalada
Boorama 11/09/2004. Waxaa wafdiga si diirran u soo dhaweeyay
culimada iyo ducaadda magaalada, waxayna wafdiga u sameeyeen
martiqaadyo ay ku maamuusayaan. Culimadu waxay muxaadarooyin
iyo duruus is daba joog ah ka jeediyeen masaajidda,
iskuullada iyo malcaamadaha magaalada, waxayna soo booqdeen
qaar ka mid ah goobaha waxbarashada. Hawlaha culimadu
qabteen waxaa kale oo ka mid ah Seminaar ku saabsan dacwada
oo socday laba cisho iyo tabarucaad loo uruuriyay mashruuca
Ummul mu’miniina Caa’isha ee duubista iyo faafinta
cajaladaha islaamiga ah. Duruusta culimadu ka bixiyeen
magaalada waxaa ka mid ah: Tilmaamaha xisbiga Ilaahay marka
loo eego xisbiyada kale, Yaa xambaarsan hammiga islaamka?,
waajibaadka saaran dumarka muslinka, sarraynta islaamka iyo
dhibaatooyinka haysta dhallinyarada iyo sida xal loogu heli
karo.
Wafdigu waxay kulamo la
yeesheen culimada, ducaadda, qaar ka mid ah guurtida,
maamulka iyo waxgaradka magaalada, waxayna ka wadahadleen
horumarinta dacwada iyo tacliinta, ka hortagga waxyaabaha
dhaawacaya diinta, dhaqanka, caafimaadka iyo nabadgalyada
bulshada oo ay ka mid yihiin Sinada, Maandooriyayaasha,
filimaanta xunxun … iwm, waxayna isku afgarteen in la isu
kaashado horumarinta bulshada iyo ka hortagga xumaanta.
Waxaa xusid mudan in ay tahay
magaalada Boorama mid leh ilbaxnimo da’ weyn oo ay ka
dhaxashay ilbaxnimadii Saylac, waana magaalo dadkeedu ku
caan bexeen jacaylka iyo ku dadaalka waxbarashada. Waxaa
kale oo lagu ammaanaa dadweynaha reer Boorama xaqdhawrista
iyo ixtiraamka walaalohood, taas oo keentay in ay u soo
guuraan dad badan oo Soomaaliyeed oo ka kala yimid daafaha
adduunyada, waxaana la oran karaa taasi waa miraha
ilbaxnimada iyo aqoonta ay ku tilmaaman tahay Boorama.
Dhanka kale muuqaalka guud ee magaalada iyo dadweynuhuba aad
ayuu u wanaagsan yahay, waxaana hadda dib uga baxaya
magaalada dad farabadan oo ka soo xagaa baxay Jibuuti iyo
Yurub.
Ugu dambayntii culimadu waxay
ugu baaqeen reer Boorame inay u soo jeestaan barashada iyo
ku dhaqanka diinta, ayna ka hortagaan waxkasta oo wax u
dhimaya adduunkooda iyo aakhiradooda, waxayna ka mahadnaqeen
sida wanaagsan ee loogu soo dhaweeyay, looguna maamuusay
magaalada.
Xafiiska dacwada iyo tarbiyada
dacwah@hotmail.com
Culimo
hawlgal dacwadeed ka fulisay Hargeysa
Raxan culimo ah oo uu
horkacayo Sh. Cali Warsame ayaa ka fuliyay magaalada
Hargaysa hawlgal dacwadeed oo socday 07-10/09/2004.
Wafdiga culimada waxaa si wanaagsan ugu soo dhaweeyay
magaalada qaar ka mid ah culimada iyo ducaadda, waxaana
loo sameeyay martiqaadyo isdaba joog ah oo lagu
maamuusayay, booqashada kooban ee culimadu ku yimaadeen
magaalada waxay ahayd mid aad loogu diirsaday loogana
faa’iidaystay ayna ku farxeen soona dhaweeyeen
dadweynaha magaaladu, culimaduna waxay aad uga mahad
celiyeen sida wanaagga iyo walaalnimada leh ee loogu soo
dhaweeyay magaalada, qadarinta diinta iyo culimaduna waa
sifo ay ku caan bexeen dadweynaha reer Hargeysa. Waxaa
kale oo culimada dareenkooda aad u soo jiitay horumarka
weyn ee magaaladu ku tillaabsatay gaar ahaan dhinacyada
dhismaha, isgaarsiinta iyo nabadgalyada, waxayna ugu
baaqeen ducaadda, dadweynaha iyo maamulkaba inay sii
xoojiyaan nabadgalyada isuna kaashadaan ka hortagga wax
kasta oo khalkhal galin kara danta guud ee bulshada,
sida: Maandooriyayaasha, Ribada, Faaxishada, Filimaanta
xunxun, anshax xumada …iwm.
Ujeeddooyinka hawlgalka
culimada waxaa ka mid ah:
- 1. in ay
culimadu soo booqdaan dadweynaha walaalohood ah, una
kuurgalaan xaaladda dacwo, waxbarasho iyo nololeed
ee bulshada, isla markaana sare loo qaado aqoontooda
iyo wacyigooda.
- 2. in ay dardar
galiyaan dacwada magaalada, ayna isku xiraan
ducaadda.
- 3. in ay
dhiirrigaliyaan tayaynta waxbarashada iyo tarbiyada.
- 4. in ay kaga
qayb qaataan horumarinta bulshada ra’yigooda.
- 5. in ducaadda
lagu tababaro laguna boorriyo la falgalka wanaagsan
ee bulshada.
Hawlaha culimadu
qabteen muddadii uu socday hawlgalkaasi waxaa ka mid
ahaa:
1. muxaadarooyin is
daba joog ah oo ka dhacay masaajidda, Madaarista iyo
fagaarayaasha oo ay ka soo qaybgaleen qaybaha kala duwan
ee bulshada.
2. Seminaar kooban
oo la siiyay qaar ka mid ah ardayda dugsiyada sare iyo
dhexe.
3. Seminaar ku
saabsan dacwada oo socday seddex bari ayna ka soo
qaybgaleen soddon ka mid ah ducaadda magaalada.
4. Kulamo lala
yeeshay culimada iyo ducaadda oo looga hadlayay sidii
loo hormarin lahaa dacwada magaalada iyo sidii loo
xoojin lahaa xiriirka iyo iskaashiga ka dhexeeya
ducaadda, maamulka iyo guud ahaan bulshada.
5. Booqasho ay ku
tageen qaar ka mid ah wafdigu magaalada Gabiley, waxayna
Muxaadaro u jeediyeen dumarka magaalada, muxaadaro
kalana waxay ka jeediyeen Masjidka weyn ee magaalada, ka
dibna waxay kulan la yeesheen ducaadda magaalada iyagoo
ku boorriyay inay laban laabaan dadaalkooda,
awooddoodana isugu geeyaan hanuuninta iyo waxbarista
bulshada walaalohood ah.
Culimada socdaalkaas ka
qayb qaadatay waxaa ka mid ah Sh. Maxamed Idriis, Sh.
Axmed Maxamed Suleymaan, Sh. Cismaan Ibraahim Faarax, Sh.
C/raxmaan Maxamuud warsame, Sh. Xasan Maxamed Ibraahin
iyo Sh. Axmed C/samad.
Gabagabadii waxaa la
filayaa in ay culimadu socdaalkooda ku sii kala bixiyaan
magaalooyin ay ka mid yihiin Boorama, Berbera iyo
Burco.
Xafiiska dacwada iyo
tarbiyada
dacwah@hotmail.com
Faafin:
SomaliTalk.com
|
Sept
18,
2004
Aqoon iswaydaarsi
Cilmiyeed ka Furmay Gaalkacyo
Kulan dacwadeed oo Lagu soo
Gabagabeeyey Galdogob
Ka hortagga ololaha Kirishtaamaynta
Olole dacwadeed oo ka bilowday Muqdisho
BAYAANKII CULIMADA SOOMAALIYEED EE KU AADANAA DASTUURKA