Barnamujka caawa Radio Xoriyo ka baxaya waxuu ka
kooban yahay.
-
Dagaal ka dhacay Waafdhuug oo gumaysiga lagu
naafeeyay.
-
Ciidamada Wayaanaha oo Diridhabe dad ku
laayay.
-
Magaalada Gaalkacyo oo lagu dhacay baabuur
Ogadenya laga leeyahay.
-
Boqollaal Itoobiyaan ah oo ku tabaalaysan
magaalada Boosaaso.
-
Talyaaniga oo raba in ciidamada Soomaaliya la
gaynayo lagu daro kuwo Yurub ah.
-
Barnaamujkii aragtida halgamaaga iyo suugaan
halgameed.
Dagaal ka dhacay Waafdhuug oo gumaysiga lagu
naafeeyay.
Dagaal ba’an oo 6/09/2004 ciidamada xoraynta
Ogadenya iyo kuwa cdowga Itoobiya ku dhex maray magaalada
Waafdhuug oo ka tirsan gobolka Doollo, ayaa ciidamada cadowga
lagaga dilay 15 askari, sidaas waxaa qortay shabakada internetka
ee Qoraxay Online.
Ciidamada xoraynta Ogadenya ayaa la sheegayaa
inay weerareen ciidan gumaysiga Itoobiya ka tirsan oo halkaas
maryay, waxaana la filayaa in dhimashada soo gaadhay ciidamada
cadowga ka sokow ay qaar badan oo kalana dagaalkaas kaga
dhaawacmeen.
Dhinaca kale sidii caadada u ahayd ciidamada
gumaysiga Itoobiya waxay nawaaxiga Waafdhuug ku dileen nin rayad
ah oo aan wax denbi ah gaysanin, kaasoo la sheegay
inuu gurigiisa ku sugnaa markii
la dilay.
Ciidamada Wayaanaha oo
Diridhabe dad ku laayay.
Ciidamada gumaysiga Itoobiya
ayaa toddobaadkii hore 37 qof in kabadan ku dilay, 100 kalana ku
dhaawacay magaalada Diridhabe, ka dib markii ay rasaas oodda
kaga qaadeen dad ku xoonsanaa suuq ganacsi oo ku yaalla
badhtamaha magaalada Diridhaba.
Wuxuu dilkani dhacay ka dib
markii ay ganacsatadu ka hortegeen isku day ay ciidamada
booliska ee gumaysiga toobiya isku dayayeen inay ku boobaan
hantida ganacsatada. Markaas ka dib ayay ciidamada boolisku
rasaas ku fureen dadkii iska caabiyay, waxaana halkaas ku
dhintay in ka badan 37 qof oo rayad, halka in ka badan 100
kalana ay kaga dhaawacmeen.
Ciidamada booliska ayaa la
sheegay inay markaas ka dib si xad-dhaaf ah u boobeen hatidii
halkaas taallay.
Raadiye ay Oromadu leeyihiin
ayaa sheegay isaguna in bishii hore dabka la saaray inta badan
ganacsigii ay dadka Oromada ahi ku lahaayeen meesha lagu
magacaabo Hara Maya.
Magaalada Gaalkacyo oo lagu
dhacay baabuur Ogadenya laga leeyahay.
Waxaa badhtamihii toddobaadkan
lagu dhacay magaalada Gaalkacyo gaadhiga laga leeyahay
magaaladda Qabridaharre ee wadanka Ogadenya.
Gaadhigani wuxuu ka baxay
magaalada Gaalkacyo, wuxuuna rar u siday dhinaca gobolka
Qorraxay, hase yeeshee dablay hubaysan ayaa jidka u gashay oo ku
joojisay duleedka magaalada Gaalkacyo, kuwaasoo rakaabkii ku
armay inay gaadhiga ka degaan.
Waxay wararku intaas ku darayaan
in gaadhiga uu kirishboogu cilid ku abuuray si aanay u kaxaysa
dablaydani, kadibna uu ka cararay dablaydii iyo gaadhigiiba
isagoo u soo cararay dhanka Magaaladda Gaalkacyo.
Ciidanka Booliiska ee magaalada
Gaalkacyo ayaa Baabuurkaas raadco ka daba-diray , ka dib markii
loo soo sheegay in la dhacay, hase yeeshee waxay u tegeen
Baabuurkii oo yaalla meeshii hantiilaha lagaga dhacay, waxaana
la filayaa inay dablaydu iskaga tegeen, ka dib markii ay
baabuurka cilladi ka gashay.
Warar kale ayaa sheegaya in
dablayda Baabuurkan qabsatay uu hor-kacayay nin Baabuurka horay
u lahaan jiray, balse milkayadiisa laga wareejiyay, ka dib
markii xaq loo bixiyay, wuxuna ninkaasi sheegay in Baabuurka
laga wareejiyay isagoon raalli ka ahayn.
Gaadhigani wuxuu hadda ku
jiraa gacanta Ciidanka Booliska ee magaalada Gaalkacyo, waxaana
socda wada-hadal lagu dhexdhexaadinayo milkiilaha gaadhiga iyo
raggii ku qabsay.
Boqollaal Itoobiyaan ah oo ku
tabaalaysan magaalada Boosaaso.
Sida uu qoray boga Internetka
Idaacada SBC waxaa magaalada Boosaaso gaadhay dad aad u badan oo
Itoobiyaan ah, kuwaas oo ka soo galay dhinaca gobolka Sanaag.
Mid ka mid ah dadkaas ayaa u
sheegay Idaacada SBC in waxii ay haysteen ee hanti ahaa lagaga
dhacay magaalo madaxda gobolka Togdheer ee Burco, haatanna ay
fara maran yihiin oo aanay wax ay ku joogaan iyo si ay u noqdaan
toonna garanaynin, dhacaas ayuu nikaasi ku
sheegay in ay u gaysteen niman
mukhalisiin ah oo u sheegay in ay u tahriibinayaan wadamada
carabta.
Dadweynaha deegaanka Boosaaso
ayaa soo gelitaankoodii hore dadkan kaalmo aan sidaas u buurnayn
u fidiyey, gaar ahaan ururro waddani ah.
Dhinaca kale waxaa jira warar
soo gaadhay Radio xoriyo oo sheegaya in ay goosteen ciidamo aad
u badan oo ku sugnaa gobolada Ogaadenya, kuwaas oo la sheegey in
ay u dhaqaaqeen dhinaca xuduudaha wadamada dariska ah, balse aan
la hayn halka ay ku danbeeyeen.
Siyaasada guracan ee Taliska
Itoobiya ayaa sababay in ay ooda jabsadaan siyaasiyiintii,
aqoonyahankii, ciidamadii iyo dadkii shacbka ahaa Beeralayda
ahaa, kadib markay ku kalsoonaan waayeen xaaladooda amaan iyo
nololeed ee dalkooda ka jirta maanta.
Talyaaniga oo raba in
ciidamada Soomaaliya la gaynayo lagu daro kuwo Yurub ah.
Dawlada Talyaaniga ayaa ku
talisay in ciidamada nabad ilaalinta Soomaaliya loo gaynayo lagu
daro kuwo laga keeno dalalka Yurub.
Wasiirka arrimaha dibada ee
dalka Talyaaniga Franco Frattini ayaa sheegay in xukuumadda
dalkiisu ay kula talisay Midowga Afrika in ciidamada nabad
ilaalinta ah ee Soomaaliya la gaynayo lagu soo daro kuwo ka
socda dalalka Yurub.
Frattini wuxuu intaas ku daray
in dawlada Talyaanigu ay dhiirri gelinayso in qorshahaas la
hirgelinayo, isla markaana ay ciidamada dalkiisu ka qayb qaadan
doonaan hawsha nabad sugida iyo hub ka dhigista ah ee Soomaaliya
loo tegayo.
Talyaanigu wuxuu sheegay inuu
aad ugu niyad san yahay natiijada ilaa iyo hadda ka soo baxday
shirka dib u-heshiisiinka kooxaha soomaaliyeed ee dalka Kenya ka
socda, kaasoo hadda maraya marxaladdii ugu denbaysay ee awood
qaybsiga ahayd.
10.09.2004
C/nuur Sh. Mohamed
raadioxoriyo@yahoo.com
Radio
Xoriyo waxaad ka dhegaysan kartaa Mawjadda 19 MB ee dhererkeedu
yahay 15670 KHZ, Maalmaha Talaadada iyo Jimcaha 7: 30PM waqtiga
Afrikada.
