::: Somalitalk.com Online Community :::::

Cali Maxamuud (Cali Xareed) oo Xildhibaanimo Loo Dhaariyey
Afhayeenka baarlamaanka iyo ku xigeenadiisa oo maanta la kulmay Madaxweynaha Dowlada Kenya.
Musharaxiinta ugu muuqaalka dheer siyaasada Somalia oo maanta dib ula noqday barnaamijkoodi illaa barri.

Mudane: Cali Maxamuud (Cali Xareed)

Cali Maxamuud (Cali Xareed) oo Xildhibaanimo Loo Dhaariyey

Maanta oo ay tahay taariikhdu 6/10/2004. Saacaduna markay ahayd 4:30 Pm ayaa waxaa lagu dhaariyey Mudanaha Cusub ee Baarlamaanka Federalka ee Jamhuuriyada Soomaaliya ee Beesha Meheri Mudane Cali Maxamuud (Cali Xareed) madasha Shirka ee Mbagathi – Nairobi.

Mudane Cali Xareed wuxuu badalay Mudanihii hore ee Baarlamaanka Federalka “Dr. Faarax Xassan Maxamed (Faarax Sayid)” oo ku geeriyooday Magaalada Nairobi.

Wa Billaahi Towfiiq.
Qore: sharmarke yusuf <sharmyusuf@hotmail.com>

Musharaxiinta ugu muuqaalka dheer siyaasada Somalia oo maanta dib ula noqday barnaamijkoodi illaa barri.

Maanta oo ahayd maalintii labaad oo ay tartamayaashu usoo bandhigayeen baarlamaanka barnaamijyadooda ku saabsan xag waxqabad iyo taariiq ee tartanka madaxweyne ayaa maanta lix ka mid ahi soo soo bandhigeen.

Maalintii shalay iyadoo ay dhiibteen barnaamijkooda sagaal musharax oo ka mid ah sideed iyo labaatanka ee buuxiyay shuruudihii laga rabay oo ay ugu horeyso lacagta ayaa maanta la filayay in ay qaar badani gudbiyaan barnaamijyadooda,balse waxaa is diiwaan galiya lix ka mid ah tiradii soo hartay.

Musharaxiinta aan wali gudbinin waxaa ka mid ah Muuse Suudi Yalaxow, Maxamad Cumar Xabeeb(dheere), Col. Maxmamad Nuur Shaati gaduud, Col,C/llaahi yuusuf Axmad, Dr,C/qaasim Salaad Xasan, Ing.Xuseen Maxamad Caydiid oo ah dhamaantood siyaasiyiinta somaliya ka dhex muuqda ama ugu cadcad, qaarkood oo maanta goob joog ahaa ayaa ka cudurdaartay in ay gudbiyaan barnaamijkooda musharaxnimo dibna ugu dhigatay bari galinka dambe oo ah maalinta ugu dambeeysa oo waqtiga la siiyay musharaxiinta in ay baarlamaanka ugu bandhigaan waxqabadkooda.

Tiradda isku soo hartay oo ay ka mid yihiin musharaxiintan ayaa gaaraysa 13 musharax ayay maanta qaar badan oo ka mid ah baarlamaanka iyo dadka kale is waydiinayeen sababta ay dib iskugu dhigeen,balse waxaa muuqata in musharax walba oo iska jiro kan kale xagga khudbooyinka oo ay u kuurgalayaan waxa uu ka hadlo kan kale, si ay markaas wax ka badalan in uu ka hadlo oo soo jiidan kara baarlamaanka.

Illaa hadda waxaan la qiyaasi karin xaaladda doorashadda ay ku sugan tahay,iyo cidda ku soo baxi kartaba xilka madaxweyne sababo badan oo jira awgood,baarlamaanka laf ahaantooda ayaa ku waramaya in aysan go'aansanin cidda ay dooranayaan.

Afhayeenka baarlamaanka iyo ku xigeenadiisa oo maanta la kulmay Madaxweynaha Dowlada Kenya.

Gudoomiyaha baarlamaanka KMG ah iyo labadiisa ku xigeen ayaa maanta la kulmay Madaxweynaha Dowlada kenya Mr.Mwai Kibaki.

Shirkan oo ka dhacay Guriga Madaxweynaha waxa uu kibaki u mahadceliyay baarlamaanka soomaaliyee oo doortay afhayeen iyo ku xigeeno,dowladiisa ay taageersan tahay Baarlamaanka soomaaliyeed, isagoo intaasi ku daray in baarlamaanka uu haatan ku howlan yahay soomaaliyeed sidii ay dooran lahaayeen madaxweyne KMG ah, si ay Soomaaliya u hesho xasilooni kuna tilmaamay talaabo horumar leh oo ay gaareen Soomaaliya ka dib shir muddo dheer uga socday kenya.

Waxaa kale oo uu intaasi ku daray in uu diyaar u yahay taageerada dowlad ka dhalata soomaaliya horayna dowladisa ay u taageertay baarlamaanka soomaaliyeed casuumaadna ay baarlamaanka kenya u fidiyeen,haddana mid la mid ah ay fidin doonaan maadaama ay iyaga gacanta ku hayaan shirka dib u heshiinta somaliyeed,waxa uuna ka dalbaday baarlamaanka in ay ilaaliyaan nidaamka doorashada si aysan u dhicin qalad.

Afhayeenka baarlamanka Shariif Xasan Sh.Aadan oo kulankaas ka hadlay ayaa u mahadceliyay Dowlada kenya dadaalka ay ka muujisay shirka soomaaliyeed intii uu socday,waxa uuna intaasi ku daray in dowladda kenya ay la socoto barnaamijyadda deeqaha ah oo ay Qaramadda Midoobay ugu talagashay soomaaliya oo ay NGO'yada ku sugan dalkiisa u isticmaalaan si qalad ah la socdo,soomaaliyana aysan hay'dahaas waxba la taaban karo ka qabinin,xiligana ay dad badan abaaro ku haystaan meelo badan oo ka mid ah dalka soomaaliya,sida uu iigu waramay gudoomiye Xigeenka 1aad Prof.Dalxa.

Waxa kale oo Gudomiyaha baarlamaanka ka dalbaday madaxweynaha kenya in dowladiisu ay taageerto madaxweynaha la doorto, maalinta caleema saarka oo ay ka soo qaybgalayaan madax badana ay dhacdo bishan 12-keeda,si loogu beego maalinta calanka Jamhuuriyadda soomaliyeed la taagay oo la taagay 12/10/1954.si munaasabada caleema saarka madaxweynaha loogu beego munaasabadaas.

Kulankan waxaa ka soo qaybgalay qaar ka mid ah madaxda IGAD,Wasiirka xiriirka iskaashi ee gobolka iyo wadamada bixiya dhaqaalaha shirka qaarkood,waxa uuna ku dhamaaday jawi is afgarad.

Anab Mohamoud Abdulle <canabmumtaz@hotmail.com>

SomaliTalk.com | Nairobi | Oct 6, 2004