SIXUN WAX U SHEEG SIXIROOL WAA KA
DARANYAHAY
W.Q. Axmed Sahid
asaahid@yahoo.com
Waxaa maalmahan hawlgal wayn oo wacyi
gelin ah ka waday gobollada kala duwan ee Puntland koox culumo ah oo u
dhashay gobolladan kana kala yimid dalka gudihiisa iyo dibaddisaba,
barnaamijta ay culumadaasi ka hadlayeen waxaa u badnaa:-
-
Muxaadarooyin kala duwan oo ka
dhacaysay masaajidda.
-
Siminaaro kor loogu qaadayay aqoonta
iyo wacyiga ardayda dugsiyada.
-
Kulamo kala duwan oo ay la yeelanayeen
qaybaha bulshada sida: - Maamulka dawladda, Isimada, Odayaasha,
Ganacsatada, Aqoonyahanka iyo qaybaha kale ee bulshada.
-
Tabarrucaad (Fund Raising) ay
ka aruurinyeen dadwaynaha degan magaalooyinka ay marayeen kaasoo ku
salaysnaa baahida hadba haysata deegaankaas.
Waxaa waxaa xusid mudan in wafdiga
culimadu meel kasta iyo maaglo kastaba ay kula kulmayeen maamulka
dawladda laga bilaabo Madaxwayne ku xigeenka D. G. Puntland Mudane :
Maxamed Cabdi Xaashi, Golaha Wasiirada qaarkood , qaybo ka mida Golaha
wakiillada iyo waliba qaybaha kale ee dawladda sida: Hay’adaha amniga,
Booliska, Saraakiil ka mida Ciidamada daraawiishta, iyo maamulada
dagmooyinka ay marayeen.
Dhammaan goobahaas wax si diiran
culumada ugu soo dhawaynayay madaxda kala duwan ee deegaanadaas iyagoo
uga xog waramayay maamulladaas ujeedada safarkooda oo ahaa sara u
qaadida wacyiga bulshada reer puntland, iyo in ay wax wada qabsadaan
iskuna duubnaadaan, arrintaas oo maamulkuna la qaatay.
Safarkii culumada ayaa markii uu soo
gaaray magaalada bosaso waxa ay la kulmeen baahi wayn oo ka jirta
jaamacadda Bariga Afrika oo u baahan lacag dhan $ 216, 000 oo ay ku
ballaarinayaan wax qabadka jaamacadda sida dhismayaal cusub oo lagu soo
kordhinayo, laboratory ay jaamaccaddu leedahay, jidad laami ah oo
jaamacadda soo gala, macallimiin cusub oo dibadda laga dalbayo iyo
baahiyo kale oo aad u fara badan oo jaamacaddu dabooli wayday.
Sidaas awgeed waxay culumadu isu
xilsaareen inay sameeyaan lacaga aruurin ballaaran oo ay ka qabteen
goobo kala gedisan oo ka tirsan magaalada Boosaso ayna goob joog
ahaayeen qaar ka mida maamulka gobolka bari.
Ilaa hadda lacagta la yaboohiyay waxay
dhantahay $100,000 taasoo aan dhammayn 50% lacagtii ay jaamacaddu ka
codsatay dadwaynaha reer Punland.
Haddaba anigoo tixraacaya maaqaal ku
soo baxay bog kamid ah Internetka oo ay ka soo xigteen wariye lasheegay
in uu jooga magaalada Boosaaso, kuna sheegay arrrimo aad iyo aad
xaqiiqada uga fog, sawir khaldanna ka bixiyay ujeedada safarka
culumadaas iyo dareenka dadka degan magaalada Boosaso labadaba.
Warbixintaan ayaa sheegaysay, in
lacagtaas loo aruurinayay nin la yiraahdo Xasan Turki oo dagaallo ka
sameeyay dooxada Jubba waxaa kale oo ay ku tilmaantay bulshada inay
walaac ka muujiyeen lacag aruurinta ay culumada sameeyeen, dawladdana ka
codsadeen inay si taxaddar leh u baarto.
Hadaba waxaa la yaab leh horumarka
itaas le’eg in laga turjumay khalad lagana baxshay sawir kale oo lid ku
ah si loo lumiyo kalsoonida ay dadka deegaankan degan ku qaabileen
culumaddii safarka ugu timid.
Waxaa mucjiso in laamihii dawladda oo
safarka culumada la socday ilaa maalintii ay soo galeen magaalada Laas
caanood goob kasta oo ay shir iyo lacag arruurin ka qabanayaan xaadir
ahaa ay cid kale oo aan alif iyo ba’ toona ahayn isu xilsaarto inay
dadka iyo dawladdaba u fasirto fartana ugu fiiqdo ujeedooyinka beenta ah
ee ka turjumeen safarka culumada.
Sidoo kale waxaan layaabay sawirka laga
baxyshay dareenka bulshada bixisay kuna yaboohday wixii ay hanti mid
socota, mid maguurtaa iyo dahab ay lahayd ilaa ay bulshadaasi bixisay
lacagtaa aan kor ku xusnay oo aanay bixin kari cid walaacsan ama shaki
kalsooni xumo qabta.
Ugu dambayntii maqaalkaas wuxuu meel
uga dhacay dhammaan Wasaaradda arrimaha gudaha, hay’adaha amniga ee
dawladda, Ciidamada Booliska, kuwa daraawiishta oo dhammaantood meesha
joogay iyo dadwaynaha khayrka jecel ee ku nool goboladdan.
Waxaan ku dhaleecaynayaa bogga ama
websiteka soo daabacay maqaalkan aan raadka iyo salka toona lahayn inay
iska soo daabaceen iyagoo aan ka fiirsan waxay qorayaan ama aan kala
xiriirin jihooyinka ay khusayso.
Waxaan leeyahay in ciddii ka dambaysay
ee soo daabacday iyo kuwii soo tifaftirayba lala xisaabtamo si loo
ilaaliyo misdaaqiyada bogga.
W.Q. Axmed Sahid
asaahid@yahoo.com