Reer Muqdishow Siyaasaddii waad Khasirteene
Caasimadda ha Luminnina..
Maslah Iikar
xamar_dhawr@yahoo.com
Waxaan salaan u
soo gudbinayaa beesha caalamka oo isku hawshay sidii ay uga mira dhalin
lahayd shirkii soomaalida ee ku soo gebageboobey bishan aan ku jirno
horraanteedii wadaanka Kenya aniga oo mahad gaara u celinaaya wadammada IGAD
iyo dalka marti geliyeyba dedaalkoodii aan kala go,a lahayn ee ay u soo
dhabar adaygeen sidii maruun ay uga mira dhalin lahaayeen shirkaas.
Marka taas aan
ka imaado waxaan doonayaa inaan waano u gudbiyo bahda reer Muqdisho oo iyagu
beryahan caado ka dhigtay inay ku doodaan inay iyagu xaq u leeyihiin inay
noqdaan madaxda qaranka ugu sarraysa sida madaxweynaha iyo waxa la mida taas
oo ay ku sababeeyaan in caasimadda cidda deggan uun ay xaq u leedahay
arrintaas oo ah mid iyadu si weyn looga dhaadhiciyey dadka ku dhaqan
magaalada Xamar, waxaana taas caddayn u ah iyada oo sidaan la wada soconno
magaalada Xamar laga diyaariyey xaflad loogu dabbaaldegi lahaa doorashada
madaxweyninimada ee dhacday maalintii 10/10/2004, hase ahaatee waxa la
sheegay in xafladaas la joojiyey iyada oo madaxweynaha la doortay aanu
magaalada Muqdisha ku lahayn taageerayaal, taasoo markaa ay caddahay in
dabaaldegga laftiisu uu markiisii horeba ahaa midaan laga daacad ahayn oo
cid gaara loogu tala galay haddii ay soo baxdo iyada oo aan meeshaba lagu
soo darin in waddanku uu ka kooban yahay TOBAN iyo SIDDEED GOBOL oo Xamarna
ay hal qayb uun ka tahay, cid kastaana ay xaq u leedahay inay wax hoggaamiso,
waxaanna oran karnaa xafladaa baaqatay waa kala mudnaan bulshada
Soomaaliyeed oo iyadu aaminsan in Muqdisho ay tahay caasimadooda isla mar
ahaantaana aanay la,aantood Xamar sii noqon karayn Xarunta Dalka Soomaaliya.
Isku soo wada
duuboo waxaan bahda reer Muqdisho aan kula talinayaa waa inaad ka
digtoonaataan wax is hor taagi kari dib u soo celinta qarankii Soomaaliyeed
taas oo ay ugu wacan tahay iyada oo beryahan soo yeerayaan warar caga
juglayn ah oo kuwa ugu muhiimsani ay ka imanayaan Dallada Culumada
Soomaaliyeed ee ku sugan Magaalada Muqdisho iyada oo aynu ognahay in
culimada diintau ay saamayn weyn leeyihiin kicintooda iyo ishortaaggooduna
uu la iman karo dhibaato iyo burburkii Soomaali oo iska sii socda. Markaas
sidaas darteed waxaan kula talinayaa dadka reer Muqdisho inay iska jiraan in
khasaarihii ka soo gaaray xagga Siyaasadda ay u raaci karayso in ay seegto
Caasimadda Waddankuna ayna dhici karto in goob kale oo waddanka ka mida ay
noqota Caasimada Soomaaliya taasoo ku keenaysa dadaka reer Xamar mustaqbalka
welwel, walaac iyo qoomamo aan dhammaad lahayn ka dib herdan amaba loollan
ciidan oo socdey muddo gaaraysa toban iyo afar sano.
Waana inay
dadka ku dhaqan magaalada Xamar ay la socdaan in adduunyada xilligan uu is
beddel xoog lihi uu ka dhacay oo aanay u suurta geli karayn in caalamku
weligii uu reer Xamar uun sugo, waana inay la socdaan haddii ay
guuldarraysato xilligan dowladda la soo dhisay ay dhici karto in Somaliya ay
noqoto dowlado yaryar oo aan awood lahayn haddii ay xitaa sii jirtona waa
inaad ogaataan in Xamar aanay noqon doonin caasimadda Somalia waa haddii aad
idinku carqalad la timaadaane waa inaad ka digtoonaataan oo aad iska
qabataan kuwa doonaya inay idiin beddelaan gegi lagu loollamo ilaa iyo xilli
aan la garanayn.
Wa Billaahi
Towfiiq
Maslah Iikar
xamar_dhawr@yahoo.com
Afeef: Aragtida qoraalkanw axaa leh qoraaga
ku saxiixan
Faafin:
SomaliTalk.com | Oct 30, 2004
Kulaabo bogga www.SomaliTalk.com
|