UMMADA UDAA HABAARQABAHEEDA...
Cawilyare
Garowe,Somalia
<ccqubane@hotmail.com>
sida aynu lawada socono
dalkeena hooyo ee soomaaliya mudo 14 sano ah
ayuu ku jiray dowlad la'aaan aysana jirin wax
sharci iyo qawaaniin ah oo kala haga ummada ,
micyaarka qiyaasta u ah ee lagu qadariyo koow
walba uu ahaa awooda ay leedahay.waxaana dhamaan
dumay oo lumay wax allaale wixii ay mas'uulka ka
ahayd dowladii dhexe ee dalku.
mar heer ayey maraysay xaalada
dalku shirar badan ayaa laqabtay kuwaas oo ugu
danbayntii ku dhamaaday guul daro , ilaa ay hada
soo gaartay in laga miro dhaliyo shirkii ugu
mudada dheeraa ee soconayey mudada labada sano
ah kaas oo lagu taagay dowladii soomaaliyeed ee
mudada badan ay dadku sugayeen, way dhici kartaa
in lagu kala aragti duwanaan karo dowladaas
cusub oo laga yaabo dadka qaybtiis inay u arkaan
inaysan buuxin karin kaalintii looga baahnaa
ayna soo wajihi karaan caqabadihii soo wajahay
kuwii iyada ka horeeyey ayna ugu danbaysa tii
lagu soo dhisay tuulada carta 2000.
halka laga yaabo qayb kale inay u
aragto in uu yahay mid ka duwan kii hore lagana
yaabo inuu ka rajo fiicnaan doono kuwii hore
iyagoo ku sababaynaya inuu yahay mid ka helaya
guud ahaan shacbiga soomaaliya taageero buuxda
iyo iyadoo ay halkaas kuwada dhanyihiin
warlords-kii ugu awooda badnaa dalka oo
dhamaantood lagu dhaariyey inay lashaqaynayaan
dowlada cusub , iyadoo durbaba ay qaybtood
ayiday xataa hadii aysan xil ka qaban dowladaas,
waxay kaloo taageero balaaran ka haysataa beesha
caalamka oo u taagan inay hadii soomaali wax
dhisato ay la garab istaagaan wixii ay
dowladaasi ku shaqayn lahayd.
hadaba ma ahayn sababta
maqaalkaan aan u qoray inaan taxliiliyo dowlada
cusub inayn noqon doonto mid shaqaynaysa iyo
inkale ee waxaa ugu kalifay qorida maqaalkaan
qoraal aan ka akhriyey somalitalk kaas oo
ciwaankiisu ahaa
SOOMAALIYA OO HABAAR QABE DOORATAY
qoraalkaas oo run ahaantii aan ka tarjumayn waa
qica lagu jiro.
waa marka ugu horaysee waxaa
qoraha maqaalka ka dhadhamaya qoraalkiisa
waxyaalihii uu ku dhaleecaynayey Col Yey taas oo
ahayd inuu yahay nin qabiili ah ku na kacsada
hashiisa,qoruhu wuxuu si bareero ah oo cad usoo
bakhti afuufayaa dibna ugu soo noolaynayaa dagaalkii
sokeeya ee ku dhisnaa qabiilka iyo maxay reer
hebel naga damceen, kaasoo badan ummada dayaca
iyo dowlad la'aanta baday soomaaliya.
qoruha maqaalkaan wuxuu soo
qaatay tixo gabay kuwaas oo ah kuwii huriyey
colaada sokeeya ee soomaaliya iyadoo dadka
curiyey ay markaas u arkayeen inay waayeen
xuquuq ay lahaayeen lana dhaawacay dadnimadoodii
iyo jiritaankii ay lahaayeen, Maxaase dhacay
kadib????...
Mase helaan dadkaasi waxyaalihii
ay ku taamayeen, tixahaan guubaabada ahna u
tiryeen............
Hadduu
dhiigu daatiyo
Hadday xaydhi dixataba
Hadday guushu degatiyo
Hadday daahyo rogataba
Hadday qaanso debecdiyo
Hadday shiish dellegantaba
Hadday Daylo curatiyo
Hadday deero tebisaba
Adoo dool dhaqaaqiyo
Adoo data mooyee
Damac waa halkiisii
Dabna waa dabkiisii
Dusdukay
ku dheregtee
Haddaan daalku dheeraan
Gabbal baas u dumin nabad
Nin
dalleensi lagu cunay
Haddaan guuto loo dilin
Dakharkiiba toban noqon
Nin kastoo dun iga qaba
Haddaan daab-cad lala dhicin
Jannnada durduurta ah
Haddaan daadku soo qubin
Aqalada derbiga dheer
Haddaan daaqad laga gelin
Ninka dabin ka boodka ah
Haddaan diirad lagu helin
Haddaan duubka gogoshiyo
Lagu dhuuman dalowyada
Haddaan shaashka derejada
Dallacaada laga nixin
Dal Allay u kibirtee
Haddaan iilka lagu degin
Haddaan meydku duurkiyo
Derrimaha ka fara badan
Sanqadhaa dabayshiyo
Haddaan fiinta laga didin
Fadhigay ku daaqdee
Haddaan soodhku dalandalin
Halka doobi lala maro
Haddaan raacdo daba gurin
Dacfalaanka mahaddiyo
Dardarsiga barwaaqada
Iyo doosha subbaga leh
Haddaan laysu dacarayn
Inta
daran intaw daran
Haddan duulal lagu falin
Haddaan deebta gumuciyo
Lagu guban dabkaan shido
Duhur laysla wada jiro
Haddaan guusha lay deyn
Alley-lehe docdaydii
Ha Goblamo dad weynuhu.
Run ahaantii maqaalkaygaan uma
qorin in aan ahay mid ka mida taageerayaasha
Col C/laahi yuusuf axmed oo loo caleema saaray
madaxweynaha dowlada federalka ah ee soomaaliya
, waana ka soohorjeedaa in badan oo ka mid ah
mowqifyada Mud. C/laahi axmed iyadoo aan u
ogahay inuu yahay macangag tiisa maahee mid kale
aan yeelin dantiisana u fuula geed dheer iyo
geed gaaban, hadafkiisa ugu wayna yahay inuu wax
xukumo , ninkii ku qabsadana ay dadka isugu
necebyihiin, intaasoo dhan anoo og ayey hadan
ceeb igu tahay inaan ka hor imaado wax yaalihii
ay umada soomaaliyeed mudada labada sano ah u
fadhiday kenya waxaana uu mudanyahay muwaadin
walbaa inuu taageero buuxda siiyo si dib loogu
soo yagleelo jamhuuriyadii horey loo oran jiray
soomaaliya ee iminka jaabiyadaha loo kala goos
goostay.
Gabagabadii
waxaan qoraaga diridhabe u soo
jeedinayaa inuusan horboodin ummada soomaaliyeed
uusana noqon nin balo ka talis ah , ee uu noqdo
qof wax san ummada u tafa'ula ama u saadaaliya,
maadama aynu wada ogsoonahay colaad sokeeya oo
hada dib loo xusuusiyo ummada soomaaliyeed iyo
in Hawiyo iyo Daarood la isugu dhufto oo la
dhaho tii Hawiye ayaa socon waydaye Tan Daarood
sidee ku socotaa inaysan xikmadi ku jiran wax
macna ah oo ay samaynaysana aysan jirin ee ay
tahay un in dib loogu laabanayo mugdiyaal ay
ummada soomaaliyeed ka soo gudubtay soona dhaxal
siisay inay in badan ku agoomoobaan, Qaxaan,
intasoo dhami iyado oo ay
jirto hadaba waxaa lagudboon aqoonyahaniinta iyo
waxgaradka soomaaliyeed inay xaaladu taagantahay
Labo Daran Mid dooro ayna inoo
darantahay wadciga iyo marxalada ay maanta ku
sugantahay soomaaliya ayna u baahantahay habaar
qabe wax ka qabta dadka bahaloobay ina bartay
dhaca boobka iyo kufsiga.
iyadoo aysan jirin 3 casho
ayaa waxaa isla hugmay dhamaan dalka soomaaliya
oo dhan min raskamboni ilaa raascasayr ilaa
boorama , taas oo ididiilo ku ridaysa dib usoo
laabashada qaranimadii soomaaliya.
HADABA WAXAAN WALAALKAYGA
DIRIDHABE EE JOOGA KRACHE PAKESTAN LEEYAHAY UDAA
UMADA SOOMAALIYEED HABAAR QABAHEEDA AY KU
DOORATAY AQLABIYADA AAN CAADIGA AHAYN , DIBNA HA
UGU CELIN UMADA SOOMAALIYEED MARXALAD AY KA SOO
GUDUBTAY 14 SANO KAHOR OO HADA DAGAAL SOKEEYE HA
U HORKICIN.
WAAD MAHADSANTIHIIN
Cawilyare
Garowe,Somalia
<ccqubane@hotmail.com>
Afeef: Aragtida
qoraalkan waxaa leh qoraaga ku saxiixan
Faafin: SomaliTalk.com
| Oct 13, 2004