w w w . S o m a l i
T a l k . c o m
|
SOMALITALK
- MAQAAL
|
DAWADA KHARAARUBA MAR BAY DAAWO NOQOTAAYE
WAR BAL DAAYA DAGAAL IYO XABADI MA AHA DAWGEENE
Omar Abdinur <omarabdinur@hotmail.com>
Mahad Ilaah baa iska leh, Nabad iyo Naxariisna
Nabi Maxamed korkiisa ha ahaato.
Markii uu dhamaaday heshiiskii DYTON ee lagu
heshiinsiinayey Muslimiintii Boosniya iyo Masiixiyiintii Zerbiyaanka ee
dagaaalka xun ee umulodooxa ah ku gumaaday muslimiinta laga tiro badanyahay ee
dalkaas bilowgii iyo bartamihii sagaashanaadka, ayaa hogaamiyihii muslimiinta ee
Bosnia Cali Azabej wuxuu yiri “Hishiiskaan soo saxiixay waa dawo kharaar” dawada
kharaarna marbaa laga yaabaa in lagu buskoodo.
Dadka caqliga lihi sidaas ayey u fakaraan marka
arrintu meel halis ah gaarto, waayo qofkasta oo la socday heshiiskaas ama
gumaadkii ka horeeyey ee loo geystay dadka muslimiinta ah ee dalkaas, marna kama
daadegteen in uu aqbalo ihaano iyo quursi intaas le eg. Xaqiiqduse waxay tahay
Cali Azabej wuxuu is barbardhigay in uu dagaal sii wado oo dadkiisu ku dabar
go’o iyo in uu qaato nabad laga yaabo in mustaqbalka dadkiisa inta hartay iyo
dalkiisa inta hartay ay ku nabad galaan ugana badbaadaan dabar go’o ku yimaada.
Maanta haddii aan nahay Soomaali cid kale oo
dibad nooga timid oo na dabar goynaysaa ma jirto laakiin waxaan halis u nahay in
aan is dabar goyno. Waxaan qoraalkaan u qorayaa waxaan ka cabsi qabaa in iyadoo
qabyaalad, is fiirsasho iyo anaa kaa kabo weyn darteed loo sameynayo laga
horyimaado oo mucaarad iyo dagaal lagu furo go’aankii kasoo baxay shirkii
Nairobi ee labada sano loo fadhiyey. Cidna iskuma diidana in la doortay nin
gacantiisa ay ku baxeen khalqi badan sababna u ahaa (sida isaguba sheegto)
dagaalka dabodheeraaday ee Soomaaliya aafeeyey. Su’aashuse waxay tahay maadaama
14 shir oo hore fashilmeen, dalkeennii iyo dadkeennii halis ku sugan yihiin,
cadowgeenna dibaddu badan yahay, adduunkiina khadyaan naga taagan yahay,
miyeysan habbooneyn in aan sidii Cali Azabej yeelno oo xataa haddii heshiiska
qaarkeen u qalmi waayo loo daneeyo dadka iyo dalka inta ka hartay??
Xadiis laga weriyey Nabigeenna Naxariis iyo
Nabadgelyo korkiisa ha ahaato ayaa waxaa micnihiisa ka mid ahaa “ Geesigu ma aha
kan dadka tabcada, dibirta ama sabbaaxadda la dhiga, ee waa kan hanta naftiisa
marka uu xanaaqsan yahay”.
Waxaan dhihi lahaa ha laga fiirsado
damaashaadka, ubaxdaadinta gobolada qaarkood kasoo yeereysa, sidoo kale ha laga
fiirsado colaadda, iyo fidno hurinta kasoo ifbaxaysa gobolada qaarka kale. Waxa
aan helnay ee heshiiskii Nairobi kasoo baxay waa dawo kharaar ee feejignaan iyo
kutalogal ha lagu liqo. Ha laga fogaato tookha, faanka, niyadjabka iyo quusta
kuwaas oo aan ahayn sifooyinka geesiga waqtiga xaalku adag yahay.
Haddii aan hadalkii, waanadii iyo digniintiiba
badiyey, anigoo rajo weyn ka qaba in dadka caqliga iyo kartida lihi ay ila fahmi
doonaan, bal aan haddana gabay yar oo ka hadlaya cirib xumada qabyaaladda aan
idiin soo gudbiyo. Gabaygaan waxaan tiriyey 19/10/2003. Waa dood dhexmartay nin
u hagar baxay qabyaaladda iyo qabyaaladdii qudheeda. Waxay isku eedeeyeen in
midba midka kale baday oo ka mas’uul yahay darxumada maanta lagu sugan yahay.
ANIGIYO QABIIL (Gabay)
Aniga waxaan ula jeedaa
qofkasta oo Soomaali ah oo qabyaaladda u hagar baxay waxse aan ka dheefin.
- Anigiyo qabiil baa
dacwiyey, oo isqoonsadaye
- Qaran li’i, jabbaad
geysatiyo, lama qiyaasaane
- Qaruumaha halkaan uga
jirnaa, qaawan sababtaaye
- Qarni iyo bar baan dibu
noqdaye, saw ma qiraneysid?
-
- Qalin iyo tacliin baa
ummadi, qaran ku taagtaaye
- Qoraal iyo xisaab waa
horaa, qiimahood tagaye
- Qori baa baddalay oo ma
helin, qalin caruurtiiye
- Qarni iyo bar baan dibu
noqdaye, saw ma qiraneysid?
-
- Dhaqaalahii markaad
wiiqdayoo, qiimihiis jabisay
- Qol markaad ku ooddee
dadkii, qaarba dhinac aaday
- Qaran hawshii uu qaban
lahaa, adigu aad qaadday
- Qarni iyo bar baan dibu
noqdaye, saw ma qiraneysid?
-
- Magaalooyinkii qurux
badnaa, dhowr qarniyo saa’id
- Qaar adigu aad dumisay
iyo, qaar darxuma liita
- Qalbigeygu wuxuu
diidayaan, qeex u tabiyaaye
- Qabri iyo shaneemays
dhexyaal, baa lasoo qoraye
-
- Qaanuun magaaliyo ma
jiro, qabasho hawleede
- Qashinkiyo muddaan laga
sifayn, qurunka awsaakhe
- Qaaxiyo tifoow baa ku
dhacay, qumman xariirtiiye
- Qarni iyo bar baan dibu
noqdaye, saw ma qiraneysid?
-
- Qaraabiyo xigaalaa is
nacay, Qabiiloow owgaaye
- Qoys nabad ku seexdaa
dartaa, loo qarxinayaaye
- Qolo aan cidnaba eed ka
galin, baa laqalayaaye
- Qiyaamaha miyaan kugu
aflixin, waaban kaa qadaye
-
- Qabiil yiri qabiiljecel
anaa, qaatay hadalkiiye
- Qadaf uma muraadee
runtaan, kuu qabbirayaaye
- Qardajeex adaa
lalahayoo, qodaya hoobaale
- Qarankii intaad dumisay
baad, igu qarweysaaye
- Qaladkaaga aan kuu
sharxee, qaado taladeyda.
-
- Qabiilkaaga waxaan
ahayn, adaa qoonsadoo nacaye
- Qoriga iyo banbaanada
adaa, qaadayoo sidaye
- Qabqablaha adaa
dabasocdoo, qaatay taladiise
- Qabiilkaba inaad adigu
tahay, saw ma qiraneysid?
-
- Qur lagooyo qurbaa loo
jaraa, waana qowl dhabahe
- Qur’aankay ku taallaa
oo ma aha, hadal qabiileede
- Qaanuunkii Ilaah adaa
diidayoo, qaab kalow maraye
- Qisaas bay aheyd inaan
kuu baxshoon, qoorta kaa jaro’e
-
- Qurbaha iyo adaa
aadayiyo, qurun shisheeyaahe
- Qabqablaha adaa
taabayoo, quud usoo diro’e
- Qaaraankana adaa soo
wadoo, qasaya deebaaqe
- Qabiilkaba inaad adigu
tahay, saw ma qiraneysid?
-
- Qarankaan hoggaan adag
lahayn, qolana eexeysan
- Qawaaniin hagtana loo
astayn, waa qadhoodhabo’e
- Mar haddaad ku
qanacdeen middaas, qaabdariyo ciilka
- Maxaan kuu qabtaa saw
adigu, xumo ma qoondeysan?
-
- Qabiiljecel haddaan
ahay dadow, iga qiyaas qaado
- Qabiilkayga waataan u
shubay, dhiig qabow badane
- Qorfo aan cid joogin
iyo u maray, kaymo qoofalane
- Qofkastoon quwaax iyo
aheyn, qolada aan sheegto
- Qarqarsiga ku jabi baan
lahaa, qoon xun weeyaane
-
- Hadii maalka qaran
leeyahoo, talo la ii qeybsho
- Qobka iyo dushaan uga
ekaa, qaa’im araggiise
- Qofkii anigu aan wadiyo
qofkii, igu qabiil sheegta
- Qurqurada uddaa baan
lahaa, yaan lagaa qabane
-
- Haddii labo qoloon
deris aheyn, qow isaga saarto
- Halkii aan masloxo
qaaliyiyo, qaban lahaa kheyrka
- Qori qiiq leh baan
dhinaca kale, uga qabtaa cowse
- Intii ay qitaal ba’an
wadaan, waan qoslahayaaye
-
- Intaasoo qariyo buur
xuniyo, qac iyo baaruuda
- Qabiilkayga awgiis
haddaan, qaran u naafeeyey
- Tub kastoo qalloocana
umaray, qolada aan sheegto
- Qaxar iyo dhib baa iga
qabsaday, waana qirayaaye.
-
- Qamuunyoodayeey yaa mar
qura, qarankii ii ceynsha
- Qarqaryada i haysana
mar qura, iga qayoodsiiya
- Qabiil waa dhibaatee
yaa bulshada, uga quraan saara
- Qaladkiiyo xumihii aan
galnana, qariya oon sheegin
-
- Qoladaan difaacnoo in
badan, qaran u miineeynay
- Qarni iyo bar qoladaan
darteed, dibugu saan qaadnay
- Wax kastoo qurxoon iyo
wixii, ummadi qiimeyso
- Qabiilkaan daraaddiis
xumaha, samanno qoosheynay
-
- Qofkii iga dambeeyow
murtidan, qaado waa dhaxale
- Qaran iyo qabiil kala
duwoo, haysku hoos qarina
- Qalad iyo xumaan kala
saxoo, hays qaddoodilina
- Qorraxdiyo mugdiga yaan
midkeen, qiil isugu keenin
-
- Qawlkii Ilaah raaca oo,
nabadda qiimeeya
- Abuu qaasim xeerkuu
dhigiyo, qaata taladiisa
- Qufraan Eebbe weydiista
oo, jooja qalalaaska
- Qiyaamaha xisaab baa
jirtiyo, qamaci naareede
- Qof walboow naftaadaa
qabriga, kali laguu qaadin
- Qosol iyo baroor baad
mid uun, qowlalada jeexin
Omar Abdinur <omarabdinur@hotmail.com>
Faafin: SomaliTalk.com | Oct 12, 2004
Afeef: Aragtida qoraalkan waxaa leh
qoraaga ku saxiixan
»Maxay
kaga duwanaankartaa dowlada cusub dowladihii
hore ? [M.A]
»Cabdulaahi
Yuusufoow, Soomaali waa ku jeceshahay
[Gaagaale]
»SOOMAALIYA
OO HABAR QABE DOORATAY
[Diridhaba]
»Cali
khaliif oo dhirbaaxadii c/qaasin ku darsaday
mid ka wayn
[c/risak]
»Somalia
oo dib dhac labaad ku habsaday
[M.Yusuf]
»Ardayda
reer Puntland oo soo dhaweyey Dorshada Madax
waynaha
»MADAXWEYNE
MA LAGU YIDHI !
[Khaliil]
»Ciidamada
Shisheeye ee C/ahi Yussuf Somalia ku soo
Wado [Osman]
»Somalia
waxay geedi u tahay god aan ka soo bixid
lahayn
[m.yusuf]
Kulaabo bogga www.SomaliTalk.com
|
©
www.SomaliTalk.com |
|
|
|