SomaliTalk.com | Nairobi | Oct 12, 2004

Warar laga helay diblomaasiyiin ka tirsan IGAD ayaa sheegay in madaxweynaha DFKMG ee Soomaaliya, C/laahi Yuusuf Axmed, oo Axadii 10/10/2004 lagu doortay shirka Kenya, in uu bisha Janaayo ee sannadka soo socda ee 2005 ka degi doono magaalada caasimada u ah dalka Soomaaliya ee Muqdisho.

Doorashada madaxweynaha ka dib, shacabka reer Muqdisho waxay aad u sugayaan cidda uu madaxweynaha dawlada federaalka ee kumeel gaarka ahi u soo xusho ra'iisul wasaaraha, iyo sida uu ra'iisul wasaarahu u soo dhiso dawladiisa. Waxaana taas ka horeysa in si rasmi ah loo dhaarin doono madaxweynaha.

Warar kale oo u kudhow madaxweynaha cusub ayaa sheegaya in laga yaabo in safarada ugu horeeya uu ku tegi doono dalka Maraykanka magaaladiisa New York, in kasta oo aan la xaqiijin waqtiga safarkaasi ku beegan yahay.

Warbaahinta caalamka ayaa badan koodu ku tilmaamay in uu C/laahi Yuusuf yahay nin ku dhow dawladaha Addis Ababa iyo Washinton. Jariidada New York Times oo faallo ka qortay doorashada C/Laahi Yuusuf ayaa tiri : Dadka ka soo horjeeda C/laahi Yusuuf waxa ay ku tilmaamaan in uu yahay nin aan u dul qaadan karin warbaahinta xorta ah, aan jeclayn xoogga islaamiyiinta ah, aan xiriir wanaagsan la lahayn Somaliland iyo qabqablayaasha Muqdisho. Jariidada oo hadalkeeda sii wadata waxa ay qortay: dadka taageerayaasha u ah C/laahi Yuusuf waxa ay yiraahdaan in uu yahay nin karti leh, tababar milatari leh, isla mar ahaantaasna gacan saar la leh Addis Ababa iyo Washington.

Warbaahinta Dalka Koonfur Afrika ayaa ayaduna qortay in dadka Soomaaliyeed ay si taxadar leh kusoo dhoweyeen doorshada madaxweynaha Soomaaliya loo doortay C/laahi Yusuuf. Jariidada Independent Online oo kasoo baxda k/Afrika oo arintaas faahfaahineysa waxa ay qortay in: shacabka Soomaaliyeed ay madaxweynaha ku qiiman doonaan wax qabadkiisa ee aysan u eegayn qabiilka uu ka dhashay.

Xog-hayaha guud ee Qaramada midoobey, Kofi Annan, waxa uu dadka Soomaaliyeed ku amaanay sida ay u dhacday doorshadii madaxweynaha, waxana uu soo dhooweeyey madaxweynaha la doortay. Waxa kale oo C/laahi Yuusuf soo dhoweeyey madaxweynaha dalka uu hadda martida u yahay ee Kenya, kaas oo ku qaabilay guriga madaxtooyada Kenya, kaddibna ay yeesheen wadahadal albaabadu u xirnayeen.

XAMAR DAAWO DACALADA... SAWIRO....