Waa sidee dareenka Muqdisho doorashadii Cabdulaahi Yuusuf ka dib

Iyadoo 10 ka bishaan loo doortey madaxweynaha Jamhuuriyadda federaalka soomaaliya Cabdulaahi Yuusuf ayaa haddana dadweynaha waxay ka muujiyeen dareemo kala duwan gaar ahaan kuwa ku nool magaalooyinka soomaaliya iyo magaaladda Muqdisho iyadoo magaalooyinka qaar si aad ah looga soo dhaweeyey waxaana ka dhacay banaanbaxyo lagu taageerayey doorashada madaxweynaha ee Cabdulaahi Yuusuf waxaa banaanbaxyadii ugu ballarnaa ka dheceen halka uu ka soo jeedo Cabdulaahi Yuusuf sida magaalooyinka Boosaaso ,Garoowe iyo Gaalkacyo.

Hadii aan fiirino magaaladda Muqdisho oo ah caasimadda Soomaaliya waxay maalmahan diyaargarow ugu jireen soo dhaweynta madaxweynaha cusub ee soomaali , waxay dadka diyaarsadeen boorar ay ku qoran yihiin halku dhigyo ay ka mid ahaayeen ‘ waxaan soo dhaweynaa madaxweynaha cusub" ‘"cid kastoo la doorto waan soo dhawaneynaa"

Dareenka Muqdisho waxa uu si aad ah u kacay markii wareegii saddexaad ay isugu soo hareen cabdilaahi Yuusuf iyo Cabdillaahi Axmed Caddoow, Qof kasta wadnaha ayuu farta ku ahayey waxayna dadka qaar ku hadaaqayeen in la gaaray xiligii uu soo gabagaboobi lahaa daalkii dheeraa ee ay soo mareen dadka soomaaliyeed muddadii Afar iyo tobanka sanno aheyd, dadkii badankiina waxay u arkayeen in xiligaan oo kale uu ka bixi karo ruux hal adag oo meel marin kara mas'uliyaddii uu qaaday, "waxaan dareemayaa neecaw qabow oo ka soo go’aysa meel fog sidaa waxaa yiri Abuukar Cali oo sheegay inuu ku kalsoon yahay qaabka loo agaasimey hawshan iyo Cidda ku guuleysatey labadaba

Muqdisho waxay u diyaar garoowdey marka ruux uu ku soo baxo doorashada nin u dhashay deegaankaan in ay dhigaan banaanbaxyo iyo fantasiiyeyaal laakiin taa meel mar ma noqon, Waxaana ku soo baxay doorashadii Cabdilaahi Yuusuf oo helay Aqlabiyad aad u badan. Inkastoo la maqlayey xabado teel teel ah doorashada kadib hadana wey ka liidatey heerkii loo filayey, Waxaa taa loo aaneynayaa xuuraansi kadib in ay tahay guusha Cabdillaahi Yuusuf.

Meelaha qaarkood waxaa la diyaariyey Blue light iyo ayadoo waliba magaalada lagu xiray nalal kala cayn ah hase yeeshee taas waa lagu hun goobey in ay shaqeyso waxaana Blue light-yadii dib saaka looga iibiyey Suuqa rasaasta ee loo yaqaan Cir toogte ee bakaaraha.waxaana la damiyey Nalalkii kala jaad-jaadka ahaa, sidoo kale xalay Waxaa magaalada ka dhacay is Qab-qabsi u dhaxeeyey taageerayaasha Cabdilaahi Yuusuf iyo Kuwa Cabdillaahi Axmed Caddoow waxaana meelaha Qaarkood lagu waramay in ka dhaceen dilal loogu geystey dad taageersanaa Cabdilaahi Yuusuf.

Saaka waxa ay magaalada Muqdisho ku waabariisatey taageerada labada Musharrax waxayna dadka qaarkood ay sheegeen in Qudbaddii u jeediyey cabdillaahi Yuusuf ay ahayd mid Dhiilo gallisey dadka gobolkan, hadal kaasoo ahaa Dadka waan kala bartey waa qaar habeen socda iyo kuwa maalin socda labadaba waan la shaqeynayaa , hadalkaasoo ay u fasirteen kuwo in uu u shaqeyn doono qaarna inuu ka shaqeyn doono. 

Cabdulahi Yuusuf Axmed Madaxweynaha soomaaliaya

Dul ahaan gad gadoonkaas siyasadeed waxaa uu keenay koror ku yimid lacagaha qalaad iyo Hubka Fud fudud ’ nin ka mid ahaa dadkii ka soo hor jeeday Cabdilaahi Yuusuf ayaa waxaa uu yiri ’Waxaan Mar kale dib u qaadan doonaa Qorigeyga , waayo Cabdilaahi kama Duwana kuwii aan la dirirnay,waxaana u arkaa mid ka mida Ardaydii Kacaankii Siyaad oo dib u soo rogaal celiyey waxaana ku Qasbanahay inaan mar kale dib guntiga dhiisha isaga dhigo ka hortagediisa,

Ruux kale oo aan ka mida dadka deegaanka magaalada Muqdisho ayaa aamin san in la gaaray xiligii la soo afjari lahaa Qoriga , dilka, dhaca, kufsiga iyo waliba isku dul noolaadka ama ka ganacsiga dadka, gabadhan oo oo lagu magacaabo Faadumo Xuseen ayaa ku talisay in la taageero oo lagarab is taago madaxweynaha Cusub ee soomaaliya,

Saadaal kala duwan ayaa laga bixiyey sida fudud oo uu ku hantey Xilka madaxtinimda soomaaliya mudada shanta sano ah , Is Qab-qabsi fogaadey oo ka dhexeeyay waayahanba hoogaamiyeyaasha siyaasadeed ee fadhigooda yahay magaalada Muqdisho ayaa loo arkaa in Col Cabdulaahi Yuusuf u saamaxdey, Dadka qaar ayaa qaba in Shanta Sano ee uu haynayo xilka ay ku soo afjarmeyso waqtiga cabdilaahi yuusuf soomaaliya ay galayso nabad iyo Barwaaqo, wadaad saaka iiga horyimid wadada ayaa si Caro leh iigu yiri "Qoomkii Is dulaayaa Ilaah waxaa uu ku Salladaa Nin Musallad ah" waxaa una sii daba dhigay In Ilaah daafacanayo diintiisa" falanqeynta siyaasadeed ee Cabdilaahi Yuusuf oo ay is weydaarsanayeen dadka qaaarkood ayaa soo bandhigay in Cabdilaahi uu yahay shaqsi dabada ay ka riixayaan cadowga sooomaaliya ee Ethiopia, Oday ruugcaddaa ah ayaa intaa raaciyey "Cabdilaahi yuusuf ma ogidine waa neceb yahay xabashida oo xabsi ayuu u muteystey kadib markii uu diidey in goobo ka tirsan soomaaliya la suro calanka xabashida xiligii Jabhadi SSDF', dadka qaar ayaa ka calool xun hadaladii kala gaaray hogaamiyaasha soomaaliyeed sida hadalkii kal hore yiri Muuse Suudi ee ahaa "Cabdulaaahi ha gashado kab ku jin ah, taasoo loo arkayo haddaan la isu taanaasulin in ay keeni karto dhaawac soo gaara nabada iyo xalka la sugayo. waxaa kaloo shacabka Muqdisho ka guuxaya hadaladii kajanka ahaa ee Cabdilaahi Yuusuf uu jeediyey xiligii la doonayey dhismihii dowladii sal balaar oo uu halkaas ka sheegay erey saameyn weyn yeeshay oo taariikhi ah"ciddii aan taageerin waxaan wadno badda haka cabaan" Markii uu shaashada iska waayeyna uu Salbalaar ku yiri "ayada badda ha cabto".

Ugu damdeyntii cadulaahi Yuusuf Axmed waxay dadka muqdisho uga fadhiyaan siyaasad fur-furan oo ka duwan kuwii looga bartey maamuladii ka horreeyey waxaana sidoo kale laga dhur sugayaa ama isha lagu hayaa cidda uu u magacaabi doono Raiisul wasaaraha soomaaliya oo fure u noqon kara xalka soomaaliya waxayna ku xiran tahay taxadarka arintaan uu ka muujiyo Cabdilaahi Yuusuf Axmed haddii kale dowladaan loo han weyn yahay waxay noqon doontaa mid dibad joog ah ama ku kooban Gobolo khaas ah.

W/D Amiin Yuusuf Khasaaro
E-Mail -amiinkhasaaro@hotmail.com ama
amiinkhasaaro@yahoo.com