Afhayeenkii Isbahaysiga Dooxada Jubba
Waqtigii Dagaaladu Socdeen oo Kahadlaya Dhibaatada ka Jirta Magaalada
Kismaayo.Deganaansho
la'aanta Kismaayo yaa wada?
Ibraahin
Jaamac Cigaal (Howle)
howlejaamac@yahoo.com
002521-216909
Dec 31, 2004
Magaalada Kismaayo oo ka mid ah
Magaalooyinka ugu waaweyn Dalkeena Soomaaliya hodana ka ahaan jirtay
dhinacyada Beeraha, Xoolaha, Ganacsiga iyo Bada-ba oo la oran karo waa
Magaalada ugu muhiimsan Soomaaliya ilaahayna ku minaystay khayraadkaasi
dhinac walba leh ayaa waxaa ku dhacday nasiib daro ah deganaansho la’aan
joogta ah iyadoo 14-kii sano ahayd meelaha ay dagaalada ugu badan ka
dhaceen dalka Soomaaliya, laga soo bilaabo xiligii ay dhacday dowladii
dhexe ee Soomaaliya ilaa iyo iminka oo ay ka jirto deganaansho la’aan
iyo maamul xumo.
Xiligii ay imaadeen ciidamii UNISOM oo
uu dib u qabsaday magaalada Gen. Maxamed Saciid Xirsi Morgan oo horey
looga eryay oo sida ay dad badani xusuusan yihiin uu xiligaas u wareegay
Gobalka Gedo oo looga soo abaabulay xiligaasi ciidan u qabta Magaalada
Kismaayo. Ciidamadaasi oo tiradoodu gaaraysay 800 oo askari oo ka mid
ahaan ciidamadii Gobalka Gedo oo saldhigoodu ay ka soo duuleen ahaa
Tuulada Faafaxadhuun oo ka tirsan degmada Baardheere ee Gobalka Gedo.
Xiligaas oo ahayd xili Roob ah oo aysan
gaadiidku dhulkaasi mari karin ayaa ciidamadaasi waxay ku soo duuleen
Dameero oo markii dambe loogu magac daray Ciidamadii dameeraleeyda.
Iyadoo ay si fudud magaalada kismaayo gacanta ugu dhigeen maadaama ay
ahaayeen ciidamo xul ah oo tababarkoodu sareeyo.
Markii magaalada la qabtay kadib ayaa
Gen. Moorgan uu isku magacaabay hogaankii ciidanka iyo Siyaadada. sidaas
darteed ayaa waxaa jananka ka khaldamay hogaankii ciidan iyo siyaasadaba
isagoo ka leexday dhabihii lagu heshiiyay waxaana bilaabmay khilaaf soo
kala dhexgalay isaga iyo saraakiishii uga hoosaysay ciidanka wuxuuna
bilaabay inuu ciidankii dhibaatada badan u soo maray qabashada magaalada
uu qaar kala wareego hubka, qaar uu laayay iyo qayb isaga tagtay, wixii
ka harey ciidamadii dameeroleey ayaa waxay tageen duleedka magaalada
kismaayo sida Goobweyn, Madhamaato iyo Lug-loow iyadoo uu halkaasi ka
bilowday dagaalkii dheeraa ee labada sano socday. ciidankaasi oo
xiligaas hogaaminayay Allaha u naxariistee Col: Afgabdheedle oo
dagaaladaasi ku geeriyooday, iyadoo uu dagaalkii sii xoogaystay kuna
fiday daafaha magaalada taageero hiil iyo hoo-ba leh-na ka helayay
Beelaha ay ka soo jeedaan ciidamadaasi, waxaana kadib ciidamadaasi ku
soo biiray ciidamo uu hogaaminayay Col: Barre Aadan
Shire (Barre-hiiraalle) oo markii
dambe loo magacaabay gudoomiyaha Guda howlgalinta taas oo uu marar badan
ku guul daraystay hogaamintaasi iyo inuu gacanta ku dhigo magaalada ugu
dambayntiina uu yimid Gen. Axmed Warsame oo wakhtiyo yar ka dib ku
guulaystay inuu ka saaro Moorgan oo huwantii uu watay.
Markii ay ciidamadaasi ay ka eryeen
Morgan Magaalada ma dhicin in Barre sameeyo maamul kumeel gaar ah oo
dadka u dhexeeya si loo helo deganaansho iyo kala dambeyn, isagoo diiday
talooyin wax ku ool ahaa oo loo soo jeediyay isla markaana sameeyay
xukun marooqsi iyo kaligii talisnimo oo keentay dhimasho badan, bur-bur
iyo kala tag.
Sidaas darteed waxaa bilaabatay in qaar ka
mid ah ciidamadii dhibka badan u soo maray wakhtiyadaasi aan soo sheegay
iyo dadkii kale oo howshaasi u soo huray naftooda iyo Maalkooda uusan
Barre siinin wax tixgalin ah taasoo sababtay inay ciidamadii iyo
waxgaradkii Beelaha ay isaga tagaan Magaalada oo ay tageen Beerxaani,
Cabdille-biroole iyo Meelo kale iyadoo saraakiil iyo waxgarad ka mid
ahaan jiray Isbahaysiga ay ku dhawaaqeen Gole loogu Magac daray Golaha
Nabadgaliyada iyo Midnimada Qaranka Soomaaliyeed oo taageero badan ka
helay Gobalka Jubbada Hoose iyo Meelo kale. Golahaas oo muujiyay dadaal
badan oo ah dhinaca nabadaliyada iyo Siyaasadaba.
Sidaas awgeed si xal looga gaaro
dhibaatooyinka ka jira Magaalada Kismaayo waxaan u soo jeedinayaa in
Barre hiiraalle maadaama uu ka gaaray target-kii uu lahaa ee
xildhibaanimada DFKMG ee Soomaaliya uuna ku guuldaraystay inuu wax ka
qabto dhibaatada mudada badan ka taagnayd halkaasi inuu fursada siiyo
waxgaradka, Aqoonyahanada iyo Siyaasiyiinta oo uu ka tago, hadii kale
waxaa iman doonta inay ku dhacdo sidii horey ugu dhacday Gen. Moorgan.
Ibraahin
Jaamac Cigaal (Howle)
howlejaamac@yahoo.com
002521-216909
Afeef: Aragtida qoraalkan
waxaa leh qoraaga ku saxiixan
Faafin: Somalitalk.com | Dec
31, 2004
Boqorka Belgium
ayaa Taageeray Agaasime Difaacay Gabar Xijaaban
Guji...