WARARKII December 30, 2004
- Abshir Bacadle: “Fahadoow
Farriintaadii way I soo gaartay”
- Guddoomiye ku xigeen Golaha
wakiillada Somaliland oo is casiley…
- Warsaxaafadeed:: Ururka
Horumarinta iyo ka hortagga Xaalufinta…
- 30-kun oo Metric ton oo
hay’adda WFP U direyso Soomaaliya…
- Maxaa ka soo baxay kulankii
afar geesoodka ee Sudan..
- Mareykanka oo sheegay inuusan
ku qanacsanayn jawaabihii ay Liibiya ka bixisay
shirqoolkii lagu dili lahaa Amiir Cabdalla
- Tababarkii Dimuq-raariyadda
iyo….
- Salaad-Gaab: “Shirweynihii
xiriirka kubadda Cagta waxaa la qabanayaa bisha ...
WAXAA DIYAARIYAY: Amiin
Yuusuf | Muqdisho
E-mail:
amiinkhasaaro@hotmail.com | Dec 30, 2004
Abshir Bacadle: “Fahadoow
Farriintaadii way I soo gaartay”
Abwaanka Weyn ee
Soomaaliyeed Abshir Bacadle ayaa markii uu Akhristay
qormadii todobaadlaha ahayd ee Fahad Yaasiin ee uu hal
ku dhigga uga dhigay (Abshir
Bacadle: “Gabyaagii Wahaabiyada maxaa hadal looga
waayay”) goostay in uu wax ka yiraahdo, wuxuuna
marka ugu horreysa mahadcelin kaddib u sheegayaa qoraaga
Fahad Yaasiin in farriintiisii ay soo gaartay uuna
garowsaday una arkay inay tahay wax gar ah.
“Waan qaatay waana wax I
qabta inkastoo meelaha qaar ee uu saaxiibkay Fahad
tilmaamay aan wax badan ka iri, way habboon tahay inaan
gabadha saqiirka ah ee ay dowladdu ku habsatay aan wax
ka iraahdo” ayuu yiri Abshir Bacadle oo xusay inuu aad
uga xun yahay dhibaatada loo geystay gabadhaa yarta ah
ee la argagaxiyay iyadoon wax dambi ah oo lagu caddeeyay
aysan jirin.
“Nin kasta oo aqoon yahan
ah, gabyaa kasta oo Soomaaliyeed iyo cid walba oo dareen
dadnimo uu ku jiro waa ku qasab inay ka hadasho arrinta
gabadhan yarta ah ee
Zamzam”.
Ayuu mar kale abwaanku yiri, isagoo booqday
xafiiska wargeyska Ayaamaha, wuxuuna intaa ku daray:
“Farriintii Fahad way I dhaqaajisay, waxaanan rajeynayaa
in todobaadka soo socda aan daaha ka rogo gabay aan kaga
hadli doono arrinta gabadha Zamzam oo dad badan oo
Soomaaliyeed saamayn ku yeelatay wax badanna laga yiri.
Bal aan markan wax yar oo
hordhac ah ka ifiyo gabayga aan arrinta Zamzam kaga
hadlayo:
Guddiga Habar-magaalood
wanjalay
Gabaraan Qaan-gaarin
Duqa ILAAHAY gafiyay gabadha ii daaya
Go’aankooda Higiskaa ma waan gobi ka shuureyn
Wanjalay: (Dembi geliyay).
Guddoomiye ku xigeen
Golaha wakiillada Somaliland oo is casiley…
Waxaa maalintii shalay
ahayd warqadiisii istiqaalada ahayd gudbiyay C/qaadir
Xaaji Ismaaciil Jirde oo ahaa guddoomiye ku xigeenka
golaha wakiillada Somaliland, C/qaadir Jirde oo ka mid
ahaa siyaasiyiinta deegaankaas caaana ku ahaa guddoomiye
ku xigeenka Golaha wakiillada Somaliland aaya waxaa lagu
tilmaamay is casilaaddiisa inay ku timid muran xoog leh
oo soo kala dhex galay qaabka xulidda ee golaha
wakiillada. Iscasilladda C/qaadir ayaa waxay soo baxday
Dorraad aroortii iyadoo ay xubnaha golaha wakiillada ay
aad ugala murmeen qaabka xulitaanka, waxaana la sheegay
inuu u adkaysan waayay buuqaas faraha badan, kaddibna ay
keentay inuu is casilo guddoomiye ku xigeenka.
Tallaabadaan uu ku dhaqaaqay guddoomiye ku xigeenka
waxay dharbaaxo ku noqonaysaa maamulka Daahir Riyaale oo
maalmahaan la ciirciirayay cadaadis kaga imaanayay qaar
ka mid ah siyaasiyiinta iyo xukuumadda, waxaa dhawaan
iyana la xiray Keyse Xaaji oo ka mid ah xildhibaannada
deegaanka waxaana la sheegay in xariggaan uu keeni karo
in ay iska horyimaadaan siyaasiyiinta waaweyn ee
maamulka Daahir Riyaale.
Warsaxaafadeed:: Ururka
Horumarinta iyo ka hortagga Xaalufinta…
Ururka horumarinta iyo ka
hortagga xaalufka deegaanka Soomaaliyeed ayaashalay soo
saaray warsaxaafadeed uu ku sheegay inay dalka ka jirto
xaalufin ba’an oo lagu hayo deegaanno ay ka mid yihiin
gobollada Gal-guduud, Hiiraan, Shabeellaha Hoose iyo
Jubbooyinka.
Ururkaan oo marka la soo
gaabiyo loo yaqaan SOPSEDE, wuxuuna warsaxaafadeedkiisa
ku sheegay in deegaannadaas xaalufintooda loo adeegsado
qalab casri ah oo lagu jaro guud ahaan dhirta, kuwaasoo
uu sheegay inay ku kacaan dhuxusha dhoofiya.
Ururku wuxuu uga digayaa
ganacsatada inay gacansigooda ku wajahaan jaridda dhirta
oo u sheegay inay qiimo weyn ugu fadhido shacabka
soomaaliyeed, isla markaana wuxuu u soo jeediyay
ganacsatada iyo kooxaha ku howlan ganacsatada inay u
naxaan dhirta iyo deeggaanka.
Ururku wuxuu sheegay in
dadkaasi ay arrimahaas uga faa’iideysanayaan maamul
la’aanta ka jirta dalka, wuxuu kaloo uga digay kooxaha
dhuxusha inay joojiyaan howlahaasi, wuxuuna sheegay in
arrintaasi ay keeni karto baaba’a ku yimaada deegaanka.
Ugu dambeyntii wuxuu u soo
jeediyay kuwa iyagana ku howlan jaridda dhirta wax
soosaarka sida: Liinta, Cambaha iyo wixii la mid ah inay
joojiyaan, wuxuuna ururku keenay inay arrintaasi keeni
karto, baaba’a ku yimaada wax soosaarka iyo deegaanka oo
nabaad guura.
Waxa kale oo uu beesha
caalamka ka codsaday inay il gooni ah ku eegaan xaalufka
lagu hayo gayiga soomaaliyeed, waxaana war
saxaafadeedkaan ku saxiixnaa guddoomiyaha ururka Maxamed
Cabdi Colaad
30-kun oo Metric ton oo
hay’adda WFP U direyso Soomaaliya…
iyadoo gargaar caamali ah
loo fidinayo dadkii ku waxyeelloobay dhulgariirkii iyo
duufaannadii ka dhacay dalalka ku teedsan dalalka India
ayaa hay’adda WFP waxay mas’uuliyiinteeda ku dhawaaqeen
inay Soomaaliya u diri doonaan 30-kun oo metric ton oo
raashin oo la siin doono dadkii ku barakacay
duufaannadaasi, gaar ahaan waxay hay’addu sheegtay in
gargaarkaas xooggiisa la gaarsiin doono gobollo ka
tirsan Puntland.
Maalinta Sabtida ah ayaa
la filayaa in wafdi uu hoggaaminayo Ra’iisul wasaaraha
Dowladda Federaalka ah Prof Cali Maxamed Geeddi ay tagi
doonaan gobollo ka tirsan Puntland waxaana ra’iisul
wasaaraha raaci doona madax ka tirsan Hay’adaha
Samofalka.
In ku dhowr 100-ruux oo
Soomaalia ah ayaa ku dhintay duufaannadii ka dhacay
Xeebaha Somaaliya, waxaana ku barokacay kumanaan kun oo
Soomaali ah.
Maxaa ka soo baxay
kulankii afar geesoodka ee Sudan..
Waxaa maalintii shalay
ahayd Magaalada Khartuum ee dalka Sudan lagu soo
gabagabeeyay kulankii afar geesoodka ahaa oo ay ka
qaybgaleen waddamda Sudan, Somalia, Yemen iyo Ethiopia,
waxaana kulankaan looga hadlay arrimo fara badan oo la
xiriira geeska Afrika iyo sidii afartaas waddan ay isaga
kaashan lahaayeen arrimo fara badan.
Go’aannadii ka soo baxay
kulankaas waxaa ka mid ahaa: Sidii loo dhameyn lahaa
colaadaha ka jira qaar ka mid ah waddamada Geeska Afrika.
Waxaa kaloo ka mid ahaa
qodobbadii ka oo baxay kulankaas waxa loogu yeeray la
dagaallanka kooxaha argagaxi-sada. Sidoo kale waxaa ka
mid ahaa qodobbada in la iska kaashado dhinacyada
dhaqaa-laha, ganacsiga iyo arrimaha bulshada, waxaana
kulankaas goob joog ahaan uga qaybgalay Somalia iyo
Jabuuti, waxayna dalbadeen inay xubno ka noqdaan
Isbhaysigaas.
Mareykanka oo sheegay
inuusan ku qanacsanayn jawaabihii ay Liibiya ka bixisay
shirqoolkii lagu dili lahaa Amiir Cabdalla
Wasaaradda Arrimaha dibadda
ee dalka Mareykanka ayaa sheegtay in marnaba aysan ku qancin
fasiraadihii ay Liibiya soo bandhigtay oo ku aaddanaaa
shirqoolkii la sheegay in lagu dili lahaa ninka leh dhaxalka
boqortooyada Sucuudi Carabiya Amiir Cabdalla Bin C/casiis.
Afhayeenka wasaaradda
arrimaha dibadda ee Mareykanka Richard Botcher wuxuu sheegay
inaysan dowladda Mareykanku weli shirqoolkan dartiis Liibiya
ugu darin liiska argagaxisada, wuxuu intaa ku daray in
mas’uuliyiinta Mareykanka ay arrintaan dhowr mar kala
hadleen dalka Liibiya.
Richard oo hadalkiisa sii
wata wuxuu yiri: “Waxay Liibiya noo soo bandhigtay qaar ka
mid ah jawaabihii ay ka bixinaysay dhacdadan balse ma ahayn
kuwo dhamaystiran oo aniga iskaba dhaafee aysan cid kale
xitaa ku qancin Karin, ma ahayn kuwo ahayn kuwo go’aan looga
qaadan karay dhacdan waqtiga hadda la joogo”. Dowladda
Sucuudiga ayaa iyada arbacadii hore safiirkeeda ka soo
qaadatay dalka Liibiya, sidoo kalena waxay soo saartay
go’aan ay dalkeeda kaga erinayso safiirkii Liibiya iyadoo
taa jawaab uga dhigaysa kaalinta Liibiya ku leedahay isku
daygii dilka ahaa ee Amiir Cabdalla.
Baarayaal Mareykan ah ayaa
markii ugu horreysay daaha ka qaaday mu’aamaraddaan, iyagoo
xusay in shirqookaan ay ka ogaadeen sida ay sheegteen nin
mulsim ah oo magac weyn ku leh dunida muslimka una dhashay
dalka Mareykanka, kaas oo ay ku socotay baaris maxkamadeed
kaddib markii lagu eedeeyay in isaga iyo dowladda Liibiya u
dhexeysay wadashaqeyn dhiaca maaliyad sharci darro ah,
waxaana ninkaa lagu xukumay 23-sano oo xabsi ah. Ninkan oo
lagu magacaabo C/raxmaan Al-Camuudi ayaa qirtay xilligii ay
maxkamad-diisu socotay bishii June ee aynu soo dhaafnay in
uu u ka qaatay mas’uul sare oo ka tirsan dowladda Liibiya
lacag malaayiin kun oo dollar ah.
Warbixin ay dowladda
Mareykanku soo saartay ayay ku sheegtay in Liibiya ay
qorshaysay dilka Amiir Cabadalla kaddib markii uu dhamaaday
shirki Madaxda carbeed ee 2003, markaas oo uu soo if baxay
khilaaf dhex maray labadaas dal ee Liibiya iyo Sucuudiga
laba todobaad kaddib markii shirkaasi la soo gabagabeeyay
ayay dowladda Liibiya u yeertay saaxiibkeed C/raxmaan Al-Camuudi
oo isagu la sheegay in si joogto ah uu u soo booqan jiray
Liibiya si uu ula kulmo madaxda Liibiya, waxaana la sheegay
in Qadaafi uu ninkaani u sheegay in uu doonayo inuu ciqaab
mariyo Amiir Cabdalla, Mas’uulkaa Liibiyaanka ah ee aan la
shaacin haybtiisa wuxuu ka codsaday C/raxmaan Al-Camuudi
inuu arrintan u gudbiyo laba nin oo dowladda Sucuudiga ka
goosatay kuwaas oo ay aaminsanaayeen in ay madax xanuun ka
qaadayaan madaxda Sucuudiga.
Richard Botcher wuxuu
sheegay in Liibiya ay soo gaarsiisay in marnaba ayhsan
doonayn in iska hor-imaad iyo gacan ka hadal ay ku xalliso
is faham waaga siyaasadeed ee Liibiya iyo Sucuudiga, wuxuuna
intaa ku daray Botcher in Liibiya ay u ballanqaaday in
arrintaasi ay ilaalin doonto, wuxuu kaloo sheegay in
mu’aamaraddan ay Liibiya ku kacday ay tahay mid hor
istaagaysa in la caadiyeeyo xiriirka ka dhexeeya Liibiya iyo
Sucuudiga.
Dhinaca kale; wargeyska Al-sharqal
Awsat ayaa ogaaday in Jaamacadda Carabta ay ka codsatay
labada dhinac inay u soo gudbiso macluumaad la xiriira
arrintan taagan, sidoo kalena waxay si gaar ah uga codsatay
dowladda sucuudiga inay soo gudbiso caddeymo lagu kalsoonaan
karo oo ay ku caddeynayso kaalinta ay Liibiya ku leedahay
isku daygan fashilmay ee lagu doonayay in lagu dilo Amiir
Cabdalla, sidoo kalena waxay Jaamacadda Carabta ka sugaysaa
dowladda Liibiya mowqifkeeda ku aaddan eedaymahan.
Xoghayaha guud ee
Jamaacadda Carabta Caamir Muusa ayaa sheegay in uu rajeynayo
in laba isbuuc gudahood uu heli doono qoraallada labada
dhinac uuna isku dayi doono inuu ka fikiro inuu u istaago
sidii Jaamacadda Carabta ay dhex dhexaadin uga geli lahayd
arrintan una soo dhaweyn lahayd labada dal ee Riyad iyo
Tripoli, dadaalkaasi wuxuu keeni doonaa in la magacaabo
guddi Carbeed oo heer wasiirro arrimo dibadeed ah oo qabta
howsha dhexdhexaadinta ah, dhinaca kalena Jaamacadda Carabta
ayaa waxa u socda xiriirro dhanka Taleefoonka ah oo joogto
ah oo ay la sameynayaan wasiirrada arrimaha dibadda ee
Sucuudiga iyo Liibiya Amiir Sucuud Al-Feysal iyo C/raxmaan
Shalqam. Kaaliyaha Xogahaya Guud ee Jaamacadda ee Arrimaha
siyaasadda Axmed Bin Xuli wuxuu sheegay in marnaba aysan
daaha ka qaadi doonin wada hadalladii ay la yeesheen
ergooyinkii Liibiya iyo Sucuudiga si aysan arrintu gacanta
uga bixin isla markaana dadaalka ay jaamacadda Carabta wado
uu noqdo mid guulaysta, wuxuuna intaa ku daray in arrinta u
dhexeysa Liibiya iyo Sucuudiga ay u geli doonaan si deggen
oo Dublamaasiyad iyo siyaasadi ku dheehan tahay.
Tababarkii Dimuq-raariyadda
iyo….
Hotelka Daamey ee magaalada
Muqdisho waxaa lagu soo gabagabeeyay tababar ay soo
qaban-qaabisay ururka Haweenka u dooda xuquuqda aadanaha iyo
nabadda Gobolka Hiiraan oo marka la soo gaabiyo loo yaqaan
HIWA oo saldhiggiisu yahay Magaalada Baladweyn xafiis
hoosaadna ku leh Magaalada Muqdisho.
Tababarkaan oo ay ka
qaybgalayeen soddon shaqsi ama ruux oo ka kala socday
qaybaha kala duwan ee bulshada Rayidka Soomaaliya, waxaana
casharro ka bixinyay khabiir lagu magacaabo Axmed Maxamed
Cali (Kiimiko) oo ka tirsan xarunta Dimquraadiyadda iyo
Xuquuqda Aadahana (Center for Democracy Human Rights) oo
fulisa howlo isugu jira kor u qaadista xirfadda hay’addaha
bulshada rayidka iyo NGO-yada Soomaaliyeed. Dhiirigelinta
Dimuqraadiyadda iyo difaacidda xuquuqda Aadanaha.
Xiritaankii siminnaarkaan
waxaa ka hadlay Xaawo Maaxi Macallin oo ka socotay ururrada
haweenka Soomaaliya, Naadiyo Suufi Cabdi oo ku hadlaysay
magaca ka qaybgalayaasha iyo Caaliyo Aadan Cabdi oo ah
Madaxa HIWA oo ka warbixisay waxqabadka HIWA iyo
qorshooyinka ay ugu talogashay bulshada Rayidka Soomaaliyeed,
waxaana soo gunaanaday C/qaadir Ibraahim Gacal (Abkow) oo ku
hadlayay magaca dhaqaaqa bulshada rayidka, waxa uuna ku
boorriyay ka qaybgalayaasha inaysan noqon kuwo miiska
dushooda uga taga wixii ay barteen kuna dabbaqaan howlahooda,
waxaa uuna intaa raaciyay in waxbarashadii Theory-ga ahayd
ee ay halkaas ku qaateen inay u rogaan mid fic ahaan loo
qabto, iyagoo dardar-gelinaaya sidii ay ugu dabbaqi
lahaayeen dowlad wanaagga iyo hoggaaminta suubban.
Salaad-Gaab: “Shirweynihii xiriirka kubadda Cagta waxaa la
qabanayaa bisha ...
Mar aanu xalay wareysannay
guddoomiyaha xiriirka Soomaaliyeed ee Kubadda cagta Salaad
Macallin Maxamed Salaad Gaab ayaan wax ka weydiinnay waqtiga
la qabanayo shirweynihii ama Congress-kii xiriirka
Soomaali-yeed ee Kubadda Cagta, isagoo arrintaas ka
hadlayana wuxuu yiri: “Shirwweynahaas waxaas waxaa la qaban
doonaan bisha August ee sannadka soo socda isagoo dastuuri
ah wixii ka sokeeya nama Quseeyaan”.
Warkan oo dhamaystiran ka akhri qaybat Ciyaaraha Khamiista...
WAXAA DIYAARIYAY: Amiin
Yuusuf Khasaaro
E-mail:
amiinkhasaaro@hotmail.com
Daabaco
Boggan | Print