Barnamujka caawa Radio Xoriyo ka baxaya waxuu ka
kooban yahay.
- Wafdigii uu hogaaminayay Gudoomiyaha J.W.X.O oo
kusugan Gobalka Kaliforniya ee cariga maraykan.
- Dagaalo lagu naafeeyay ciidamada gumaysiga
Itoobiya.
- Shir balaadhan oo ay Jaaliyada Ogaadeenya ee
Norway qabatay.
- Dawlada Itoobiya oo looga digay in ay faragalin
Miletari ku samayso Soomaaliya.
- Dhulgariir saameeyay inta badan wadamada
koonfurta asia,
- Barnaamujkii aragtida halgamaaga oo aan ku soo
qaadan doono qaybtii Labaad ee goroyooy gabl kuu dhac iyo suugaan
halgameed.
Wafdigii uu hogaaminayay Gudoomiyaha J.W.X.O
oo kusugan Gobalka Kaliforniya ee cariga maraykan.
Makhribnimadii 24kii Decembeber ayaa waxaa ka dagay
gagida dayuuradaha ee Magaalada Sandiego ee Gobalka kaliforniya wafdi uu
hogaaminayo gudoomiyaha Jabhada wadaniga xoreeynta Ogaadeenya Adm Mohamed
Omar Osman oo ay kamid yihiin Gudoomiyaha Qorshaynta iyo Cilmi baadhista
Dr. Mohamed Sirad Doolaal iyo wakiilka Jabhada ee wadanka Maraykanka
Professor.Mohamed Wali Abas.
Waxaana halkaas si diiran ugu soo dhaweeyeen
masuuliyiinta jaaliyada Ogaadeenya ee gobolka kaliforniya, odayaasha iyo
cuqaasha magaalada San-Diyeego oo y horkacayso Dr.Cibaado Xirsi Mahad oo ah
madaxa haweenka Ogaadeenya ee cariga Maraykanka.
Wafdiga oo kadib loo galbiyey Hotelka martida ee loogu
talagalay, ayaa maalintii Axada ka qayb galay shir balaadhan oo ay soo qaban
qaabisey Jaaliyada Ogadeeniya ee Magaalada Sandiyego.
Shirkaaas oo ku bilowdey sacab iyo sawaxan aan kala
joogsi lahayn oo lagu soo dhaweeynayay masuuliyiinta, ayaa waxay madaxdu
dadka siiyeen warbixin qoto dheer oo taabanaysa dhinacyo badan oo ku
saabsan wadanka Ogadeniya iyo guud ahaan Geeska Afrikaba.
Dadweynihii goobtaas isugu yimid oo aad wajiyadooda ka
akhrisanayso baahida ay u qabaan warbixinta Madaxda ayaa masuuliyiinta u
muujiyay taageerada ay u hayaan halganka loogu jiro madax banaanida
Ogaadeenya.
Dagaalo lagu naafeeyay ciidamada gumaysiga Itoobiya.
Wararkii ugu dambeeyey ee wariyaha RX ee gobolka Doolo
Cali Yare uu noo soo tabiyay ayaa sheegaya dagaalo badan oo ciidanka
gumeysiga Itoobiya si weyn loogu naafeeyay.
Dagaaladan oo si gaadmo ah ciidamada dulmiga iyo
gardarada ku caanbaxay ee gumaysiga Itoobiya loogu qaaday badhtamihii bishii
11 ilaa badhtamihii bishan aynu ku jiro ee Dec. Ayaa ciidamada Taliska Adis
Ababa lagaga dilay 100 Askari, oo 40 ka mid ah lagu gubay Baabuur wayn oo ay
saaraayeen kaas oo lagu gubay Daratoore oo ka tirsan gobolka Doolo, waxaana
ciidamada cadawga laga dhaawacay 77 Askari.
Dagaaladan oo intooda badan ka dhacay inta u dhaxaysa
gobolada Doolo, Qoraxay iyo Jarar ayaa ciidamada wayaanaha lagaga furtay 22
Qori oo nooca Outomatiga u dhaca ah, waxaa kaloo lagaga furtay rasaas aad u
badan iyo qalab yar yar oo kale.
Dagaaladan joogtada ah ee ay Jabhada wadaniga xoreeynta
Ogaadeenya ku hayso ciidamada gumaysiga Itoobiya ayaa waxay sababeen isku
dhacyo dagaal oo dhex mara ciidamada gumaysiga Itoobiya ee ku sugan gobolada
Ogaadenya. Askari gadooday oo ka tirsan ciidanka gumaysiga Itoobiya ee dagan
magaalada Birqod ayaa 23.12.2004 ku dilay saldhiga ciidamada gumaysiga
Itoobiya Sargaalkii madaxda ka ahaa ciidanka Birqod dagan iyo 3 Askario oo
kale waxuu kaloo dhaawacyo halis ah gaadhsiiyay 4 Askari oo kale. Askarigan
gadooday ayaa la sheegayaa in uu baxsaday oo aan la qaban.
Shir balaadhan oo ay Jaaliyada Ogaadeenya ee
Norway qabatay.
Galabnimadii Axada ahayd ee taariikhdu ku beegnayd
26-12-04 ayay jaaliyada Ogadenya ee wadanka Norway isugu yimaadeen shir
balaadhan oo ka dhacay xarunta jaaliyada ee magaalada Oslo,shirkaas oo si
heer-sare ah loosoo agaasimay waxaa warbixintiisa oo faah-faahsan inoo haya
wariyaheena nooga soo warama wadanka Norway Mohamed Cabdi Gaafane.
Shir aad u balaaran oo ay ka soo qeyb galeen dhamaan
qeybaha bulshada ayaa maalinimadii Axada ee ay taariikhdu ahayd 26 Dec. 3:00
galabnimo ka dhacay xarunta jaaliyadda Ogaadeenya ee dalka Norway Magaaladda
Oslo.
Shirkan oo ahaa mid si habsami ah loo soo agaasimay
ayaa lagu doortey guddi cusub, kaas oo wadi doono hawlaha Jaaliyadda labada
sanno ee inagu soo fool leh, iyada oo isla mar ahaantaana la isla meel
dhigay in shirkan oo kale labadii Sanaba hal mar la qabto, halka kolkii hore
Sanadkiiba uu mar ka ahaa.
Waxaa Madashii shirka ka hadley gudoomiyihii hore
jaaliyyada ogaadeenya ee dalka Norway muddane C/laahi Cali oo halkaas ka
akhriyey warbixin dheer oo ka hadleysa waxqabadkii jaaliyyaddu ay ku
talaabsatey sanadkii la soo dhaafey.
Waxaa kale oo iyaguna hadalo qiimo leh halkaas ka soo
jeediyey Wakiilka JWXO mudane Maxamed Yuusuf, Marwo Sahro Ismaaciil iyo
Mudane Axmed Kahliif Muxumed oo idilkoodba ku nuuxnuuxsadey sida loogu
baahan yahay in la garab istaago halganka aaya ka talinta shacabka
Ogaadeenya.
Guddigan Cusub ee lagu caleemo saarey goobtaas oo ay
howlo badani horyaalaan ayaa gudoomiyo loogu doortey Mudane Cabdinuur Dhaga
Cade..
Dawlada Itoobiya oo looga digay in ay
faragalin Miletari ku samayso Soomaaliya.
Xasan Hilawle Cusman (Xasan Kacaan) oo ah ku simaha
gudoomiyaha gobolka Hiiraan ayaa dawlada Itoobiya uga digay in ay faragalin
milelateri ku samayso wadanka Soomaaliya. Hadalkan ayuu sheegay mudane Xasan
Kacaan kadib markay soo baxeen warar sheegaya in dawlada Itoobiya ay
diyaarinayso ciidamo faragalin ku sameeya Soomaaliya, kuwaas oo lagu sheegay
in ay dhan yihiin 5000 oo Askari, oo ka qayb qaadanaya hub kadhigista
meleeshiyooyinka hubaysan ee Soomaaliya.
Mudane Kacaan ayaa sheegay in ciidamada Itoobiya loo
qorsheeyay in ay ka howlgalaan gobolada Hiiraan, Gado, Bay iyo bakool,
waxuuna dawlada Itoobiya uga digay inaysan hawlgalkaas ka samaynin wadanka
Soomaaliya isla markaasna waxuu carabka ku dhuftay in uu maamulka Hiiran ka
soo horjeedo qorshaha Itoobiya ee ay ku damacsan tahay in ay ciidamadeeda ka
hawl galiso Soomaliya.
Dawlada Itoobiya oo ciidamo ku sii
daadguraynaysa magaalada Badame.
Wararka naga soo gaadhaya xarunta xukuumada gumaysiga
Itoobiya ee Adis Ababa ayaa sheegaya ciidamo Itoobiyaan ah oo lagu sii
daabulayo magaalada Badame ee xuduuda wadanka Eritrea iyo Itoobiya ku taala,
taas oo uu dagaal lagu hoobtay ku dhex maray wadamada Itoobiya iyo Eritrea,
kadib markii lahaanshaheeda Labada wadan mid walba sheegtay. Gudi uu golaha
amaanka ee Jimciyada Quruumaha ka dhaxaysa u saaray xalinta khilaafka
xuduuda wadamada Eritrea iyo Itoobiya ayaa sanadkii 2002 go,aamiyay in ay
magaalada Badame ku taalo wadanka Eritea, hase yeeshee waxaa go,aankaas ku
gacan saydhay dawlada Itoobiya oo ku caan baxday qabsashada wadamada dariska
la ah.
Cadaadis caalami ah oo dawlada Itoobiya lagu saaray in
ay u hogaansanto go,aanka caalamiga ah ee uu gudiga xalintu soo gaadhay ayay
xukuumada Adis Ababa bishii hore ku sheegatay in ay ogolaatay go,aankii
gudiga caalamiga ah uu ka gaadhay xuduuda Eritrea iyo Itoobiya.
Tan iyo intii ay xukuumada Itoobiya sheegtay in ay
ogolaatay go,aankii gudiga caalamiga ah uu ka gaadhay xuduuda wadamada
Itoobiya iyo Eritrea waxaa soo baxayay warar sheegaya in xukuumada Itoobiya
isu diyarinayso in ay mar kale weerar ku qaado wadanka Eritrea, waxaana ugu
danbeeyay warkan sheegaya in wasaarada gaashaandhiga Itoobiya ka codsatay 3
Shirkadood in ay Ciidamo u daabulaan magaalada Badame.
Dhulgariir saameeyay inta badan wadamada koonfurta
asia,
Dhulgariir cabirkiisu yahay 8.9 ee halbeega lagu cabiro
dhulgariirka ayaa maalintii Axada ku dhuftay dhamaan wadamada dhaca
Koonfurta Asia. Inkabadan 20,000 ayaa kudhimatay, malyuunaad kalana waa ay
kudhaawacmeen.
Dhulagariirkan oo aan aduunka kadhicin mudo nusqarni ah
ayaa waxuu ugu horayn kasoo bilawday, waqooyiga dalka Indonesia gaar ahaan
gobolka Ache ee jasiirada tusama.
Dhulgariirka ayaa waxa uu dhacay goor aroor ah oo badi dadku aanay
shaqooyinkii u dareerin, isagoo si mawjad ahaana uga dhashay badwaynta
India oo markaa safar dheer kujiidhay dhamaan wadamada kulaala badwaynta
Hindia ee kuyaal koonfurta Asia. Wadamada Indonesia, Srilanka, India iyo
Thailand ayaa ah kuwa ay masiibadu aadka u haleeshay.
Wadanka Indonesia oo ah kay mawjadu kasoo bilaabantay
ayaa waxaa lagu qiyaasay inay ku dhinteen dad kor udhaafaya 5000,
islamarkaana ay kumaankun dad ahi ku dhaawacmeen,halka dad badanina ay ku
hanti beeleen. Dalka Srilanka oo ah kuu khasaaraha ugu badani ku dhacay
ayaa dhimashada lagu qiyaasay mid isasoo taraysa oo aan sifiican loo
xaqiijin Karin iyadoo qiyaasihii ugu danbeeyay ee qaybaha caafimaadka iyo
militarigu soo saarayaan ay gaadhayso 11,000, islamarkaana ay in kabadan
hal malyan ku dhaawacmeen, dhamaan dadka ku nool aaga uu dhulgariirku ku
habsaday ayaa gabi ahaanba ku hanti beeley.
Dhamaan adeegyadii bulshada sida isgaadhsiinta,
korontada, biyaha nadiifta ah, iyo gaadiid ayaan suuragalin inay badbaadaan.
Magaalooyinka Galley, Matali ayaa ah kuwa ay masiibadu aadka u naafaysay,
Gobolada Waqooyiga iyo Bariga ee ay kataliyaan ururka mucaaradka ah ee
looyaqaano Tamil Tigers ayaan xaqiiq sax ah laga hayn khasaaraha gaadhay,
sababtoo ah waxaa adag in dawladu ay ka fuliso tijaabooyin buuxa.
Madaxwaynaha dalka Srilanka waa haweenayda lagu
magacaabo Chadrika kumaratunga ayaa ku baaqday in dhibkani yahay masiibo
qaran iyadoo isla mar ahaantaa ka dalbatay dalalka qaniga ah in jawaab
gargaar oo dagdag ah laga bixiyo masiibada.
Dalalka Soomaaliya iyo Kenya ayuu badgariirkan
saameeyay waxaana wadanka soomaaliya ku dhintay dad ka badan 40 Ruux waxaana
ku bara kacay kumanaan qoys oo xeebaha Soomaaliya ku noolaa.
28.12.2004
C/Nuur Sh.Mohamed
radioxoriyo@ogaden.com
raadioxoriyo@yahoo.com
Radio Xoriyo waxaad ka dhegaysan kartaa
Mawjadda 31 MB ee dhererkeedu yahay 9820 KHZ, Maalmaha Talaadada iyo Jimcaha
7: 30PM waqtiga Afrikada.
Daabaco
Boggan | Print