Somali
Concern Group
www.somaliconcern.org
WARQAD FURAN
Ku: Mudane Abdullahi Yusuf
Ahmed, Madaxweynaha DKFS
Ku: Mudane Ali Mohamed Gedi, Ra’iisal wasaaraha DKFS
Ku: Mudane Sharif Hassan Sh. Adan, Guddoomiyaha Baarlamaanka DKFS.
25ka December 2004
Mudanayaal,
Ururka Somali Concern Group si aad iyo aad
ah ayuu uga murugeysan yahay xaaladda uu waddanka maanta ku sugan yahay,
welwelka aan qabno darteed ayaan u aragnay inay ku habboon tahay inaan
warqad furan idiin soo gudbino taasoo aan ku caddeynayno welwelkayaga.
Sidaan horeyba 21kii November 2004 talooyin
ugu soo jeedinay dowladda, ayaan mar walba diyaar ugu nahay inaan ugu soo
jeesanno sidii loo horumarin lahaa waddanka, looguna howlgeli lahaa wax
qabad dhab ah oo wax tar u leh shacabka Soomaaliyeed. Waxaad ogaataan inaad
mas’uuliyad culus aad u qaaddeen shacabka Soomaaliyeed, ha yeeshee aad moodo
in shakiyo badan ay soo baxayaan maalinba maalinta ka danbeysa.
Waxaa muhiim ah inaad noqotaan shaqsiyaad
dhowra sharciga, illaaliya hantida ummadda soomaaliyeed. Mas’uul waa kan
danta gaarka ah ka horumariya tan guud, isla markaana ogaada rabitaanka
shacabkiisa. Waxaad maanta heysataan fursad qaalli ah oo aad dhabaha saxda
ah ku qaadaan idinkoon u qaraabo kiilin dano gaar ah. Mas’uul waa kan dadka
dhibka ka saara oo u horseeda dhabbo suuban oo ku dayasho mudan.
Maalintii 21kii December, hayadda caalamiga
ah ee la yiraahdo International Crisis Group (ICG) waxey soo saareen
warbixin muhiim ah oo la magac baxday “Somalia:
Continuation of War by Other Means?” oo ay ku soo jeediyeen talooyin
macquul ah oo muhiim u ah waddanka, sidaas daraadeed waxaan jeclaan laheyn
in xubnaha baarlamaanka ay ka doodaan oo tallooyin muhiim ah ka soo saaraan.
SCG waxey aaminsanyihiin in nuqulkan uusan wada saxsaneyn, ha yeeshee talo
soo jeedintooda ay macquul tahay una aragno fursad xukuumadda iyo
baarlamaankaba bilow ugu noqota doodooda.
SCG waxey idinkula talineysaa inaad
tallooyinkii aan horey idiinkugu soo jeedinayna aad tixgelisaan, lana
timaadaan horseed cusub oo waxtar shacabka u leh. Mas’uuliyiinta dowladda ee
la dooranayo waa in lagu saleeyaa aqoon, karti, waayo aragnimo shaqo, lalana
xisaabtamo. SCG waxey talo ku soo jeedineysaa in sharciga loo dhowro sida uu
yahay oo aan markii larabana laga faa’iideysan. Ogaada in ummaddu ay idin
wada fiirsaneyso oo noqda kuwii isku kalsoonaada oo shacabka soomaaliyeed
siiya mudnaanta koowaad.
SCG waxey talo ku soo jeedineysaa in
barnaamijka dowladda uu noqdo mid shaqsi walba oo soomaali ah uu heli karo,
si xisaabtanku u noqdo mid loo wada jeedo. Sidoo kale xildhibaanada marka ay
doodayaan waa inay si cilmiyeysan oo sharciga waafaqsan u fuliyaan howlaha
horyaalla, ogaadana aragtiyaha lagu kala duwan yahay waa faa’iidada
horumarka. Xildhibaanadu waa iney la yimaadaan firfircooni dheeraad ah oo ay
danta guud ka horumariyaan danta gaarka ah. Dhamaan xildhibaanada waa in
tababarro joogta ah loo fidiyaa si habsami u socodka howlahoodu uu ugu
fududaado.
SCG waxey jeclaan laheyd dowladda iyo
baarlamaanka oo waddanka gudihiisa taga sida ugu dhaqsiyaha badan iyagoo
gacmaha iswada heysta. Sidoo kale waa inaad Somalida dibedda joogta aad ka
codsataan inay waddanka dib u dhiskiisa iyo horumarkiisa ay kaalintooda uga
aadan ka qaataan. Sidoo kale shacabka soomaaliyeed ee gudaha jooga waa inaad
si dhab ah oo kal iyo laab ah ula hadashaan una caddeysaan inaad iyaga u
shaqeyneysaan, kana codsataan wada shaqeyn dhab ah. Waxaan aaminsanahay in
shacabka soomaaliyeed meel walba oo ay joogaan ay kaalin firfircoon ka
qaadan karaan dib u heshiisiinta iyo dib u dhiska waddanka.
Mudanayaal, waxaan idiin rajeyneynaa inaad
xilkiina u gudataan si dhab ah oo aad fulisaan dhaarta aad u dhaarateen
xilka. SCG waxey idiin rajeyneysaa in EEBBE idinku garab galo howshiina,
ogaadana waxaan ugu horreynaa hay’adaha ama shaqsiyaadka idin la xisaabtami
doono.
Mahadsanidiin
Abdirahman Omar Osman (Eng. Yarisow)
Chairperson of Somali Concern Group
somali@somaliconcern.org
Faafin: SomaliTalk.com | Dec 25, 2004
Somali
Concern Group (SCG) waxey soo dhoweyneysaa dhameystirka
shirka Somalida oo muddo labo sano ah ka socday waddanka Kenya iyo
doorashadii bisha 10 keedii lagu doortay madaxweynaha..
Guji
Kulaabo bogga www.SomaliTalk.com
|